Matei 12

Imtwatsa wa Sabato

(Malk 2:23-28; Luk 6:1-5)

1Ghamatsuwa agho, Yesu kabita mna imighunda ya ingano mna litsuwa lya Sabato, wanafunzi wake wakala na nzala yakwawa, apfo wandusa kugana imikungwi na kuja ingano. 2Mafarisayo hawonile apfo, wamlongela, “Lola, iwanafunzi wako wotenda chinu ichighomighwe ukutenda mna litsuwa lya Sabato.”

3Yesu kawedika, “Apfi ng'amsomile baye achila chiyatendile Daudi, hayakalile na nzala, yeye na wayaghe iyakalile nawo? 4Pfayengile mna ing'anda ya Imlungu, yeye na wayaghe, kaja ipfighate pfa ukulolesighwa, hata kama tsamwiko yeye ukupfija, wala kwa wayaghe, ila iwabamighwe ukupfija tsaiwatambika waliyeka. 5Apfi ng'amsomile baye mna Ghamalaghitso gha Musa, kuwa mna litsuwa lya Sabato iwatambika mna lihekalu wolibetsa litsuwa lya Sabato, lekeni ng'awakwoneka ka watotsa baye? 6Lekeni nomlongelani, ahano hana iyali mkulu kubita lihekalu. 7Ghamaandiko gholonga, ‘Nobama libatsi, na si tsinambiko baye.’ Tsamng'amanyile mana yake choni, ng'ambamile kuwahigha baye iwanu iwalihela totso. 8Kwaapfila Imwana wa Adamu yuyo Imtwatsa wa Litsuwa lya Sabato.”

Imunu yana ghumoko ighuholole

(Malk 3:1-6; Luk 6:6-11)

9Yesu koka hanu aho, kengila mna lisinagogi lyawo, 10baho tsakukala na munu yumwe yana ghumoko ighuholole. Wamghutsa, walonga, “Apfi ng'aighomighwa baye kumhonetsa imunu mna litsuwa lya Sabato?” Wamghutsa apfo ili wapate imbuli ya ukumghoghela.

11Kawalongela, “Apfi munu yuhi kuna mwemwe yana ing'olo yumwe, na ing'olio ayo yang'engila mwipondo mna Litsuwa lya Sabato, yang'atsomkwegha yamlapfe kunze?” 12Imunu kana samani kubita ing'olo mala ngapi? Apfo ng'aighomighwa baye kutenda ighanoghile mna litsuwa lya Sabato. 13Kuya kamlongela imunu ayula, “Gholosa ghumoko ghwako.” Kaghugholosa, nagho ghuhona, ghuwa mgima kama ghumoko ghwake ghungi. 14Baho Mafarisayo walawa kunze, weka tsengwe lya apfila pfawatsomkoma.

Imtumighwa iyasaghulighwe na Imlungu

15Yesu hayaimanyile imbuli ayo, koka hanu ahala, na wanu wengi wamuwinza. Naye kawahonya wose; 16kuya kawaghoma waleke kuwalongela iwanu wangi mbuli tsake. 17Tsakatenda apfo ili achila ichilongighwe na nabii Isaya chitimile, hayalongile,

18“Ayuno mtumighwa wangu yanimsaghule,

yanimkunda, na iyonideng'elesa ghumoyo ghwangu.

Nitsoghuma Iloho yangu mchanya mwake;

naye katsotsipetela isi tsose ukuhigha kwangu.

19Ng'atsesonga wala ukudalamka;

wala kuduhu munu iyatsohulika litsi lyake mnzila.

20Ghumlanzi ighuhondeke ng'atsoghubena baye,

wala utambi wa itala iulapfa liyosi ng'atsoutsima baye,

mbaka yaitende haki itawale.

21Na litaghwa lyake isi tsa iwanu iwali si Wayahudi baye watsehuwila.”

Yesu na Belizebuli

(Malk 3:20-30; Luk 11:14-23)

22Kuya wamghalila munu yumwe iyakalile na chinyamkela naye tsachipofu na chibubu, naye kamhonya, mbaka kadaha ukulonga na ukwona. 23Iwanu wa likingili lyose wakangawala, walonga, “Angu ayuno si imwana wa Daudi baye?” 24Lekeni Mafarisayo hawahulike apfo, walonga, “Imunu yuno kolapfa pfinyamkela kwa ukwapfilighwa na Belizebuli, mkulu wa ipfinyamkela.”

25Naye Yesu hayamanyile chawang'ali wofikitsa kawalongela, “Chila ufalume wipinga iwenyegho utsohinyika; na isi au ikaye ipinga yenyegho ng'aidaha kwima baye. 26Na Setani yang'amlapfa Setani, ayo kepinga imwenyegho. Lelo ufalume wake utsakwimatse? 27Na nene ning'alapfa ipfinyamkela kwa ngupfu tsa Belizebuli, iwana wenu wopfilapfa kwa ngupfu tsa nani? Apfo lelo awo iwana wenu wawo iwatsomhighani. 28Lekeni kwa apfila nene nolapfa ipfinyamkela kwa Iloho wa Imlungu, mmanye kama ufalume wa Imlungu mala uwatsila.

29“Au imunu yodahatse kwingila mna ing'anda ya imunu yana ingupfu na kumboka ipfinu pfake, bila kwandusa ukumwoha imunu ayo yana ingupfu? Baho lelo hayatsodaha ukuboka ipfinu pfa ing'anda yake.

30“Imunu ka ng'ali hamwe na nene baye, ayo konibiduka, na imunu ing'ayokunga na nene, ayo kopwililisa. 31Apfo nomlongelani, chila nzambi na kufulu iwanu watsoleghusighwa; lekeni kwa ukumkufulu Iloho ng'awatsoleghusighwa baye. 32Munu wowose iyomlonga pfihile Imwana wa Adamu katsoleghusighwa inzambi yake, lekeni ayula iyomlonga pfihile Iloho Yelile ng'atsoleghusighwa baye inzambi yake mna ghamatsuwa aghano, wala mna ghamatsuwa ighakutsa.

Mbiki na ghamatunda ghake

(Luk 6:43-45)

33“Ghutendeni ghumbiki ghunoghe na ghamatunda ghake ghanoghe, au ghutendeni ghumbiki ghwihe na ghamatunda ghake ghehe; kwaapfila mbiki ghwotangika kwa ghamatunda ghake. 34Mwemwe muwana wa nzoka, apfi mdahatse kulonga ighanoghile na mwemwe muwenyegho mwiha? Kwaapfila ghumlomo gwa imunu ghwolonga achila ichimmemile mna ghumoyo ghwake. 35Imunu yanoghile mmoyo kolapfa ipfinu ipfinoghile kulawa mna ihatsina ya ipfinu ipfinoghile; na imunu yehile, kulawa mna ihatsina ya ipfinu pfihile kolapfa ipfinu pfihile.

36“Apfo nomlongelani ghendo, kwa chila chinu chihile chawolonga iwanu, watsohighighwa mna litsuwa lya ukuhigha iwanu. 37Mana kwa aghala ghaulonga kutsopata haki, na pfipfila kwa aghala ghaulonga kutsohighighwa.”

Chitango cha Yona

(Malk 8:11-12; Luk 11:29-32)

38Baho waandishi wamwe na Mafarisayo wamlongela, “Mlangulitsi, twobama twone chitango kuna ghweghwe.”

39Kawedika, “Lweleko lwihile na lwa ughoni lwobama chitango! Lekeni ng'alutsakwing'ighwa chitango baye ila ichitango cha nabii Yona. 40Mana kama apfila Yona pfayakalile munda mwa isomba mkulu matsuwa madatu chilo na misi, pfipfo Imwana wa Adamu pfayatsokala matsuwa madatu chilo na misi mna ghumoyo ghwa isi. 41Iwanu wa Ninawi watsakwima na iwanu wa ilweleko aluno mna litsuwa lya ukuhigha, na watsowahigha; kwaapfila wawo tsawasama ghamatotso ghawo hawapetelighwe na Yona; na ahano hana iyali mkulu kubita Yona. 42Malikiya wa kusini (wa Sheba) katsakwima na iwanu wa ilweleko aluno mna litsuwa lya ukuhigha, naye katsowahigha; kwaapfila yeye tsakatsa kulawa ubali wa utsighilo wa iduniya, kutegheletsa ihekima ya Selemani; na ahano hana iyali mkulu kubita Selemani.

Ukuya kwa ichinyamkela

(Luk 11:24-26)

43“Chinyamkela hayomlawa imunu, kakwangakwanga muisi isakale kobama hanu ha ukubwihila, na ng'opata hanu baye; 44kuya kelongela imwenyegho, ‘Nakuya kuna ing'anda yangu kwanilawile,’ na hayakuya na kuyona ing'anda yahela chinu, iseyighwa na ikighwa ghoya; 45baho kakuka na kusola pfinyamkela wangi saba iwehile kubita yeye, nawo wakwingila na kukala amwo. Na imunu ayo hali yake ya keli itsakuwa iha kubita ya mwanduso. Apfo pfipfo pfaitsakuwa kwa ilweleko aluno lwihile.”

Mamo wake na ndughu tsake Yesu

(Malk 3:31-35; Luk 8:19-21)

46Yesu hayang'ali yolonga na ghumtingano, lola, mai wake na ndughu tsake wapfika, wema kunze, wobama walonge naye. 47Apfo munu yumwe kamlongela, “Mai wako na ndughu tsako wakunze, wobama walonge naghwe.” 48Kedika, kamlongela imunu ayula, “Nani yali mai wangu? Nani wali ndughu tsangu?” 49Kuya kagholosa ghumoko kuna iwanafunzi wake kalonga, “Awano wawo mamo tsangu na ndughu tsangu! 50Kwaapfila munu wowose iyosang'ana achila chayobama Aba wangu wa kulanga, ayo yuyo ndughu yangu, lumbu lyangu, na mai wangu.”

தற்சமயம் தேர்ந்தெடுக்கப்பட்டது:

Matei 12: LBV

சிறப்புக்கூறு

பகிர்

நகல்