Amuse 9
9
Tasaibangane ki Tamatama
1Wadrelaku ki Tamatama acegecege ikai thili ki tapatarumaramarane; la iya kai, “Lri pangulraku ki bulri ki daane ki Twaumase, lani mulebe patueelre ku daane, la cwake ku awlru ki sanaka umawmase. Lri arakaiyaku ku lrabu papacai ki tedrane ka laumawmase, kadrwa ku natangeeanga ku lri kilragau, laka kadrwa ku natangeeanga ku lri mubere. 2Kwi lalasu adravane lruku ngwadriadringi, la daruru swadriadringi, lri mialriaku malra liniane putaluvaivai! Kwi lalasu adravane kapa papubebelenge, lri mialriaku malra bilibili liniane pulebe! 3Kwi lalasu adravane mubere mubelenge ki lregelrege Karemele, lri mialriaku katwase silape, si kidringai liniane! Kwi lalasu adravane kilepenge ikai lebe ki laveke, lri mialriaku dawlu ki maelaelane ka waudriwdripi ikai laveke si kane liniane! 4Kwi lalasu adravane ka kiaravasenga, lri mialriaku dawlu ki badha si papacai liniane! Malrithethenga naku kalri amudu liniane, si kai paralubu liniane.”
5Ku abebeelengenga ka Tamatama ka abebeelengenga ki sanaka kwapingi sana tapidrungu ki kadaengane,
kai kadaengane lri ngiderenau;
kai yakai ki kadaengane kai laumawmase lai lri tubi karaleale makanaelre,
kai kadaengane mia ki kadravane Nile lu bawbau si aru theredre.
6Ku Tamatama yakai subelebelenge tudaane ku taikaikaiyane,
arakai subelebelenge kabungu kawmasane.
Ku Twaumase wadrekase ki laveke,
si gugu pikai ki kadaengane.
Lri kipasi Tamatama!
7Ku Tamatama amia kai, “Swa Iseraylri, makalithaku ki swa Kuse, mia lu kakalithaku numiane. Waililukaku ki swa Pelisitine katwase Kerete, la ililukaku ki swa Siria katwase Kire, mararaamau sa patwaladhaku Izipiti ililuku numiane katwase. 8Kwaku ka abebeelengenga ka Tamatama walengethaku drele kikai maadrau ku pasalrivane ka swa Iseraylri. Lri patwaladhaku kai ki kadaengane mwalrathe liniane, ai kainaku lri amudu makanaelre ki mwabaibalrithi ki Yakubu.
9“Lri drekasaku malra ki swa Iseraylri pwa ki balraku, si sara ikai ki lakuni kudra ki ngialisiane la malra cilri patueelre. 10Ikai ki kawkawluli, kudra la pasalrisalriu ku umawmase ku amia kai, ‘Ku akwalriane kai lri mwa mitane’. Lri pacai makanaelre ikai ki lrabu.”
Ngiradhekanane ki swa Iseraylri
11Ku Tamatama amia kai, “Lri ikai ku minakavalane, lri tupelaku tucekele kudra masuburunga ka cekele ki Davidi. Lri pudriadringadhaku ku raedre ki cekele; lri tupelaku, si pangimiya kunadruma, 12ku swa Iseraylri lani dulru kikaruburu kudra ki waudripi ki swa Idume, la sawlri kudra kiamalra ku kadaenganeli.” Kikai vaga taiyane ki Tamatama ka amani ku lri pangimia kikai patueelre.
13Ku Tamatama amia kai:
Kwini vai lri padaalrunga si kela,
ku akadravane ki lataleke, kai lri maka kisaswarawnga kitaleke;
lu kalremenga ku budu, kai lri maka kisaswarawnga tubava.
Ku maadrau ku lregelrege lri atuturu mwaludru ku mathariri ku bava, si lri lribate ki lalrelrelrege.
14Lri ililukaku ki kawkawluli ka swa Iseraylri siwlri mwa ki nacekele lini;
kwi lalasu lri tupela tucekele kudra maburukunga ku cekele,
si lrika palralrawthunga ikai kwini;
kwi lalasu lri tupela kaungu tuumawma ku babudwane,
lai lri ungulu ku tubava lini;
kwi lalasu lri tupela tuivaivai,
si kane ku lamadru.
15Lri malraku ki kawkawluli si lredreke pikai ki patarumarali baai liniane ka kadaengane;
kwi lalasu kai lri kiakucunga patalabalace lutumane.
Ku Tamatama ka Twaumase numi amia kikai pelaela.
ที่ได้เลือกล่าสุด:
Amuse 9: NDV
เน้นข้อความ
คัดลอก
เปรียบเทียบ
แบ่งปัน
ต้องการเน้นข้อความที่บันทึกไว้ตลอดทั้งอุปกรณ์ของคุณหรือไม่? ลงทะเบียน หรือลงชื่อเข้าใช้
© The Bible Society in Taiwan, 2017
All rights reserved
© 臺灣聖經公會版權所有，2017