الرُّؤْيَا 11

الْفَصْلْ حْضَاشْ

جُوجْ دْ الشّْهُودْ

1وْمْنْ بَعْدْ تّْعْطَاتْنِي قْصْبَة دْ الْعْبَارْ كَتْشْبَهْ لْلعْصَا، وْتّْݣَالْ لِيَّ: «سِيرْ وْعْبَرْ بِيتْ اللَّهْ وْالْمَدْبَحْ، وْحْسَبْ هَادُوكْ اللِّي كَيْعَبْدُو فِيهْ. 2وْالْوْسْعَة دْيَالْ بِيتْ اللَّهْ اللِّي عْلَى بْرَّا خَلِّيهَا وْمَا تْعْبَرْهَاشْ، عْلَاحْقَّاشْ تّْعْطَاتْ لْلشّْعُوبْ اللِّي مَا كَيْآمْنُوشْ بْاللَّهْ، اللِّي غَيْخَرّْبُو الْمْدِينَة الْمْقَدّْسَة لْمُدَّةْ تْنِينْ وْرْبْعِينْ شْهَرْ.#لوقا 21‏:24 3وْغَنْعْطِي السُّلْطَة لْجُوجْ دْ الشّْهُودْ دْيَاوْلِي، بَاشْ يْتّْنَبّْأُو لْمُدَّةْ أَلْفْ وْمْيَتَايْنْ وْسْتِّينْ يُومْ وْهُمَ لَابْسِينْ الْخِيشْ». 4وْهَادْ جُوجْ دْ الشّْهُودْ هُمَ جُوجْ دْ الشّْجْرَاتْ دْ الزِّيتُونْ وْجُوجْ دْ الْحَسْكَاتْ، وْهُمَ اللِّي وَاقْفِينْ قُدَّامْ رَبّْ الْأَرْضْ. 5وْإِلَا بْغَا شِي وَاحْدْ يْآدِيهُمْ، كَتْخْرَجْ الْعَافْيَة مْنْ فُمّْهُمْ وْكَتَاكُلْ عْدْيَانْهُمْ. وْإِلَا بْغَا شِي وَاحْدْ يْآدِيهُمْ، بْحَالْ هَكَّا خَاصُّه يْتّْهْلَكْ. 6وْهَادْ الشّْهُودْ عَنْدْهُمْ السُّلْطَة بَاشْ يْسَدُّو السّْمَا بَاشْ مَا تْطِيحْشْ الشّْتَا فْلِيَّامْ اللِّي غَيْتّْنَبّْأُو فِيهَا، وْعَنْدْهُمْ السُّلْطَة بَاشْ يْرَدُّو الْمَا دْمّْ، وْيْسَلّْطُو ݣَاعْ الْمْصَايْبْ عْلَى الْأَرْضْ وَقْتْمَا بْغَاوْ. 7وْمْلِّي غَيْكَمّْلُو الشّْهَادَة دْيَالْهُمْ، رَاهْ الْحَيَوَانْ اللِّي غَادِي يْطْلَعْ مْنْ الْهَاوِيَة غَيْتّْحَارْبْ مْعَاهُمْ وْغَيْغْلَبْهُمْ وْغَيْقْتَلْهُمْ. 8وْالدَّاتْ دْيَالْهُمْ غَتْبْقَى مْرْمِيَّة فْوَسْطْ الْمْدِينَة الْكْبِيرَة اللِّي كَيْشَبّْهُوهَا بْسَدُومْ وْمِصْرْ، وْاللِّي فِيهَا تّْصْلَبْ الْإِلَاهْ دْيَالْهُمْ. 9وْغَيْشُوفُو النَّاسْ مْنْ ݣَاعْ الشّْعُوبْ، وْالْقْبَايْلْ، وْاللُّغَاتْ، وْالْأُمَمْ، الدَّاتْ دْيَالْهُمْ لْمُدَّةْ تْلْتْ يَّامْ وْنَصّْ، وْمَا غَادِيشْ يْخَلِّيوْهُمْ يْتّْدْفْنُو. 10وْغَيْفَرْحُو سُكَّانْ الْأَرْضْ وْغَيْحْتَفْلُو، وْغَيْعْطِيوْ الْهْدِيَّاتْ لْبَعْضِيَّاتْهُمْ، عْلَاحْقَّاشْ هَادْ جُوجْ دْ الْأَنْبِيَا كَانُو كَيْعَدّْبُو سُكَّانْ الْأَرْضْ بْزَّافْ.

11وْمْنْ بَعْدْ تْلْتْ يَّامْ وْنَصّْ، رْجْعَاتْ رُوحْ الْحَيَاةْ مْنْ عَنْدْ اللَّهْ لْهَادُوكْ الجُّوجْ اللِّي مَاتُو، وْوْقْفُو عْلَى رْجْلِيهُمْ، وْتّْخَلْعُو هَادُوكْ اللِّي كَانُو كَيْشُوفُو فِيهُمْ. 12وْسْمْعُو بْجُوجْ وَاحْدْ الصُّوتْ قْوِي مْنْ السّْمَا كَيْݣُولْ لِيهُمْ: «طْلْعُو لّْهْنَا». وْطْلْعُو لْلسّْمَا فْالسّْحَابْ وْعْدْيَانْهُمْ كَيْشُوفُو فِيهُمْ. 13وْفْدِيكْ السَّاعَة وْقَعْ وَاحْدْ الزّْلْزَالْ قْوِي، وْطَاحْ الْعُشُرْ دْيَالْ الْمْدِينَة، وْمَاتُو بْالزّْلْزَالْ سْبْعَالَافْ وَاحْدْ، وْاللِّي بْقَاوْ كَانُو خَايْفِينْ، وْعْطَاوْ الْعَزّْ لْإِلَاهْ السّْمَا.#الرؤيا 6‏:12؛ 16‏:18 14الْوِيلْ التَّانِي دَازْ، وْهَا الْوِيلْ التَّالْتْ قْرِيبْ يْجِي.

الْبُوقْ السَّابْعْ

15وْنْفَخْ الْمَلَاكْ السَّابْعْ فْالْبُوقْ دْيَالُه، وْتّْسَمْعَاتْ صْوَاتْ قْوِيَّة فْالسّْمَا كَتْݣُولْ: «الْمَمْلَكَة دْيَالْ الدّْنْيَا وْلَّاتْ دْيَالْ رَبّْنَا وْالْمَسِيحْ دْيَالُه، وْغَيْمْلَكْ دِيمَا وْعْلَى الدّْوَامْ». 16وْالرّْبْعَة وْعْشْرِينْ شِيخْ مْسْؤُولْ، اللِّي كُلّْ وَاحْدْ فِيهُمْ ݣَالْسْ عْلَى الْعَرْشْ دْيَالُه قُدَّامْ اللَّهْ، تّْحْنَاوْ عْلَى وْجُوهْهُمْ وْسْجْدُو لْلَّهْ 17وْهُمَ كَيْݣُولُو: «كَنْشَكْرُوكْ آ الرَّبّْ الْإِلَاهْ الْقَادْرْ عْلَى كُلّْشِي اللِّي كَايْنْ وْاللِّي كَانْ، عْلَاحْقَّاشْ بَيّْنْتِي الْقُوَّة دْيَالْكْ الْكْبِيرَة، وْرْسِّيتِي الْمُلْكْ دْيَالْكْ. 18وْتّْقَلّْقُو الشّْعُوبْ اللِّي مَاشِي يْهُودْ، وْهُوَ يْنْزَلْ الْغَضَبْ دْيَالْكْ، وْجَا الْوَقْتْ اللِّي فِيهْ غَيْتّْحَاسْبُو الْمُوتَى، وْيْتّْجَازَاوْ عْبِيدْكْ الْأَنْبِيَا وْالْمْقَدّْسِينْ وْاللِّي كَيْحْتَرْمُو الْإِسْمْ دْيَالْكْ، الصّْغَارْ وْالْكْبَارْ، وْيْتّْهَلْكُو اللِّي كَيْخَرّْبُو الْأَرْضْ». 19وْتّْحَلّْ بِيتْ اللَّهْ اللِّي فْالسّْمَا، وْبَانْ فِيهْ تَابُوتْ الْعَهْدْ دْيَالُه، وْهُوَ يْوْقَعْ بَرْقْ وْصُوتْ وْرَعْدْ وْزْلْزَالْ وْتْبْرُورِي قْوِي.#الرؤيا 8‏:5؛ 16‏:18؛ الرؤيا 16‏:21

தற்சமயம் தேர்ந்தெடுக்கப்பட்டது:

الرُّؤْيَا 11: MSTD

சிறப்புக்கூறு

நகல்

ஒப்பீடு

பகிர்

உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்

الترجمة المغربية القياسية பற்றி மேலும் அறிக