MARK 1
1
Baptisma Diya John Pora Raasta Jugar Kora
1Isor laga Putro, Jisu Khrista pora Tar laga bhall khobor shuru hua.
2Isaiah bhavobadi he likhi thaka nisna,
Sabi, tumar aage te moi nijor laga khobor bukha ekjon moi pathai ase,
Kon pora tumar raasta jugar kori dibo,
3jungol jaga te, chillai kene kua ekjon laga awaz tu eitu ase:
‘Prabhu laga raasta jugar koribi,
Tar laga khuj raasta sidha bonai lobi.’”
4Jungol jaga te John ulai ahhise aru baptisma di kene mon ghurabole aru paap pora khyama pabo nimite prachar kori thakise. 5Judea laga nagor sob pora aru Jerusalem manuh khan tar logot te jaise; aru taikhan paap sob shikar kora pasote, Jordan nadi te John pora baptisma dise. 6Etiya John he ut laga chuli pora bona kapoor pindhi thakise, aru komor te chamra rosi bandhi thakise, aru kakoti-foring aru jungol laga mou jhul khai thakise. 7Aru tar he prachar kori kene koise, “Moi laga piche te ekjon ahhi ase, tar tu hole moi pora bhi shaktiman, kon laga juta rosi khulibole bhi moi jugyo nahoi. 8Moi tu tumikhan ke paani te he baptisma di ase; kintu Tar pora hole tumikhan ke Pobitro Atma te baptisma dibo.”
Jisu Baptisma Lua
9Heitu din te Jisu Galilee laga Nazareth pora ahhi kene Jordan te John pora baptisma loise. 10Aru ketiya Tar paani pora ulaise, loge loge sorgo khuli jua Tar pora dekhise aru kopo-chiriya nisna, Tar upor te Atma nami ahha dekhise; 11aru sorgo pora ekta awaz he koise, “Tumi, moi laga priyo Putro ase; tumi logot te moi besi khushi pai.”
Jisu Ke Porikhya Kora
12Loge loge Atma pora Tar jungol te jabole dise. 13Aru Tar eitu jungol te, saitan pora porikhya kori kene, chalis din thakise; aru Tar jungol laga janwar khan logot te thakise; aru sorgo dut khan pora Tar ke seva korise.
Jisu Porisarjo Shuru Kora
14Etiya John ke dhori lua pasot te, Isor laga Susamachar prachar kori kene Jisu Galilee te ahhise, 15aru koise, “Homoi tu hoise, aru Isor laga rajyo tu usor te ase; mon ghurai lobi, aru Susamachar te biswas koribi.”
Jisu He Prothom Chella Khan Ke Mata
16Aru Galilee samundor par kori jua homoi te, Tar pora Simon aru bhai Andrew samundor te jal mari kene dekhise; kilemane tarkhan maas dhora manuh thakise. 17Aru Jisu he tarkhan ke koise, “Moi laga piche te ahhibi, aru Moi tumikhan ke manuh bachai lua khan hoi jabole dibo.” 18Aru loge loge tarkhan laga jal shari kene Tar piche te jaise. 19Aru olop aage te jai kene, Tar pora Zebedee laga putro, James aru John ke dekhise, tarkhan nao te jal bhanga silaai thakise. 20Aru loge loge Jisu he tarkhan ke matise; aru tarkhan pora nijor pitri Zebedee aru hazira manuh khan nao te shari kene Tar piche te jaise.
Jisu He Ohusi Atma Thaka Ekjon Hustho Kora
21Aru tarkhan Capernaum te jaise; aru loge loge bisram din te Tar girja ghor te jai kene sikhai dise. 22Aru Tar pora sikhai diya te taikhan sob asorit lagise, kilemane Tar pora pondit khan nisna nahoi, kintu odhikar thaka ekjon nisna sikhai dise. 23Aru loge loge tate girja ghor te letra ohusi atma thaka manuh ekjon thakise; 24aru tar dangor awaz di kene koise, “Nazareth laga Jisu, amikhan logote apuni ki koribole ase? Amikhan ke nosto koribole apuni ahhise neki? Moi jane Apuni tu Isor laga Pobitro Ekjon tu ase.” 25Kintu Jisu he tar ke gali di kene koise, “Chup-chap thakibi, aru tar pora ulai jabi!” 26Aru ohusi atma pora dhora manuh tu jur pora hilai dise, aru dangor awaz pora hala kori kene ulai jaise. 27Aru taikhan sob asorit lagise, eitu karne taikhan majot te huda-hudi korise, “Eitu ki ase? Odhikar pora sikhai diya notun kotha ekta! Tar pora ohusi atma ke bhi hukum di ase, aru taikhan pora mani loise.” 28Aru loge loge Tar laga sunam tu Galilee te thaka nagor sob phale jaise.
Jisu He Besi Manuh Hustho Kora
29Aru loge loge Tar girja ghor shari kene James aru John logot te, Simon aru Andrew laga ghor te ahhise. 30Tate Simon laga sasuri bukhar uthi kene bemar hoi ghumai thakise, aru taikhan pora eitu khobor tu Tar ke koise. 31Tetiya Tar ahhise aru tai laga haat te dhori kene uthai dise aru bukhar pora tai bhall hoise; aru tai pora tarkhan ke seva koribole shuru hoise.
32Heitu din, sham phale surjyo nami jua homoi te, taikhan pora bemari khan aru ohusi atma pora dhori thaka manuh khan sob Tar usor te anise. 33Aru sohor te thaka manuh khan sob jama kori kene dorja usor tak khara korise. 34Aru Tar pora kisim-kisim bemar manuh besi bhall kori dise, aru ohusi atma khan khedai dise; aru Tar pora ohusi atma khan ke kotha kobole diya nai, kilemane taikhan pora Jisu ke jani thakise.
Jisu Galilee Te Prachar Kora
35Aru ekdom phujor te, ketiya andhera asile, eitu homoi te Tar uthise aru manuh nathaka jaga te jaise, aru tate prathana korise. 36Aru Simon aru tar logot te thaka khan pora Jisu ke bisarise, 37aru tarkhan pora Jisu ke dekhi kene koise, “Sabi, manuh khan pora apuni ke bisari ase.” 38Aru Tar pora taikhan ke koise, “Amikhan dusera nagor te jabo, moi tate bhi prachar koribo lage; kilemane eitu nimite he moi ahhise.” 39Aru tar Galilee jaga sob phale jaise aru girja ghor te prachar korise, aru ohusi atma khan khedai dise.
Kuntho-rugi Ekjon Jisu He Safa Kora
40Aru kuntho-rugi ekjon Tar usor te ahhi kene onurudh korise aru athukarhi kene Tar ke koise, “Jodi apuni itcha hole moi ke safa kori dibo pare.” 41Morom hoi kene, Jisu he tar laga haat uthai kene eitu manuh ke chui kene koise, “Moi itcha ase; safa hobi.” 42Aru loge loge kuntho-rugi pora tar ke sharise, aru tar safa hoi jaise. 43Aru Jisu he tar ke jur pora aigya di kene pathaise, 44aru tar ke koise, “Sabi, tumi kon ke bhi eku nakobi; kintu jabi, tumi nijor jai kene puruhit khan ke dekhai dibi, aru Moses pora ki hukum dise eitu nisna tumi safa hua tu manuh khan aage te sakhi hobo karne daan di dibi.” 45Kintu tar jai kene sob manuh ke koi dise, aru khobor tu janai dise, eitu karne Jisu he manuh khan aage te khula khuli hoi kene dusera nagor te jabole para nai, kintu nagor bahar phale manuh nathaka jaga te thaki jaise; holebhi alag alag jaga pora manuh khan Tar usor te ahhi jaise.
Iliyochaguliwa sasa
MARK 1: NagaMe
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2014, The Bible Society of India
All rights reserved.
