بُطْرُسْ اللّْوّْلَى 5

الْفَصْلْ الْخَامْسْ

بُطْرُسْ كَيْوَصِّي الْمُومْنِينْ

1وْكَنْطْلَبْ مْنْ الشّْيُوخْ دْيَالْ الْكْنِيسَة اللِّي مْعَاكُمْ، وْرَانِي شِيخْ بْحَالْهُمْ وْكْنْتْ شَاهْدْ عْلَى عْدَابْ الْمَسِيحْ، وْشْرِيكْ فْالْعَزّْ اللِّي غَيْبَانْ، 2رْدُّو الْبَالْ لْلْقَطْعَة دْيَالْ اللَّهْ اللِّي كَلّْفْكُمْ بِيهَا، مَاشِي بَزّْزْ وَلَكِنْ بْخَاطْرْكُمْ كِيفْ بْغَا اللَّهْ، وْمَاشِي بْالطّْمَعْ وَلَكِنْ بْالْمْحَبَّة.#يوحنا 21‏:15‏-17 3وْمَا تْفَرْضُوشْ السُّلْطَة دْيَالْكُمْ عْلَى هَادُوكْ اللِّي كَلّْفْكُمْ اللَّهْ بِيهُمْ، وَلَكِنْ كُونُو مْتَالْ لِيهُمْ. 4وْمْلِّي يْرْجَعْ الرَّاعِي الْكْبِيرْ، غَتَاخْدُو التَّاجْ دْ الْعَزّْ اللِّي مَا كَيْقْدَامْشْ.

5وْحْتَّى نْتُمَ آ الشُّبَّانْ، طِيعُو الشّْيُوخْ دْ الْكْنِيسَة. وْكُونُو كُلّْكُمْ مْتْوَاضْعِينْ مْعَ بْعْضِيَّاتْكُمْ حِيتْ كْتَابْ اللَّهْ كَيْݣُولْ: «اللَّهْ كَيْقَاوْمْ الْمْتْكَبّْرِينْ، وَلَكِنْ الْمْتْوَاضْعِينْ كَيْعْطِيهُمْ النِّعْمَة». 6إِيوَا عْلِيهَا تْوَاضْعُو تَحْتْ يْدّْ اللَّهْ الْقْوِيَّة بَاشْ يْعَلِّي شَانْكُمْ فْالْوَقْتْ دْيَالُه،#متى 23‏:12؛ لوقا 14‏:11؛ 18‏:14 7حَطُّو ݣَاعْ هَمّْكُمْ عْلِيهْ، عْلَاحْقَّاشْ هُوَ اللِّي كَيْتّْهَلَّى فِيكُمْ.

8كُونُو عْلَى بَالْ وْمُّوݣْضِينْ! رَاهْ الْعْدُو دْيَالْكُمْ إِبْلِيسْ، دَايْرْ بْحَالْ السّْبَعْ الْهَايْجْ كَيْضُورْ وْكَيْقَلّْبْ عْلَى شِي وَاحْدْ بَاشْ يْفَرْسُه. 9إِيوَا قَاوْمُوهْ وْبْقَاوْ تَابْتِينْ فْالْإِيمَانْ، وْعَرْفُو بْلِّي خُوتْكُمْ الْمُومْنِينْ فْالدّْنْيَا كُلّْهَا كَيْقَاسِيوْ بْحَالْ هَادْ الْعْدَابْ. 10وْالْإِلَاهْ دْيَالْ النِّعْمَة كُلّْهَا اللِّي عَيّْطْ لِيكُمْ لْلْعَزّْ دْيَالُه الدَّايْمْ فْالْمَسِيحْ يَسُوعْ، قَادْرْ يْرَدّْكُمْ مْكْمُولِينْ وْتَابْتِينْ وْقْوِيِّينْ وْوَاقْفِينْ عْلَى الصَّحْ مْنْ بَعْدْمَا تْعَدّْبْتُو شِي وَقْتْ قْلِيلْ. 11لِيهْ الْقُوَّة دِيمَا وْعْلَى الدّْوَامْ. آمِينْ.

السّْلَامْ

12كْتَبْتْ لِيكُمْ هَادْ الرِّسَالَة الْقْصِيرَة عْلَى يْدّْ خُونَا سِلْوَانُسْ اللِّي كَنْعْتَبْرُه أَمِينْ، بَاشْ نْشَجّْعْكُمْ وْنْشْهَدْ لِيكُمْ بْلِّي هَادِي هِيَ نِعْمَةْ اللَّهْ الْحْقِيقِيَّة اللِّي نْتُمَ تَابْتِينْ فِيهَا.#الاعمال 15‏:22‏،40 13كَتْسَلّْمْ عْلِيكُمْ الجّْمَاعَة دْ الْمُومْنِينْ اللِّي خْتَارْهُمْ اللَّهْ وْاللِّي كَايْنِينْ فْبَابِلْ، وْكَيْسَلّْمْ عْلِيكُمْ حْتَّى وْلْدِي مَرْقُسْ.#الاعمال 12‏:12‏،25؛ 13‏:13؛ 15‏:37‏-39؛ كولوسي 4‏:10؛ فيلمون 24 14سَلّْمُو عْلَى بْعْضِيَّاتْكُمْ بْبُوسَة دْيَالْ الْمْحَبَّة. وْالْهْنَا يْكُونْ مْعَاكُمْ نْتُمَ كُلّْكُمْ اللِّي فْالْمَسِيحْ.

தற்சமயம் தேர்ந்தெடுக்கப்பட்டது:

بُطْرُسْ اللّْوّْلَى 5: MSTD

சிறப்புக்கூறு

நகல்

ஒப்பீடு

பகிர்

உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்

الترجمة المغربية القياسية பற்றி மேலும் அறிக

بُطْرُسْ اللّْوّْلَى 5