लाम्दिक् 29
29
निङ्वाॽफुसाम्बाहाॽ तोःम्मासि थिम्
1“खे़ङ्हाॽरे़ निङ्वाॽफुसाम्बा ताक्फाओ आङ्गाॽ आलागि माङ्से़वा याःम्बक् मे़जोगुर फाॽआङ् खे़ङ्हाॽ सेसे चोःक्मासि खे़ङ्हाॽरे़ खुन्छिॽ लागि चोःक्मा के़बोङ्बा याःम्बक्किन् आम्भा कन्लो—लत्छा पित्सात् नु ने़त्छि वरिक्लिक्पा मे़ल्लुक्हाॽ तारे़से़ॽआङ् त्ये़ॽ, 2हे़क्क्याङ् खरे़ःङ्, निःङ्गेॽओ सॽमनाबा चारःप्पा, निःङ्गेॽ हुःप्मनाबा पाॽपाःम्बा लोःत्तो, खे़ङ्हाॽ के़रे़क् के़भङ्बा सिदाॽ मे़न्याक्केबा चुन्जुम्बा मासि फेॽरुम्मिल्ले़न् चोगे़ॽ॥ 3हे़क्क्याङ् खे़ङ्हाॽ पक्वाओ केःत्ते़ॽआङ् खे़न् पक्वाःन्, से़गम्बा पित्ते़न् नु खे़न् ने़प्माङ् मे़ल्लुक्हाॽ तारे़से़ॽ॥ 4खे़न् एगाङ् तुम्मादे़न् साःङ्गाहिम्मोबा लाम्धेःत्तिल्ले़ कुबेसाङ् हारुने़न् नु खुने़ॽ कुस्साहाॽ तारे़से़ॽआङ् खे़ङ्हाॽ च्वाःत्तिल्ले़ वारुःप्से़से़ॽ॥ 5खे़न् चाङ्हाॽ तारे़ॽआङ् हारुने़न् लगेःप्, एपोदे़ल्ले़ कुसिगाङ्बा चाङ्, एपोद नु साःङ्बे से़ःप्चाङ् चाक्ते़ॽआङ् नुरिक्काङ् फमनाबा युम्मा फॽइःन् खे़ल्ले़ कुसम्धाङ् खेःक्खे़ पिरे़ॽ॥ 6खुने़ॽ कुधे़गेःक्पो खे़न् साम्म्याङ् इसेःङ्बा ले़प्पे़प्पा फे़तान् खुःक्ते़ॽ, फे़ताःल्ले़ कुसम्धाङ् सेसे तिचःन् फत्छे़ पिरे़ॽ॥ 7खे़न् एगाङ् माङ्थोःक्ना पिमा निःङ्गेन् याङ्सिङ्ङे़ॽआङ् खे़ल्ले़ कुधे़गेःक्पो ले़ःक्ते़ॽआङ् माङ्थोःक्ना पिरे़ॽ॥ 8हे़क्क्याङ् खे़ल्ले़ कुस्साहाॽ तारे़से़ॽआङ् खे़ङ्हाॽ लगेःप् तेत् चाक्ते़से़ॽ, 9हम्भ्याङ् खे़ङ्हारे़ खुन्छिॽ थे़गेःक्पो फे़ता खेःक्खे़ पिरे़से़ॽ॥ खे़ब्याङ् हारुने़न् नु खे़ल्ले़ कुस्साहाॽ फॽइ युप्ते़से़ॽ॥ सदादिङ् के़वाॽबा साक्थिक्लाम् खे़ङ्हाॽरे़ निङ्वाॽफुसाम्बा ताक्फा मे़घोसुॽ॥ कम्भलॽरिक् खे़ने़ॽ हारुने़न् नु खे़ल्ले़ कुस्साहाॽ निङ्वाॽफुसाम्बा याःम्बक्को युक्तिङ् चोगे़से़ॽ॥
10“तुम्मादे़न् साःङ्गाहिम्मिल्ले़ कुदगाङ् खे़न् से़गम्बा पित्ते़न् तारे़ॽ, हे़क्क्याङ् हारुने़न् नु खुने़ॽ कुस्साहाॽरे़ से़गम्बा पित्ते़ल्ले़ कुधे़गेःक्पो खुन्छिॽ हुक्हाॽ मे़ने़स्सुर॥ 11खे़न् से़गम्बा पित्ते़न् यहवे दाङ्बे़ल्ले़ कुदगाङ् तुम्मादे़न् साःङ्गाहिम्मोबा लाम्धेःत्तिल्ले़ कुदगि वयागे़न् सिदुङ्जभा चोगे़ॽ॥ 12से़गम्बा पित्तिल्ले़ कुभा कुमाक्खिॽजि याङ्सिङ्ङे़ॽआङ् ले़त्ति तोःम्मादे़न्निल्ले़ कुदाङ्हाॽओ खे़ने़ॽ के़हुक्चोःल्ले़ हुःत्ते़ॽ, हे़क्क्याङ् खे़ल्ले़ के़नम्बा कुमाक्खिन् ले़त्ति तोःम्मादे़न्निल्ले़ कुबुङ्ङो हुक्खे़ॽ॥ 13हे़क्क्याङ् खे़ने़ॽ कुहिदुत् कुधे़गाङ् के़दे़प्पा कुसोःत्हाॽ नु कुलुङ्माॽओबा सान् हे़क्क्याङ् ने़प्माङ् कुले़म्भेःम्माहाॽ नु खे़ल्ले़ कुसम्मोबा कुसोःत्तिन् याङ्सिङ्ङे़ॽआङ् ले़त्ति तोःम्मादे़न्नो मिधिक्खे़देसे़ॽ॥ 14कर से़गम्बा पित्छान् नु खे़ल्ले़ कुहोरिक्पान् हे़क्क्याङ् कुहिदुत् कुधे़गाङ्हाॽ साःङ्गाहिम्मोलाम् लाःक्कात् मिओ मिधिक्खे़देसे़ॽ॥ खे़ङ्ग लायोलाम् ले़प्मि खोमा सिदुङ्जभारो॥
15“याम्मो लत्छा थुःम्बा थिक् याङ्सिङ्ङे़ॽ, हे़क्क्याङ् हारुने़न् नु खुने़ॽ कुस्साहाॽरे़ थुःम्बाःल्ले़ कुधे़गेःक्पो खुन्छिॽ हुक्हाॽ मे़ने़स्सुर॥ 16थुःम्बाःन् वयागे़न् सिदुङ्जभा चोगे़ॽ हे़क्क्याङ् खे़ल्ले़ कुमाक्खिन् याङ्सिङ्ङे़ॽआङ् ले़त्ति तोःम्मादे़न् कब्रिङ् साक्खे़ॽ॥ 17खे़न् थुःम्बाःन् कुजक्ता कुले़म्दा खक्ते़ॽआङ् खे़ल्ले़ कुहिदुत् कुधे़गाङ्ङिन् नु कुलाङ्हाॽ वाहप्ते़ॽ खे़ब्याङ् खे़ल्ले़ कुजक्ता कुले़म्दाहाॽ नु कुधे़गेःक्किन्नुए सोरिक् ने़स्से़ॽ॥ 18खे़न् थुःम्बाःन् के़रे़क् ले़त्ति तोःम्मादे़न्नो मिधिक्खे़ॽ॥ खे़ङ्ग मिलाम्बा तोःम्मनाबा मिधिङ्मनादेमनाबा यहवे दाङ्बे़ल्ले़ कुसिराॽ के़धाङ्बा नु कुनाम् के़नुॽबा सिदुङ्जभारो॥
19“खे़ने़ॽ वेॽ मे़ल्लुक्थिक् याङ्सिङ्ङे़ॽ, हे़क्क्याङ् हारुने़न् नु कुस्साहाॽरे़ मे़ल्लुक्किल्ले़ कुधे़गेक् सम्धाङ् खुन्छिॽ हुक्हाॽ मे़ने़स्सुर॥ 20खे़ब्याङ् मे़ल्लुक्किन् वयागे़न् सिदुङ्जभा चोगे़ॽ हे़क्क्याङ् खे़ल्ले़ कुभा कुमाक्खिॽजि याङ्सिङ्ङे़ॽआङ् हारुने़ल्ले़ कुजुक्वा कुन्भाक्को नु खुने़ॽ कुस्साहाॽरे़ खुन्छिॽ चुक्वा ने़भाक् खिओ, हे़क्क्याङ् खे़ङ्हाॽरे़ खुन्छिॽ चुक्वा हुक्कोबा हुक्माओ नु चुक्वा लाङ्ङोबा लाङ्माओ हुःत्ते़ पिरे़से़ॽ॥ खे़न् एगाङ् ले़त्ति तोःम्मादे़न्निल्ले़ कुयाम्ले़ङ्बे़न् सामाक्खिल्ले़ ले़ःक्ते़ॽ॥ 21हे़क्क्याङ् ले़त्ति तोःम्मादे़न्नो के़युङ्बा सामाक्खिन् नु माङ्थोःक्ना पिमा निःङ्गेॽओलाम् आजे़ःत्छिक् याङ्सिङ्ङे़ॽआङ् हारुने़न् नु खुने़ॽ कुजाङ्हाॽओ हे़क्क्याङ् खुने़ॽ कुस्साहाॽरे़ खुन्छिॽ सम्धाङ् नु खुन्छिॽ चाङ्हाॽरे़ कुसम्धाङ् साक्खे़ॽ॥ कम्भलॽरिक् खुने़ॽ, खुने़ॽ कुस्साहाॽ नु खे़ङ्हाॽ के़रे़क्ले़ खुन्छिॽ चाङ्हाॽआङ् सेसेसाङ्साङ् पोङ्ॽ॥
22“खे़ने़ॽ खे़न् थुम्बाःल्ले़ कुसोःत्तिन् नु कुमिओबा कुसोःत्ते़न् हे़क्क्याङ् कुहिदुत् कुधे़गाङ् के़दे़प्पा कुसोत् पःत्थाङ्ङिन् नु कुलुङ्माॽओबा सान् खे़ब्याङ् कुसोःत्तिन्नु सोरिक्पा कुले़म्भेःप्मान् नु कुजुक्वा ले़प्माङ्बा कुलाङ्भे़ल्ले़क्मान् याङ्सिङ्ङे़ॽ॥ (खे़न् युक्तिङ् चोःक्मे़ल्ले़ ओगप्ले़ लागि तोःम्मनाबा थुःम्बारो॥) 23यहवे दाङ्बे़ल्ले़ कुदगि के़युङ्बा के़भङ्बा सिदाॽ मे़न्याक्केबा खरे़ःङ् के़याक्पा नाॽइमोलाम् लत्छा खरे़ःङ् हे़क्क्याङ् निःङ्गेॽओ ले़ःङ्मनाबा लत्छा चारःप्पा नु निःङ्गेॽ मेःन्नेबा खरे़ःङ्धिक् याङ्सिङ्ङे़ॽआङ् 24खे़ङ्हाॽ के़रे़क् हारुने़न् नु खुने़ॽ कुस्साहाॽरे़ खुन्छिॽ हुक्को ने़स्से़ पिरे़से़ॽ॥ खे़न् यहवे दाङ्बे़ल्ले़ कुदगि थाःङ् पङ्मनाबा सिदुङ्जभा कुइसिक् पक्खे़म्मे़ॽ॥ 25खे़ब्याङ् खे़ङ्हाॽरे़ खुन्छिॽ हुक्कोलाम् खे़ङ्हाॽ ताःक्ते़ॽआङ् यहवे दाङ्बे़ल्ले़ कुसिराॽ के़धाङ्बा कुनाम्नुॽमारे़ लागि मिधिङ्मनादेमनाबा वयागे़न् सिदुङ्जभाःन्नु सोरिक् ले़त्ति तोःम्मादे़न्नो मिधिक्खे़देसे़ॽ॥ कङ्ग यहवे दाङ्बे़ल्ले़ कुलागि मिलाम्बा तोःम्मनाबा सिदुङ्जभारो॥ 26हे़क्क्याङ् हारुने़ल्ले़ तोःन्दुबा थुःम्बाःल्ले़ कुसङ्बप्मे़न् याङ्सिङ्ङे़ॽआङ् यहवे दाङ्बे़ल्ले़ कुदगि थाःङ् पङ्मनाबा सिदुङ्जभा कुइसिक् पक्खे़ॽ॥ खे़न् खे़ने़ॽ के़लक् पोङ्ॽ॥
27“तोःम्मनाबा थुःम्बालाम् हारुने़न् नु खुने़ॽ कुस्साहाॽरे़ खुन्छिॽ लागि के़बोङ्बा थाःङ् पङ्मनाबा कुसङ्बप्मे़न् नु तोःम्मनाबा कुलाङ्भे़ल्ले़क्मान् सेसेसाङ्साङ् चोगे़ॽ हे़क्क्याङ् खे़न् खे़ङ्हाॽरे़न् पोङ्ॽ॥ 28हारुने़न् नु खुने़ॽ कुस्साहाॽरे़ लागि इस्राइलिहाॽरे़ आभे़ल्ले़साङ् लःप्मा के़बोङ्बा लक्किन् हाबा कन्लो, थेआङ्भे़ल्ले़ इस्राइलिहाॽरे़ खुन्छिॽ तङ्जुम् वयागे़न् सिदुङ्जभाहाॽलाम् यहवे दाङ्बाओ तोःम्मा के़बोङ्बा लक्किन् आम्भा खे़न्लो॥
29“हे़क्केलॽरिक् खे़ङ्हाॽ माङ्थोःक्ना मे़बोङ्ङाङ् युक्तिङ् मे़जोगुसिल्ले़ हारुने़ल्ले़ सेसे कुजाङ्हाॽ खुने़ॽ कुमुॽइदाङ्साहाॽरे़ खुन्छिॽ लागि पोङ्ल॥ हे़क्क्याङ् खे़ङ्हाॽरे़ खे़न् चाङ्हाॽ मे़जाक्खुर॥ 30हारुने़ल्ले़ कुले़क्वाओ निङ्वाॽफुसाम्बा के़बोङ्बा कुस्सान् तुम्मादे़न् साःङ्गाहिम्मोबा सेसेबादे़न्नो माङ्से़वा चोःक्से़ ताःल्ले़, नुसि ये़न् थारिक् खे़ल्ले़ खे़न् चाङ्ङिन् चाक्खुर॥
31“युक्तिङ् चोःक्मे़ल्ले़ ओगप् चोःक्मारे़ लागि तोःम्मनाबा थुःम्बाःन् याङ्सिङ्ङे़ॽ हे़क्क्याङ् खे़न् सान् लत्छा चक्खोबादे़न्नो थोःक्ते़ॽ॥ 32खे़न् एगाङ् हारुने़न् नु खुने़ॽ कुस्साहारे़ खे़न् थुःम्बा सान् नु नाॽइमाओ के़याक्पा खरे़ःङ्ङिन् तुम्मादे़न् साःङ्गाहिम्मोबा लाःप्मादे़न्नो मे़जर॥ 33खे़ङ्हाॽ युक्तिङ् नु सेसे चोःक्मासिरे़ लागि आत्तिन् आत्तिन् कुजाहाॽलाम् ले़प्मि मे़नाःक्तुआङ् मे़वये़, खे़न् कुजान् खे़ङ्हाॽरे़ मे़जर॥ कर कुभा वेॽ मनाहाॽरे़ खे़न् मे़न्जने़न्ल, थेआङ्भे़ल्ले़ खे़न् कुजाहाॽ सेसेबा चोक्॥ 34तोःम्मनाबा थुःम्बा सान् इग्र खरे़ःङ्हाॽ कुभा तानाम् थारिक् नन्ने़भग्र खे़न् के़नम्बा लक्किन् मिओ मिधिक्खे़देसे़ॽ॥ खे़न् चामा मे़नुॽने़न्, थेआङ्भे़ल्ले़ खे़न् सेसेबा चोक्॥
35“खे़ने़ॽ आङ्गाॽ पिने़बा के़रे़क् इङ्जाङ्हाॽ कुइसिक् हारुने़न् नु खुने़ॽ कुस्साहाॽरे़ लागि चोगे़ॽ॥ नुसि ये़न् थारिक्ले़ खे़ङ्हाॽ युक्तिङ् चोगे़से़ॽ॥ 36लायोल्ले़ लागि ले़प्मि नाःक्मा याःम्बक् चोःक्मारे़ लागि लायोलाम् ले़प्मि खोमा सिदुङ्जभा से़गम्बा पित्ते़न् खे़ने़ॽ थिक्याःन्धक्मा तोःन्दे़ॽ॥ खे़ब्याङ् चैतुन निःङ्गेल्ले़ ले़त्ति तोःम्मादे़न्निन् माङ्थोःक्ना चोगे़ॽआङ् सुत्थो चोगे़ॽ॥ 37नुसि ये़न् थारिक् ले़त्ति तोःम्मादे़न्निन्ले़ लागि खे़ने़ॽ लायोलाम् ले़प्मि नाःक्मा याःम्बक् चोगे़ॽर पत्छे़ॽ, हे़क्क्याङ् खे़न् सेसे चोगे़ॽ॥ अक्खेलॽरिक् ले़त्ति तोःम्मादे़न्निन् साॽरिक् सेसे पोङ्ॽ॥ थे़मा थे़माहाॽरे़ खे़न् ले़त्ति तोःम्मादे़न्निन् मे़सुसु खे़ङ्हाॽ सेसे मे़बोङ्लो॥
थिक्याःन्धक् तोःम्मा के़बोङ्बा सिदुङ्जभा
(खानिःत् २८:१-८)
38“आल्ल ले़त्ति तोःम्मादे़न्नो खे़ने़ॽ थिक्याःन्धक् तोःम्मा के़बोङ्बा पाःन्निन् हाबा कन्लो—तङ्बे थिक् के़गे़प्पा थुःम्बा ने़त्छि॥ 39लत्छा थुःम्बा तानाम् तोःन्दे़ॽ हे़क्क्याङ् लत्छा वेॽइन् युःन्छिक् तोःन्दे़ॽ॥ 40थिक्सिगेक्पा थुःम्बाःन्नु सोरिक् युमनाबा माना लिसि चैतुन निःङ्गेॽओ सॽमनाबा माना ने़त्छि फेॽरुम्, हे़क्क्याङ् सेजःङ्वा सिदुङ्जभारे़ लागि लितर थिक् चे़ल्ले़क्सेॽ सेजःङ्वा तोःन्दे़ॽ॥ 41वेॽ थुःम्बान् युःन्छिक् तोःन्दे़ॽ, हे़क्क्याङ् खे़न्नु सोरिक् तानाम् के़दोःन्दुबान् हे़क्के पोगुगे़न् कुजा सिदुङ्जभा नु सेजःङ्वा सिदुङ्जभा पोङ्ल॥ यहवे दाङ्बे़ल्ले़ कुलागि मिलाम् तोःम्मनाबा खे़न् कुनाम् के़नुॽबा सिदुङ्जभा पोङ्ॽ॥ 42खिनिॽ थाःक्थाःक्ले़ लागि यहवे दाङ्बे़ल्ले़ कुदगि तुम्मादे़न् साःङ्गाहिम्मोबा लाःप्मादे़न्निल्ले़ कुबेसाङ् खे़न् थिक्याःन्धक्पा मिधिङ्मनादेमनाबा वयागे़न् सिदुङ्जभा तोःम्मा पोङ्ॽ॥ हाबा खे़न् ते़न्नो आङ्गाॽ खे़ने़ॽनु पाःप्मारे़ लागि खे़ने़ॽ तुम्ने़ॽ॥ 43इस्राइलिहाॽनु आङ्गाॽ हाबा खे़म्मोए तुम्मा याःम्बक् चोगुङ्ॽ, हे़क्क्याङ् खे़न् साःङ्गाहिम्मिन् आङ्गाॽ आमिमिदिङ्ङिल्ले़ सेसे पोङ्ॽ॥
44“तुम्मादे़न् साःङ्गाहिम्मिन् नु ले़त्ति तोःम्मादे़न्निन् आङ्गाॽ सेसे चोगुङ्ॽ॥ हारुने़न् नु खुने़ॽ कुस्साहाॽआङ् आङ्गाॽ आलागि निङ्वाॽफुसाम्बा ताक्फाओ माङ्से़वा याःम्बक् चोःक्मारे़ लागि सेसे चोगुङ्सिङ्ॽ॥ 45आङ्गाॽ इस्राइलिहाॽरे़ खुन्छिॽ लुम्मो याङ्धोःक्का, हे़क्क्याङ् खे़ङ्हाॽरे़ खुन्छिॽ निङ्वाॽफुमाङ् पोङ्ङा॥ 46खे़ङ्हाॽरे़ खुन्छिॽ लुम्मो वाॽमा फाॽआङ् खे़ङ्हाॽ मिस्रलाम् के़लःप्पा के़भे़प्पान् आङ्गाॽ यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्आ फाॽआङ् खे़ङ्हाॽरे़ निङ्वाॽ मे़घोसुॽ॥ आङ्गाॽ यहवे दाङ्बा खे़ङ्हाॽरे़ खुन्छिॽ निङ्वाॽफुमाङ्आरो॥
தற்சமயம் தேர்ந்தெடுக்கப்பட்டது:
लाम्दिक् 29: LIF
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2009, 2023, Wycliffe Bible Translators, Inc. All rights reserved.