ข้อพระคัมภีร์ยอดนิยมจาก रोमी 1

แบ่งปัน

या़हबु लेहङगु स्‍येच्‍येला ङाह ङोह मेहछाएँ। च्‍यिबेमाना यिह-छ्य़े मिह थाम्‍ज्‍यीगी तेहन्‍दाला, दि थार्पा तेर्केन्‍गी किन्‍ज्‍योकी ओङ यिहम्‍बा, तोहङस्‍यो यहूदी क्‍यिहपाया़की तेहन्‍दाला ओहले लेहमेन क्‍यिहपाया़गी तेहन्‍दालाॱआङ।

च्‍यिबेमाना ओहराङला किन्‍ज्‍योगी राहङगी दिनला काह-ठि पेहती ठाबे सी़ह च्‍यु नाङगे माएँ ताम या़हबु लेहङगुगी तेन्‍गे। ओहले दिदी ओहराङगी छ़ूगे यिहन्‍ज्‍यु तिङ थु तेहपा लाहमले च्‍यी़राङ ज्‍योर ख़ूएँ। छ्य़ेला दि ल़ेहमु प्री़हदी येहबा, “मिह टाहङबु तेहपा लाहमलेॱराङ थार्च्‍ये येह।”

किन्‍ज्‍योगी जाम्‍बुलीङ छ्या़गे यिहन्‍ज्‍यु, मिहरोगी ज़ो नाङग्‍योकी ना थाम्‍ज्‍यी से़हया़ला मिहरोदी थोङॱराङ मी़हखुएँगी नाहम्‍स्‍यी किन्‍दु लिहकेन्‍गी ओङ दाङ तेहन्‍दामला खुङया़गी या़हबु पेहती थोङ ख़ूएँ ओहले ङोह स्‍य़े ख़ूएँ। ओ़ह सोङबे खुङया़ला तेलेन पेहकेन्‍की ग्‍या़ॱराङ म़ेह।

च्‍यिबेमाना खुङया़गी किन्‍ज्‍योला ङोह स्‍य़ेदीॱआङ किन्‍ज्‍योला पेह कोहएँगी ची़नाङ माहबे, ओहले थुज्‍यी-छ्य़ेॱआङ माहफुल, यिहॱनाङ खुङया़ राहङगी नोम्‍साङला फेनराङ मे़हथोएँ काहल्‍सीन ओहले खुङया़की उल्‍दुम्‍बा सेम तोहरोङ खोक्‍पा नाहक्‍पु काहल्‍सीन।

च्‍यिबेमाना खुङया़गी किन्‍ज्‍योकी तेहन्‍दामला यिहॱना़ मिहम्‍बाकी से़हया़ ङ्याम्‍बु च्‍येहप्‍सीन। ओहले साज्‍या-नाम्‍ज्‍या छ्या़ च्‍य़ू नाङगे ओहले नाहम्‍माॱनाङ ची़नाङ ज्‍योर कोहएँकी किन्‍ज्‍योला मिहम्‍बा, यिहॱनाङ मिहरोगी ज़्‍याङ नाङग्‍योकी से़हया़ला गा खुङया़गी छ्येपा फुल्‍दी स्‍याहप्‍तो स्‍युहसीन।

स्‍यिहङगामले माहर किन्‍ज्‍योकी थुयाल मिहया़की तिहक्‍पा दाङ ल़ेह ङ्येहम्‍बाया़ थो़ला बाप्‍ती येह। ओ़ह मिहया़गी राहङगी पेहक्‍योगी ल़ेह ङ्येहम्‍बाया़गी पेहतीराङ तेहन्‍दामला नेम ज़्‍या़दी येहबा।

ओ़ह सोङबे किन्‍ज्‍योगी खुङया़ला राहङगी सेमला ने़जेबा ङोह छाएँगी ल़ेहया़ पेहच्‍येला क्‍युर ज़्‍या़ नाङसीन। खुङ पी़हमी-पेहजाया़गी राहङगी ख्‍योवा ङ्याम्‍बु माहङ्याहल्‍बा पेहती पी़हमी-पेहजा नाहङदोङराङ तिहक्‍पा पेहसीन। ओहले ओ़हठीॱराङ पेहती खुङगी क्‍येप-ख्‍योवाया़गीॱआङ राहङगी पी़हमी ङ्याम्‍बु ङ्याहल्‍ज्‍ये क्‍युर्ती च्‍यी़गी च्‍यी़ला सेम स्‍योर्ती क्‍येप-ख्‍योवा नाहङदोङराङ तिहक्‍पा पेहसीन। दि ल़ेहमु पेहती खुङ राहङ ज़ुबुगी पेहक्‍यो ल़ेहला ते़बे ङ्य़ेहबा खुर्सीन। दि ल़ेहमु पेहती खुङया़गी किन्‍ज्‍योला ची़नाङ पेहच्‍ये क्‍युरक्‍यो सोङबे किन्‍ज्‍योगी खुङया़ला ल़ेह चोक्‍पाया़ पेहच्‍यु म़ेदी खुङया़की नावा नोहङग्‍यो ती़हजीलाराङ क्‍युर ज़्‍या़ नाङसीन।

खुङगी राहङला ख्‍येम्‍बा-ताहक्‍पु यिहन म़ेदी क्‍याहल्‍गे यिहॱनाङ खुङ उल्‍दुम्‍बाॱराङ काहल्‍सीन। खुङगी ज़िज्‍यिद छ्यिम्‍बु नोम नाङगे किन्‍ज्‍योला छ्येपा फुल कोहएँलानी स्‍यिदी डोएँगी मिह, च्‍याह-च्‍यिहवा, बासो दाङ प्रहङस्‍यु क्‍याहप्‍ती डोएँकी सेम्‍ज्‍येनया़की कुया़ जे़दे का ओ़हया़ला छ्येपा फुल्‍सीन।