ข้อพระคัมภีร์ยอดนิยมจาก ရ︀ေႃမ︀ 1

แบ่งปัน

ၵ︀ၢဝ်ႈၵ︀ၢမ︀်းꩫ︀ီႈယ︀ႃႇ တ︀ၢင︀်းဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ၸ︀ူႛယ︀ုမ︀်ယ︀မ︀်ႈလ︀ုက︀်ႉၸ︀ꩫ︀်းက︀ျူးမ︀ႆ︀ႛက︀ူဝ်ꩬ︀ီ ဢ︀ꩫ︀်ႈက︀ျူးမ︀ဝ်ꩡ︀ႂ်ႈꩫ︀ႆ︀ႇၵ︀ဝ်တ︀င︀်းလ︀ုင︀်မ︀ႆ︀ႛ ၵ︀ေꩬ︀ေꩭႂ်ႛꩫ︀မ︀်ꩫ︀ꩫ︀ႆ︀ႇ က︀ဝ်ႈဢ︀က︀မ︀်ထက︀်ꩰꩫ︀မ︀်။

ၵ︀ၢဝ်ႈၵ︀ၢမ︀်းꩫ︀ီႈꩫ︀ႆ︀ႇယ︀ႃႇ “က︀ူဝ်ႇဢ︀ꩫ︀်ႈꩬ︀ိုဝ်ႈတ︀ူဝ်ꩫ︀ႆ︀ႇ ဢ︀ဝ်ႈတ︀ၢင︀်းယ︀ုမ︀်ယ︀မ︀်ႈ တ︀ီꩫ︀ိပ︀်ꩫ︀မ︀်” ꩫ︀ꩬ︀ီက︀ျမ︀်းလ︀ိက︀်ႉမ︀ႆ︀ႛဝႃႈဝႆ︀ႇꩫ︀ႆ︀ႇꩫ︀က︀ꩫ︀်ႈ ဢ︀ဝ်ႈတ︀ၢင︀်းယ︀ုမ︀်ယ︀မ︀်ႈꩫ︀ၢႆ︀ႈꩬ︀ိုင︀် ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛမ︀တ︀်ႉက︀ူꩫ︀်းꩬ︀ိုဝ်ႈတ︀ူဝ်ꩫ︀ႆ︀ႇမ︀ႆ︀ႛ ပ︀ုတ︀်ပ︀ျႃးဝႆ︀ႇꩫ︀မ︀်။

ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛၸ︀ၢꩫ︀်ꩬ︀ၢင︀်းဝႆ︀ႇꩫ︀ႆ︀ႇၵ︀ဝ်မ︀ႆ︀ႛလ︀ႅမ︀်းꩬ︀ီ တ︀ꩫ︀်းၵ︀ူဝ်းထႃဝရ︀မ︀ꩫ︀်းꩡ︀ဝ်ႛꩫ︀ၵ︀ႃ ꩬ︀ပ︀ႃဝမ︀ꩫ︀်းꩡ︀ဝ်ႛ ဢ︀ꩫ︀်ႈ က︀ူꩫ︀်းꩭဝ်းꩭꩫ︀်မ︀ဝ်ꩫ︀ႆ︀ႛꩫ︀ႆ︀ႇၵ︀ဝ်ယ︀ႃႇ ꩡ︀ုꩫ︀်ႈꩬ︀ႃႚꩬ︀ႃႚꩬ︀ီဢ︀ူꩫ︀မ︀်။ င︀ႆ︀းꩫ︀ႆ︀ႇꩬ︀ီ ၵ︀ဝ်ယ︀ႃႇ ဢ︀ꩫ︀်ႈတ︀ီပ︀ိꩫ︀်ႇပ︀ႆ︀ ꩵ︀ႈယ︀င︀်းပ︀ိူင︀်ႈလ︀ူင︀်ယ︀ဝ်ႇ။

ၵ︀ဝ်ယ︀ႃႇ လ︀ွင︀်ႈၸ︀ြႃးပ︀ီꩫ︀်ႈꩡ︀ဝ်ႛတ︀ွင︀်းꩫ︀က︀ေႃႇ မ︀ꩫ︀်းꩡ︀ဝ်ႛမ︀ႆ︀ႛ ꩫ︀င︀်ဢ︀ꩫ︀်ႈထုက︀်ယ︀ူဝ်းယ︀ွင︀်ႛꩫ︀က︀ꩫ︀်ႈ ꩵ︀ႈယ︀ူဝ်းယ︀ွင︀်ႛ။ က︀ျေးꩡ︀ူးက︀ေႃႇꩵ︀ႈတ︀ၢင︀်။ ၵ︀ဝ်ယ︀ႃႇ ဢ︀ꩫ︀်ႈက︀ꩬ︀င︀်မ︀ဝ်ꩡ︀ႂ်ႈꩫ︀ႆ︀ႇၵ︀ဝ်ꩫ︀ႆ︀ၢႈꩬ︀ိုင︀်ၵ︀ႂ်ႈꩡ︀ႂ်ႈက︀ꩫ︀်ႈꩬ︀ီ၊ ꩡ︀ႂ်ႈၵ︀ဝ်ယ︀ႃႇ ꩫ︀မ︀်ႈꩬ︀ိင︀်တ︀ိက︀်ႉꩰက︀ꩫ︀်ႈꩫ︀မ︀်။

ၵ︀ဝ်ယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛတ︀ေႇတ︀ေႇမ︀ႆ︀ႛယ︀ႃႇ မ︀ဝ်ယ︀ုမ︀်ယ︀မ︀်ႈꩬ︀ီ ဢ︀ꩫ︀်ႈၸ︀ြႃးပ︀ီꩫ︀်ႈꩡ︀ဝ်ႛ ၸ︀ၢꩫ︀်ꩬ︀ၢင︀်းဝႆ︀ႇꩫ︀ႆ︀ႇၵ︀ဝ်မ︀ႆ︀ႛꩬ︀ိုင︀် ပ︀ႆ︀ၢႛဝႆ︀ႈက︀ꩫ︀်ႈဢ︀ူ။ ꩭီတ︀်င︀ႆ︀းꩬ︀ီၵ︀ဝ် ꩬ︀မ︀်မ︀ႃတ︀ြႃးမ︀ႆ︀ႛပ︀ႆ︀ၵ︀ွတ︀်ꩬ︀ီ ဢ︀ꩫ︀်ႈမ︀ဝ်ꩡ︀ႂ်ႈမ︀ႆ︀ႛꩬ︀ိုင︀် ꩭၢပ︀်ႉဢ︀ဝ်ႈက︀ꩫ︀်ႈဢ︀ူ။ ဢ︀ꩫ︀်ႈတ︀ေႇတ︀ေႇက︀ီး ꩡ︀ဝ်ႛဢ︀ꩫ︀်ႈက︀ူꩫ︀်းꩭဝ်း မ︀ိူဝ်ႈလ︀ႂ်ႈမ︀ိူဝ်ႈလ︀ႂ်ႈက︀ေႃႇ ထုက︀်ꩫ︀ီႈပ︀ႆ︀ၢႛဝႆ︀ႈꩫ︀ႆ︀ႇယ︀ႃႇ ၸ︀ြႃးပ︀ီꩫ︀်ႈꩡ︀ဝ်ႛ ꩡ︀ဝ်ႛၸ︀ၢꩫ︀်ꩬ︀ၢင︀်းပ︀ီꩫ︀်ႈꩡ︀ဝ်ႛ ꩫ︀မ︀်။ ꩬ︀ႃႈထု။

ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ က︀ွပ︀်ႉပ︀ိူဝ်ႈက︀ူꩫ︀်းꩫ︀ႆ︀ႇၵ︀ဝ် မ︀ꩫ︀်းꩡ︀ဝ်ႛမ︀ႆ︀ႛမ︀ဝ်က︀ူဝ်ႈယ︀မ︀်ႈင︀ႆ︀း ꩭီတ︀်ဢ︀ꩫ︀်ႈမ︀ဝ်တ︀ြႃးꩫ︀ႆ︀ႇꩬ︀ီ ဢ︀ꩫ︀်ႈꩬ︀ိုဝ်ႈꩡ︀ႂ်ႈမ︀ꩫ︀်းꩡ︀ဝ်ႛမ︀ႆ︀ႛ လ︀ၢပ︀်ႉဝႆ︀ႇꩫ︀ႆ︀ႇမ︀ႆ︀ႛ မ︀ꩫ︀်းꩡ︀ဝ်ႛၵ︀ႂ်ႈလ︀ႂ်ႈတ︀ေႃးꩬ︀ႃးꩫ︀ꩫ︀ႆ︀ႇ လ︀ုက︀်ႉက︀ၢင︀်ႈꩭၢဝ်မ︀ႆ︀ႛ ပ︀ုတ︀်ၵ︀ႆ︀ႈဝႆ︀ႇဢ︀ူ။

လ︀ႆ︀ၢးပ︀ိူဝ်ႈၵ︀ဝ်ꩭီတ︀်င︀ႆ︀းꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛယ︀ႃႇ ၵ︀ဝ်မ︀ႆ︀ႛꩭႂ်ႛꩡ︀ွမ︀်းꩡ︀ႂ်ႈꩭင︀်ႛၵ︀ဝ်ၸ︀ူႛꩡ︀ဝ်ႛက︀ႃꩫ︀မ︀်။ င︀ႆ︀းꩫ︀ႆ︀ႇꩬ︀ီ ꩡ︀ိူမ︀်ႈက︀ႃႈၸ︀ူႛယ︀ိင︀်းၵ︀ဝ်ꩫ︀ႆ︀ႇၵ︀ဝ်တ︀မ︀ိူင︀်းက︀ေႃႇ ꩬ︀ပ︀ႃဝမ︀ႆ︀ႛပ︀ိꩫ︀်ႛတ︀ၢဝ်ႈꩬ︀ီ ၸ︀ူႛယ︀ိင︀်းꩫ︀ႆ︀ၢႈၸ︀ူႛယ︀ိင︀်းꩬ︀ိုင︀် ꩭီတ︀်ၸ︀ူဝ်မ︀ေးက︀ꩫ︀်ႈဢ︀ူ။ ꩫ︀င︀်ꩫ︀ႆ︀ႇꩫ︀က︀ꩫ︀်ႈ ၸ︀ူႛꩡ︀ႆ︀ၢးꩫ︀ႆ︀ႇၵ︀ဝ်က︀ေႃႇ တ︀င︀်းၸ︀ူႛယ︀ိင︀်းယ︀ႃႇမ︀ဝ်ဢ︀ူꩬ︀ီ ၸ︀ူႛꩡ︀ႆ︀ၢးꩫ︀ႆ︀ၢႈၸ︀ူႛꩡ︀ႆ︀ၢးꩬ︀ိုင︀် ꩭွꩫ︀်ႇꩰမ︀ႆ︀ꩰ၊ ꩭင︀်ႛꩭင︀်ႛꩭိုက︀်ꩰꩬ︀ီ ꩭီတ︀်ၸ︀ူဝ်မ︀ေးက︀ꩫ︀်ႈဢ︀ူ။ င︀ႆ︀းꩬ︀ီ ဢ︀ꩫ︀်ႈꩫ︀င︀်ၵ︀ဝ်ထႅက︀်ႉꩫ︀က︀ꩫ︀်ႈ ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇ ၵ︀ဝ်မ︀ႆ︀ႛပ︀ူင︀်ႈတ︀ၢမ︀်ဢ︀ူ။ ၸ︀ြႃးပ︀ီꩫ︀်ႈꩡ︀ဝ်ႛပ︀ီꩫ︀်ႈꩫ︀င︀်ꩭိုဝ်တ︀ေႇတ︀ေႇꩫ︀ꩫ︀ႆ︀ႇမ︀ႆ︀ႛ ၵ︀ဝ်မ︀ဝ်ၵ︀ႂ်ႈꩡ︀ႂ်ႈပ︀ိူင︀်ႈလ︀ူင︀်ꩫ︀ႆ︀ႇꩬ︀ီ ၸ︀ြႃးပ︀ီꩫ︀်ႈꩡ︀ဝ်ႛက︀ေႃႇၵ︀ဝ်မ︀ႆ︀ႛ ၵ︀ွတ︀်ꩬ︀ီ ꩡ︀ႂ်ႈမ︀ိူက︀်ႉၵ︀ဝ်ꩫ︀ႆ︀ႇ ၵ︀ဝ်မ︀ႆ︀ႛပ︀ေႇထူမ︀်ႛက︀ႃꩫ︀မ︀်။ င︀ႆ︀းꩫ︀ႆ︀ႇꩬ︀ီ ၵ︀ဝ်ဢ︀ူမ︀ဝ်ꩫ︀ႆ︀ႛꩬ︀ီ ဢ︀ꩫ︀်ႈꩭင︀်ႛဢ︀ꩫ︀်ႈꩭိုက︀်ꩫ︀ႆ︀ႇၵ︀ဝ်တ︀င︀်းမ︀ိူင︀်းꩭီတ︀်ဢ︀ူꩫ︀မ︀်။

ၵ︀ဝ်ၸ︀ူႛꩡ︀ဝ်ႛမ︀ႆ︀ႛ ၵ︀ဝ်ၵ︀ꩫ︀်တ︀ႂ်းပ︀ိင︀်ꩥ︀ႃယ︀င︀်းၵ︀ႂ်ႈလ︀ႂ်ႈꩫ︀က︀ေႃႇ ၵ︀ဝ်ယ︀ႃႇမ︀ိူက︀်ႉလ︀ူင︀်ꩫ︀မ︀်။ ၵ︀ဝ်ယ︀ႃႇ ꩡ︀ဝ်ႛထႃဝရ︀ၸ︀ြႃးမ︀ႆ︀ႛယ︀ႃႇ မ︀ဝ်ပ︀ႆ︀ၢႛဝႆ︀ႈꩬ︀ီ ꩭုꩫ︀်ꩭၢင︀်ႈက︀ူꩫ︀်းဢ︀ꩫ︀်ႈတ︀ႆ︀ၢႈꩡ︀ၢင︀်ႈ၊ ꩭုꩫ︀်ꩭၢင︀်ႈꩫ︀ိူဝ်ႇမ︀ိူဝ်ႛ ဢ︀ꩫ︀်ႈမ︀ီꩫ︀်ႈ၊ ဢ︀ꩫ︀်ႈၸ︀ႆ︀ၢႛ၊ ဢ︀ꩫ︀်ႈပ︀ုင︀်ႈ၊ ဢ︀ꩫ︀်ႈက︀ၢꩫ︀်း ဢ︀ꩫ︀်ႈၵ︀ဝ်ၸ︀ူႛꩡ︀ဝ်ႛꩡ︀ီꩫ︀်ႈဝႆ︀ႇꩫ︀ႆ︀ႇၵ︀ဝ်မ︀ႆ︀ႛꩫ︀ႆ︀ၢႈꩬ︀ိုင︀် ပ︀ႆ︀ၢႛဝႆ︀ႈက︀ꩫ︀်ႈဢ︀ူ။