Roma 10
10
1Ĩsisãnawã norĩ, ĩpẽ'ẽ 're ĩma iwẽ uptabi hã, ĩsiré Zudeu norĩ hã tinho'reptuzé te te sina i'uwaimrami za'ra da si. Ãhã na 'Re ihâimana u'âsi mono wi, wa te te ãma 're rowaptẽrẽ za'ra. 2E marĩ wa. Wa hã ta norĩ 'madâ'â'wai wa, sena uptabi 'Re ihâimana u'âsi mono ma si, aimawi 're ihâimana za'ra mono na hã. Tane nherẽ, tãma 're ihâimana za'ra mono zé hã, sena na rowaihu'u hawib õ di. 3E marĩ wa. Ta norĩ hã te te waihu'u za'ra õ wa, niha zarina 'Re ihâimana u'âsi mono, i'uwaibaba na 're idahâimana za'ra mono na te te 're ida'a'madâ'â mono zé hã. Ãne wa, te sô 're sõpré, sihawi te te 're sõpẽtẽ za'ra mono da newa. Ta norĩ hã ma tô siwi wẽ'õ za'ra, niha zarina 'Re ihâimana u'âsi mono, i'uwaibaba na 're idahâimana za'ra mono na te te 're ida'a'madâ'â mono zé hã. 4E marĩ wa. Cristu hã Mozésihi nhimi'ui'éré na roti zahi hã te te 'rãtõ wa, ãne zarina uburé Cristu te te 're isaze za'ra mono norĩ hã, 'Re ihâimana u'âsi mono, i'uwaibaba na 're idahâimana za'ra mono na te te 're da'a'madâ'â mono da.
Danho'reptuzé hã, uburé isazei'wa norĩ ma hã
5Mozési hã ma tô rob'ui'éré, 'Re ihâimana u'âsi mono, i'uwaibaba na 're idahâimana za'ra mono na te te 're ida'a'madâ'â mono zém na, roti zahi na isimirob'ui'éré, da te 're i'madâ'â pese za'ra mono zarina, ãne: “Ni'wa hã 'Re ihâimana u'âsi mono nhimiroti zahi na rob'ui'éré te te i'ru te te 're a'manharĩ mono wamhã, taha zarina te za ihâimanazé isi'utõrĩ'õ hã tãma 're hâimana.” 6Tane nherẽ, 'Re ihâimana u'âsi mono, da te dasina 're i'umnhasi za'ra mono zéb zarina, i'uwaibaba na 're idahâimana za'ra mono na te te 're ida'a'madâ'â mono zém na ma tô Mozési hã ãma rob'ui'éré, ãne: “'Râwi asisadanharĩ tõ, ãne: E 'wa hã te za hâiwa u hã sai'u”, Cristuhu ãma we te te si'ra da. 7Duré niwamhã ãne hã asisadanharĩ tõ: “E 'wa hã te za si'ra, adâ 're ihâimana za'ra mono zéb u hã”, Cristuhu ãma ta hawi te te ãma sai'uri da hã. 8Ãne Ibaihâ Iwazé pese na rob'ui'éré hã: “'Re ihâimana u'âsi mono zadawa wasu'u hã ai'rata te tihâiba, asaihâ na, duré aipẽ'ẽ 're.” Ã hã isadawa wasu'u, da te dasina 're i'umnhasi za'ra mono zé, wa wa te dama 're 'mahârâ za'ra. 9Asadawa na nharĩ wamhã, ãne: “Zezusi hã Uburé Danhib'apito” duré 'Re ihâimana u'âsi mono, Zezusi te te ihâiwa'utu na aipẽ'ẽ 're sazei wamhã, ãne wamhã, asõ'reptuzé hã te za tô asina i'uwaimra. 10E marĩ wa. Dapẽ'ẽ na da te 're isaze za'ra mono zarina, 'Re ihâimana u'âsi mono hã i'uwaibaba na 're idahâimana za'ra mono na te te 're da'a'madâ'â mono wa. Duré dazadawa na danhimizaze na 're idasiwasu'u za'ra mono zéb zarina te za danho'reptuzé hã da te dasina 're uwaimrami za'ra. 11Ibaihâ Iwazé pese na rob'ui'éré hã te tinha, ãne: “Uburé te te 're isaze za'ra mono norĩ hã, niwa tiwi irowazéb za'ra da hã, mare uptabi di za.” 12Ã hã te uburé dama 're hâimana, aimawi õ na 're hâimana za'ra mono õ wa, Zudeu norĩ hã Zudeu'õ norĩ me hã. 'Re ihâimana u'âsi mono hã te Danhib'apito na 're hâimana tô, uburé dama hã. Duré ni'wam norĩ isimipawaptobzé te te tiwi 're iwaptẽrẽ za'ra mono norĩ ma, te iwẽ hã uburé te te tãma 're apisutu. 13Ibaihâ Iwazé pese na rob'ui'éré hã te tinha, ãne: “Ni'wam norĩ, Uburé Danhib'apito zô, isisi na sô 're ihãsi mono norĩ hã, uburé te za tinho'reptuzé hã te te sina 're uwaimrami za'ra.”
14Tane nherẽ, e niha te za ni'wam norĩ hã sina sô tihârâ za'ra, te te saze za'ra õ nherẽ. E niha te za tawamhã saze za'ra, isadawa wasu'u hã te te wapari za'ra õ nherẽ. E niha te za duré wapari za'ra, ni'wa hã te te tãma 'mahârâ za'ra õ nherẽ. 15E niha te za duré isadawa wasu'u hã 'mahârâ za'ra ni, romreme 'wapéi'wa norĩ hã Wanhib'apito te te itẽme satõrĩ za'ra õ nherẽ. Ibaihâ Iwazé pese na rob'ui'éré hã te tinha, ãne: “'Madâ'â zei uptabi di, Rowasu'uwẽ 'mahârâ'wa norĩ nimomo iré 're sihutu mono wamhã.”
16Tane nherẽ, uburé da te 're waibui wẽ mono õ di, Rowasu'uwẽ hã. Izaias hã ma tô ãma rob'ui'éré, ãne: “Uburé Danhib'apito, e 'wa hã te te wazazei bâ, wazadawa wasu'u na hã.” 17Tahawa, 'Re ihâimana u'âsi mono, da te dasina 're i'umnhasi za'ra mono zé hã, isadawa wasu'u, da te 're iwapari za'ra mono zém hawi, te dama 're hâimana za'ra. Duré isadawa wasu'u hã i'mahârâ'wa norĩ hawi, te da te 're wapari za'ra, Cristuhu wasu'uwẽ te te 're iwasu'u za'ra mono norĩ hawi.
18Tawamhã wa za anha, ãne: E tawamhã ta norĩ hã isadawa wasu'u te te 're wapari za'ra mono õ di bété. Ma tô te te 're wapari za'ra tô! Ibaihâ Iwazé pese na rob'ui'éré hã te tinha, ãne:
“Imreme za'ra hã ropâ ma tô te te 're ropé.
Imreme za'ra hã ma tô uburé ti'ai mono bâ te te 're ropé.”
19Wa za duré anha, ãne: E tawamhã ãne na hã, Izaraéu nhihudu norĩ te te waihu'u za'ra õ di bété. Tãma waihu'u pese za'ra di tô. Mozési hã imorĩ'rata na ma tô tãma waihu'u za'ra, 'Re ihâimana u'âsi mono hawim na, ãne:
“Wa za 'manha, za nimahã a'uwẽ norĩ hã 're sõ'ru za'ra wa'aba mono da, misi haré dawamri na 're ihâimana za'ra mono õ hã.
Wa za duré 'manha za, sada 're asahi za'ra wa'aba mono da, a'uwẽ 'rãnhimiza'rese ãna 're ihâimana za'ra mono norĩ zada.”
20Duré Izaias hã sib'ru na ma tô rob'mahâ, 'Re ihâimana u'âsi mono hawim na, ãne:
“Ĩzô 're irĩtĩ za'ra mono õ norĩ hã ma tô siwi ĩnhopẽtẽ.
Wa tô duré ĩsihâi'ré, ĩzô 're isinharĩ za'ra mono õ norĩ ma.”
21Tazahã, Izaraéu nhihudu norĩ na hã, 'Re ihâimana u'âsi mono ma tô tinha, ãne:
“Õne u'âsi, wa 're ĩnhimiwẽ, dawamri isimimreme 'madâ'â õ zô, duré ipẽ'ẽ tete norĩ zô hã.”
Iliyochaguliwa sasa
Roma 10: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
