Isaya 26
26
Mulungu kowapela wanhu wakwe wusume
1Lizuwa lyolokuza,
lono wanhu wololwimba lwimbo aluno mu yisi ya Yuda;
Likaya lyetu, lye 'kaya lye vilungo!
2Holeka 'lu digulenyi milango,
ho linjile likungugo lye ling'ani,
likungugo lyono wanhu walyo wetumaga ze mbeka.
3Gwe go Muwaha Mulungu,
kuwapelaga mulamu wono wukwilaniciye,
i wanhu wono wuhile wawo wose wuli kuli'gwe
kanyhi wakwitumbiye gwegwe.
4Mumwitumbile Muwaha Mulungu cibitilila
hambi nha yo mukamisi wetu vilo vyose.
5Nha yakondya kuwanyetya i wedunhumuzi,
ne makaya gawo gono wekalaga,
Mulungu yakondya kugongomeza,
ne majinji gayo kakondya kugatulanjiza gawa manghundi.
6Na wa walya wono wewonelwaga,
alu wakugakanyanjila mucanyha yago
wakugasambanjiza hasi ye magulu gawo.
7Gwe go Muwaha Mulungu,
kuyitelemezaga nzila ye wanhu we ling'ani,
wawa kukola mu nzila yo wuhihi.
8Ase cikutyatya zo wuhile wako,
kanyhi cikwitumbiye gwegwe,
agwe yo gwegwe mono kucikwilanicizaga
vyose vyono cikwilowa.
9Nane nikalaga nghukwihwesa gwegwe du
cilo cose kwe nhumbula yangu yose,
nagwe kolo wukuyiling'aniza yinze
hamonga ne wanhu wayo,
baho ho wolomanyila ze ling'ani yako vyono yinha.
10Hamba yiwe agwe wuli lusungu kuli wanhu wabi,
ninga wene hamba si wamanyaga yaye ku wituma ze ling'ani.
Hamba wawe luno,
wali mu yisi ye wanhu we ling'ani,
ninga wene vyo wakali kwituma zo wubi,
hamba si wakusacila lukulu kuzimanya zo wuwaha wako.
11Ne walugu wako nawo,
hamba si wakumanya yaye nha vyono kowalipiciza.
Gwe go Muwaha Mulungu,
wuwakozaje cevu,
wuwalece wenjile mu magayo go
wulipicizwe wono wuwawikanizize.
Ninga 'gwe, wuwalajile zo wendo wako kuli wanhu wako.
12Gwe go Muwaha Mulungu,
kocimotya mu milimo yetu yose,
hambi nha yo soko ye metumo gako.
13Gwe go Muwaha Mulungu, go Mulungu wetu,
nha cali citemigwe ne wanhu wanji,
ninga agwe yo gwegwe du wuli wene,
yo wuli Muwaha Mulungu wetu.
14Ninga 'lu wawo wose wakondya kufwa,
hamba si wowumipa kanyhi
myuhe yawo hamba si yozuka yaye,
hambi agwe nha wakondya kuwalipiciza
no kuwongomezeza lukulu.
Hasina kanyhi hamba yunji mono kowakumbucila.
15Gwe go Muwaha Mulungu, walinjifya likungugo lyetu,
wayigazimhya ne mipaka ye yisi yetu mbavu zose,
ne nghani yiyi yo yikupelile lilumbo yiwaha.
16Gwe go Muwaha Mulungu,
wawalipiciza wanhu wako
nawo wakahidimbala kukulomba ko
wusungu wuwaha muno.
17Gwe go Muwaha Mulungu wacilizya muno,
nha vyono kalilaga ko wusungu mucekulu mono yali
mu nghunga yo lusawo.
18Nase cali cili mu wusungu,
cali cili mu nghunga yo lusawo,
ninga hamba kulela cinji co cose.
Cali cisina vilungo vyo kusumila mu yisi yetu
holeka hamba si ciketuma cinji co cose.
19Ninga wanhu wa muli wanhu wetu wono wafwa,
awo langa wolozuka kanyhi!
Ne miwili yawo yilawumipa kanyhi.
Na wose wono wagonile mu vitenjelo,
wolokwinuka wawe kwimba na nyemo.
Hambi Muwaha Mulugu nha kolowazukula
wose wono wafwa katali,
wowa nha buhe yono yiyisangalazaga yisi.
Wuling'anizwe no wuzuce
20Nye nyo wanhu wangu,
alu mwinjile mu zikaya zenyu, mwidindile mumo.
Mwihundice mumo cidaha, sunga likuwo lyo Mulungu lipulute.
21Hambi Muwaha Mulungu
nha yakuza yakulawa ku wulanga ku wikalo wakwe,
ho yawalipicize wanhu we yinze ku soko yo wubi wawo.
No wuwulaji wose wono wetumwaga cinyele mono'nze,
wose wololajilwa cagalanze.
Ne yinze nayo,
hamba si yolowahundika yaye wose wono wawulagwa.
Cigogo Bible © Bible Society of Tanzania, 2002.