MATTHEW 28
28
Ponuruthan Hua
1Etiya bisram din pasote, hopta te prothom din, ekdom phujor homoi te, Mary Magdalene aru dusera Mary kobor sthan tu sabole jaise. 2Aru sabi, tate dangor bhumi-kompo ekta hoise; kilemane Prabhu laga dut ekjon sorgo pora nami ahhise aru pathor tu hatai dise, aru eitu upor te bohise. 3Tar tu sabole bijuli nisna, aru tar laga ujal tu borof nisna boga thakise. 4Aru tar ke bhoi hua karne sentry khan kapi kapi kene mora manuh nisna hoise. 5Kintu dut pora tiruta ke koise, “Bhoi nakoribi; kilemane tumi, Jisu kon kros te morai dise, tar ke bisari ase, eitu moi jane. 6Tar iyate nai; kilemane Tar kua nisna Tar jinda uthi jaise. Ahhibi, Tar rakha jaga sabi. 7Etiya joldi jabi aru Tar laga chella khan ke kobi, Tar mora pora jinda hoise, aru sabi, tumikhan aage te Tar Galilee te jai ase; tate tumikhan pora Tar ke dekhibo. Sabi, eitu moi tumikhan ke koi dise.” 8Tetiya taikhan koborsthan pora bhoi bhi lagise kintu besi khushi hoi kene joldi jai jaise, aru tar chella khan ke kobole polaise. 9Aru sabi, Jisu he taikhan log kori kene koise, “jaimai!” Aru taikhan ahhi kene Tar laga theng te dhori kene aradhana korise. 10Tetiya Jisu he taikhan ke koise, “Bhoi nakoribi; jabi aru moi laga bhai khan ke Galilee te jabole kobi, aru tate tarkhan pora moi ke dekhibo.”
Sentry Khan Laga Khobor
11Ketiya taikhan jai thakise, sabi, sepahi konuba sohor te jaise aru prodhan puruhit khan ke ki hoise eitu sob koise. 12Aru ketiya taikhan bridho khan logot te jama kori kene alusona korise, taikhan pora sepahi khan logot te poisa dise 13aru koise, “Manuh khan ke kobi, ‘Raati te amikhan ghumai thaka homoi te Tar laga chella khan ahhi kene choor kori loi jaise.’ 14Aru jodi eitu khobor tu rajyopal pora hunile, amikhan pora phuslai dibo aru tumikhan eku dukh nahobo.” 15Tetiya tarkhan pora poisa tu loise aru keneka kobole dise eneka koi dise. Aru eitu khobor tu aji tak Jews majote koi ase.
Dangor Odhikar
16Etiya ekgharo jon chella khan tu Galilee te, ki pahar te jabole Jisu he koise tate jaise. 17Aru ketiya Jisu ke dekhise, taikhan pora aradhana korise; kintu konuba pora hondeh hoise. 18Aru Jisu he ahhi kene taikhan ke koise, “Sorgo aru prithibi te odhikar sob Moi ke di dise. 19Eitu karne jabi, aru zati sob te chella khan bonabi, aru Pitri, Putro aru Pobitro Atma laga nam te baptisma di dibi, 20Moi tumikhan ke ki hukum dise eitu palon koribole sob ke sikhai dibi; aru sabi, jugh hekh din nahua tak Moi tumikhan logot te hodai thakibo.”
Iliyochaguliwa sasa
MATTHEW 28: NagaMe
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2014, The Bible Society of India
All rights reserved.
