Luka 2
2
Arebutwa ra Yesu
(Mat 1:18-25)
1Mwa kianiro umo, Kaisari Kosite amwami mukulu we Roma, nianabula mbu abandu ba mwa bihuo byoshe bya teekire baye kwa fishi#2:1 fishi : Kaisari Kosite akolesaa afishi kwebula mbu kutabaa kiro na mundu yangatindehora akoli ya Kaisari.. 2Afishi nchondotsi iyo yaibwaako mwa kianiro Kiriniusi abaa mukulukulu wa kyango kye Suriya. 3Abandu boshe niabanaya kwa fishi, kintsi mundu kwa mutsi uwe wa bubutwa.
4Yosefu naye nianatoka i Nasareti mwa kyango kye Ngalilaya. Nianaya i Yuteya, mwa mutsi wo mwami Ndauti abutirwaamo, walukwa mbu Betelehemu. Ayaeyo, kubwishi ni wa mwa kipfunga kya mwami Ndauti. 5Mweya kwa fishi, aenda ne Mariya yabaa amehangira, naye ni mukule wa kalembelembe. 6Babere bahika i Betelehemu, akashangi ka rebuta ra Mariya niakanaeraho. 7Nianabuta mwana uwe mubere wa butsana. Nianamutondeka mu ngobi, abanemuonchitsa mu kitsinga, kureba bahushaa buonchiro mwe chumbi.
Malaika apfulirao abasumba ku Yesu amebutwa
8Na mwa kihuo umo ho ni muli basumba. Abasumbabo ni bali mwa bihya ni abakereresa mwe kiro kwelanga abihyo byabo. 9Mu kashalimo malaika wa Ninakuwetu nianapfumbukira kubo, na ngulu ya Ninakuwetu niainakoletsabo kwa myunda yoshe. Niabanatsimbwa na buba bungi. 10Wetuwe, malaika nianabwirabo mbu: «Mutaubahaa kubwishi nibahetere Mwatsi Mubuya wakamoya abandu boshe kutsibu. 11Munolwire, mwamebutirwa Muufutsi mwa mutsi wa Ndauti, naye ye Kirisitu, Ninakuwetu. 12Na kano ko kalolero ko kakababwerekya ku yoyo: mukashingana ancholyana ni itondekirwe mu ngobi neonchitsibwa mu kitsinga.»
13Mu kashalimo, amalaika uyo nianaxungwa kuuma na kichiri kinene kya bandi bamalaika bo batenga mu mbingu, ni abasingya Ongo mbu:
14«Ongo ahabwe ngulu mu mbingu,
na bandu baranatsiira mwa kihuo babe na buholo.»
Abasumba baya i Betelehemu kwetangula ancholyana
15Inyuma kwaho, abamalaika niabanasiya abasumba, bafuluka mu mbingu. Niyo abasumba babutsabutsanya mbu: «Eo! tuye Betelehemu, nge twayexunga akinwa kyo kyameba iyo, kyo Ninakuwetu ametubwira.» 16Niabanaihuta kweyayo, batimana Mariya ne Yosefu na ncholyana yo ionchitsibwe mu kitsinga. 17Babere bamexunga ancholyana, baya ipfula amwatsi wo malaika abwiraabo kuluenda amwana uyo. 18Na bandu boshe bo bahulikyaa amwatsi wa basumba bapfulaa, niabanashishala kutsibu. 19Wetuwe, Mariya nianabika abinwa byoshe ibyo mwa mwete uwe, ni yereanikirabyo lingi.
20Inyuma kwaho, abasumba abo niabanafuluka. Baenda niabaha Ongo yo ngulu nemusingya kwa byoshe byo bahulikyaa nelolako. Bairaa batyo kubwishi ni bameshingana abyoshe ni binali nga ko malaika abwiraabo.
Yesu atolwa itsina
21Yesu abere amebanda biro munane abutirwe, niabanamumonia. Niabanamuluka mbu ye Yesu. Nero ho, renetsina malaika amuhaa lubere Mariya akulehe.
Yesu aletwa mwa hekalu
22Inyuma kwaho, alwire lwa rehotsibwa ra Mariya ne Yosefu nialunaeraho nga ko aMuomba wa Musa ananeena. Niabanatwala amwana i Yerusalemu kwemubwerekya mwa mbere sa Ninakuwetu#2:22 Soma Balawi 12:2-6. 23kureba, kiandikirwe mwa Muomba wa Ninakuwetu mbu: «Kintsi lubere lwa mwana wa butsana, lwendekomibwa mwa mbere sa Ninakuwetu#2:23 Soma Mafuluko 13:2,12,15..» 24Niabanaleta kandi mutulo kwa Muomba wa Ninakuwetu uyo aneenire mbu: «Mautu mabiri neri byana bibiri bya makuku#2:24 Soma Balawi 12:8..»
Abutahwa bwa Simiyoni
25Mwa mulungu we Yerusalemu mwabaa muli mulume muuma ni ye Simiyoni. Ne Simiyoni uyo ni mundu wa butunganane, ni aubahire Ongo. Abaa alindire yakendechira aluanda lwe Isiraeli lo mikocho. Abaa ni aendibwa na Mutima Akomire. 26Na kandi, aMutima Akomire abaa ameotola imubwira mbu atendepfa buxondotsi axunge Kirisitu yakendetumwa ne Ninakuwetu. 27Simiyoni nianaingira mwa hekalu ya Ongo ni ameendibwa na Mutima Akomire. Mwa kashangi umo, ababuti ba Yesu bamuletamo kwebereretsa kwa amuomba ateekire. 28Simiyoni nianaangirira amwana, nianatangira isingya Ongo, mbu:
29«Ninakuwetu, amanihisa mo wanihaa wamebereretsao,
Tsene, ngye mukotsi wawe, wanganilika niipfire mu buholo!
30Kubwishi nameilolera kwa Muufutsi yo wametuma.
31Yo waiteanyaa mbu abe Muufutsi mwa mbere sa bandu boshe.
32Amuufutsi uyo yo kyaka kyarekoletsa abandu boshe.
Na kandi, ya kendeha alubuto lwawe Isiraeli yo ngulu.»
33Abinwa byoshi byo Simiyoni aneenaa kuluenda Yesu bishishatsa ababuti ba Yesu. 34Simiyoni nianaashanirabo, nianabwira Mariya, nina wa mwana, mbu: «Talola: Amwana uyu amebutwa kwetoya bandu bauma na kwebatula bandi bandu mwa Isiraeli. Endeba kalolero katengire ira mwa Ongo, wetuwe abandu bendeya buhaka kubwishi bwaye. 35Kubatyo, amianikire ya bandu bangi yo ibishirwe yendebishulwa kyenene. Nawe, Mariya, wendenuba ngakuno mundu yamexootwa bupanga mwa mwete.»
Amutahwakatsi Ana, asima Ongo
36Habaa mutahwakatsi muuma ni ye Ana. Ana uyo, Abaa mwali wa Fanuere, wa mwa kipfunga kya Ashere. Ana uyo abaa mukekulu. Anaikalaa myaka irindaho ne iba. 37Iba abere amepfa, nianashiba mwa buxumbakatsi mo myaka lunane nene. Abaa atatoka mwa hekalu ya Ongo kwemukolera, kiro na mwishi, mwihema na mwiihangira ilya. 38Mwa kashangi umo, naye ahika, netangira isingya Ongo. Abaa anapfula amwatsi wa Yesu kwa bandu boshe bobabaa balindirire kwe Ongo akaufula becha i Yerusalemu mwa minubo yabo.
Ababuti ba Yesu baxuba i Nasareti
39Ababuti ba Yesu babereretsa abyoshe bya Muomba wa Ninakuwetu abaa ateekire. Kubatyo, niabanafuluka ira mwabo, mwa mulungu we Nasareti, mwa kyango kye Ngalilaya. 40Yesu nianauxuka nebiriita. Abaa muteateanya, na lukoo lwa Ongo ni luli kuuma naye.
Yesu mwa hekalu ya Ongo
41Kintsi mwaka, ababuti ba Yesu babaa banaya i Yerusalemu mwa lwire lukulu lwa Pasaka. 42Yesu abere ahara na myaka ikumi nebiri, nianaya i Yerusalemu kuuma na babuti bewe mwa lwire lukulu ulo kweimitsanya na ndungo ya Bayahuti#2:42 Mwa Bayahuti, amwana wa butsana ameba na myaka ikumi nebiri, ni ahara ali mwa luero lwa bandu bo bangaingira mwa hekalu. Soma Muubuko 6:1–8:16; Isaya 11:1-2; Miani 20:11.. 43Abiro bya Pasaka byabere byametsuka, ababuti ba Yesu niabanafuluka kwa wabo. Wetuwe, amwana Yesu, iye, nianasiala i Yerusalemu. Na babuti bewe batakengula ku amesiala. 44Nabo bereanikira mbu ali kwa muoba. Babere bamekola luendo lwa mubitsi, niabanatangira imuxondera mwa banyakyabo na mu bo bechene nabo. 45Wetuwe, bamuhusha. Kubatyo, niabanaxubula i Yerusalemu ni abamuxonda.
46Inyuma ya biro bishatu, bamutimana mwa hekalu ya Ongo ni aikere mwa kati ka beisa ba Muomba, ni ahulikyabo nebutsabo. 47Aboshe bobabaa abamuhulikya niabashishala kutsibu kubwishi bwa bwenge buwe na mixubitse iwe. 48Ababuti babere bamuxunga, niabanashishala kutsibu. Niyo nina amubwira mbu: «We mwana wani iwe! Kubwishi bwaki wangatukolera iki? Talola kwingye ne ixo twamekuxonda mu mushiki mungi!» 49Naye nianabula mbu: «Amunixonderaki? Mbeni mutechi ku nishushire iba mwa nyumba ya Tata?» 50Wetuwe, abinwa byabaa abwirabo, batamenyabyo.
51Niyo Yesu afuluka kuuma nabo i Nasareti. Naye abaa anakola abyoshe bya babuti bewe babaa banamubwira. Abinwa byoshe ibyo, nina nianabikabyo mwa mwete uwe. 52Yesu nianauxuka nebiriita mu buteateanya, nemoya Ongo na bandu.
தற்சமயம் தேர்ந்தெடுக்கப்பட்டது:
Luka 2: HKE
சிறப்புக்கூறு
பகிர்
நகல்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
@2025 GROUPE D'ASSOCIATIONS POUR LA PROMOTION DES LANGUES, CULTURE ET DEVELOPPEMENT INTEGRAL "GAPLCDI"
