Isaya 23
23
Nghani yo Mulungu kuli Tulo na Sidoni
1Ayi yo nghani yo Mulungu kuli Tulo.
Ale, mulile ko wusungu,
anye nyo wajendela mu zingalawa mwi'lenga!
Hambi i hanhu ha wuficilo we zingalawa zenyu ku Tulo,
nha hakondya kongomezwa.
I makaya gayo, hamonga ne hanhu ho wuficilo we zingalawa,
mose gawa matongo du.
Nagwe zingalawa zako kolo zakondya kuwuya ku wulawa Kupulo,
ale, komanyizwa.
2Alu mulile'nye nyo wasuluza wa ku Sidoni!
Hambi nha mwali muzoweye kutuma,
3wanhu wakulowoka lilenga wakagule
no kuguza wuhemba wono wukulimwa ku Misili,
no kunoza wusuluza ne wanhu we zinghungugo zose.
4Gwegwe 'gwe 'kaya lya Sidoni, alu wakozwa cevu!
Hambi lilenga, ne ligomawakali lye lilenga liwaha,
nha lyo lilonjile likutya, “Ane nha nghali natuga,
hamba kuwilusa i wana we cilume hamba we cicekulu.”
5Sunga ne Wamisili wose wotinuka,
kanyhi wokogofywa muno muno,
kolo wakuhulika vyono Tulo yakondya kongomezwa.
6Holeka nanye nyo wanhu wa Foyinike,
mulile ko wusungu wuwaha!
Mutizize ku Sipaniya!
7Alu mbeka lili lyowa lyo likaya lya Tulo lyono lyali lisangalaye,
lyono lyazengwa katali muno?
Alu mwene, lilino mbeka lyo likaya
lyono lyawategulaga wahamizi ku nhumbi ye lilenga ho wakebate zisi?
8Alu mwene yo munhuci mono yazihwesa
ho yazilete zono zinha zizi mwi'kaya lya Tulo,
mwi'kaya lili liswanu muno.
Tulo, lyono ne wakwawi walyo,
wali wo watemi wono wali wo wanhu
wono wena lilumbo liwaha muno mono'nze yiyi?
9Ninga wumanye, vyono yo Muwaha Mulungu du we mihanga,
yo yaziwika zizi.
Yaziwika ho yawawusize lukulu cibede cawo wanhu wa Tulo,
cibede cono cali ciwatumvizye,
kanyhi ho yawanyetye ne wanhu wawo we lilumbo.
10Ale, mubite mukayilime yisi,
anye nyo wanhu wose
mono ma'si genyu gali hasi yo wutemi wa Sipaniya!
Kanyhi howa hasina
hamba munhu monga mono kosuma kumucitilenyi yaye.
11Nayo Muwaha Mulungu,
yawugoloye muwoko wakwe mwi'lenga,
ho yagongomezeze mwi'lenga matemi gose.
Kanyhi yakondya kulajiliza nha vyono,
magomawakli gose ga mu Kanani, gongomezezwe lukulu.
12Alu 'gwe, 'gwe 'kaya lya Sidoni,
i nyemo yako nhondo yakondya kuduma,
ne wanhu wako wakwiwonelwa.
Hamba watizize ku Kupulo, ninga si wopona yaye.
13(Nawo wanhu wa Babiloni wo wagenjiza malimu ga mu mbago ho gayihodanje yisi ya Tulo, ninga si wali wanhu wa Ashuli yaye, wali wawo wanhu wa Babiloni wo walipilima likaya lya Tulo, wakagamwagulanga ne magomawakali gayo, wakalileka likaya lyawa yitongo.)
14Nanye nyo wajendela mwi'lenga,
mulile ko wusungu wuwaha!
Hambi likaya lyono mwali mulitumbiye,
nha lyakondya kongomezwa.
15Ne vilo vyokuza, vyono Tulo yolowa yisemigwe, sunga yipulute myaka makumi mupunghati ye vilo vyo wutemi wo mutemi monga. Na kolo myaka yiyo yapuluta, nayo Tulo, nhondo ho yolowa nho lwimbo lo musenyha.
16Ale, lu, wusole lisumbi, wupilime ku zikaya,
agwe go muciwa mono wusemigwe!
Wuvine, no kwimba ne zinyimbo zako,
wuwagomole kanyhi wanhu kamonga.
17Nayo myaka yiyo makumi mupunghati kolo yapuluta, nayo Muwaha Mulungu ho koloyileka kanyhi Tulo, yijendelele no wusuluza wayo we katali. Nayo yolokwiyedya yeneco mu matemi gose ga mono'nze yose. 18Ne sawo yose yono kowa kuyituga mumo mu wusuluza wakwe, yowa kulavywa kuli Muwaha Mulungu. Ninga yene si yolokwiwicila ciwutwa yaye. Langa sawo yiyo, yolokwitumamilwa ne wanhu wono wolowa kumuhemba du Muwaha Mulungu, wolowa kugula ndigwa hamonga ne vivwalo vyono wanjiye.
Cigogo Bible © Bible Society of Tanzania, 2002.