YEƁ ZAPEE 23
23
1Paulus pee nahnǝn wo za ma zyeɓ ɓǝ pǝ cok tai malii faa: Wee pa ɓe, me kaa ɓo pel Masǝŋ ne fatan zahzyil ɓe bai ɓǝ ki ŋhaa tǝ'nahko. 2Ananias pa joŋzahsyiŋ malii faa nyi za mai mo uura ɓo kah Paulus mo ira zah nyi ko. 3So Paulus faa nyi ko: Amo gboŋ mai mo rwah fan ɓo wo pǝfãi! Masǝŋ ye ga i mo jeertǝ. Mo kaa ɓo nyee ka ŋgoŋ kiita tǝ ɓe tǝgbana ɓǝ lai mo faa ɓo, mo so zyak ɓǝ lai ah ne faa mo ira me!#Mt 23:27-28 4Za mai mo uura ɓo kah Paulus faara nyi ko: Mo tǝǝ pa joŋzahsyiŋ malii Masǝŋ sye koi ne! 5Paulus zyii faa: Wee pa ɓe, me tǝ sõone pa joŋzahsyiŋ malii ye ya. Mor Ɗerewol faa: Mo faa ɓǝɓe' tǝ dǝɓlii mai mo kǝsyil za ɓo ka.#Pǝ̃ǝ 22:28
6Paulus tǝ ɓe, za ma zyeɓ ɓǝ mo taira ɓo za ki Farisien yo, za ki laŋ Sadusien yo, mor ah ɓyaŋ ɓǝ ge sǝŋ pel ɓǝǝ faa: Wee pa ɓe, ame ye Farisiyo, me ye we Farisien, ame tǝ byak ɓǝ mai za ma wul moo ga urra ne cee, me no pǝ kiita nyee mor ɓǝ ahe.#Yeɓ 26:5; Fil 3:5
7Ne cok Paulus mo faa ɓǝ mai vǝrri, syel ur kǝsyil Farisien ne Sadusien, so tai ah woŋ gwa. 8(Mor Sadusien a faara za ka ga ur pǝ wul a, Angeloi kǝka, fan mai nahnǝn mo ka lwaa kwan a daŋ ka kǝka ta, amma Farisien nyiŋra ɓǝ ah ɓo sai daŋ.)#Mt 22:23; Mk 12:18; Lu 20:27 9Gaŋra ɓǝ tǝ ɓǝ ah ge pel pǝlli. Za ki kǝsyil za ma cuura ɓǝ lai mo kǝsyil Farisien urra uu ne syesyel tǝ ɓǝ ah ne swahe, faara: Ru lwaa ɓǝɓe' wo dǝɓ mai ya. Ɗah maki fan ki wala angelos ye faa ɓǝ ɓo nyi ko ne! 10Ŋhaa ɓǝ ah ŋwaa ge pel pǝ'manne, so swah sooje ɗuu gal ɗah maki a pahlra Paulus ne? Mor ah faa nyi sooje ah ra mo gera kǝsyil za ka mo nǝǝra Paulus pǝ̃ǝ ge lal ne ka ga pǝ kaŋ sooje ne ki.
11Ne suŋ ah Dǝɓlii ge uu pel Paulus faa nyi ko: Mo soɓ zahzyil nǝǝ mo ka! Tǝgbana mai mo joŋ syedowal tǝ ɓe yaŋ Jerusalem nyeeko, sai mo ga joŋ syedowal yaŋ Rom nai ta.
Yahuduen gbǝra zah ka in Paulus pǝ wulli
12Tǝ'nan ah ne zah'nan Yahuduen taira ki, gbǝra zah ka in Paulus. Haara zah faa: Ru ka re fan a, ru ka zwǝ fan laŋ ga zah ya ta, sai ka ru i Paulus pǝ wul ɓe. 13Za mai mo gbǝra zah kal jemma nai ɓe. 14Kalra ge wo za joŋzahsyiŋ maluu tǝkine zaluu tǝsal ɓǝ, faara nyi ra: Ru gbǝ zah ɓo, ru haa zah ka ru re fan ki ka, sai ka ru i Paulus pǝ wul ɓe. 15Zǝzǝ̃ǝko, awe ne za ma zyeɓ ɓǝ pǝ tai malii daŋ we fii swah sooje Romanen ka mo zaŋko Paulus gee we ne ko, we joŋ tǝgbana we tǝ kyeɓ ka fii goŋga ɓǝ ah pǝsãhe. Aru laŋ ru ga zyeɓ suu ɓuu kaa ne ka ru i ko pǝ wul ka ɓah gin dai wo ɓii ya ba.
16Amma we naa mah Paulus mawin laa zah gwǝǝ ɓǝǝra. So zol kal ge pǝ kaŋ sooje ge kee ɓǝ ah nyi Paulus gŋ. 17So Paulus ɗii kapten maki ah faa nyi ko: Mo swǝ we tǝbanna mai ge wo swah sooje sa, mor a no ne ɓǝ ka faa nyi ko. 18So kapten zaŋ we tǝbanna ah kal ge wo swah sooje ne ko, ge faa: Paulus mai mo daŋgai kŋ ɗii me, so fii me ka me zaŋ we tǝbanna nyẽe ge wo ɓo ne ko, a no ne ɓǝ ka faa nyi mo. 19So swah sooje gbǝ jol we tǝbanna, zaŋ ko kal ge uu lal ne ko, so fii ko: Mo 'yah faa ɓǝ fẽe nyi me ne? 20Zyii faa: Yahuduen gbǝra zah ɓo ka fii mo ka mo zaŋ Paulus ge pel za ma zyeɓ ɓǝ pǝ cok tai malii ne tǝ'nanne, tǝgbana za ma zyeɓ ɓǝ tǝ ga kyeɓra ka fii mor goŋga ɓǝ ah pǝsãhe. 21Amma mo fiira mo ɓe, mo zyii ka, mor za mai mo gbǝra zah ɓo tǝgǝǝ ɓǝǝ kal jemma nai ɓe, kalra ga kaafuu ah ka byak ko. Mor haara zah ɓo faara: Ru ka re fan a, ru ka zwǝ fan ga zah ya ta, sai ka ru i ko pǝ wul ɓe. Zǝzǝ̃ǝko zyeɓra suu ɓǝǝ kaa ɓo ne ko tǝ byakra ɓǝ faa zah ɓo to o. 22So swah sooje faa nyi we tǝbanna: Ɓǝ mai mo kee ɓo me, ka mo faa nyi dǝɓ ki ka. Fahfal ah nyi fahlii nyi ko kalle.
Peera Paulus kal ge nyi govener Feliks
23So swah sooje ɗii kapten ah maki ah ra gwa, faa nyi ra: We ɗii sooje temere gwa, za ma ne pǝr mo yea jemma rǝŋ, za ma ne suk guu temere gwa, ka we zyeɓ suu ɓii ka ga yaŋ Kaiseria ne cok com doraŋ ma ne suŋ maiko. 24We bam pǝr ka Paulus mo yeeko mo ge wo govener Feliks ne jam. 25So ŋwǝǝ leetǝr naiko:
26Ame Klaudius Lisias, me haozah wo govener Feliks dǝɓ mayǝkki. 27Yahuduen gbǝra dǝɓ mai tǝ kyeɓra ka in ko pǝ wulli. Ne cok me laa dǝɓ Romanen yo, me ge ne sooje ɓe me nyiŋ ko jol ɓǝǝra. 28Me 'yah ka tan ɓǝ mai Yahuduen mo tǝ cenra ko ne ɓǝ ahe, mor ah me zaŋ ko ge pel ɓǝǝ pǝ cok tai malii ne ko. 29Me so lwaa tǝ cenra ko mor ɓǝ camcam pǝ ɓǝ lai ɓǝǝra, amma ɓǝ mai mo tǝ cenra ko ne ɓǝ ah laŋ ka nǝn pǝkoŋ mai dǝɓ mo i dǝɓ pǝ wul ne ɓǝ ah koo ka ɓoo ko ga daŋgai laŋ ya. 30Ne cok me so laa Yahuduen faara ɓǝ ɓo kal ah ka in ko pǝ wulli, mor ah me so pee ko ge wo ɓo gwari, me faa nyi za ma cenra ko mo ge faara ɓǝ cen ah nyi mo ne suu ɓǝǝra.
31So sooje joŋra tǝgbana mo faara nyi ra, ɓaŋra Paulus ne suŋ moo kalra ge yaŋ Antipatris ne ki. 32Tǝ'nan ah sooje mai ara mo ne ɓal pii soora kal ge pǝ kaŋ sooje, soɓra za ma ne pǝr kalra ne Paulus. 33Ne cok mo ge daira yaŋ Kaiseria nyira leetǝr nyi govener, soɓra Paulus nyi ta. 34Govener kee leetǝr ahe, so fii Paulus a sǝr makẽne. Ne cok mo laa a pǝ sǝr Kilikia, 35so faa nyi ko: Za ma cenra mo, mo gera ɓe, me ga laa ɓǝ faa ɓo ba. So faa nyi ra mo byakra Paulus yaŋ Herodes.
தற்சமயம் தேர்ந்தெடுக்கப்பட்டது:
YEƁ ZAPEE 23: MUAR
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Bible Moundang © Alliance Biblique du Tchad, 1996.
