लाम्दिक् 18
18
यित्रोःल्ले़ मोसान् तुमुॽ
1निङ्वाॽफुमाङ्ङिल्ले़ मोसान् नु खुने़ॽ आबाङे कुमना इस्राइलिहाॽरे़ लागि चोगुबा के़रे़क् पाःन्हाॽ, हे़क्क्याङ् आक्खेलॽरिक् यहवे दाङ्बाल्ले़ इस्राइलिहाॽ मिस्रलाम्बा लःत्तु फे़त्तुसिआङ् वये़, खे़न् पाःन्निन् मिद्याःन्बा निङ्वाॽफुसाम्बा मोसाःल्ले़ कुन्नुःप्पा यित्रोःल्ले़ खे़प्सु॥
2मोसाःल्ले़ कुमेत् सिप्पोराःन् कुम्बारे़ कुहिम्मो पाङ्घुदेसु, हे़क्क्याङ् कुभा ये़म् एगाङ् कुन्नुःप्पा यित्रोःल्ले़ सिप्पोराःन् 3हे़क्क्याङ् कुस्सा ये़म्बित्छा ने़त्छि गेर्सोम नु एलिएजरे़न् तारुसिआङ् यित्रोःन् मोसाओ त्ये़॥ मोसाःल्ले़ कुस्साधिक्ले़ कुमिङ् गेर्सोम मिङ् वाःत्तुआङ् वये़ थेआङ्भे़ल्ले़ खुने़ॽ पाःत्तु, “आङ्गाॽ वेॽ लाजेॽओ वे़प्मिबा पोःक्खाङ्ङाङ् युङाङ्॥” 4हे़क्क्याङ् खुने़ॽ वेॽ कुस्साःल्ले़ कुमिङ् एलिएजर मिङ् वाःत्तु, थेआङ्भे़ल्ले़ खुने़ॽ पाःत्तु, “आङ्गाॽ आम्बारे़ कुनिङ्वाॽफुमाङ्ङिल्ले़ फाॽराङ् हे़क्क्याङ् फारोल्ले़ कुदाभेओ थामालाम् ताङ्से़ःप्ताङ्॥”
5मोसाःल्ले़ साःङ्गाहिम् चोगुआङ् युङे़बा मुरे़क् खारे़क् थेआङ् के़होःप्पादे़न् सेसे कोःक्माल्ले़ कुबेसाङ् यित्रोःल्ले़ मोसाःल्ले़ कुस्सा ये़म्बित्छा ने़प्फुहाॽ नु कुमेःत्ते़न् फे़त्तुसिआङ् फे़रे़॥ 6यित्रोःल्ले़ मोसान् अक्तङ्बा इङ्घङ् हाक्तुआङ् वये़, “आङ्गाॽ खे़ने़ॽ के़न्नुःप्पे़न् खे़ने़ॽ के़मेःत् सिप्पोराःन् नु ने़प्फु के़स्सा ये़म्बित्छाहाॽ फे़त्तुङ्सिङ्ङाङ् खे़ने़ॽओ फे़न्नार पत्ता॥” 7कल्ले़चोगुल्ले़ खुने़ॽ कुदुम्से़ मोसान् लःन्दे़, हे़क्क्याङ् खुने़ॽ तुमुआङ् से़वा मे़त्तुर चुप् मे़त्तु॥#१८:७ खे़न् साक्थिम्मो कन् के़वाॽबा थिम् वये़॥ मोसाःल्ले़ खुने़ॽ कुन्नुःप्पे़न् लुङ्माॽ तुक्तुबा नु मिःम्जि मे़त्तुबा पाःन्निल्ले़न् ओसेःन्धाङ् वये़॥ खे़ङ्हाॽ खुन्छिॽ लुम्मो आक्खे के़लॽरि के़नुरि के़दासिबि फाॽआङ् सेःन्मे़दोसिङ् हे़क्क्याङ् मोसाःल्ले़ कुसाःङ्गाहिम्मो मे़लासे़॥ 8यहवे दाङ्बे़ल्ले़ इस्राइलिहाॽरे़ खुन्छिॽ लागि फारोन् नु मिस्रिहाॽ आक्खे मे़त्तुसि, हे़क्क्याङ् लाम्मो खे़ङ्हाॽरे़ आक्तङ्बा तुक्खे लाक्खे मे़दुमु, हे़क्क्याङ् यहवे दाङ्बाल्ले़ इस्राइलिहाॽ आक्खेलॽरिक् से़ःप्तुसि के़लॽबा पाःन्निन् मोसाःल्ले़ कुन्नुःप्पान् चे़क्तु॥
9मिस्रिहाॽरे़ खुन्छिॽ हुक्कोलाम् इस्राइलिहाॽ से़न्दुसिआङ् फे़त्तुसिल्ले़ खे़ङ्हाॽरे़ खुन्छिॽ लागि यहवे दाङ्बे़ल्ले़ चोगुबा के़रे़क् नुबा पाःन्हाॽरे़ चोगुल्ले़ यित्रोःन् साॽरिक् कुनिङ्वाॽ त्ये़॥ 10हे़क्क्याङ् खुने़ॽ मे़त्तु, “मिस्रिहाॽरे़ खुन्छिॽ हुक्कोलाम् नु फारोल्ले़ कुहुक्कोलाम् चोःक्युम्भो आबिबिबा यहवे दाङ्बे़ल्ले़ कुनारा पोररो॥ 11आल्ल यहवे दाङ्बे़न् वेॽ के़रे़क् माङ् साम्माङ्हाॽनुःल्ले़आङ् पयम् यम्बा चोःक्ले़त्छ फाॽआङ् आङ्गाॽ कुसिङ् निःत्तुङ्लो, थेआङ्भे़ल्ले़ मिस्रिहाॽरे़ इस्राइलिहाॽ कुनामे़न्छाॽ मे़मे़त्तुसिआङ् ताप्फे़ःल्लिक् मे़मे़त्तुसिल्ले़ खुने़ॽ खे़ङ्हाॽ ताङ्से़ःप्तुसि॥” 12खे़न् एगाङ् मोसाःल्ले़ कुन्नुःप्पा यित्रोःल्ले़ यहवे दाङ्बाओ मिधिङ्मनादेमनाबा वयागे़न् सिदुङ्जभा नु वेॽ सिदुङ्जभाहाॽ तोःन्दु॥ हे़क्क्याङ् हारुने़न् नु इस्राइलबा के़रे़क् लाम्लोबाहाॽ मोसाःल्ले़ कुन्नुःप्पा यित्रोःन्नु सोरिक् निङ्वाॽफुमाङ्ङिल्ले़ कुदगि सेसे कुजा चासे़ मे़द्ये़रो॥
खासे़न्लोःम्बाहाॽ सेःक्युक् मे़जोगुसि
(साम्यो इङ् १:९-१८)
13कुदाःन्दिक्मा मोसाःल्ले़ के़घेबा मनाहाॽ तङ्मासिरे़ खासे़न् लोःम्मा याःम्बक् चोगु हे़क्क्याङ् तानाम्माङ्धो युःन्छिक् थारिक्के खुने़ॽ खे़न् याःम्बक्को यागे़॥ 14मनाहाॽरे़ लागि मोसाःल्ले़ चोगुबा के़रे़क् याःम्बक्हाॽ मोसाःल्ले़ कुन्नुःप्पे़ल्ले़ निसुआङ् खे़न् सेःन्दोसु, “मनाहाॽरे़ लागि खे़ने़ॽ के़जोगुबा कन् याःम्बक्किन् थे़माबे? थेआङ् खे़ने़ॽरक् खासे़न् लोःन्छे़ एःक् के़युङ्बा, हे़क्क्याङ् कन् के़रे़क् मनाहाॽ तानाम्माङ्धो युःन्छिक् थारिक् खे़ने़ॽ के़गब्रिङ् हाबा मे़ये़प्पिङ्ग?”
15मोसाःल्ले़ मे़त्तु, “आङ्गाॽ अक्खेए चोःक्मा पोङ्ॽ थेआङ्भे़ल्ले़ मनाहाॽ आङ्गाॽओ निङ्वाॽफुमाङ्ङिल्ले़ कुनिङ्वाॽ कुसिङ्निःत्छे़ मे़दाःॽ॥ 16खे़ङ्हाॽरे़ खुन्छिॽ निङ्वाॽ मे़न्दङ्मा पान् वाॽने़भग्र खे़ङ्हाॽ आङ्गाॽओ मे़दाःॽ, हे़क्क्याङ् कुभा मना नु खुने़ॽ कुम्भुॽ कुन्साॽलुम्मो आङ्गाॽ खासे़न् लोःन्दुङ् पिरुङ्सिङ्ॽ, हे़क्क्याङ् खे़ङ्हाॽ निङ्वाॽफुमाङ्ङिल्ले़ कुधिम्हाॽ चे़क्तुङ्सिङ्ॽ॥”
17खे़ब्याङ् यित्रोःल्ले़ मे़त्तु, “कन् याःम्बक्किन् खे़ने़ॽ लाॽरु खे़म्दुर मे़न्जोःक्के के़वाॽ॥ 18खे़ने़ॽ नु खे़ने़ॽओ के़दाबा के़रे़क् मनाहाॽ के़नासि॥ थेआङ्भे़ल्ले़ कन् याःम्बक्किन् खे़ने़ॽ के़लागि साॽरिक् के़जाॽबा चोक्॥ कन् याःम्बक्किन् खे़ने़ॽरक् एःक् चोःक्मा के़न्छुक्तुन्ॽ॥ 19आङ्गाॽ खे़ने़ॽ के़लागि नुबा सुजा पिने़र पत्ता हे़क्क्याङ् निङ्वाॽफुमाङ्ङिन् खे़ने़ॽ ले़प्माङ् वाॽर॥ खे़ने़ॽ मनाहाॽरे़ खुन्छिॽ इङ्घङ्साबा के़बोङ्ङाङ् खे़ङ्हाॽरे़ खुन्छिॽ खेमा थक्मा पाःन्निन् निङ्वाॽफुमाङ्ङिल्ले़ कुदगि तारे़ॽ॥ 20खे़ने़ॽ खे़ङ्हाॽ निङ्वाॽफुमाङ्ङिल्ले़ कुधिम्हाॽ हुॽमासि पोङ्ॽ, हे़क्क्याङ् खे़ङ्हाॽ आक्खेलॽरिक् हिङ्मा पोङ्ॽ खे़ब्याङ् थे याःम्बक् चोःक्मा पोङ्ॽ, खे़न् पाःन्निन् खे़ङ्हाॽ हुॽरे़से़ॽ॥ 21कर के़रे़क् मनाहाॽओलाम् निङ्वाॽफुमाङ्ङिन्नु के़गिबा, सुम्बोधासाबा ये़म्बित्छाहाॽ सेगे़से़ॽ॥ खे़ङ्हाॽ मे़न्वाॽमनाबा पाःन्हाॽलाम् याङ्थक्मा के़जिःप्पा कुदोःप्मा मना मे़बोङ्ल॥ खे़ङ्हाॽ हे़न्छिङ् हे़न्छिङ्, किप्थिक् किप्थिक्, ङाबोङ् ङाबोङ् नु थिबोङ् थिबोङ् मनाहाॽरे़ लागि लाम्लोबा चोगे़से़ॽ॥ 22खे़ङ्हाॽरे़ चक्मे़ल्लॽए मनाहाॽरे़ खुन्छिॽ लागि खासे़न्लोःम्बा याःम्बक् मे़जोगुर॥ खे़ङ्हाॽरे़ के़रे़क् के़साक्पा तुःन्देॽ पाःन्हाॽ खे़ने़ॽओ ताःप्मा मे़सुक्तुॽ, कर चुक्पा ताङ्बा पाःन्हाॽ खे़ङ्हाॽरे़ आबाङे तङ्मा मे़सुक्तुॽ॥ हे़क्के के़जोगुल्ले़ खे़ने़ॽ के़लागि याःम्बक् चोःक्मा उसुरु पोङ्ॽ थेआङ्भे़ल्ले़ खे़ङ्हाॽरे़आङ् खे़ने़ॽ याःम्बक् चोःक्मा के़म्भाॽ॥ 23खे़ने़ॽ कन् याःम्बक्किन् के़जोगु हे़क्क्याङ् निङ्वाॽफुमाङ्ङिल्ले़आङ् आम्भा कन् इङ्जाङ्ङिन् के़बिने़भग्र, खे़ने़ॽ के़न्नाने़न्, हे़क्क्याङ् कन् मनाहाॽआङ् खुन्छिॽ निङ्वाॽ ताआङ् आबाङे हिम्हिम् मे़बेःक्॥”
24मोसाःल्ले़ खुने़ॽ कुन्नुःप्पे़ल्ले़ पाःत्तुबा पाःन्निन् खे़प्सु, हे़क्क्याङ् खे़ल्ले़ पाःत्तुबा हे़क्के के़रे़क् चोगु॥ 25मोसाःल्ले़ के़रे़क् इस्राइलिहाॽलाम् सुम्बोधासाबा मनाहाॽ सेगुसि, हे़क्क्याङ् खे़ङ्हाॽ हे़न्छिङ् हे़न्छिङ्ले़ लागि लाम्लोबा, किप्थिक् किप्थिक्ले़ लागि लाम्लोबा, ङाबोङ् ङाबोङ्ले़ लागि लाम्लोबा नु थिबोङ् थिबोङ्ले़ लागि लाम्लोबा चोगुसि॥ 26खे़ङ्हाॽरे़ चक्मे़ल्लॽए मनाहाॽ खासे़न्लोःम्बा हे़क्के मे़भाॽरुसि॥ के़साक्पा मे़न्दङ्मनाबा पाःन्हाॽ चाहि खे़ङ्हाॽरे़ मोसाओ मे़दारु, कर के़रे़क् चुक्पा ताङ्बा खेमा थक्मा पाःन्हाॽ खे़ङ्हाॽरे़ आबाङे मे़दङ्घु मे़बिरुसि॥
27खे़न् एगाङ् मोसाःल्ले़ यित्रोःन् लाम्मे़त्तुदेसु हे़क्क्याङ् यित्रोःन् कुलाजेॽओ नुःक्खे़रो॥
தற்சமயம் தேர்ந்தெடுக்கப்பட்டது:
लाम्दिक् 18: LIF
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
© 2009, 2023, Wycliffe Bible Translators, Inc. All rights reserved.