Isaya 11
11
Wutemi wo Mulamu
1U wityatye we ndelo ye citemi mu mhuga ya Dawudi,
wihwanile no mubici wono wadumulwa,
ninga lisina lyayo, likutula kanyhi manhambi ganji.
Holeka mutemi mupya kololelwa muli wawo i wana wa Dawudi.
2Nayo muhe wo Muwaha Mulungu kolomupela mahala,
hamonga no wizuce no wunghula
wo kuwatemela wanhu wakwe.
Nayo kolowumanya wuhile wo Muwaha Mulungu
kanyhi kowa ne cogopo kuli mwene.
3Nayo kowona wendezwe muno mu cihuliko ca muli mwene.
Hamba no wuling'anizi wakwe,
sikoling'aniza so zinghani zono kolowona ne meso,
hamba zono kolohulika kwe makutu gakwe.
4Langa kolowaling'aniza wasocele ko wiling'ano,
no kulamula nghani yo muciwa kwe ling'ani.
Nawo wanhu wolowa kulipicizizwa mu wulajilize wakwe,
ne wanhu wetuma zimbi wolowulagwa.
5No wiling'ano wolowa musipi wa mu ciwino cakwe,
no wihuwilwa wo musipi wo kwiwopela.
6Nago maminzi ne zingholo,
vyolokwikalana hamonga ko mulamu,
nago masuwi, golowa gagonile hamonga ne zinyana ze zimhene,
nazo zindama ne mana ge simba, zolodima hamonga.
Ne wana wadodo, wo wolowa wakuzidima.
7Zing'ombe nazo, ne madubu, zolodima hamonga,
nazo zinyehe ne mana ge dubu,
zolowa zikugona hamonga ko mulamu.
Nazo simba zololya mahanze nha ng'ombe.
8Hamba mwana mugalika,
yedawale behi ne lizoka, lyono lina sumu nghali,
ninga si lyolomuluma yaye.
9Na mwi'tunda lyo Mulungu lyono lyelile lya Sayuni,
molowa musina citamisi co cose hamba cibi co cose.
Hambi yisi nha yolomema wumanye wo Muwaha Mulungu
nha vyono lilenga limemile malenga kose.
I wanhu wono wahamywa wolowuya
10Ne lizuwa lyolokuza, lono mutemi mupya, mono kololawa mu wityatye we mhuga ye citemi ya Dawudi, kolowa citanjilo kuli makungugo. Makungugo golokwihanguliziza hamonga kwi'kaya lyakwe lyo wutemi, no kumupela lilumbo. 11Na yolowa mwizuwa lilyo, U Muwaha Mulungu kolokwitumamila kanyhi vilungo vyakwe, yawagomole wanhu wakwe wono wowa wakali wasigaye ku Ashuli, na ku Misili, na ku Patilosi, na ku Kushi, na ku Elamu, na ku Sinali, na ku Hamati, ne zi'si zose za ku zimhwani.
12Muwaha Mulungu kolowenulila bendela makungugo,
ho yagalajile nha vyono, aluno nhondo,
yeza kuwakongholeza kanyhi hamonga,
i wanhu wa Isilayeli na Yuda,
wono wali weyagaye ako na ako,
yawagomole ku wulawa ku zimhelo ze yinze zose vyono yine.
13No wutemi we Waisilayeli si wolowuwonela wivu
kanyhi u wutemi wa Yuda.
No wutemi wa Yuda nawo si wolowa mulugu
kanyhi wo wutemi wa Isilayeli.
14Langa wene wolokwilunza hamonga,
wabite wakayihome yisi ye Wafilisiti wa ku lubavu lwa kumwezi,
wawatece ne wanhu wono wekaye ku cilima.
Kanyhi wolowasuma i wanhu wa ku Edomu, na Mowabu.
Nawo i wanhu wono wekaye mu yisi ya Amoni,
wolowa wena cihuliko kuli wene.
15Nayo Muwaha Mulungu,
kololinyaza lilenga lya Shamu,
kololeta mbeho yono yili moto,
yalinyaze likolongo lya Efulata,
ninga kololeka vikolongo vidodo-dodo vili mupunghati,
munhu wo wose ho yasume kulowoka hakavu.
16Kanyhi holowa na nzila mbaha yono yilawiliye ku Ashuli,
yono wolowa kukola i wanhu wakwe Waisilayeli
wono wolowa wakali wasigaye kuko ku Misili.
Nha vyono yali yinha, lono i walezi wawo wawucila ku Misili.
Cigogo Bible © Bible Society of Tanzania, 2002.