If you have would like a copy of this version please contact info@davarpartners.org

Text: Chambeali New Testament, CC-BY-SA-4.0, The Love Fellowship. Audio: Chambeali Standard Version New Testament Audio Bible, CC-BY-SA-4.0, Davar Partners International, Bridge Connectivity Solutions, 2022

Chambeali Standard Version New Testament

Chambeali Bible (चम्बयाळी बाइबिल) 2020 by The Love Fellowship is licensed under a Creative Commons Attribution-ShareAlike 4.0 International License.

फिरी जां प्रभु जी जो पता लग्गेया कि फरीसियां ने सुणे रा है कि यीशु यूहन्ना का भी जादा चेल्‍ले बणांदा ते तिन्हा जो बपतिस्मा दिन्दा हालांकि यीशु अप्पु नी पर तिसेरे चेल्‍ले बपतिस्मा दिंदे थिये। तां से अपणे चेल्‍लेयां कने यहूदियां प्रदेश जो छडी करी फिरी गलील प्रदेश जो चली पये। कने तिन्हा जो सामरिया प्रदेश का होई करी जाणा जरुरी थिया। इस तांइ से सुखार नां रे सामरिया प्रदेश रे इक्क ग्रां तिकर आया, जे तिस जमीन रे नेड़े है जिस जो याकूब ने अपणे निक्के यूसुफ जो दिता थिया, ते इस्राएली लोक्कां रे पुरखे, याकूब रा खोद्दे रा कुआँ भी तित्ते थिया, ते यीशु रस्ते रा थकी करी तिस कुएं पर इय्यां ही बेई गेया। ए तकरिबन बारा बजे रे लगभग थिया। इतणे बिच इक्क सामरिया प्रदेश री जनानी पाणी भरणे आई यीशु ने तिसजो बोल्लेया, मेरे जो पाणी पिया किजोकी तिसेरे चेल्‍ले तां ग्रां बिच रोट्टी खरीदणे गेरे थिये। तिस सामरिया प्रदेश री जनानी ने तिसजो बोल्लेया, तू यहूदी होई करी मेरे जदेई सामरी जनानी का पाणी किजो मगंदा? यीशु ने जवाब दित्ता, जे तू परमेश्वर रे वरदान जो जाणदी जे से तिज्जो दैणा चाह्‍ंदे, कने ए भी नी जाणदी कि से कुण है जे तिज्जो बोलदा, मेरे जो पाणी पिया, तां तू तिसका मंगदी कने से तिज्जो जिन्दगी रा पाणी दिंदा। जनानी ने तिसजो बोल्लेया, ओ प्रभु तेरे का तां पाणी भरणे तांइ किच्‍छ है भी नी कने कुआँ डुग्गा है, तां सेह़ जिन्दगी रा पाणी तेरे का कुत्ते का आया? कै तू असा रे बाबे याकूब का बड्डा है जिस ने असा जो ए कुआँ दित्ते रा है, कने अप्पु ही अपणे पुत्तर कने अपणे डंगरा समेत इस बिच का पीन्दा यीशु ने जवाब दिता जे कोई ए पाणी पिंगा तिन्नी फिरी प्यासा होणा पर जे कोई तिस पाणी बिच का पिन्गा, जे मैं तिसजो दैणा, तिसजो फिरी कदी भी प्यास नी लगणी पर जे पाणी मैं तिसजो दैणा, तिसेरा उस मणू अन्दर इक्क सोता बणी जाणा जे हमेसा तिकर रैह्णा। जनानी ने तिसजो बोल्लेया, ओ प्रभु ए पाणी मेरे जो दे तां कि मैं प्यासी न होवा कने पाणी भरणे जो इनी दुर न आए यीशु ने तिसजो बोल्लेया, जा अपणे लाड़े जो इत्ते सद्दी लेई आ जनानी ने जवाब दिता, मैं ते बिना लाड़े रे है यीशु ने तिसजो बोल्लेया, तू ठीक बोलदी है कि मैं बिना लाड़े रे ए किजोकी तू पांज्ज लाड़े करी चुकी री है कने अब्बे जिस मर्द कने है से भी तेरा लाड़ा नी है ए तू सच ही बोल्लेया जनानी ने तिन्हा जो बोल्लेया, ओ प्रभु जी, मेरे जो लगदा कि तुसा भविष्यद्वक्ता हिन असा रे पुरखे ने इसी पहाड़ पर अराधना कित्ती, ते यहूदी मणू बोलदे की जित्ते अराधना करणी चाएदी से जगाह् यरुशलेम सहर बिच है। यीशु ने तिसजो बोल्लेया, ओ जनानी मेरी गल्ल रा विश्वास कर कि से बेल्ला आंदा है कि न तां तुसा इस पहाड पर बाबे री भक्ति करणी ना ही यरुशलेम बिच तुसा सामरी कस्बे रे मणू जिस जो नी जाणदे, तिसेरी अराधना करदे, ते असी यहूदी मणू जिस जो जाणदे तिसेरी अराधना करदे, किजोकी छुटकारा यहूदियां बिच का है। पर से बेल्ला आणे वाला है हालांकि अब्बे भी है जिस बिच सच्चे भक्त बाबे री भक्ति आत्‍मा कने सच्चाई कने करणी किजोकी बाबा अपणे तांइ इदेए भक्तां जो तोपदा परमेश्वर आत्‍मा है इधेरे तांइ जरुरी है कि तिसेरी अराधना करणे वाला आत्‍मा ते सच्चाई कने अराधना करे। जनानी ने तिसजो बोल्लेया, मैं जाणदी कि मसीह जे ख्रिस्त है, आणे वाला है, जिस बेल्ले तिसने आणा तां सारी गल्लां असा जो दसणियां। यीशु ने तिसजो बोल्लेया मैं जे किच्‍छ तेरे कने बोल्लेया करदा है, मैं से ही ए।

इतणे बिच ही तिसेरे चेल्‍ले आई गे कने हैरान होई गे कि से जनानी कने गल्ल करे करदा फिरी भी कुसी ने नी पुछया, कि तू कै चाहन्दा है या कुस तांइ तिसेरे कने गल्लां करे करदा?
तां जनानी घड़ा छडी करी ग्रां बिच चली गई ते मणूआं जो बोलणा लग्गी आओ कने इस मणू जो दिखो जिस ने सारा किच्‍छ जे मैं अपणी जिन्दगी बिच कित्ते रा थिया मेरे जो दस्सी दित्ता, कुत्ते ए ही तां मसीह नी है? इधेरे तांइ से सहर का निकली करी यीशु का आणा लगे। इसेरे बिच यीशु रे चेल्‍लेयां ने छन्दे करी के बोल्लेया कि ओ गुरु कुछ खाई लियो पर तिसने तिन्हा जो बोल्लेया मेरे का खाणे वास्ते इदेइ रोट्टी है जिसेरे बारे बिच तुसा नी जाणदे तां चेल्‍लेयां ने आपस बिच बोल्लेया, कै कोई तिसेरे तिकर किच्‍छ खाणे जो लाए रा है। यीशु ने तिन्हा जो बोल्लेया, मेरी रोट्टी से है कि परमेश्वर जिन्हा ने मेरे जो भेज्जे रा है, तिन्हेरी मर्जी रे हिसाब कने चलां ते तिसेरा कम्म पूरा करां। कै तुसा इय्यां नी बोलदे, फसलां कटणे जो हल्ले तांइ भी चार महिन्ने बचे रे हिन? मैं तुसा जो बोलदा, अपणी हाख्खियां चुक्की करी इन्हा लोक्कां जो दिख्खो, ए तिस पके री फसल सांई हिन जे कटीणे तांइ तैयार है। फसल कटणे वाले जो बदिया मजूरी मिलदी, ते बाड्डी वाली फसल से मणू हिन जिन्हा जो से हमेसा री जिन्दगी बिच पूजांदे। बीह् बाणे वाले ते फसल कटणे वाले दोन्नां जो बड़ा वरी आनंद मिलणा! किजोकी इत्ते ए कहावत ठीक बैन्दी है कि बाणे वाला होर है ते कटणे वाला होर मैं तुसा जो से खेतर कटणे तांइ भेज्जेया जिस बिच तुसा कोई मैहनत नी कित्ती। दूज्जेयां ने मैहनत कित्ती कने तुसा तिसेरी मैहनत रे फल्ल रे हिस्सेदार होए।

उस कस्बे बिच बड़े-वरी सामरिया प्रदेश रे लोक्कां ने तिस जनानी रे बोलणे पर यीशु पर विश्वास कित्ता किजोकी तिसने सारेयां जो ए बोल्लेया थिया कि तिसने सब किच्‍छ जे मैं अपणी जिन्दगी बिच कित्ते रा थिया से मेरे जो दस्सी दिता।
जिस बेल्ले सामरिया प्रदेश रे मणू तिसेरे नेड़े आए तां तिसरे छन्दे करणे लगे कि असा रे का इत्ते रे ते से तित्ते दो दिन तक रुकेया तिन्हा रे बसेख री वजह कने होर भी कई मणूआं ने तिस पर विश्वास कित्ता। अते तिस जनानी जो बोल्लेया, अवे असी तेरे बोलणे कने विश्वास नी करदे किजोकी असी अप्पु ही सुणी लिता कने जाणदे हिन कि ऐई सच्चो ही दुनिया छुटकारा दैणे वाले है। फिरी तिन्हा दो दिना रे बाद से तित्ते का निकली करी गलील प्रदेश जो चली गे। किजोकी यीशु ने अप्पु ही गवाई दित्ती कि भविष्यद्वक्ता अपणे देस अन्दर आदर-खातर हासल नी करी सकदा जां से गलील प्रदेश बिच आया तां गलील प्रदेशी तिस कने बड़ी-वरी खुसी कने मिल्ले किजोकी जिन्ने कम्म तिसने यरुशलेम बिच त्योहर रे बेल्ले कित्ते थिये तिन्हा ने उन्हा सारया कमा जो दिखया थिया, किजोकी से सारे भी त्योहर बिच गेरे थिये।

तां से फिरी गलील प्रदेश रे काना कस्बे बिच आए जित्ते तिन्हा ने पाणी जो अंगूर रा रस्स बणाया थिया, तित्ते राज्जे रा इक्क नौक्कर थिया जिसेरा मुंडा कफरनहूम कस्बे बिच बिमार थिया। से ए सुणी करी कि यीशु यहूदियां का गलील प्रदेश बिच आई गेरे हिन, तिसेरे का गेया कने तिसेरे छन्दे करणा लग्गेया चली करी मेरे निक्के जो ठीक कर किजोकी से मरणे वाला थिया। यीशु ने तिसजो बोल्लेया, जिस बेल्ले तक तुसा चमत्कार नी दिख्खी लैणे तिस बेल्ला तक तुसा कदी विश्वास नी करणा कि मैं मसीह है। राज्जे रे नौक्कर ने तिसजो बोल्लेया, ओ प्रभु मेरे निक्के री मौत होणे का पहले तित्ते चल यीशु ने तिसजो बोल्लेया, जा तेरा निक्का जिन्दा है तिस मणू ने यीशु री बोल्ली री गल्ल रा विश्वास कित्ता कने चली गेया से हल्ले रस्ते बिच ही थिया कि तिसेरे नौक्कर ने तिसका आई करी बोल्लेया कि तेरा निक्का जिन्दा है। यीशु ने तिसका पूच्छेया, से कुस बेल्ले से ठीक होणा लग्गेया थिया? तिन्हा ने तिसजो बोल्लेया, कल धियाड़ी इक्क बजे रे करीब बिच तिसेरा बुखार उतरी गेया। तां तिस बेल्ले तिसेरे प्यो जो पता लग्गी गेया कि ए तिसी बेल्ले होया, जां यीशु ने तिसजो बोल्लेया कि तेरे निक्के ने नी मरणा। तिस मणू ते तिसेरे पूरे परिवार ने यीशु पर विश्वास कित्ता। ए दूज्जी निशानी थी जे यीशु ने यहूदियां प्रदेश का गलील प्रदेश जो हटी आणे का बाद कित्ता थिया।

ฟัง यूहन्ना 4