Soma Biblia Kila Siku 10Mfano

Mfalme Sauli alikuwa anataka sana kumwua Daudi. Huyo alipokuwa amejificha kwa Samweli na kundi la manabii, Sauli alipata habari, akaja ili amkamate (19:22-23).  Daudi akakimbia tena, akatafuta msaada kwa rafiki yake Yonathani, mwana wa Mfalme. Alikuwa amejaa hofu: Iko hatua moja tu kati ya mimi na mauti(m.3). Inawezekana hata wewe umewahi kunusurika. Au sasa hivi unajiona u karibu na mauti, nawe unaogopa. Mpendwa, usihofu, bali umtumaini Bwana Yesu! Ujikabidhi kwake. Ni Mkuu! Akupenda! Soma Zab 91:1-16, maneno yake yatakutia moyo.