Romə 6

Mar wə hay' kwa bro', ke kə i zə Kris

1Namba də in ma su? Namba də kofo kə gi kwa mə bro' kədan ɓay Ifray nə də ke wa mba ɓayrum su? 2Cu ndəna' mi! Namba mar wə hay' kwa mə bro' si, namba gak ta du kwa mə bro' kərem su? 3Hi cu we i kə ri məni namba ve baptem kədan namba ɓa ɗaw kə Zezu Kris, namba ɓa ɗaw kə rum wə du mar um wə du baptem rum nə mi su? 4Zə rum, kəri məni namba ve baptem, namba mar kə rum ɓay sôwâ mo' mba kə rum ta', ɓay ce' ndə məni Bəba par Kris mbə mar kə gbəgboŋ um, ndəna' ta' mum də mba ne nyî mə mbrewe#Kol 2.12. 5Namba la' ɓa ɗaw kə rum kəri məni namba də mar ce' ndə məni mum mar nə si, ndəna' ta', namba də ɓa ɗaw kə rum kəri məni Ifray də mba ra' mbə mar ce' ndə məni mum par Zezu mbə mara. 6Mə we dan məni nə kə ɓayrumu: Kpak tu məni namba ke kə ndi ɓa' si nə mar kə Kris wa gu, kədan gbəgboŋ kpak tu mba mə bro' nə ɗənok, ɓay kədan namba cu də ke bek kwa mə bro' za' mi. 7Zə swə məni mar si faŋ swə mə njeŋ, kwa mə bro' cu kə gbəgboŋ wa rum mi. 8Namba la' mar kə Kris si, namba ve i namba də ke kə nyî kə rum ta'a. 9Namba we si: Daka kəri məni Ifray par Kris mbə mar, mum cu də mar kərem za' mi. Mar cu kə gbəgboŋ wa rum za' mi. 10Kəri məni mum mar, mum mar wə hay' kwa mə bro' sem ɗaw sar də hâ, ama nyî um məni mum kə ndi nə, mum kə ndi zə Ifraya. 11Ndəna' kə hi ta', i kar tu ri ce' ndə mar wə hay' kwa mə bro', ɓay i kar tu ri ce' ndə hi kə i zə Ifray wə du ɓa mi kə Zezu Kris.

12Kwa mə bro' cu gak suk gbəgboŋ wə tu ri məni wə mar, kədan mum mi gi ta zə kwa səna' tu ri za' mi. 13I ar kwa tu ri cem cem gi kwa mə bro' ce' ndə kwa sin məni wə gi sin mə bro' mi, zawa i ne tu ri ne kə Ifray ce' ndə sôwâ məni Ifray ra' mbə mar, ɓay i ne tu ri cet ne kə Ifray ce' ndə kwa sin mə gi kwa mə njeŋe. 14Kwa mə bro' cu gak suk gbəgboŋ wa ri mi, zə hi cu ta zə dan dlay mi, ama hi wə ta zə ɓay Ifraya.

I ar tu ri ce' ndə bek zə gi kwa mə njeŋe

15Namba gak in ma su? Namba də gi kwa mə bro' zə namba cu ta zə dan dlay mi, ama zə namba wə ta zə ɓay Ifray su? Cu ndəna' mi! 16Hi we si njeŋ, kəri məni hi ar tu ri ne kə swə kədan hi ta zə rum, hi faŋ bek swə məni hi wə ta zə rumu. Hi la' wə ta zə kwa mə bro' si, hi də mara. Hi la' wə ta zə Ifray si, mum də mi gi njeŋ kor rumu. 17Ama mə gi soko ne kə Ifraya: Ɓa' si, hi ke bek kwa mə bro', ama mgbaŋ ni nə, hi wə ta zə dan mə kəzin' məni hi za' wə du kwata' Ifray kə vunduk ri daŋ'ŋ. 18Ifray siɗ ni mbə du sin mə bro', ɓay hi faŋ bek gi kwa mə njeŋe. 19Na wə in dan məni nə ce' ndə məni sumra' mə tətâ wə in, zə hi cu gak mun zu dan mə seŋ məto'o. Ɓa' si, hi ar tu ri ce' ndə bek kə gi kwa mə kə zur kə sin mə bro' kədan hi ta wə du sin mə bro' dan zuru. Ndəna' ta', mgbaŋ ni nə, i ar tu ri cet ce' ndə bek kə gi kwa mə njeŋ kədan hi ta ce' ndə məni Ifray wə wa'a. 20Kəri məni hi ke bek kwa mə bro', hi cu tle fur gi kwa mə njeŋ mi. 21Hi za' mi kə gi sin məni hi ke gi, ɓay zur wə mi gi wa rum mgbaŋ ni nə su? Ndo' vun sin rum nə mar na. 22Ama mgbaŋ ni nə, Ifray siɗ ni mbə du kwa mə bro' ɓay gi ni faŋ bek umu. Kwa məni hi wə za' han, hi wə ta ce' ndə məni Ifray gi ni faŋ njeŋ, ɓay ndo' vun rum, hi də fe nyî mə də hâ. 23Zə bal cik məni swə wə fe zə kwa mə bro' məni mum gi nə mara. Ama kwane məni Ifray ne uray ne mba wə du ɓa mba kə Bârî mba Zezu Kris nə nyî mə də hâ.

ที่ได้เลือกล่าสุด:

Romə 6: KMN

เน้นข้อความ

แบ่งปัน

เปรียบเทียบ

คัดลอก