كُورِنْتُوسْ التَّانِيَّة 1
1
الْفَصْلْ اللّْوّْلْ
السّْلَامْ
1مْنْ بُولُسْ رَسُولْ الْمَسِيحْ يَسُوعْ بْمُرَادْ اللَّهْ، وْمْنْ تِيمُوتَاوُسْ خُونَا فْالْإِيمَانْ، لْكْنِيسْةْ اللَّهْ اللِّي فْكُورِنْتُوسْ، وْلْݣَاعْ الْمُومْنِينْ الْمْقَدّْسِينْ اللِّي فْأَخَائِيَة كُلّْهَا،#الاعمال 18:1 2النِّعْمَة وْالْهْنَا مْنْ اللَّهْ بَّانَا وْالرَّبّْ يَسُوعْ الْمَسِيحْ لِيكُمْ.
3يْتْبَارْكْ اللَّهْ بُو رَبّْنَا يَسُوعْ الْمَسِيحْ، الْآبْ الرّْحِيمْ وْالْإِلَاهْ دْيَالْ التَّشْجِيعْ، 4حِيتْ هُوَ اللِّي كَيْشَجّْعْنَا فْكُلّْ مْحْنَة، بَاشْ نْقَدْرُو نْشَجّْعُو اللِّي كَيْدُوزُو فْأَيّْ مْحْنَة بْالتَّشْجِيعْ اللِّي خْدِينَاهْ مْنْ عَنْدُه. 5عْلَاحْقَّاشْ كِمَا كَنْقَاسِيوْ الْعْدَابْ عْلَى وْدّْ الْإِيمَانْ بْالْمَسِيحْ، هَكَّاكْ بْالْمَسِيحْ كَنْتّْشَجّْعُو بْزَّافْ. 6إِيوَا إِلَا كْنَّا فْالْمْحْنَة، رَاهْ هَادْشِّي لْلتَّشْجِيعْ وْالنّْجَا دْيَالْكُمْ، وْإِلَا تّْشَجّْعْنَا رَاهْ هَادْشِّي لْلتَّشْجِيعْ دْيَالْكُمْ، اللِّي كَيْدِيرْ فِيكُمْ الصّْبَرْ بَاشْ تْتْحَمّْلُو الْعْدَابْ اللِّي تْعَدّْبْنَاهْ حْتَّى حْنَا. 7وْرَاهْ رْجَانَا فِيكُمْ تَابْتْ، حِيتْ كَنْعَرْفُو بْلِّي كِمَا كَتْشَارْكُونَا فْالْعْدَابْ، كَتْشَارْكُونَا حْتَّى فْالتَّشْجِيعْ.
8وْبْغِينَاكُمْ آ الْخُوتْ تْعَرْفُو الْمْحَايْنْ اللِّي دَازْتْ عْلِينَا فْبْلَادْ آسْيَا، وْاللِّي كَانْتْ قَاسْحَة بْزَّافْ وْكْتَرْ مْنْ جَهْدْنَا، حْتَّى مَا بْقَاشْ عَنْدْنَا الرّْجَا بْلِّي غَنْعِيشُو.#1كورنتوس 15:32 9وْكْتَرْ مْنْ هَكَّا، حْسِّينَا بْلِّي مْحْكُومْ عْلِينَا بْالْمُوتْ، بَاشْ مَا نْتّْكْلُوشْ عْلَى رَاسْنَا، وَلَكِنْ عْلَى اللَّهْ اللِّي كَيْحْيِي الْمُوتَى. 10وْهُوَ اللِّي نْجَّانَا مْنْ هَادْ الْمُوتْ وْغَيْنَجِّينَا، وْفِيهْ عَنْدْنَا الرّْجَا بْلِّي غَيْعَاوْدْ يْنَجِّينَا مْنْ بَعْدْ. 11إِيوَا عَاوْنُونَا حْتَّى نْتُمَ بْالصّْلَاة دْيَالْكُمْ، حِيتْ الْبَرَكَاتْ اللِّي تّْعْطَاوْنَا هُمَ جْوَابْ الصّْلَاة دْيَالْ بْزَّافْ دْ النَّاسْ، وْهَادْشِّي كَيْخَلِّي بْزَّافْ دْ النَّاسْ يْشَكْرُو اللَّهْ مْنْ جِهْتْنَا.
بُولُسْ كَيْبَدّْلْ طْرِيقْ السّْفَرْ دْيَالُه
12حِيتْ الْإِفْتِخَارْ دْيَالْنَا هُوَ شْهَادْةْ الضَّمِيرْ دْيَالْنَا، بْلِّي كَنْتّْعَامْلُو مْعَ النَّاسْ كُلّْهُمْ، وْخُصُوصًا مْعَاكُمْ نْتُمَ، بْالنِّيَّة وْالْمْعْقُولْ مْنْ عَنْدْ اللَّهْ، وْهَادَا بْفْضَلْ النِّعْمَة دْيَالْ اللَّهْ مَاشِي بْالْحْكْمَة دْيَالْ بْنَادْمْ. 13وْحْنَا مَا كَنْكَتْبُو لِيكُمْ غِيرْ دَاكْشِّي اللِّي كَتْقْرَاوْهْ وْكَتْفَهْمُوهْ، وْكَنْتّْمَنَّى تْفَهْمُو كُلّْشِي 14كِمَا فْهَمْتُونَا شْوِيَّة مْنْ قْبَلْ، بَاشْ نْفْتَخْرُو بِيكُمْ فْيُومْ الْمْجِي دْيَالْ الرَّبّْ يَسُوعْ كِمَا كَتْفْتَخْرُو بِينَا.
15وْبْهَادْ التِّقَة قَرّْرْتْ نْزُورْكُمْ فْاللّْوّْلْ بَاشْ تْسْتَافْدُو جُوجْ دْ الْمَرَّاتْ. 16وْغَنْدُوزْ لْعَنْدْكُمْ مْلِّي نْكُونْ مْسَافْرْ لْبْلَادْ مَكِدُونِيَة، وْمْنْ بَعْدْ غَنْدُوزْ لْعَنْدْكُمْ مْلِّي نْكُونْ رَاجْعْ مْنّْهَا، بَاشْ تْعَاوْنُونِي فْالسّْفَرْ دْيَالِي لْبْلَادْ الْيَهُودِيَّة.#الاعمال 19:21 17وَاشْ تْسَرَّعْتْ مْلِّي خْدِيتْ هَادْ الْقَرَارْ؟ وْلَا وَاشْ قَرّْرْتْ هَادْ الْأُمُورْ كِمَا كَيْقَرّْرُو النَّاسْ دْيَالْ الدّْنْيَا، بَاشْ نْݣُولْ بْحَالْهُمْ: إِيِّهْ، إِيِّهْ وْلَّا، لَّا فْوَقْتْ وَاحْدْ؟ 18وَلَكِنْ اللَّهْ أَمِينْ وْعَارْفْ بْلِّي الْكْلَامْ دْيَالْنَا لِيكُمْ مَا كَانْشْ «إِيِّهْ» وْ «لَّا»، 19حِيتْ يَسُوعْ الْمَسِيحْ وَلْدْ اللَّهْ اللِّي خَبّْرْنَاكُمْ بِيهْ، أَنَا وْسِلْوَانُسْ وْتِيمُوتَاوُسْ، مَا كَانْشْ «إِيِّهْ» وْ «لَّا»، وَلَكِنْ كَانْ دِيمَا «إِيِّهْ».#الاعمال 18:5 20حِيتْ فْالْمَسِيحْ الْوُعُودْ دْيَالْ اللَّهْ كُلّْهَا «إِيِّهْ». وْهَادْشِّي عْلَاشْ كَنْعْطِيوْ بِيهْ الْعَزّْ لْلَّهْ مْلِّي كَنْݣُولُو: آمِينْ. 21وَلَكِنْ رَاهْ اللِّي كَيْخَلِّينَا وْكَيْخَلِّيكُمْ تَابْتِينْ فْالْإِيمَانْ بْالْمَسِيحْ، وْاللِّي خْتَارْنَا هُوَ اللَّهْ، 22اللِّي رْشَمْنَا، وْعْطَانَا الرُّوحْ الْقُدُسْ عَرْبُونْ فْقْلُوبْنَا.
23وْاللَّهْ رَاهْ شَاهْدْ عْلِيَّ بْلِّي حِيتْ حْنِّيتْ عْلِيكُمْ مَا جِيتْشْ لْكُورِنْتُوسْ، 24مَاشِي حِيتْ عَنْدْنَا السُّلْطَة عْلَى الْإِيمَانْ دْيَالْكُمْ، وَلَكِنْ رَاهْ حْنَا كَنْخَدْمُو مْعَاكُمْ عْلَى وْدّْ الْفَرْحَة دْيَالْكُمْ، حِيتْ نْتُمَ تَابْتِينْ فْإِيمَانْكُمْ.
தற்சமயம் தேர்ந்தெடுக்கப்பட்டது:
كُورِنْتُوسْ التَّانِيَّة 1: MSTD
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved