Isaya 24
24
Muwaha Mulungu koloyilipiciza yinze
1Muwaha Mulungu koloyihodanga yinze no kuyileka yili bwete.
Koloyipitula yinze no kuweyagaza wanhu wayo.
2Ne wanhu wose wolokwiyagazwa,
i wakohani hamonga ne wanhu.
Watumwa, hamonga ne wawaha wawo.
Wono wakugula, hamonga na wono wakuguza.
Wono wakwazima, hamonga na wono wakuwazima.
Iwagoli, hamonga ne waciwa.
3Yinze yolokwiyagazwa no kongomezwa.
Muwaha Mulungu yo yalonjile, na vyo zowa zinha.
4Yinze yikukalala no kunyala,
ne yinze yose yikutimba,
yinze hamonga no wulanga, vyose vikusakala.
5Ne wanhu wakondya kuyavufya yinze,
so wubena malajilizo go Mulungu,
no kudelengula cilagane cono yacinoza, ho cikale cibitilila.
6Holeka nayo Mulungu yayilijita yinze.
Ne wanhu nhondo wakulipicizizwa mu metumo gawo weneco.
Na muli wawo, wacefu du wono wasigala womi.
7Ne migunda ye mizabibu yeza kunyala,
ne divayi nayo yikuwa nyhefu.
Ne wanhu wose wono wali wasangalaye alu wasina nyemo kanyhi.
8Ne lizi lye nyemo lyanyamala no wuvina we zindonondo wawuka,
nawo wutowe we zing'oma, alu waduma.
9Nalu, hawa hasina kanyhi wimbe wo wusangalale ku soko ye divayi,
hasina hamba munhu monga
mono yakuyisangalalila divayi muzinzi wayo.
10Na mwi'kaya namo, mweza mumemile wuwulaji,
sunga ne wanhu weza kwidindila mu zikaya zawo ho weponye.
11Ne wanhu nawo wakulila mu zinzila,
vyono heza hasina kanyhi divayi.
Ne nyemo yawo yawucila lukulu,
no wusangalale wakondya kuwuswa mu'si.
12Ne likaya lyasigala matongo du,
ne milango yayo yakondya kubenanjizwa.
13Na zizi zo zoyijelela yinze yose mu zinghungugo zose.
Yokwihwana no mudumo we nhwanga,
lono mizeyituni yakondya kukong'onhwa mu mibici yayo,
no kuhalaliza zabibu zose mu mizabibu yayo.
14Nawo wono walasigala,
wolowa kwimba ko wusangalale.
Na wono wolowa wekaye ku lubavu lwa kumwezi,
wologanula zo wuwaha wo Muwaha Mulungu vyono winha,
15nawo wono wekaye ku lubavu lwa kucilima,
wolomukumya mwene.
Nawo i wanhu wono wekaye mu mwalambalo we lilenga,
wolomukumya Muwaha Mulungu, u Mulungu wa Isilayeli.
16Nawo we ma'si go kutali mono'nze,
wolozihulika zinyimbo zo kumukumya Isilayeli,
nghungugo ye ling'ani.
Ninga hamba nhavivyo, ane nha sina witumbilo!
Nghuganda!
Nawo i wagaluci vyo wakucila kungaluka du,
no wukonji wawo wukucila kuwa wubi muno muno.
17Alu muhulicizaje ta anye wose!
Howuli wogofywe ne makweme,
hamonga ne mitego vikumulindilenyi nyenye.
18No munhu wo wose mono kolojela kwiponya mu wogofywe,
kologwila mwi'kweme.
No munhu wo wose mono kolojela kwiponya mwi'kweme,
kolokwibatwa no mutego.
Ne malenga menji ge mvula,
golotonya ku wulawa ku wulanga.
Ne misinji ye yinze yolosinjisika.
19Yinze yolopanduka no kubenanjika hamonga no kudemuka yiwe mwazi.
20Ne yinze yoloyumba-yumba nho mugalo 'jimbi
no kupemheluswa nha cibanda mu mbeho yo mukukunzo.
Nayo yinze yikuvunwa no wubi wayo,
na mwi'zuwa linji yologwa hasi,
hamba si yolokwinucila lukulu kanyhi.
21Nalyo lizuwa likuza,
lono Muwaha Mulungu kolowalipiciza mapuga ge wawaha,
gono gali kucanyha,
hamonga ne watemi we yinze wono wali mono'nze.
22Mulungu kolowakonghola hamonga watemi wose
nha wafungwa wono wali mwi'kweme.
Kolowadindila mu jela wekale mumo,
sunga lizuwa lyawo lyo wulipicizwe lize lifice.
23Nawo mwezi wolotukuwala,
ne lizuwa nalyo hamba si lyolowalika yaye.
Hambi u Muwaha Mulungu we mihanga,
nha kolowa yo mutemi.
Nayo kolotema mu Yelusalemi,
mwi'tunda lya Sayuni,
ne walongola wose we wanhu,
wololuwona lukumyo lwakwe.
Cigogo Bible © Bible Society of Tanzania, 2002.