Isaya 27
27
1Na mwi'zuwa lilyo, Muwaha Mulungu kolokwitumamila mumaje we lifwa, kwe vilungo vyakwe, kololilipiciza lilimu lyono likucemwa Lewiyatani, lizoka lyono libinzulaga, liwa kwinyongola, no kuliwulaga lizoka lyono likalaga mwi'lenga.
2Na mwi'zuwa lilyo,
u Muwaha Mulungu kololonga
zo mugunda wakwe muswanu we mizabibu, yawe kutya,
3“Nene no Muwaha Mulungu mono niwukamisaga,
kanyhi niwumwajilaga ne malenga nhondo zose.
Yo nene mono niwulindilizaga ku cilo ne misi,
ho yunji yalece kuwuhodanga.
4Hamba nghali si nawukolelwa likuwo yaye u mugunda wuwu.
Na hono gawe mogali mamivya ne mabijili,
gono gosaka gawutitilize,
ane nigalimaga niwa kuganyanya.
5Ninga nawo i walugu we wanhu wangu,
hono wasace niwadime,
yiwanojeye wamule welamule nane.
Heya mbeka, yiwanojeye sunga welamule nane.”
6Na mu vilo vivyo vyono vikuza,
i wanhu wa Isilayeli, wo lulelo lwa Yakobo,
wolocindika nha mubici,
wolosanula no kupasicila,
no kuyimemya yinze yose mikalo.
7Hambi Waisilayeli nha si watuga wulipicizwe wuwaha
nha vyono walipicizwa i walugu wawo,
ne wanhu wa Isilayeli,
hamba si wafwa wenji,
nha vyono wafwa walugu wawo.
8Langa Muwaha Mulungu,
yawalipiciziza wanhu wakwe,
mu nzila yo kuwahamya no kuwategula ku yisi yo wujenzi.
Lono yawahwajiliza no mukukunzo we mbeho nghali ya kucilima.
9Ninga wubi we Waisilayeli, wolonenelwa du,
kolo wene wakondya kugatulanjiziza lukulu i mabwe
ge vikumbicilo vye wanhu wono si wamumanyile Muwaha Mulungu,
hawe hasina kanyhi vikumbicilo vyo kufusiza wuvumba,
hamba vihwani vyo mulungu we cicekulu Ashela,
vyono vikali visigaliye.
10Woyi hee!
I magomawakali ge makaya, gaweza 'lu matongo.
Gakondya kulekwa gasina wanhu,
geza nha mbago yono yisina cinji.
Alu haweza wudimilo we zing'ombe,
zikudima no kuceha mumo.
11Sunga ne manhambi ge mibici gakunyala,
gakubeneka, ne wacekulu nawo wakutenya mumo ne zingwagu.
Hambi i wanhu nha siwakutanga yaye,
holeka nayo Mulungu u Muwumbi wawo,
si kowawonela lusungu, hamba si kowanenela yaye.
12Na mwi'zuwa lilyo, u Muwaha Mulungu kolowakongholeza wanhu wakwe yumonga yumonga nha vyono munhu kelaga wuhemba mu mawaje ku wulawa Efulata, sunga ko ku mupaka we yisi ye Misili. 13Na mwi'zuwa lilyo, ndulele yololila, yiwacemeleze Waisilayeli wose wono wali ku wuhamywe, ku yisi ya Ashuli, na ku yisi ya Misili, wose wawuye. Nawo wolowuya, wamuhembe Muwaha Mulungu mwi'tunda lyakwe lyono lyelile lya mu Yelusalemi.
Cigogo Bible © Bible Society of Tanzania, 2002.