Atus 21
21
Paulu hã Zeruzalẽ u imorĩzé
1Tawamhã wa te wasima ropéi parimhã, wa tô wasisa're uba're rowa'u'u na inem na, õne haré rob'ré za'idi Cosi u. Duré awẽm na hã wa tô wasisa're, Rodi na rob'ré za'iti nhisi u, uba're nhimizahârizéb u. Ta hawimhã wa tô ai'aba'ré ni, Patara na 'ri nho'õmo nhisi u. 2Tame, wa tô uba're rowa'u'u na ine hã wasiwi 'manhopẽtẽ ni, Fenisia u iwara da hã. Taha na wa tô asisi ni. Wawara na wa tô ãma uzusi za'ra ni. 3Rob'ré za'idi Chipri hã wa te oto 'madâ'â za'ra wamhã, wa tô wasisa'rei waré rob'ré za'iti nhimi'e niwĩ. Tawamhã wa tô wasisa're, Siria na danhipti'a nho'õmo nhisi u. Tiru ãma wa tô warere'e ni, tame uba're, marĩ te te iduri hã za da te sani za'ra wa. 4Tame 'ri wa'õtõ 'remhã wa tô sõpẽtẽ za'ra ni ni'wam norĩ Zezusihi zazei'wa norĩ hã. Isiré wa tô wahâimana za'ra ni, 7 na bâtâ 'remhã. Tawamhã ta norĩ hã 'Re ihâimana u'âsi mono Pẽ'ẽzani te te tãma waihu'u za'ra wa, ma tô Pauluhu ma nharĩ za'ra, Zeruzalẽ u hã morĩ tõ da. 5Tane nherẽ, bâdâ iwasi'aba'rézé iwa waptã'ã wamhã, wamorĩ na wa tô ãma uzusi za'ra ni. Tawamhã tame isazei'wa norĩ hã ma tô 'ri nho'õmo hawi wasiré ai'aba'ré, â zaihâ u, timro norĩ ré duré ti'ra norĩ ré zama. Tame wa tô uburé supara'ai wa wahi'rãtitõ asimro ni. Wa tô rowaptẽrẽ za'ra ni. 6Tawamhã wasisawi za'ra parimhã, uba're wa, wa tô oto asisi ni. Wasisãnawã norĩ hã apâ ma tô ai'aba'ré, tinhorõwa u.
7Wamorĩ na wa ãma uzusi za'ra ni, uba're na. Tiru hawi wa tô ai'aba'ré ni. Patolemaida na 'ri nho'õmo nhisi u, wa tô aihutu ni. Tame isazei'wa norĩ hã wa tô sawi za'ra ni. Misi bâtâ na wa tô duré i'ratab za'ra hã wahâimana za'ra ni. 8Awẽm na hã wa tô ai'aba'ré ni. Tawamhã Cézaréia u wa tô aihutu ni. Tame Filipihi nhorõwa ãma wa tô ai'ubumro ni. Ta hã Zezusihi wasu'uwẽ na isazei'õ'wa norĩ ma rowasu'u'wa. 7 na isazei'wa norĩ pawapto'wa da, da te ipisutu za'ra norĩ me, 're ihâimana mono, Zeruzalẽ ãma hã. 9I'ra sipi'õ norĩ hã maparane si'uiwa na ihâiba za'ra hã, imro õ si, te 'Re ihâimana u'âsi mono zadawa 'mahârâ'wa na 're hâimana za'ra. 10Tame niha bâtâ na wahâimana za'ra parimhã, Zudéa hawimhã ma tô wi, aibâ hã 'Re ihâimana u'âsi mono zadawa 'mahârâ'wa, Agabu na isisi hã. 11Watẽme wisi za'ra wi, ma tô Pauluhu usisizé hã tiwi waze. Ma tô ãma sisib'rata wasisi, tipara zama. Taha pari, ma tô ãne tinha:
— 'Re ihâimana u'âsi mono Pẽ'ẽzani hã ma tô ãne ĩma waihu'u: “Ãne te za Zudeu norĩ hã da'usisizé tede'wa hã siwi wasisi, Zeruzalẽ ãma hã. Taha pari te za zudeu'õ norĩ ma siwi hâiba nho.”
12Tawamhã ãne hã imreme wa te wapari za'ra wamhã, tame isazei'wa norĩ 're isi'ubumroi mono norĩ me, wa tô Pauluhu ma wazada waza'réi'õ za'ra ni aré, Zeruzalẽ u hã morĩ tõ da. 13Tane nherẽ, Paulu hã ma tô wama nharĩ za'ra, ãne:
— E marĩ da, te ai'ru'ru wa'wa. Ma ãma ĩwi irobzei'õ pese za'ra wa'wa. Wa tô ĩsisa'ra pese, da te ĩpawasisi da si õ di. Duré ĩdâ'â da zama Zeruzalẽ 'remhã, Wanhib'apito Zezusihi u'âbâ.
14Morĩ tõ da, wa te wasiwi pi'rai waihu'u õ wa, wa te oto tiwi rosawi za'ra õ di. Tahawa, wa tô ãne tãma nharĩ za'ra ni oto:
— Uburé Danhib'apito te te sima iwẽzéb uwaibaba ihâimana da si, iwẽ hã.
15Tame wahâimana za'ra parimhã, wa tô wasima rob'ubumro za'ra ni. Taha pari wa tô ai'aba'ré ni, Zeruzalẽ u. 16Nima norĩ Cézaréia ãma isazei'wa norĩ hã ma tô wasiré ai'aba'ré. Ta norĩ hã ma tô te te wanhimro Menasõhõ nhorõwa u, tame wasi'ubumro da. Ta hã Chipri ãma ipotozé hã duréi isazei'wa.
Paulu hã Zeruzalẽ u iwisizé
17Tawamhã Zeruzalẽ u wasihutu wamhã, isazei'wa norĩ hã to sina ma wawaibu. 18Awẽm na hã Paulu ma tô wasiré timorĩ za'ra, Tiagu te te sabu da. Tame uburé pese isazei'wa 'madâ'â'wa norĩ hã ma tô ubumro. 19Tawamhã Paulu hã ma tô sawi za'ra. Ma tô duré uburé tãma wasu'u pese za'ra, 'Re ihâimana u'âsi mono te te 're ipawapto mono zé hã zudeu'õ norĩ wazari 're hâimana mono ré hã. 20Te te siwi wapari parimhã, uburé ma tô 'Re ihâimana u'âsi mono ãma tiwata za'ra. Ãne ma tô Pauluhu ma nharĩ za'ra:
— Wasisãnawã, aima waihu'u pese di, ã hã. Zudeu norĩ hã ahâ uptabi na ma tô saze za'ra. Duré uburé te te 're 'madâ'â pese za'ra, 'Re ihâimana u'âsi mono nhimiroti zahi na Mozési te te irob'ui'érézé hã. 21Ta norĩ hã ma tô aiwasu'u wapari za'ra, Zudeu norĩ hã, zudeu'õ norĩ wazari 're isi'ubumroi mono norĩ ma 're irowahutu mono na hã, Mozésihi nhimi'ui'éré hã te te rẽme za'ra tõ da. Te u, tãma 're iroti za'ra mo, ti'ra hã te te 're sihâiwata nhihâri za'ra mono tõ da, Zudeu norĩ hâimanazéb zarina. 22Tawamhã ãne wamhã, e marĩ, wa za 'manharĩ za'ra ni. Te za tô aiwasu'u wapari za'ra, we i'aiwisi na hã. 23Tahawa, ma'ãpé 'manharĩ, za wa te aima inharĩ za'ra zéb zarina: Wasiré te tihâimana za'ra maparane si'uiwa na aibâ norĩ hã, 'Re ihâimana u'âsi mono ma, marĩ na ropisudu te te i'manharĩ za'ra hã. 24Tahawa, ma'ãpé aimorĩ. Isiré aihâimana za'ra na, 'Re ihâimana u'âsi mono ma, 're idasihâiba pese za'ra mono zéb ãma hã. Duré taha wa'âbâzé hã tãma wa'âbâ za'ra na, si'rãpari za'ra da. Ãne wamhã, uburé te za waihu'u za'ra ni, senai õ na da te i'aiwasu'u za'ra zé hã. Tazahã te za aiwaihu'u za'ra ni, Mozésihi nhimi'ui'éré zarina 're i'aihâimana mono na hã. 25Zudeu'õ norĩ te te isaze za'ra norĩ ma, wa tô rob'ui'éré hã wasiwi sõmri ni, ãne hã: “'Re huri wa'aba mono tõ, danhimizama romhâiba 'manharĩ ãma 're dawata za'ra mono da, da te 're isimroi mono nhi hã. Duré iwapru hã 're âhuri aba mono tõ. Duré danhimizama da te 're isõ'reti za'ra mono norĩ nhi hã, 're huri aba mono tõ. Duré aihâiba na asiwi 're asimisaihuri za'ra wa'aba mono tõ.”
26Tawamhã awẽm na, Paulu hã ma tô te te simro aibâ norĩ hã. 'Re ihâimana u'âsi mono ma, 're idasihâiba pese za'ra mono zé hã ma tô isiré 'manharĩ za'ra. Taha pari, ma tô ãzé, 'Re ihâimana u'âsi mono nhorõwa 'ri 'rãihâ u, te te da'apo're pu'u da, niwa za isi'utõrĩzém na hã bâdâ dasihâiba upsõzép te hã, aibâ norĩ hã tinhoprubzé hâiba mono bâ te te 'manharĩ za'ra da.
Paulu hã da te i'ârizé, 'Re ihâimana u'âsi mono nhorõwa 'ri 'rãihâ ãma
27'Re idasihâiba upsõ za'ra mono zé, bâdâ 7 na oto isi'utõrĩzéb u hã, nima norĩ Zudeu norĩ Azia na ti'a nhisi hawimhã ma tô siwi 'madâ Paulu hã, 'Re ihâimana u'âsi mono nhorõwa 'ri 'rãihâ ãma. Tawamhã ma tô sada dawada'uri wasété za'ra. Tahawa ma tô siwi ti'â. 28Tawamhã ma tô tihârâ za'ra, ãne:
— Izaraéu nhihudu norĩ, wa'ãma ana wa'aba. Ã hã aibâ hã daro mono bâ ma tô te te dama 're rowahutu, tizadawa nhipese na, Izaraéu nhihudu wasu'u wasété na duré 'Re ihâimana u'âsi mono nhimiroti zahi na Mozési te te irob'ui'érézé hã da te 're 'madâ'â pese za'ra mono tõ da, duré 'Re ihâimana u'âsi mono nhorõwa 'ri 'rãihâ wasu'u wasété na zama. Taha siré hã zudeu'õ norĩ hã ma tô we 'mazasi za'ra 'Re ihâimana u'âsi mono nhorõwa u. Taha zarina ma tô ã hã 'ri iwazé pe hã wasété.
29Ãne hã ma tô nharĩ za'ra, te te siwi 'madâ'â wa, Trofimu hã Éfézu hawimhã, 'ri nho'õmo 're Pauluhu siré. Tahawa ma tô ãma rosa'rata za'ra, Paulu hã 'Re ihâimana u'âsi mono nhorõwa 'ri 'rãihâ u te te 'mazébré newa. 30Tahawa, Zeruzalẽ 'remhã, ro'wa'rudu hã ma tô ropâ tihâiba. Dasi'aba'ré na ma tô ubumro ni. Paulu hã ma tô dasiwi âri ni. Ma tô da te ãma robâdâ rob u, 'Re ihâimana u'âsi mono nhorõwa hawi. Tahawa awa'awi pesere ma tô 'ridawa hã dasiwi sitom ni. 31Paulu hã da te oto iwĩrĩzéb u, Roma hawi dasi'wapéi 'manharĩ'wa norĩ nhib'apito tẽme ma tô wi romreme hã, Zeruzalẽ 'remhã iro'wa'rutu na hã. 32Tahawa waptu na awa'awi ma tô tite nima norĩ dasi'wapéi 'manharĩ'wa norĩ nhib'apito norĩ zô hâ, duré tite dasi'wapéi 'manharĩ'wa norĩ zô zama. Tawamhã ta norĩ hã ma tô sisa're, dawa'wa u. Dasi'wapéi 'manharĩ'wa norĩ nhib'apito hã duré dasi'wapéi 'manharĩ'wa norĩ hã da te 'madâ'â za'ra wamhã, ma tô Paulu hã siwi azâri zazâ. 33Tawamhã danhib'apito hã, Pauluhu u ma tô ai'ré. Ma tô pa'â. Ma tô duré ti'ru, ite dasi'wapéi 'manharĩ'wa norĩ hã te te siwi pawasisi da, maparane isi'uwazi nhorõ rutu na. Taha pari ma tô ãne sadanha:
— E 'wa hã ã hã aibâ. E marĩ ma 'manha.
34Tane nherẽ, da'ahâ uptabi na idahâimana za'ra ãma hã, dahârâ sipu'u pese na ma tô nasi tahãsi ni. Ro'wa'rutu uptabi wamhã, danhib'apito hã iromhâimanazé hã te te upsibi mei waihu'u õ di. Tahawa ma tô ti'ru dasi'wapéi 'manharĩ'wa norĩ ma, Paulu hã te te siwi 'mazébré da, 'ri isiptete u hã. 35Dazai'urizéb u sihutu wamhã, dasi'wapéi 'manharĩ'wa norĩ hã, Paulu ma tô siwi subza, dazahi wa, da te dasiwi i'azâri da si wa. 36Tawamhã da'ahâ na isarina idasi'aba'ré norĩ hã ma tô dahãsi u'âsi, ãne:
— Wĩrĩ aba. Wĩrĩ aba.
Paulu hã si'uihâ na dama isiwasu'uzé
37'Ri isiptete u te te siwi i'mazébrézéb u, Paulu hã ma tô tinha danhib'apito ma, ãne:
— E aima wẽ di, marĩ te aima iwasu'u da hã.
Tawamhã apito hã te asa sadanha, ãne:
— E nare aima waihu'u pese di, gregu norĩ mreme hã. 38E tawamhã a hã ezipsiu duréihã nimahã wahum na te te ãma isãna'rada, Roma ãma apito wi, dasipizari za'ra da hã duré ropsi 're irosa'wari mono u te te idanhimroi mono 4 miu na dahâiba na, rowasété 'manharĩ'wa norĩ hã.
39Tawamhã Paulu hã ma sada'â, ãne:
— Wa hã Zudeu. Tarsu na 'ri nho'õmo nhisi ãma ĩpotozé hã. Ta hã 'ri nho'u dama ipire, Silisia na danhipti'a nho'õmo nhisi ãma hã. Ĩma 'ru na a'â, te dama rowasu'u da.
40Tawamhã dasi'wapéi 'manharĩ'wa norĩ nhib'apito hã ma tô tãma rowairébé wẽ, te te tô dama rowasu'u da hã. Tawamhã Paulu hã hâiwi ma tô za dazai'urizém na. Tinhib'rada hã ma tô duré dama 'manha, ari'iwi dasimasab da. Oto dawarõtâ'â za'ra wamhã, ma tô dama tinha, Ebreu norĩ mreme na.
Iliyochaguliwa sasa
Atus 21: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
