Lom 9
9
Nyɔ tɛ̀ tsaa bɛniiŋ bɛ Isɛlɛɛ le be ni be nuuŋ bɛniiŋ bee
1Fiee fi ŋgii ni ntiiti dɛɛni fini nuuŋ chɛɛŋ si wi wu Krai. N'yɛŋgi yɛ kɛ. Shéŋ yɛŋ teendi yɛɛ kɛti li tsaŋ yi Fiana yi Waaŋ li le n'yɛŋgi yɛ kɛ. 2Fi nuuŋ le ŋkɛmɔɔ nshiiŋ ŋge bɛ ntɔnyɛ wu mɛɛ yɛ kɛ li shéŋ yɛɛŋ, 3kii bɛŋwaanɛŋ bɛ kwɛɛŋ lɛ bɛ tɛɛ be nuuŋ ŋgɔŋ mɛ mumkpaŋ. Mbeechɔɔ le bee Nyɔ yi lɔɔ mi, mi se ŋgatɛ tɛɛ Krai kii be. 4Bɛniiŋ bani nuuŋ bɛniiŋ bɛ Isɛlɛɛ, Nyɔ tɛ̀ dzɔ be yi fɛ le be ni be nuuŋ bɔɔŋ bee, doonchɛ be bunɔŋa bwee si Nyɔ, ji leh bɛ be, nyɛ bɛnchi bee li tsaŋ yi bee, yi doonchɛ be si nuuŋ bɛ ni bɛ guundi yi, yi fɛ bɛŋkaachɛ bɛ be. 5Ɛ bɛniiŋ bɛ bɛte tee bɛ bee nuuŋ bɛniiŋ bɛ Nyɔ-ɔ bɛ bɛ kii be, Kinsofu ki Nyɔ tɛ̀ kaachɛ tɛ̀ gii ki nuuŋ le ki bɛ si wiwoŋ bɛ biɛ ki li kini ki bɛniiŋ bani-i. Tɛ ni tɛ nyɛɛ mpiaru mfi kwi ma nsiŋ li Kinsofu kini ki nuuŋ Nyɔ lɛ biee bichu lɛwe. Fi nuuŋ lɛ.
6Fiee fi Nyɔ tɛ̀ kaachɛ bɛniiŋ bɛ Isɛlɛɛ lu nuuŋ fi tɛ̀ ka li yee li kɛ, kifɛ ɛ bɛniiŋ bɛchu bɛ bɛ tɛ̀ biɛ li kini ki Isɛlɛɛ bɛ nuuŋ chɛɛŋ chɛɛŋ bɛniiŋ bɛ Isɛlɛɛ kɛ. 7Se fi nuuŋ yɛ tɛ̀ le ɛ bɔɔŋ bɛ bɛ biɛ li yih yi Abrahaŋ bɛchu bɛ nuuŋ bɔɔŋ bee chɛɛŋ chɛɛŋ kɛ. Fi nuuŋ si Nyɔ tɛ̀ tee li Abraha-aŋ le,
“Ɛ Adzi wu gii naa biɛ bɔɔŋ bɛ gii be gɛɛ bukooŋ bwo.”
8Fini doonchi le ɛ bɔɔŋ bɛ Abrahaŋ biɛ bɛchu bɛ nuuŋ bɔɔŋ bɛ Nyɔ-ɔ kɛ. Ɛ bɔɔŋ bɛ Nyɔ tɛ̀ kaachɛ Abrahaŋ lu bɛ bɛ dzɔ le ɛ bɔɔŋ bɛ Abrahaŋ. 9Nyɔ tɛ̀ gii yi feti ŋkaachɛ wuni yi tee le,
“Gii naa ni nuuŋ lɛ mfi lɛwa,
ŋkaari mbɛ, Saara se kɛmɛ ŋwaŋ wu nyuŋ.”
10Mɛɛŋ ki ba kɛ fini kwaa kɛ. Fiee si fini tɛ̀ ka tɛ bɛ Lɛbika wu te bɔɔŋ bee tɛ̀ nuuŋ Adzi kwaa wu te bɛtaa bɛsɛŋ. 11-12Mɔɔ fɛ bɛ tɛ̀ mɛɛŋ bɛ se naa bɛ biɛ maŋ yini, yi mɛɛŋ saa ki fɛ kɛ fiee fi dzeeŋ kɛ fi bifi kɛ, Nyɔ tɛ̀ tee li ni wu bee le,
“Wi wu kaaŋ gii naa ni nindi li ŋwaŋ wu bwi.”
Nyɔ tɛ̀ yɔ lɛ le yi doonchɛ le yi tsɛki wi yi biki li ntsawu we-e. Yi tsɛki yɛ kii nimɛ chimu chi wi niŋ kɛ. Yi tsɛki yi biki nuuŋ si yi wɛki. 13Fi fiɛɛ nɛɛ si bɛ tɛ̀ tsɛɛ le,
“Ntɛ̀ ŋkɔɔŋgi Yakɔ, mbaanɛ Ɛsau.”
Nyɔ kɔŋgisi fiee fi yi wɛki le yi fɛ li ŋkɔŋ wu yi-i
14Si fi nuuŋ lɛ, nuuŋ tɛ tuu tɛ ni tɛ tiiti le la? Fi se nuuŋ le Nyɔ feti yɛ tsaaŋ kɛ ni? Fi nuuŋ yɛ lɛ kɛ! 15Nyɔ tɛ̀ tee li Mɔɔsɛ le,
“Ŋgii naa ŋkɔɔ nshiiŋ li wi wu ŋkɔŋgisi,
ŋkɛmɛ nshiiŋ li wi wu ŋkɔŋgisi le ŋkɛmɛ-ɛ.”
16Bɛdɛɛni Nyɔ ti tsɛki yɛ wi biki si wiwoŋ kɔŋgisi kɛ, kɛ mɔɔ nuuŋ li nimɛ chi wi ni-iŋ kɛ. Tsɛki nuuŋ kii fɛ keeti nshiiŋ li bɛniiŋ li. 17Fini fiɛɛ nɛɛ si bɛ tɛ̀ tsɛɛ lɛ Kiŋwaati ki Nyɔ-ɔ, Nyɔ yeti li Fɛrɔ Mfɔŋ wu Ijip le,
“Ntɛ̀ mbiiŋgi wɛ si Mfɔŋ le ke se
ndoonchɛ buŋga bweŋ li yi ya,
bɛniiŋ gɛɛŋ bɛ bukooŋ bweŋ li kikoo ki nshɛ kichu.”
18Fini se doonchi le Nyɔ keeti nshiiŋ li wi wu yi kɔŋgisi-i, yi nyɛɛ kikoo ki tɛɛmɛ li wi wu yi kɔŋgisi le ni tɛɛmi kikoo.
19Wi wumu nuuŋ nɛɛ bii li mi laa, “Ɛ fi nuuŋ lɛ, Nyɔ se tuu yi gundi bɛniiŋ kii la? Wi wu nuuŋ faaŋ fiee fi Nyɔ kɔŋgisi le fi nuuŋ, ɛ noo?” 20Ɔ nuuŋ noo ɔ nuuŋ ɔ ni ɔ mɛki biee bɛ Nyɔ? Nuuŋ wi ma fiee fi kaari fi bii li wu laa, “Ɔ ma mi ni kii la le ni?” 21Wi wu mɛɛ sháŋ kɛmi buŋga lɛ chimɛ-ɛ lɛwe bu nuuŋ dzɔɔ kikeenɛ kimumkpaŋ ki chimɛ chilu ma biee lu chichi chichi, fimu ni fi kɛmi bufɛ bu shaaŋ fimu kɛmi bufɛ bu lɔɔlɔɔ. 22Fi fiɛɛ nɛɛ lɛ si Nyɔ feti. Yi tɛ̀ gii yi wɛki le yi doonchɛ sheŋ yee yi fuuti li bɛniiŋ li, yi tuu yi fɛ bɛniiŋ se kɛɛ buŋga bu yi-i. Se nuuŋ le yi tɛ̀ gbɛɛŋ yi kaŋ shéŋ bɛ bɛniiŋ bɛ tɛ̀ feti shéŋ fuuti yi bɛ be, mɔɔ nuuŋ si fi tɛ̀ nuuŋ le gii lɛɛshɛ be lɛ. 23Yi tɛ̀ fɛ lɛ dɛɛni le yi doonchɛ bunɔŋa bu yi-i bu ŋge bu nuuŋ li bɛniiŋ bɛ keeti nshiiŋ li bee. Bɛniiŋ bani nuuŋ bɛ tɛ̀ nachɛ kituŋ mɛɛŋ lindɛɛri le be gii be naa be kɛmɛ bunɔŋa bulu. 24Ɛ bee kibɛɛ bɛ nuuŋ bɛniiŋ bɛlu bɛ wu teeŋ. Nuuŋ yɛ Bɛjuu kwaa kɛ. Bɛniiŋ bɛ nuuŋ yɛ Bɛjuu kɛ baa fe tɛ. 25Ɛ nɛɛ fi fi Nyɔ tɛ̀ tee lɛ Kiŋwaati ki ntomfɔŋ we wu Hosia le,
“Bɛniiŋ bɛ nuuŋ yɛ bɛniiŋ beŋ kɛ,
ŋgii ni nteenyi be le, ‘Bɛniiŋ beŋ.’
Bɛ ntɛ̀ mbuu ŋkɔŋgisi yɛ be kɛ,
ni nteenyi be le, ‘Shéŋ yɛŋ.’”
26“Ɛ fɛ kintsii kini-i ki yi yi Nyɔ tɛ̀ tiiti li bɛniiŋ bɛlu le,
‘Nɛ nuuŋ yɛ bɛniiŋ beŋ kɛ,’
bɛ gii bɛ ni bɛ nteenyi be le,
‘Bɔɔŋ bɛ Nyɔ yi nuuŋ lu-u.’”
27Ɛsaya ntomfɔŋ wu Nyɔ tɛ̀ gii dii tɛ kii bɛniiŋ bɛ Isɛlɛɛ tiiti le,
“Nɛɛ si bɛniiŋ bɛ Isɛlɛɛ tɛ̀ yaŋ si mfwɛ mɛ li ŋgemɛ yi dzɔɔ li ni,
bɛ gii bɛ naa bɛ soo be nɛɛ niiŋ kwaa.
28Fi fiɛɛ le Nyɔ gii naa yi dza yi taa yi lɔŋ ŋgɛ
li kikoo ki nshɛ mfwaa mumkpaŋ yi mɛɛshi fiee fichu.”
29Ɛ wu wu Ɛsaya tɛ̀ saa kweeŋ le,
“Tɛ̀ gii nuuŋ yɛ le Taa Nyɔ yi kɛmi Buŋga Buchu
bachɛ bɔɔŋ li kini kisɛŋ nsiŋ,
bee nuuŋ yi lɛɛshɛ bee si kitoŋ ki Sɔdɔŋ,
mɔɔ ki Gɔmɔra.”
Bɛniiŋ bɛ Isɛlɛɛ faaŋ dze yi Nyɔ yi nuuŋ tsaaŋ
30Si fi nuuŋ lɛ, nuuŋ tɛ tuu tɛ tee le la? Nuuŋ tɛ tee le bɛniiŋ bɛ nuuŋ yɛ Bɛjuu kɛ bɛ tɛ̀ mɛɛŋ ki mɔnchɛ kɛ le be nuuŋ tsaaŋ lɛ Nyɔ lii kɛ baa dɛɛni tsaaŋ lɛ Nyɔ lii kii shéŋ yibe gɛɛ li yi-i. 31Se nuuŋ le, bɛniiŋ bɛ Isɛlɛɛ bɛ tɛ̀ gwenini le be nuuŋ tsaaŋ lɛ Nyɔ lii biki dze yi bɛnchi wɛki lɛjiŋ lɛlu, be ti mɛɛŋ ki nuuŋ kɛ tsaaŋ lɛ yi-i lii kɛ. 32Tɛ̀ nuuŋ kii la? Tɛ̀ nuuŋ kifɛ be tɛ̀ gwenini yɛ le be biee dze yi nuuŋ be gɛɛ shéŋ li Nyɔ-ɔ kɛ. Be biki nuuŋ dze yi nimɛ. Be fɛ lɛ be kɔtɛ li tɛtɛ chi bɛniiŋ kɔtini li chi-i. 33Tɛtɛ chini nuuŋ chi bɛ tsɛɛ kii chi le,
“Bichɛ yɛɛŋ nɛ ŋɛŋ, ŋgikɔɔ tɛtɛ li kitoŋ ki Sayɔ-ɔŋ,
nuuŋ tɛtɛ chi bɛniiŋ gii be ni be kɔtini li chi-i.
Kimbaŋ ki gii ki ni ki feti bɛniiŋ weyi.
Se nuuŋ le, ɛ wi gɛɛ shéŋ li wuu, mwɛ tɛ̀ tuu le nuuŋ bɛ buya kɛ.”
தற்சமயம் தேர்ந்தெடுக்கப்பட்டது:
Lom 9: asj
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2024 (Active), Wycliffe Bible Translators, Inc. All rights reserved.
