Mika 6
6
Ku Tamatama wakukusu ki swa Iseraylri
1Kunumi kilalra! Ku Tamatama wakukususu ki swa Iseraylri.
Tamatama! Ngidrakala si putaluvaivai ku sakukusuanesu, lani kilalalra kai lamadrau ka lregelrege si latikiane ka lregelrege!
2Lalregelrege, palralrawthu ka tangadrane ki kadaengane ka lrenege! Kilalalra ku takukusuane ki Tamatama! Ku Tamatama lri kukusu ki kawkawluini, lri kukusu ki swa Iseraylri.
3Ku Tamatama amia kikai, “Lakawkawluli yakai ku pasalriuli numiane? Waupungunga naku numiane? Iya pakaelre ku nau iya numi! 4Twaladhaku Izipiti malra iluku numiane, si palribulu numiane patwalai ki taaduriane numi. Siakawlaku ki Musi, Arungu si Miriame ililuku numiane. 5Lakawkawluli, ngulringava sa kisanu tulisi ku talialalai ki swa Muabe ka Balake si tatubalreane iniane ki lalake ki Biure ka Balame; ngulringava ku tangimiane sa ikadalrananeta twalai Sitime mwa Gilegale. Lu ngulrialringau numi kikai patuelre, lri thingale numi ku piali ala ka pakai ku apalribulane numiane.”
Urikai ki Tamatama
6Yakai ku umawmase ku kiavaga, “Lri ilukai naku ku manemane ku saceacebe si kainganai kikawriva ki Tamatama? Lri tungitwatumanai naku kainganai sukubu ki yabelenge ka Twaumase? Lri ilukaku ku mathaithaariringa ku lrulai ku lwange si tu Lama ka lrisi patarumara baai iniane? 7Ku Tamatama lri kadalamaini lu patarumaraku ku wadaruru ki kudrulu kudrai ku sawvalai ku kiu, ka maru vaalrunga kai kadrekadrekare ku lawlau? Lri kiragadhaini lu patarumaraku ku takataakanga ka lalake ka sawvalai tusalangadhane supilri ki pasalrivane?”
8Yakawmasane ka umawmase, ku Tamatama peaelaelaanga mitane lukamanemane ku mathariri. Ku urikaini mitane yai: Apathingalanane ku madringelrese, si pia ku kai maelaela ku sakialibake, la ngitatualebe pasalaladha ki Twaumaseta.
9Ku mwasakene mukuludru ki Tamatama yai malrigili. Ku Tamatama papia ki cekele ki laumawmase iya kai, “Yaelrelre ikai ki cekele ka laumawmase, kilalra! 10Ku tacekecekelane ikai ki latavanane ki manganga ka umawmase yai niara lrilrigilane malra. Kwi lalasu arakai ku makakaela ku tintingi si bungubungu, kikai yai kalraseli turamuru. 11Lri tumanaku pacepe ku arakai ku makakaela ku tintingi si lekete ku umawmase? 12Ikai kai ki cekele ku sapaiswane ku umawmase wasulape ki matiakukuru ka umawmase, ku yakai kwini ku laumawmase yadreepele ka taralrilrigili. 13Ngwalai ki tapasalrisalrivane numi, pathagilinga naku lrumai numiane, lai lri kipakilringau numi kadula. 14Lri kane numi. Ai kai numi lri kabucuku, lrika takalaipane kwi barange numi. Lri ravase numi ku lamanemane, ai kai numi lri maka ngipapikai; asi lwiyane pangwa ribici numi malra, lri arakaiyaku ku amakakaruburane amudu. 15Lri eape numi, ai kai numi lri maka kitaleke; lri pe numi ku ulrive tulawlau, ai lrika kadrwa ku arakaiyane numi; lri tubava numi, ai lri kai numi maka kisupilri. 16Twalralrau numi ku takangangane ki talialalai ka Umeri si lalakeini ka Ahabe, si pacungulu ku tarathudane lini ngukunkwane. Lakamani lri paaruturamuraku numiane; ku palrapalra lri tudreadrekase numiane, si tusinalreme numiane.”
ที่ได้เลือกล่าสุด:
Mika 6: NDV
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© The Bible Society in Taiwan, 2017
All rights reserved
© 臺灣聖經公會版權所有，2017