Isaya 13
13
Mulungu koloyilipiciza Babiloni
1Nazo azino, zo nghani za Babiloni,
zono Isaya yazibocela kulawa kuli Mulungu.
2Ale, mutumbice bendela yo wulugu,
mucanyha ye litunda lyono si licindice mibici!
Muwaceme wasilikale mwinuye muno mazi genyu,
akuno mukuwayunziza miwoko yenyu,
ciwe co citanjilo cenyu,
co kuwalonjela nha vyono wagahome malango ge likaya lidunhumuzi.
3Muwaha Mulungu kawalajiliza wanhu
wono wayisangalalilaga nhojo yakwe,
i wanhu we vilungo, ho wawahome,
no kuwalipiciza wawo wono yawakoleywe likuwo.
4Ale, hulicizenyi ta i mazozo ge lipuga liwaha lye wanhu,
wono wehangulize mu matunda,
go mazi ge makungugo,
hamonga ne matemi gawo.
Muwaha Mulungu u muwaha we milewo,
yakuwikaniza mapuga gakwe ge wasilikale so milewo.
5Wakulawilila mu ma'si go kutali ku mhelo ye yinze.
Nayo Muwaha Mulungu kokuza yayongomezeze yisi yose mwi'kuwo lyakwe.
6Mulile muno!
Hambi lizuwa lyo Muwaha Mulungu nha lyasejelela,
lizuwa lyono u Mulungu Mudaha vyose,
koleta wongomezwe.
7Holeka miwoko yose yotimba,
ne mitima ye wanhu wose yozizima.
8Ne wanhu wose wolokogofywa,
no kwibatwa no wusungu,
nha wo mucekulu lono yali mu nghunga yo lusawo.
Kanyhi wowa kwilanga weneco wose ko woga wuwaha muno.
No wusu wawo wolowa wukununghaye so cevu.
9Lizuwa lyo Muwaha Mulungu likuza,
lizuwa lyo wukali we likuwo lyakwe.
Mwi'zuwa lilyo, yinze yolonozwa yiwe mbago,
no kuwongomeza wanyo wubi wose.
10Nazo zinyelezi hamonga ne vibuto vye zinyelezi,
si zolong'alala yaye.
Nalyo lizuwa lyolotukuwala kolo lyeza kusosomoka,
no mwezi nawo hamba si wolosana ng'o.
11Muwaha Mulungu yakutya,
“Ane nololeta wongomele mono yinze,
nolowalipiciza ne wanhu wabi wose,
ku soko yo wubi wawo.
Nolowanyetya wose i wewoni,
nolowalipiciza wose i wedunhumuzi, ne wakali.
12Nawo wono walasigala wolowa wacefu si nhe zahabu.
13Nane mwi'zuwa lilyo nolowucicimya wulanga ne yinze,
nayo yolosinjisika yiwuce hanhu hayo,
lono ane no Muwaha Mulungu nghulilajila likuwo lyangu.
14“I wajenzi wono wekaye ku Babiloni,
wolomangha watizize ku zi'si zawo,
hambi nha wolowa weyagaye nhe zinhemanyika
zono zikutiza ho ziponye mu miwoko ye wapelembi.
Kanyhi nha kotya ngholo zono zisina mudimi.
15No munhu wo wose mono kolokwibatwa, kolowulagwa.
16Na kolo wakwijela vyono wasina wutazi wo wose,
hodu i wana wawo wagalika,
wolowa kutowezwa-towezwa sunga wafwe,
zikaya zawo zolosolwa,
ne wagolece zawo wolowa kwibatwa kwe vilungo.”
17Muwaha Mulungu yakutya,
“Nawasagahiza likuwo Wamedi,
wabite wakayihome Babiloni.
Kanyhi wene hamba si wolosaka fweza hamba zahabu yaye.
18Nawo wolowawulaga i wazelelo wawo ko wupinde ne zisonga zawo.
Hamba si wolowawonela lusungu yaye i wagalika hamba wana wadodo.
19Heya, Babiloni, mbeka wo wutemi wuswanu muno,
kanyhi wulawiliciye mu matemi gose.
Nawo kanyhi wilumbilaga muli wanhu wayo.
Ninga ane no Muwaha Mulungu,
nowongomeza nha vyono nayongomeza Sodoma na Gomola!
20Kanyhi holowa hasina munhu hamba monga,
mono kolokwikala mumo.
Hamba ne Walabu i wayeji-yeji,
si wolokoma mahema gawo mumo yaye.
Hamba ne wadimi si wolodimila mumo kanyhi mitugo zawo.
21Holowa heza hanhu hono malimu ga mu nyika golowa kwikala mumo.
Holowa hanhu hono matuwi gowa kuzenga manhuli gago mumo.
Ne nyacihema zolowa kwikala mumo,
ne zimhene za mu mbago nazo zolowa kwidawala mu matongo.
22Nayo minala, hamonga ne makaya go wutemi,
golowa kubocelela mazi ge vililo vye zimbisi hamonga ne macewe.”
“Holeka cidaha co kuyongomeza Babiloni cakondya kuza!
Ne vilo vyawo vyeza malika.”
Cigogo Bible © Bible Society of Tanzania, 2002.