NUMEROS 18
18
Ang Bahin nga sa mga Sacerdote kag mga Levinhon
1Gani ang Ginoo nagsiling kay Aaron, “Ikaw kag ang imo mga anak kag ang imo baranggay kaupud nimo magaantus sang kalautan sa kaangtanan sa santuario; kag ikaw kag ang imo mga anak kaupud nimo magaantus sang kalautan sa kaangtanan sa inyo pagkasacerdote. 2Papalapita upud sa imo ang imo mga utud man, ang kabikahan ni Levi, ang kabikahan sang imo amay, agud nga mag-impon sila sa imo, kag mag-alagad sa imo samtang nga ikaw kag ang imo mga anak upud sa imo manginsa atubangan sang layanglayang sang pagpamatuud. 3Bantayan nila ang imo talatapon kag ang talatapon sang bug-os nga layanglayang; apang dili sila magpalapit sa mga gamit sang santuario ukon sa halaran, agud nga indi sila, kag kamo, mapatay. 4Isimpon sila sa imo, kag magbantay sang talatapon sang layanglayang nga tiliponan, nga sa bug-os nga pag-alagdan sang layanglayang; kag ang dumuloong indi magpalapit sa inyo. 5Kag bantayan ninyo ang talatapon sang santuario kag ang talatapon sang halaran, agud nga wala na sing kasingkal sa katawohan sang Israel. 6Kag yari karon, ginkuha ko ang inyo mga utud nga Levinhon gikan sa tunga sang katawohan sang Israel; gindolot sila sa inyo, nga ginhatag sa Ginoo, sa paghimo sang pag-alagdan sa layanglayang nga tiliponan. 7Kag ikaw kag ang imo mga anak kaupud nimo magabantay sang inyo pagkasacerdote sa tagsa ka butang sang halaran kag sang yara sa sulud sang kumbung; kag mag-alagad kamo. Ginahatag ko sa inyo ang pagkasacerdote subong nga pag-alagdan nga dolot, kag ang dumuloong nga magpalapit patyon.”
8Niyan ang Ginoo nagsiling kay Aaron, “Kag yari karon, ginhatag ko sa imo nga talatapon ang akon mga halad-nga-binayaw, ang tanan nga butang nga balaan sang katawohan sang Israel; ginhatag ko sila sa imo bangud sang paghaplas, kag sa imo mga anak nga bahin nga dayon. 9Ini mangin-imo sang mga butang nga labi gid kabalaan, nga nabilin gikan sa kalayo; ang tagsa nila ka halad, ang tagsa nila ka halad-nga-kalan-on kag ang tagsa nila ka halad-tungud-sa-sala, kag ang tagsa nila ka halad-sa-paglapas, nga ihatag nila sa akon, manginlabi gid kabalaan sa imo kag sa imo mga anak. 10Kaonon mo ini subong nga labi gid kabalaan nga mga butang; ang tagsa ka lalaki magakaon sini; manginbalaan ini sa imo. 11Kag ini imo, ang mga halad-nga-binayaw sang ila mga dolot, ang tanan nga halad-nga-hinabog sang katawohan sang Israel; ginhatag ko sila sa imo, kag sa imo mga anak nga lalaki kag sa imo mga anak nga babayi upud sa imo, subong nga bahin nga dayon; ang tagsa nga matinlo sa imo panimalay magakaon sa sini. 12Ang tanan nga labi gid kaayo sang lana, kag ang tanan nga labi gid kaayo sang duga sang uvas kag sang uyas, ang ali nga nahaunang mga bunga sang ginahatag nila sa Ginoo, ginahatag ko sa imo. 13Ang nahaunang loto nga mga bunga sang tanan nga yara sa ila duta, nga ginadala nila sa Ginoo, mangin-imo; ang tagsatagsa nga matinlo sa imo panimalay magakaon sini. 14Ang tagsa ka butang nga napahanungud#Lev. 27:28. sa Israel mangin-imo. 15Ang tagsa ka butang nga panganay sang taguangkan sang tanan nga unud, nga ginadolot nila sa Ginoo, sang tawo ukon sapat, mangin-imo; walay sapayan ang panganay sang tawo gawaron mo, kag ang panganay sang dimatinlo nga mga sapat gawaron mo. 16Kag ang mga galawaron sa ila (kutub sa isa ka bulan gawaron mo sila) sono sa imo pagpabili sa cuarta nga lima ka siclo, sono sa siclo sang santuario, nga duha ka pulo ka gera. 17Apang ang panganay sang baka, ukon ang panganay sang carnero, panganay ukon ang panganay sang kanding, dili mo paggawaron; balaan sila. Iwisik mo ang dugo nila sa ibabaw sang halaran, kag sonogon ang ila sapay nga sa halad tungud sa kalayo, nga maamyon sa Ginoo; 18apang ang unud nila mangin-imo, subong sang hinabog nga dughan kag subong sang paa nga too mangin-imo. 19Ang tanan nga halad-nga-binayaw sang mga butang nga balaan nga ginadolot sa Ginoo sang katawohan sang Israel nahatag ko sa imo, kag sa imo mga anak nga lalaki kag sa imo mga anak nga babayi upud sa imo, subong nga bahin nga dayon; ini katipan sang asin nga dayon sa atubangan sang Ginoo sa imo kag sa imo kaliwat upud sa imo.” 20Kag ang Ginoo nagsiling kay Aaron, “Wala ka sing panublion sa duta nila, ukon bisan ano nga bahin sa tunga nila; ako amo ang imo bahin kag imo panublion sa tunga sang katawohan sang Israel.
21“Sa mga anak ni Levi nahatag ko ang tanan nga ikapulo#Lev. 27:30-33; Deut. 14:22-29. sa Israel subong nga panublion, nga balus sa ila pag-alagad nga ila ginaalagad, ang pag-alagdan sa layanglayang nga tiliponan. 22Kag kutub karon ang katawohan sang Israel dili magpalapit sa layanglayang nga tiliponan, basi nga makasala sila, kag mapatay. 23Apang ang mga Levinhon maghimo sang pag-alagdan sang layanglayang nga tiliponan, kag sila magaantus sang ila kalautan; palatukuran ini nga dayon sa inyo mga kaliwatan; kag wala sing panublion sila sa tunga sang katawohan sang Israel. 24Kay sa mga Levinhon ginhatag ko nga panublion ang mga ikapulo sang katawohan sang Israel, nga ginadolot nila sa Ginoo subong nga halad-nga-binayaw; busa nagsiling ako sa ila nga wala sila sing panublion sa tunga sang katawohan sang Israel.”
25Kag ang Ginoo nagsiling kay Moises, 26“Labut pa isiling mo sa mga Levinhon, ‘Kon magkuha kamo gikan sa katawohan sang Israel sang ikapulo nga ginhatag ko sa inyo nga inyo panublion gikan sa ila, niyan magdolot kamo gikan sini sing halad-nga-binayaw sa Ginoo, ang ikapulo sang ikapulo. 27Kag kabigon sa inyo ang inyo halad-nga-binayaw, subong nga patubas sang linasan, kag subong sang pagkapuno sang linasan sang uvas. 28Gani magdolot kamo sing halad-nga-binayaw sa Ginoo gikan sa tanan ninyo nga ikapulo, nga inyo nabaton gikan sa katawohan sang Israel; kag gikan sini maghatag kamo sang halad-nga-binayaw sang Ginoo kay Aaron nga sacerdote. 29Gikan sa tanan ninyong dolot, magdolot kamo sang tagsa ka halad-nga-binayaw sa Ginoo, gikan sa tanan nga ali sa ila, ang bahin nila nga pinakabalaan gikan sini.’ 30Busa isilang mo sa ila, ‘Kon magbayaw kamo sang ali gikan sini, niyan kabigon ini sa mga Levinhon subong nga patubas sang linasan, kag subong nga patubas sang linasan sang uvas; 31kag magkaon kamo sini sa bisan diin nga duug, kamo kag ang inyo mga panimalay; kay ini inyo sohol nga balus sang inyo pag-alagad sa layanglayang nga tiliponan. 32Kag dili kamo magpakasala bangud sini, kon mabayaw ninyo ang ali sini. Kag dili ninyo pagpasipalahan ang balaan nga mga butang sang katawohan sang Israel, agud nga indi kamo mapatay.’”
தற்சமயம் தேர்ந்தெடுக்கப்பட்டது:
NUMEROS 18: ABHIL82
சிறப்புக்கூறு
நகல்
ஒப்பீடு
பகிர்
உங்கள் எல்லா சாதனங்களிலும் உங்கள் சிறப்பம்சங்கள் சேமிக்கப்பட வேண்டுமா? பதிவு செய்யவும் அல்லது உள்நுழையவும்
Ang Biblia ©1982 Philippine Bible Society