Soma Biblia Kila Siku Juni 2021Mfano

Yesu anafundisha kuhusu ukuu katika ufalme wa Mungu: Mtu atakaye kuwa wa kwanza atakuwa wa mwisho kuliko wote, na mtumishi wa wote (m.35). Ni tofauti sana na ukuu katika ulimwengu huu. Wanafunzi walitumia kipimo cha ukuu katika ulimwengu huu ambacho ni mamlaka ya mtu. Lakini kipimo katika ufalme wa Mungu ni kutumika kwa mtu. Kwa maana Mwana wa Adamu naye hakuja kutumikiwa, bali kutumika, na kutoa nafsi yake iwe fidia ya wengi (10:45). Huwa huduma kwa watoto haihesabiki kuwa kazi yenye heshima sana. Ila kwa wafuasi wa Yesu hali inatakiwa kuwa tofauti kabisa. Hiyo Yesu anatufundisha katika m.36-37 kwa namna ifuatayo: Akatwaa kitoto, akamweka katikati yao, akamkumbatia, akawaambia, Mtu akimpokea mtoto mmoja wa namna hii kwa jina langu, anipokea mimi; na mtu akinipokea mimi, humpokea, si mimi, bali yeye aliyenituma. Je, unawapenda watoto?