رِسَالَةْ تْسَالُونِيكِي اللّْوّْلَى 3
3
الْفَصْلْ التَّالْتْ
بُولُسْ كَيْصِيفْطْ تِيمُوتَاوُسْ لْتْسَالُونِيكِي
1وْحِيتْ مَا قْدَرْنَاشْ نْتّْحَمّْلُو، فَكّْرْنَا بْلِّي حْسَنْ نْبْقَاوْ بُوحْدْنَا فْأَتِينَا.#الاعمال 17:15 2وْصِيفْطْنَا خُونَا تِيمُوتَاوُسْ اللِّي كَيْخْدَمْ لْلَّهْ وْكَيْعَاوْنَّا نْخَبّْرُو بْإِنْجِيلْ الْمَسِيحْ، بَاشْ يْقَوِّيكُمْ وْيْشَجّْعْكُمْ فْإِيمَانْكُمْ، 3وْبَاشْ حْتَّى وَاحْدْ فِيكُمْ مَا يْرْجَعْ عْلَى إِيمَانُه بْسْبَابْ هَادْ الْمْحَايْنْ. وْرَاكُمْ كَتْعَرْفُو بْلِّي تّْخْتَارِينَا لْهَادْشِّي. 4حِيتْ مْلِّي كْنَّا عَنْدْكُمْ، سْبَقْ وْݣْلْنَا لِيكُمْ بْلِّي غَنْتّْمَحّْنُو، وْهَادْشِّي نِيتْ اللِّي جْرَا كِيفْ كَتْعَرْفُو. 5وْعْلَى وْدّْ هَادْشِّي، مْلِّي مَا قْدَرْتْشْ مَازَالْ نْصْبَرْ، صِيفْطْتْ لِيكُمْ تِيمُوتَاوُسْ بَاشْ نْعْرَفْ فِينْ وْصَلْ إِيمَانْكُمْ، حِيتْ كْنْتْ خَايْفْ لَيْكُونْ الشِّيطَانْ جَرّْبْكُمْ، وْتْوَلِّي تَمَارَة اللِّي ضْرَبْنَاهَا عْلَى وْدّْكُمْ بْلَا فَايْدَة.
6وَلَكِنْ دَابَا رْجَعْ تِيمُوتَاوُسْ مْنْ عَنْدْكُمْ، وْخَبّْرْنَا عْلَى إِيمَانْكُمْ وْمْحَبّْتْكُمْ، وْبْلِّي كَتّْفَكّْرُونَا دِيمَا بْالْخِيرْ، وْمْشْتَاقِينْ تْشُوفُونَا كِمَا حْتَّى حْنَا مْشْتَاقِينْ نْشُوفُوكُمْ،#الاعمال 18:5 7عْلَى هَادْشِّي، تْشَجّْعْنَا مْنْ جِهْتْكُمْ آ الْخُوتْ عْلَى وْدّْ إِيمَانْكُمْ، وَاخَّا حْنَا فْوَسْطْ الْمْحَايْنْ وْالْعْدَابْ. 8عْلَاحْقَّاشْ دَابَا كَنْعِيشُو هَانْيِينْ مَا دَامْ نْتُمَ تَابْتِينْ فْالرَّبّْ. 9إِيوَا كِيفَاشْ نْقَدْرُو نْشَكْرُو اللَّهْ مْنْ جِهْتْكُمْ عْلَى وْدّْ الْفَرْحَة الْكْبِيرَة اللِّي كَنْحَسُّو بِيهَا بْسْبَابْكُمْ قُدَّامْ إِلَاهْنَا؟ 10وْرَاهْ كَنْطْلْبُو اللَّهْ لِيلْ وْنْهَارْ بَاشْ نْشُوفُوكُمْ، وْنْكَمّْلُو دَاكْشِّي اللِّي مَازَالْ نَاقْصْ فْإِيمَانْكُمْ. 11وْكَنْطْلَبْ مْنْ اللَّهْ بَّانَا بْنَفْسُه وْرَبّْنَا يَسُوعْ، بَاشْ يْوَجّْدْ لِينَا الطّْرِيقْ نْجِيوْ لْعَنْدْكُمْ. 12وْكَنْطْلَبْ مْنْ الرَّبّْ يْزِيدْ يْكَبّْرْكُمْ وْيْكَتّْرْ فِيكُمْ الْمْحَبَّة لْبَعْضِيَّاتْكُمْ وْلْݣَاعْ النَّاسْ، بْحَالْ مْحَبّْتْنَا لِيكُمْ حْتَّى حْنَا، 13بَاشْ يْتَبّْتْ قْلُوبْكُمْ وْتْكُونُو مْقَدّْسِينْ وْبْلَا لُومْ قُدَّامْ اللَّهْ بَّانَا مْلِّي غَيْرْجَعْ رَبّْنَا يَسُوعْ مْعَ ݣَاعْ الْمُومْنِينْ الْمْقَدّْسِينْ دْيَالُه. [آمِينْ]
தற்சமயம் தேர்ந்தெடுக்கப்பட்டது:
رِسَالَةْ تْسَالُونِيكِي اللّْوّْلَى 3: MSTD
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2012 دار الكتاب المقدس بالمغرب. جميع الحقوق محفوظة
© 2012 Morocco Bible Society. All rights reserved