Atus 20
20
1Tawamhã ro'wa'rudu si'utõrĩ wamhã, Paulu hã isazei'wa norĩ zô ma tô hâ. Ma tô pawaptob za'ra, siptete za'ra da. Taha pari ma tô sisa'u sawi za'ra. Te te sawi za'ra pari, ma tô oto mo, Masédonia u.
Paulu hã Masédonia ãma ihâimanazé duré Acaia ãma zama
2Paulu hã Masédonia na ti'a nhisi na ma tô mo. Tinhimirowasu'u na ma tô te te anhiptete, isazei'wa norĩ hã. Tawamhã ma tô oto wi, Grécia na ti'a nhisi u. 3Tame si'ubdatõ a'amo hã sãmra ré, ma tô ãma ai'utõ. Siria na ti'a nhisi u oto imorĩzéb u, ma tô sina waihu'u, Zudeu norĩ te te ãma sima irowa'õtõ za'ra zé hã. Tahawa ma tô sima rowairébé, Masédonia wa'waibaba apâ morĩ da. 4Morĩ wamhã, ã norĩ hã ma tô isiré ai'aba'ré: Sopatru hã, Piruhu 'ra Béréia na 'ri nho'õmo nhisi hawimhã; Aristarcu duré Secuduhu me Tesalonica hawib zahuré; Gaiu Dérbi hawimhã; Timotiu, Tiquicu duré Trofimu, Azia na ti'a nhisi hawimhã. 5Ã hã aibâ norĩ hã wanhowa ma tô ai'aba'ré. Tawamhã Troadi ãma ma tô wazô asimro. 6I'u'ẽtẽ wapu mapu'õ na dasa da te 're ihuri mono zém na dato hã hâimana parimhã, wa tô wawairébé ni, 'ri wa'õno Filipu hawimhã. Imrotõ na bâdâ si'utõrĩ pari, wa tô wasisõpẽtẽ za'ra ni Troadi ãma. Tame wa tô wahâimana za'ra ni, misi romhuri na.
Paulu hã Troadi ãma ihâimanazé
7Sabadu bâdâ iwa waptã'ã wamhã, barana wa tô wasiré wasi'rã'õtõ ni, wasisãnawã norĩ me, i'u'ẽtẽ wapu wẽ'ẽ na wasiré wasaihuri da#20.7 I'u'ẽtẽ wapu na wẽ'ẽ na duré isiré hã dasa da te ihuri na hã te wasu'u.. Tawamhã Paulu hã ma tô rowahutu mara wa'wab u, awẽ za oto morĩ dâ'âsina. 8Tawamhã rob'uiwẽzé hã ahâ di, 'ri're wa'wa iwasi'rã'õtõzéb ãma hã. Hâimo 'ri're wa'wa ihâimana ãma wa wasi'rã'õtõ ni. 9Tawamhã aibâ ihâiba té, Euticu na isisi hã ma tô nhamra, zanela na. Paulu hã te te rowasu'u hâ wamhã, ihâiba té hã ma tô aptâ hã azâri pese. Tahawa ma tô nhono. Tawamhã ma tô waptãrã, zanela hawi. Te te siwi wahutu wamhã, dâ'â di oto. 10Tawamhã Paulu hã ma tô itẽme si'ra. Tinho'utu ma tô ti'â. Ãne te dama tinha:
— Aihâtâ'â za'ra wa'aba tõ. Hâiba ré te tihâiba.
11Taha parimhã, Paulu hã ma tô duré apâ sai'u. I'u'ẽtẽ wapu hã ma tô te te wẽ'ẽ. Ma tô duré oto ti'rẽ. Taha parimhã, ma tô duré ãma uzusi rowahutu na, i'awẽzéb u. Taha pari ma tô oto mo. 12Tawamhã aibâ ihâiba té hã hâiba ré ma tô siwi saprõ, isõrõwa u. Ta hã ma tô tãma rowẽ pese za'ra, isazei'wa norĩ ma.
Paulu hã Troadi hawi Miletu u imorĩzé
13Pauluhu wana wa tô ai'aba'ré ni. Rowa'u'u na uba'renem na, wa tô asisi ni, Asosi na 'ri nho'õmo nhisi u hã, tame sô wanhimipari za'ra da, te te i'ruzéb zarina te te sima wẽ wa, ti'ai baba ãma morĩ da, Asõ u hã. 14Tawamhã Asosi ãma te te wanhopẽtẽ za'ra wamhã, uba're na ma tô watẽme tizébré za'ra. Ta hawi wamorĩ na wa ãma uzusi za'ra ni, 'ri nho'u Miletu u hã. 15Tawamhã ta hawi awẽm na wa tô ai'aba'ré ni, uba're na. Tawamhã Quiu na rob'ré za'iti 'rata, wa tô ro'rahâri za'ra ni. Awẽm na hã Samo na rob'ré za'iti u wa tô duré aihutu ni. Ta hawimhã awẽm na hã wa tô aihutu ni, Miletu u. 16Tawamhã Paulu hã ma tô sima rowairébé, Éfézu u hã sipa tõ da, te te sima wẽ õ wa, Azia na ti'a nhisi ãma, ãma ironomro da hã. Wapu wamhã, tãma iwẽ hã Zeruzalẽ u wisi su'u da, Pẽtécosti na bâtâ wana ré.
Paulu hã Éfézu ãma da'madâ'â'wa norĩ ma, te te irob'ui'érézé
17Tawamhã Miletu ãma sãmra ré, Paulu hã ma tô sitẽme sô tihârâ za'ra, Éfézu ãma isazei'wa norĩ 'madâ'â'wa norĩ zô. 18Itẽme sihutu wamhã, Paulu hã ma tô ãne tãma nharĩ za'ra:
— Aima waihu'u pese za'ra wa'aba di, niha na asiré 're ĩhâimana za'ra wa'aba mono zé hã, imorĩ'rata na ĩwisizém hawimhã Azia na ti'a nhisi u hã. 19Wanhib'apito ma si wa tô te 're romhuri, ĩsi'madâ'â zei ãna duré ĩtõmo'ui 'rowi, Ãne hã ropire hã tô ĩma 're hâimana mono nherẽ, Zudeu norĩ hã ĩzada 're ihâimana za'ra mono u'âbâmhã. 20Duré aima waihu'u pese za'ra wa'aba di, uburé marĩ hã te 're i'a'manharĩ mono na hã ai'ãma 're ĩsime za'ra wa'aba mono da. Wanhib'apito wasu'u na, wa tô te 're rowasu'u sõ'awi dama duré 'ri mono na. 21Tô sena wa tô te 're rowasu'u Zudeu norĩ ma hã duré zudeu'õ norĩ ma zama, tiwasété na 're si'ruiwapari za'ra mono wa, 're sipizari za'ra mono da, 'Re ihâimana u'âsi mono u hã duré te te 're saze za'ra mono da, Wanhib'apito Zezusi hã. 22Ãhã na hã wa za oto mo Zeruzalẽ u, 'Re ihâimana u'âsi mono Pẽ'ẽzani te te ĩma i'ruzéb zarina, marĩ za ĩ'ãma ihâimanazé hã te waihu'u ãna, tame. 23Misire ĩma iwaihu'u pe hã, 'ri nho'õmo mono bâ, 're ĩne mono wa, 'Re ihâimana u'âsi mono Pẽ'ẽzani te te 're ĩpo're pu'u mono hã dazazé hã duré robzépada hã ĩzô 're ihâimana za'ra mono na. 24Tane nherẽ, ĩma hã marĩ dai õ di, ĩhâimanazé hã. Ĩma ipire hã ĩnhimiromhuri te i'uprosi wẽ da si, duré te i'rãsutu wẽ da si, Wanhib'apito Zezusi te te ĩma ipisudu hã te i'manharĩ da hã. Ĩte romhuri hã ã hã: Rowasu'u wẽ ité hã te 're iwasu'u mono da si, 'Re ihâimana u'âsi mono nhimipawaptobzé iwa'âbâ'õ hã.
25— Aiwazari wa tô 're ĩhâimana za'ra wa'wa. Wa tô te 're rowasu'u, 'Re ihâimana u'âsi mono da'ãma 're isib'a'uwẽ mono zém na. Ãhã na hã ĩma waihu'u pese di, niwa za oto asiwi ĩ'madâ'â wa'aba õ na hã. 26Tahawa ãhã na hã ãne te aima nharĩ za'ra wa'aba da, asõ'reptuzé hã 'manhimini wa'aba wamhã, wa hãi õ di za oto. 27E marĩ wa. Te sazâri õ wa, te aima iwasu'u za'ra wa'aba na hã, uburé 'Re ihâimana u'âsi mono nhimirowa'õtõzé hã. 28Asi'madâ'â pese za'ra wa'aba. Duré uburé asimi'ubumro norĩ hã 'Re ihâimana u'âsi mono Pẽ'ẽzani te te aima isõmri za'ra wa'wa hã 're 'madâ'â pese za'ra wa'aba mono, pone'ẽrebâ 'madâ'â'wa ne, rowahutu'wa na isazei'wa norĩ 'Re ihâimana u'âsi mono te na 're aihâimana za'ra wa'aba mono wa, te te sima i'a'uipra norĩ, ti'ra wapru na. 29Ãne hã wa aima nharĩ za'ra wa'wa, ĩma waihu'u pese wa, ãne: Ĩmorĩ za'u hã te za we sihâi'ré za'ra, abaze zahi isahi uptabi norĩ hã, aiwazari za'ra wa'aba hã. Ta norĩ hã pone'ẽrebâ norĩ ãma 're pẽ'ẽzé za'ra mono õ di za. 30Tawamhã bâdâ hã te za duré wi za, asiré za'ra wa'wa ni'wam norĩ hã tizadawa nhipese na te te 're irowasu'u za'ra mono hã, ni'wam norĩ isazei'wa norĩ hã isiniwĩ 're hâimana za'ra mono da. 31Tahawa, ma'ãpé 're asõpré u'âsi wa'aba mono! Duré ãma aipo're si'âri za'ra wa'aba tõ, si'ubdatõ wahub 'remhã, bâtâ na duré mara na hã, wa hã ĩwawa sina nherẽ, te aima 're iroti za'ra wa'aba mono zé hã te sazâri õ di.
32— Ãhã na hã 'Re ihâimana u'âsi mono ma, wa asõmri za'ra wa'wa, te te 're ai'madâ'â za'ra wa'aba mono da, duré isimipawaptobzé iwa'âbâ'õ na isadawa wasu'u hã te te 're asiptete za'ra wa'aba mono da, duré marĩ iwẽ uptabi hã romhutu'õ te te aima sõmri za'ra wa'aba da, dapoto mono bâ tinhib'a'uwẽ ma, te te 're i'apisutu mono hã. 33Date nherẽ, te dawi 'ruiwapari õ di, ẽtẽ waipo prã prata hã ẽtẽ waipo pré oru hã duré ni'wai uza hã. 34Aima waihu'u pese za'ra wa'aba di, ĩnhib'rata na romhuri na marĩ hã te 're i'azani mono na hã duré ĩsiré romhuri'wa norĩ ma hã, marĩ zô wawi 're rowaptâ'â za'ra mono wamhã. 35Uburé marĩ te 're i'a'manharĩ mono zéb zarina, wa tô te aima 're hâi'ré za'ra wa'wa, ãne wa te 're romhuri za'ra mono wamhã, marĩ zô tiwi 're irowaptâ'â za'ra mono norĩ, wa te 're ipawaptob za'ra mono na hã. Wanhib'apito Zezusihi mreme na ãma 're aipo're pu'u za'ra wa'aba mono, ãne te te inharĩzém na hã: “Marĩ hã ni'wai ma, da te sõmri wamhã, ãma rowẽ uptabi di, ni'wa marĩ te te dama isõmri, da te i'âri, ãma rowẽ nhipai u.”
36Tawamhã Paulu hã timreme te te 'rãsutu parimhã, hi'rãtitõ ma tô nhamra, uburé da'madâ'â'wa norĩ me. Ma tô duré rowaptẽ, isiré za'ra. 37Tawamhã sa'ẽtẽ na ma tô ti'ru'ru. Tinho'utu ma tô siwi ti'â, Paulu hã. Ma tô duré siwi tob'rata hârâ. 38Tiwi irobzei'õ pese za'ra zé hã, Paulu hã te te nharĩ wa, za oto niwa te te siwi i'madâ'â õ na hã. Taha pari uba're u ma tô isiré ai'aba'ré.
Iliyochaguliwa sasa
Atus 20: xavBP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2011, Wycliffe Bible Translators, Inc.
