लाम्दिक् 25
25
सेसे साःङ्गाहिम्ले़ लागि ले़त्ति
(ला ३५:४-९)
1यहवे दाङ्बे़ल्ले़ मोसान् मे़त्तु, 2“आङ्गाॽ आलागि इस्राइलिहाॽरे़ हुक्वा मे़दारुर फाॽआङ् खे़ङ्हाॽ मे़त्ते़से़ॽ॥ के़रे़क्ले़ आबाङे खुन्छिॽ निङ्वाॽ हे़क्के मे़दोन्दुबा हुक्वान् खे़ने़ॽ आङ्गाॽ आलागि ताःक्ते़ॽ॥ 3खे़ङ्हाॽलाम्बा ताःक्मा के़बोङ्बा हुक्वाहाॽ हाबा कन्हाॽए पोङ्लो—साम्म्याङ्, युप्पा, कासा, 4लिप्लिङ्गे खिलाम् थाक्मनाबा चिरिक्, हिःक्यङ्यङ्बा, पारान्ला नु हे़ःत्ताङ्बा से़मुरिक्, मे़ःन्दाक् मुरिक्लाम् थाक्मनाबा चिरिक्, 5हे़ःत्ताङ्बा चाःम्मनाबा मे़ल्लुक् होरिक्हाॽ, के़रे़क्नुःल्ले़ नुबा साहोरिक्पाहाॽ, सिरिस सिङ्, 6सेमि हाःम्मारे़ लागि चैतुन निःङ्गेॽ, माङ्थोःक्ना चोःक्मा निःङ्गेॽरे़ लागि मारुक्हाॽ नु कुनाम् के़नुॽबा सुक्पारे़ लागि मारुक्हाॽ 7मानिङ्वाॽफुसाम्बाल्ले़ कुलागि एपोद हे़क्क्याङ् साःङ्बे से़ःप्चाङ्ङो वाःप्मनाबा अनिक्स मुधिङ्लुङ् नु वेॽ कुमे़न् के़घिःक्पा मुधिङ्लुङ्हाॽ॥
8“आङ्गाॽ मनाहाॽरे़ खुन्छिॽ लुम्मो वाॽमारे़ लागि खे़ङ्हाॽरे़ सेसेदे़न् थिक् मे़जोगुर पोङ्ॽ॥ 9आङ्गाॽ खे़ने़ॽ ओःन्धाक्ने़बा कुबि कुइसिक् खे़ने़ॽ सेसेदे़न् नु खे़ल्ले़ कुघे़म्सिङ्मा के़रे़क् सामा पुमाहाॽ चोगे़ॽओ॥
निङ्वाॽफुमाङ्ङिल्ले़ कुमाङ्हुप् सन्दोक्
(ला ३७:१-९)
10“खे़ङ्हाॽरे़ बबुल सिङ्ङिल्ले़न् लत्छा सन्दोक् मे़गाम्सुर॥ खे़ल्ले़ कुलाम्तिःन् हुक्सिक् ने़त्छिआङ् कुभ्रे़ःङ्, कुभे़रे़न् हुक्सिक् थिक्काङ् कुभ्रे़ःङ् नु कुलिङ्गे़न्निन् हुक्सिक् थिक्काङ् कुभ्रे़ःङ्बा पोङ्ल॥ 11खे़न् खे़ने़ॽ इसेःङ्बा साम्म्याङ्ङिल्ले़ सुःप्ते़ॽ॥ सिगाङ्, लाःक्कात् खे़ने़ॽ खे़न् सुःप्ते़ॽ॥ खे़ल्ले़ के़रे़क् पिसाङ् कुगःङ्ग्या फत्छे़ॽ॥ 12खे़ल्ले़ लागि लिसि साम्म्याङ् कुन्दुल्लोहाॽ योःन्दे़ॽआङ् खे़ल्ले़ लिसि कुलाङ्हाॽओ फत्छे़ॽ, कुन्दुल्लो ने़त्छि कत्नाहाङ् नु कुन्दुल्लो ने़त्छि नाहाङ् पत्ल पोङ्ॽ॥ 13खे़ब्याङ् खे़ने़ॽ बबुल सिङ्ङिल्ले़न् तक्लाङ्हाॽ चोगे़ॽआङ् खे़ङ्हाॽ साम्म्याङ्ङिल्ले़ सुःप्ते़ॽ॥ 14खे़न् तक्लाङ्हाॽ सन्दोक्को नाहाङ् कत्नाहाङ् के़बप्पा कुन्दुल्लोहाॽओ सन्दोक्किन् पङ्मारे़ लागि याक्ते़ॽ॥ 15खे़न् तक्लाङ्हाॽ सन्दोःक्कोबा कुन्दुल्लोहाॽओए पत्ल पोङ्ॽ, खे़न् तक्लाङ्हाॽ खे़प्मोलाम्बा मे़लःत्ते़न्ने़ॽ॥ 16आङ्गाॽ खे़ने़ॽ ने़त्छि साप्लुङ्हाॽ पिने़॥ खे़ब्याङ् खे़न् साप्लुङ्हाॽ खे़न् सन्दोक्को याक्ते़ॽ॥ खे़न् साप्लुङ्हाॽओ आङ्गाॽ आइङ्जाङ्हाॽ साप्ते़आङ् पत्॥
17“हे़क्क्याङ् साम्म्याङ् इसेःङ्बा लत्छा माङ्हुप् सन्दोक्किल्ले़ कुदे़प्फेॽ थिक् चोगे़ॽ॥ खे़ल्ले़ कुलाम्तिःन् हुक्सिक् ने़त्छिआङ् कुभ्रे़ःङ् नु कुभे़रे़न् हुक्सिक् थिक्काङ् कुभ्रे़ःङ् पोङ्ल॥ 18थवाःल्ले़ हिप्मना लःप्मनाबा ने़त्छि साम्म्याङ् करुबहाॽ माङ्हुप् सन्दोक्किल्ले़ कुदे़प्फेओबा कुया ने़प्माङ् ले़प्माङ् युङ्सिर पोङ्ॽ— 19हे़क्क्याङ् माङ्हुप् सन्दोक्किल्ले़ कुदे़प्फेःल्ले़ कुलाम्ति पिसाङ् ने़प्माङ् कुया ले़प्माङ् खे़न् करुबहाॽ फत्छे़से़ॽ॥ खे़न् करुबहाॽ लायोलाम् ले़प्मि खोमा कुदे़प्फेन्नु तुम्से़ॽआङ् लत्छा साम्म्याङ् कुआःत् हे़क्के निदे़त्ल चोगे़ॽ॥ 20खे़न् करुबहाॽ तक् नु तक् चोगे़से़ॽआङ् कुदे़प्फेओ युक्खे़से़ॽ॥ खे़ङ्हाॽरे़ खुन्छिॽ लाप्हाॽ थाःङ् ले़प्माङ् हप्फे़ फे़सुबा नु लायोलाम् ले़प्मि खोमा कुदे़प्फेन् ओमे़त्छुआङ् खुन्छिॽ लाप्पिल्ले़ सुःप्सुर पोङ्ॽ॥ 21ने़त्छि साप्लुङ्हाॽ सन्दोक्को याक्ते़से़ॽ हे़क्क्याङ् खे़ल्ले़ कुसम्धाङ् कुदे़प्फेःल्ले़ ते़प्ते़ॽ॥ 22हाबा खे़प्मो आङ्गाॽ खे़ने़ॽ तुम्ने़, हे़क्क्याङ् माङ्हुप् साप्लुङ् के़याक्पा सन्दोक्किल्ले़ कुसम्धाङ् ने़त्छि करुबहाॽरे़ खुन्छिॽ लुम्मोलाम् आङ्गाॽ इस्राइलबा मनाहाॽरे़ खुनिॽ लागि आङ्गाॽ के़रे़क् आधिम्हाॽ खे़ने़ॽ पिने़रो॥
निङ्वाॽफुमाङ्ङो तोःम्मनाबा खरे़ःङ् ने़मा चप्ते़न्
(ला ३७:१०-१६)
23“खे़ने़ॽ बबुल सिङ्ङिल्ले़न् लत्छा चप्ते़न् चोगे़ॽ॥ खे़ल्ले़ कुलाम्तिःन् हुक्सिक् ने़त्छि, कुभे़रे़न् हुक्सिक्थिक् नु कुलिङ्गे़न्निन् हुक्सिक् थिक्काङ् कुभ्रे़ःङ् पोङ्मा पोङ्ॽ॥ 24खे़न् इसेःङ्बा साम्म्याङ्ङिल्ले़ सुःप्ते़ॽ हे़क्क्याङ् के़रे़क् पिसाङ् साम्म्याङ् कुगःङ्ग्या फत्छे़ॽ॥ 25खे़न् के़रे़क् पिसाङ् हुक्ताप्पेॽ थिक् कुभे़रे़ के़बप्पा लत्छा कुगःङ्ग्या चोगे़ॽ, हे़क्क्याङ् खे़न् कब्रिङ् पिसाङ् खे़प्मो कुगःङ्ग्या फत्छे़ॽ॥ 26चप्ते़निल्ले़ कुलागि लिसि साम्म्याङ् कुन्दुल्लोहाॽ चोगे़ॽ, हे़क्क्याङ् खे़न् लिसि कुन्दुल्लोहाॽ खे़ल्ले़ लिसिए कुलाङ्हाॽरे़ कुसुक्पो फत्छे़ॽ॥ 27चप्ते़न् पङ्मा तक्लाङ्हाॽ याक्मा कुन्दुल्लोहाॽ कुगःङ्ग्याःल्ले़ कुबेसाङ् फत्छे़ॽ॥ 28खे़न् तक्लाङ्हाॽ बबुल सिङ्ङिल्ले़न् पोङ्ल॥ साम्म्याङ्ङिल्ले़ खे़न् सुःप्ते़ॽ, हे़क्क्याङ् खे़न् सन्दोक्किल्ले़ कुबङ्मा पोङ्ल॥ 29चप्ते़न्निल्ले़ कुलागि खे़ने़ॽ साम्म्याङ् इसेःङ्बा च्ये़त्थ्याहाॽ, साङ्ते़रे़ङ्हाॽ, हे़क्क्याङ् कुवा सिदुङ्जभा हुङ्मारे़ लागि फङ्ना नु खोर्याहाॽ थगे़ॽ॥ 30सन्दोक्किल्ले़ कुदगि ले़प्माङ् चप्ते़न्ने़न् युक्खे़ॽ हे़क्क्याङ् आङ्गाॽओ मे़दोन्दुबा खरे़ःङ्हाॽ आभे़ल्ले़साङ् चप्ते़न् सम्धाङ् मे़ने़स्सुररो॥
सेमियुङ्दे़न्
(ला ३७:१७-२४)
31“खे़ने़ॽ इसेःङ्बा साम्म्याङ्ङिन् फे़ःत्छे़ॽआङ् सेमियुङ्दे़न् थिक् चोगे़ॽ॥ खे़ल्ले़ कुयुक्नान् नु कुलाङ्हाॽ साम्म्याङ्ङिल्ले़न् चोगे़ॽ, खे़ल्ले़ कुघे़म्मारे़ लागि चोःक्मनाबा फुङ्, फुङ्फे़क्मे़ःत्तिन् नु चल्लाङ्ना खोर्याहाॽ लत्छा साम्म्याङ् कुलःप्लालाम्बा चोगे़ॽ॥ 32खे़ल्ले़ तुक्सि कुबोराक्हाॽओ सुम्सि कुबोराक्हाॽ सेमियुङ्दे़न् थिक्ले़प्माङ् नु सुम्सि कुबोराक्हाॽ वेॽ ले़प्माङ् के़लःम्बा पोङ्ल पोङ्ॽ॥ 33लत्छा कुबोराक्को खजङ्सेॽ फुङ् हे़क्तङ्बा सुम्सि चल्लाङ्ना खोर्या, हे़क्क्याङ् खे़न्नु सोसोरिक् कुभे़क्मे़त् नु कुभुङ्हाॽ पत्ल पोङ्ॽ॥ वेॽ कुबोराक्कोआङ् सुम्सिए कुभे़क्मे़त् नु कुभुङ्हाॽ पत्ल पोङ्ॽ॥ सेमि युङ्दे़न्लाम्बा के़लःम्बा खे़न् तुक्सिए कुबोराक्हाॽओ अक्तङ्बाए पोङ्ल॥ 34खे़न्नु सोसोरिक्, सेमि युङ्दे़न्निल्ले़ कुलाङ्ङो खजङ्सेॽ फुङ् हे़क्तङ्बा लिसि चल्लाङ्ना खोर्या, खे़ल्ले़ आप्फेक् कुभे़क्मे़त् नु कुभुङ्ङाङ् पत्ल पोङ्ॽ॥ 35सेमि युङ्दे़नलाम् के़लःम्बा थिक्सिगेक्पा कुगाप् पोराःक्किल्ले़ कुसिङ्गाङ् लत्छा कुभे़क्मे़त्, निसिगेक्पा कुगाप् सिगाङ् निसिगेक्पा कुभे़क्मे़त्, सुम्सिगेक्पा कुगाप् सिगाङ् सुम्सिगेक्पा कुभे़क्मे़त् तुक्सि कुबोराक्हाॽओबा ने़त्छि ने़त्छि कुबोराक् सिगाङ् लत्छा लत्छा कुभे़क्मे़त् पत्ल॥ 36सेमियुङ्दे़न्, कुभे़क्मे़त् नु कुबोराक्हाॽ के़रे़क् थक्मनाबा लत्छा साम्म्याङ् कुलःप्लालाम् चोगे़ॽ॥
37“सेमि युङ्दे़न्ले़ लागि नुसि छक्कङ्हाॽ चोगे़ॽ॥ खे़न् छक्कङ्हाॽ सेमियुङ्दे़न् तगि ले़प्माङ् थोॽमारे़ लागि हाःन्दे़ युक्खे़॥ 38खे़प्मोबा तःङ्ग्रेःल्ले़ कुभिःप्मा लाभिःत्हाॽ नु खे़प्मोबा माक्सुःन्दा ताःक्मे़न् इसेःङ्बा साम्म्याङ्ङिल्ले़न् चोगे़ॽ॥ 39सेमियुङ्दे़न्, छक्कङ् नु कन् के़रे़क् खे़म्सिङ्ल चोःक्मारे़ लागि तोरा#२५:३९ तोरा थिक्किन् सुम्बोङ्ङाङ् ङासि किलोग्राम पोङ्ॽ॥ थिक् इसेःङ्बा साम्म्याङ् याङ्सिङ्ङे़ॽ॥ 40आङ्गाॽ खे़ने़ॽ कोःक्माओ थो ओःन्धाक्ने़बा कुजोङ् कुइसिक् कन्हाॽ के़रे़क् सिङ्सिङ् ये़क्ये़क्काङ् चोगे़ॽओ॥
தற்சமயம் தேர்ந்தெடுக்கப்பட்டது:
लाम्दिक् 25: LIF
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2009, 2023, Wycliffe Bible Translators, Inc. All rights reserved.