Matei 15
15
Ichelile na ichihile
(Malk 7:1-13)
1Kuya Mafarisayo na waandishi kulawa Yerusalemu wamghendela Yesu, wamghutsa, 2“Hebari wanafunzi wako ng'awokinda baye ipfihendo pfa iwahenga wetu? Mana hawakuja ng'awonawa baye ghamoko ghawo!” 3Yesu kawedika, kawalongela, “Mbona na mwemwe ng'amkinda baye ghamalaghitso gha Imlungu, ila mwowinza ipfihendo pfenu? 4Kwaapfila Imlungu kalonga, ‘Umheshimu aba wako na mai wako,’ na ‘Imunu wowose iyomligha aba wake au mai wake ayo ukufa nayafe.’ 5Lekeni mwemwe mwolonga, ‘Iyatsomlongela aba wake au mai wake, Chochose chanili nacho ichidaha kukwapfila acho nomlapfila Imlungu,’ 6aho imunu ayo ng'obamighwa kumtegheletsa aba wake baye. Apfo mwolibetsa laghitso ya Imlungu kwa kuwinza ipfihendo pfenu. 7Mwemwe mwa wang'enye! Nabii Isaya tsakatabili ghoya, hayalongile,
8‘Iwanu awano woniheshimu kwa imilomo yawo,
lekeni imimoyo yawo yakutali na nene.
9Woniabudu hela,
aku welangulitsa malangulitso ighali malaghitso gha iwanu.’ ”
Aghala ighomtenda imunu yehe
(Malk 7:14-23)
10Kuya kaghukema ghumtingano ghwa iwanu, kawalongela, “Mtegheletse na mpfimanye! 11Ichimtenda imunu yehe si achila ichikwingila mumlomo mwake baye, ila achila ichilawa kunze mwa ghumlomo, acho chicho ichimtenda yehe.”
12Kuya wanafunzi wake wamghendela wamghutsa, “Apfi komanya ka Mafarisayo hawahulike chaulongile wekwala, wona maya?”
13Kawedika, “Chila mti ing'aghuhandighwe na Aba wangu iyali kulanga ghutsong'olighwa. 14Walekeni, awo pfilongotsi pfipofu iwolongotsa pfipofu; na chipofu yang'amlongotsa chipofu miyaghe, wose weli watsokuluwila mpondo.”
15Petiri kedika, kamlongela, “Tulongele mana yake ghumfano aghuno.” 16Yesu kalonga, “Apfi mbaka sambi hata mwemwe mng'ali mwahela tsimbutsi? 17Ng'ammanyile baye ka chila chinu ichikwingila mumlomo chobitila munda, kuya cholapfighwa choghenda kucholo? 18Lekeni achila ichilawa mumlomo, cholawa mna ghumoyo; na acho chiho ichimtenda imunu yehe. 19Kwaapfila mghati mwa ghumoyo gholawa mawatso ghehile, ukukoma, ughoni, uashelati, uhitsi, ukalangama wa ughutsu, na maligho. 20Aghano ghagho ighomtenda imunu yehe; lekeni ukuja bila kunawa ghamoko ng'akumtenda imunu yehe baye.”
Ukuamini kwa ipinga Mkananayo
(Malk 7:24-30)
21Yesu koka hanu ahala, kaghenda kuna ghumkowa ghwa Tiro na Sidoni. 22Baho, pinga yumwe Mkananayo iyang'ali yokala mna isi ayo kamghendela aku kokemelela, kalonga, “Ghwemtwatsa, Mwana wa Daudi, mbonela libatsi! Imwanangu kana chinyamkela chomghogha ng'ani.”
23Wala yeye ng'amwidike chochose baye. Nawo wanafunzi wake wamghendela, wamlomba, “Mleke yoke, kwaapfila kotuwinza yokemelela kuchughu.”
24Kedika, kalonga, “Nene situmighwe kwa wanu wangi baye, ila kwa wang'olo iwaghile wa ing'anda ya Isiraeli.”
25Ipinga ayula kamghendela na kamwinamila hambele hake, kalonga, “Ghwemtwatsa, nyapfile!”
26Naye kedika, “Ng'apfinoghile baye ukusola ichijo cha iwana na kuwasila wambwa.”
27Ipinga kalonga, “Ona, Ghwemtwatsa, lekeni hata wambwa wakuja ipfijo ipfilaghala mmetsa mwa imtwatsa wawo.”
28Baho Yesu kamwidika, “Ghweipinga, imani yako ng'ulu! Leka ghakulawile ka pfaubama.” Bahala imwanaghe kahona.
Yesu kowahonya wanu wengi
29Yesu koka hanu ahala, kaghenda mmbalimbali mwa litsimbu lya Galilaya. Kuya kagheluka kuchidunda, kakala hasi. 30Mtingano mkulu ghwa wanu ghumghendela na kumhilikila ipfimbete, na ipfipofu, na ipfibubu, na iwanu iwaholole, na iwanu wengi iwoghula; wamwikila hambele hake hamaghulu, naye kawahonya. 31Iwanu wakangawala hawonile ipfibubu wolonga, iwaholole wohona, ipfimbete woghenda, na ipfipofu wakona; nawo wamtunitsa Imlungu wa Isiraeli.
Yesu koweng'a ichijo wanu elufu nne
(Malk 8:1-10)
32Yesu kawakema wanafunzi wake, kawalongela, “Noghwonela libatsi ghumtingano, kwaapfila wakala na nene kwa matsuwa madatu, na wahela chaukuja. Kuya sibama niwaleke woke na inzala baye, hela watsotsilika mnzila.”
33Wanafunzi wake wamghutsa, “Tudaha kupata kwani, kunyika akuno kwatuli, pfighate pfingi pfa kuwetsa kuweng'a ghumtingano ghwose aghuno waje?”
34Yesu kawaghutsa, “Mna pfighate pfingapi?”
Wamwidika, “Saba na somba wadowado chidogho.”
35Kalaghitsa ghumtingano ghwa iwanu wakale hasi. 36Kapfisola ipfighate apfila saba na wasomba, kapfibaliki, kapfibena kaweng'a wanafunzi wake, nawo wanafunzi wawagholela iwanu. 37Wose waja weghuta; wadondola pfihande pfa pfighate ipfisighale pfikapo pfimemile saba. 38Nawo iwajile wapetighwa, tsaiwamale waliyeka wakala elufu nne, bila kupeta wamapinga na iwana. 39Kuya kawaleka iwanu woke, yeye kadina mna ghumnumbwi, kaghenda kuna isi ya Magadani.
தற்சமயம் தேர்ந்தெடுக்கப்பட்டது:
Matei 15: LBV
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
