ข้อพระคัมภีร์ยอดนิยมจาก MATHE 6

แบ่งปัน

Naonhaung" kam" wa- Mao"So: mung"dan: we' yao: myid o: ra" khyo re sao qhid' qho ge,. Alao" yao: wa ai gatau qo ca" ra" gu: alhab' rere: naonhaung" re byid' li" nae".

Airu: mung: ne, mo" ba: qhid' mae" damyid: ci" ge,- Ne, mo" ba wa yao" qhid' mae" myid: ci" li" nae"- ana" ba qug: khai" ru wa ana" ba: qhid' mae" ga" va" ra".

Aimung: ngo naonhaung" re ta" ru wa- Pe" zo: pe" shaug' nae" laug ein: kao so' qhid' mae" Pe" ve, nae" laug ein: gaung khyao qhid' mae" naonhaung" damyid: ci" ge, Ai: kao so' wa zo:ve tho'- gaung khyao wa ve, mai ve, bau tho' je: akhyag: mangad: i?

Naonhaung" kam" wa akyu" mho' gelao"- kug qe, khyo vao lo" mung: kham: pyid' yang: myo, yang mamyao: ra" naonhaung" yao: Pho" re akyu" mho' ge,. Alao" anyham: avho' mae kad' rure myao: ra" naonhaung" yao: Pho" wa naonhaung" re shaman" jeju byid' li" nae".

Airu: mung: naonhaung" akyu" mho' gelao"- ceru: mho' ge,- Mug:gaung dao mae" ngonhaung" Pho" we"- Ni" gyang" lho" ra" mang A re phug' myao: vageshao:- Ni" mung"dan: joe" lo vashao:- Mug:gaung dao mae ni" nhag' dag: ru we' dakhyo: myid gaung: dao mae re: dag: lo vashao wo"

Ngonhaung" qo: ra" zo:ve ana" ba ngonhaung" re byid: la,

Ngonhaung" re shad' ra" mo; qobo re ngonhaung" khyad' byid' ru we' dakhyo: ngonhaung" qobo rere: khyad' byid: la,

Ju" phyo' ra" khyo ngonhaung" re maye: nhao lo: makhyang: yaug: lo, mae" ngonhaung" re khyad' yu la, wo"

Naonhaung" re shad' ra mo; qobo re naonhaung" khyad' byid: ko" ngad: re mug:gaung: dao mae na: ra" naonhaung" Pho" re: naonhaung" qobo re khyad' byid' li" nae".

Mug: phyo: mae dao" qin" ra" ngho' jham re qu" qu" ge,- yao: bam wa myug: shi: re masin: maqho:- yad re: mayad: yu- jhi mae re: maqaung" to: gengad: ra". Ngadqere: mug:gaung dao mae na: ra" naonhaung" Pho" wa yao: bam re zho" na: ra". Naonhaung" wa ngho' jham tho' myo: sho' je: phug' de, ko" mangad: i?

Nhug we' zu: yang qo" zo" qheim" pye' mung: khug' mo, kyaung" thad' vao ye: yang: qo" khug' yu: ra" ce: myid gaung dao mae Naonhaung" jo,nho" jham re naonhaung" qhid' mae" daqaung" to: ge,- Ai: atha" nhug we' zu: yang maqo" zo" qheim" ru we' khug' mo, re: maqo" kyaung" vao ye: maqo" khug' yu: ra" mug:gaung dao mae naonhaung" jo,nho" jham re naonhaung" qhid' mae" qaung" to: ge,. Pe"mung:ga"re naonhaung" jo,nho" jo; ra" tau mae naonhaung" nhag' lam: taui" jo, li" genae".

Khag' ngadqere: asang shid' yaug: jeim qo" kad' nae" mangad:- yao: wa asang dayaug re nghang: mung: dayaug re jhid'de; li" nae". Asang dayaug re gyaug phug' mung:- gatau dayaug re maphug' makhyad' kad' li" nae". Amung: naonhaung" wa Mao"So re we' ngaui qhang jo,nho" re daga" za: qo" caung da" byid: genae" mangad:.

Mao"So re lam khug: ra" myid ngai: ra" mo, we"- ana" ba yaug: jo, mung: ne, mo" ba myi:khyeim" mae ngha" pye' ra" seyo mae" myo, gae jham re Mao"So shaung vhe' byid' ra". Yao: wa naonhaung" re je yang: vhe' byid' li" nae" mangad: i?

Ngadqere: qo ca" mo, re naonhaung" aung lam alu: byid: ko" re- ni" lo, yo lo, kad' ra" mau" zo" re ni" lo, kaung: lo, re daba nhao wa,. Alao" ni" aung lam alu: byid' ra" khyo wa anyham: avho' mae kad' ru ngad nae". Amung: anyham: avho' kad' rure myao: ra" ni" Pho" wa nao re jhaung qhu" byid' li" nae".

Amung: su the' myao vageshao: ein:- mo, byu qe myo: sho' qhid' kheim: mae naonhaung" lalam lakhug: mau" zo" jham re mazaui: nae" qhid' mae lha" ge,- Airu: mangad: re mug:gaung dao mae na: ra" naonhaung" yao: Pho" mae" pe" shaman" jeju re: maqo" yu genae".

Amung: naonhaung" zo:ve jao" gelao"- geim kad' mo, we' dakhyo: myo, nho asham zang dakad' ci ge,- yao: bam wa yao: bam zo:ve jao" na: ra" khyo re su alhab' the' myao vageshao: ga: yao: bam: ave, re lhai" pye' ako"- naonhaung" re ngo ta" gali" Yao: bam wa yao: bam o: ra" aphug' jhaung qhu" re qo" yu: avako". Naonhaung" zo:ve jao" gelao" myo,jid' yang mamyao: ra" naonhaung" Pho" mae" lai yang: naonhaung" zo:ve jao" na: rure khag' maqo" ba genae" qhid' mae" myo, cid' mung: au: xau gyad yang: kyo' shaung: pye' ge,. Anyham: avho' kad' rure myao: ra" naonhaung" Pho" wa- naonhaung" re shaman" jeju byid' li" nae".