MATTHEW 27
27
Jisu Pilate Ke Dise
1Ketiya phujor homoi ahhise, prodhan puruhit khan aru zati bridho khan Jisu ke keneka morai dibo eitu laga kotha patise; 2aru taikhan Jisu ke bandhi kene loi jaise, aru rajyopal Pilate usor te anikene di dise.
Judas Phansi Kora
3Ketiya Jisu ke thogai diya, Judas pora Jisu morai dibole ninda kora dekhise, tar galad kam kora yaad kori kene mon ghuraise aru tris-ta chandi tu wapas anikene prodhan puruhit aru zati bridho khan ke dise, aru 4koise, “Galti nathaka manuh ke morai dibole thogai diya tu moi paap korise.” Taikhan pora koise, “Amikhan karne ki ase? Eitu tumi nijor laga kam he ase.” 5Aru chandi tu girja te phelai di kene jaise; aru tar jai kene tar nijor phansi korise. 6Kintu prodhan puruhit khan pora, chandi tu uthai kene koise, “Eitu ghurai kene mondoli laga sampoti te rakhi bole kanoon te nai, kilemane eitu manuh laga khoon girai diya laga toka poisa ase.” 7Eitu karne taikhan alusona korise, aru alohi khan moidam dibo nimite kumar ekjon laga kheti kini loise. 8Eitu karne, heitu jaga tu aji tak, khoon laga kheti eneka mati ase. 9Tetiya Jeremiah bhavobadi pora ki koi thakise, eitu hidho hoise, tar koise, “Aru taikhan pora tris-ta chandi tu loise, eitu ekjon laga dam, eitu dam tu Israel manuh konuba pora bonaise, 10aru tarkhan pora kumar laga kheti karne poisa tu dise, eitu Prabhu pora moi ke dekhai diya nisna hoise.”
Pilate Aage Te Jisu
11Etiya rajyopal aage te Jisu khara korise; aru rajyopal he Tar ke hudise, “Tumi Jews laga Raja neki?” Jisu he koise, “Tumi he koi di dise.” 12Kintu ketiya prodhan puruhit khan aru zati bridho khan pora Tar laga galti tu anise, Tar he eku uttar diya nai. 13Tetiya Pilate pora Tar ke koise, “Taikhan pora kiman bhi galti tumar upor te koi ase, tumi nahune neki?” 14Kintu Jisu he tar upor te misa sakhi diya te, kon laga bhi uttar diya nai; eitu karne rajyopal bhi ekdom asorit lagise.
Genti napara Manuh Khan Pora Barabbas Ke Basise
15Etiya porokh homoi bandhi ghor te thaka beya manuh khan majot te, manuh khan pora itcha kora ekjon, shari dibole rajyopal laga niyom thakise. 16Aru eitu homoi te Barabbas koi kene, ekdom beya bodmas ekjon bandhi ghor te thakise. 17Eitu karne ketiya taikhan sob jama korise, Pilate pora taikhan ke koise, “Tumikhan karne Barabbas nahole Jisu kon ke Khrista eneka mate, tar duijon kon ke shari di dibole monn ase?” 18Kilemane soku jola karne he Jisu tu taikhan pora dhori kene anise eneka tar pora jani loise. 19Aru eitu upor te, ketiya tar bichar singsason te bohi thakise, tar laga patni pora khobor pathai kene koise, “Hei tu dharmik manuh logot te eku nakoribi, kilemane eitu manuh karne ekta sapna te moi aji besi dukh paise.” 20Etiya prodhan puruhit aru bridho khan pora manuh khan phuslai kene Barabbas sharibo aru Jisu ke morai dibole koise. 21Rajyopal he arubhi taikhan ke koise, “Duijon majot te moi tumikhan karne kon ke shari di dibole monn ase?” Aru taikhan he koise, “Barabbas.” 22Pilate he taikhan ke koise, “Tetiya Jisu, kon ke Khrista mate, Tar ke ki koribo?” Taikhan sob bhi koise, “Kros te dibi.” 23Aru tar he koise, “Tenehole Tar ke kros te di dibi.”
Jisu Kros Te Morai Dibole Pilate Pora Hukum Diya
24Eitu karne, ketiya Pilate he tar pora eku koribo napara janise, aru manuh khan majot te he hala-gula shuru hoise, tar he paani anikene manuh khan aage te haat dhulai loise, aru koise, “Eitu galti nathaka manuh laga khoon girai dibole moi eku galti nai; tumikhan pora eitu jani lobi.” 25Aru sob manuh he jawab di koise, “Tar laga khoon tu amikhan aru amikhan laga bacha upor te ahhibole dibi!” 26Tetiya tar pora Barabbas taikhan karne shari dise, aru Jisu ke sabuk pora marise, aru kros te lagai dibole di dise.
Jisu Ke Ninda Kora
27Tetiya rajyopal laga sepahi khan pora Jisu ke Praetorium te loi jaise, aru sepahi kiman thakise tarkhan sob Jisu aage te jama korise. 28Aru Tar laga kapoor ulai di kene tarkhan pora lal kapoor ekta pindhai dise, 29aru kait laga ekta mukut bonai kene Jisu laga matha te lagai dise, aru lakhuti ekta Tar laga daina haat te dhoribole dise. Aru Jisu laga aage te athukarhi kene Tar ke ninda kori kene koise, “Pornam Jews Raja!” 30Aru tarkhan pora Jisu gau upor te thuk marise, aru paani gos laga lakhuti tu loi kene tar laga matha te marise. 31Aru ketiya tarkhan pora Jisu ke ninda kori loise, taikhan pora kapoor tu ulai loise, Tar nijor laga kapoor tu lagai dise, aru kros te lagai dibole loi jaise.
Kros Te Morai Diya
32Taikhan jua homoi te Cyrene manuh Simon koi kene ekjon log paise; eitu manuh ke Jisu laga kros jopor josti bukhibole dise. 33Aru ketiya taikhan ekta jaga, ki laga nam Golgotha (ki laga ortho ase, matha hardi jaga) te ahhise, 34taikhan pora tita paani logot milai kene draikhya-roh Tar ke pibole dise; kintu ketiya Jisu he pisaise, tar pibole para nai. 35Aru ketiya taikhan pora kros te lagai dise, taikhan pora Jisu laga kapoor tu taikhan majote shithi-khel kheli kene bhag kori loise; 36eitu pasot te taikhan bohi kene Tar ke roikhya kori thakise. 37Aru Tar laga matha upor te, “Eitu Jisu, Jews laga Raja.” eneka taikhan pora likhi kene lagai dise. 38Tate duijon dacoit, ekjon Tar daina aru ekjon banya phale kros te lagai dise. 39Aru kiman jon eitu raasta phale jaise, taikhan he nijor matha hilai kene Jisu ke ninda kori kene, 40koise, “Tumi, kon pora girja ghor bhangai kene eitu tin din te bonabo pare, Tumi nijor ke bachai lobi! Jodi Tumi Isor laga Putro hole, eitu kros pora nami ahhibi.” 41Eitu nisna prodhan puruhit, pondit aru bridho khan pora bhi ninda kori kene koise, 42“Tar pora dusera ke bachaise; kintu Tar nijor tu bachabo napare. Tar he Israel laga Raja ase; Tar etiya kros pora nami ahhibole dibi, tetiya amikhan bhi Tar ke biswas koribo. 43Tar Isor ke bharosa kore; etiya Isor he ahhi kene Tar ke udhar koribole dibi, jodi Tar itcha hole; kilemane Tar he koise, ‘Moi Isor laga Putro ase.’ ” 44Aru eitu nisna Tar logot kros te morai diya dacoit khan pora bhi Jisu ke ninda korise.
Jisu Mora
45Etiya soi ghonta homoi (12 noon) pora noh ghonta homoi (3 Pm) tak eitu jaga sob phale andhera hoi jaise. 46Aru noh ghonta homoi (3 Pm) nisna te Jisu he dangor awaz di kene koise, “Eli, Eli, lema sabach-thani?” Eitu ortho ase, “Moi laga Isor, Moi laga Isor, kile apuni moi ke shari di ase?” 47Aru konuba usor te khara kori thaka khan pora eitu huni kene koise, “Eitu manuh Elijah ke mati ase.” 48Aru taikhan majot te ekjon polai kene sponge ekta te tenga paani loise, aru ekta paani gos laga nol te uthai kene Jisu ke pibole dise. 49Kintu dusera khan pora koise, “Ene rukhi thakibi, jodi Elijah pora Tar ke bachabole ahhibo na nahhibo sai thakibi.” 50Aru Jisu he jur pora chillai kene awaz dise aru Tar laga Atma shari dise.
51Aru sabi, girja ghor te thaka porda duita bhag hoi kene upor pora niche tak phati jaise; maati hilise, aru pathor khan phati jaise; 52koborsthan bhi khulise, aru pobitro manuh kon mori kene thakise eitu khan besi uthi jaise, 53aru koborsthan pora ulai kene thaka khan, Tar ponuruthan hua pasot te taikhan bhi pobitro sohor te jai kene besi manuh logot te dekhaise. 54Ketiya senapoti aru tar logot Jisu ke roikhya kori thaka khan pora, bhumi kompo hua aru ki ki hoise eitu dekhise, taikhan sob bhoi lagise aru koise, “Hosa bhi eitu Isor laga Putro thakise!”
55Aru tate tiruta khan, kon he Galilee pora Jisu piche te ahhi kene Tar ke seva kori thakise, taikhan bhi dur pora sai thakise; 56taikhan majot te, Mary Magdalene, James aru Joseph laga amaa Mary, aru Zebedee laga putro khan laga amaa thakise.
Jisu Ke Moidam Dise
57Ketiya sham hoise, Arimathea jaga pora dhoni manuh, Joseph koi kene ekjon ahhise, tar bhi Jisu laga chella hoi kene thakise. 58Tar Pilate usor te jai kene, Jisu laga mora gau tu mangise. Tetiya Pilate pora Joseph ke di dibole hukum dise. 59Aru Joseph pora mora gau tu loi kene, safa norom kapoor pora bandhi kene, 60tar nijor laga notun kobor ekta, pathor kati kene bona, tate rakhi dise; aru dangor kobor pathor ekta pora eitu bhitor jabole mukh tu bond kori kene jai jaise. 61Mary Magdalene aru dusera Mary eitu kobor sthan aage te bohi thakise.
Kobor Sthan Te Sentry
62Aage din te, heitu jugar kora din piche te, prodhan puruhit khan aru pharisees khan Pilate usor te jama korise 63aru koise, “sahab, amikhan pora yaad kori ase, heitu manuh, nijor ke dangor kori kene utha, tar jinda thaka homoi te koisile, ‘Tin din pasote Moi jinda hoi kene uthibo.’ 64Eitu karne kobor tu tin din nahua tak bhall pora roikhya kori bole hukum dibi, kilemane tar laga chella khan pora gau tu choor kori kene loi jabo, aru manuh khan ke kobo, ‘Tar mora pora jinda hoise,’ aru hekh te thogai diya tu prothom pora besi beya hobo.” 65Pilate pora tarkhan ke koise, “Tumi khan he sepahi khan loi kene sentry kori lobi; jabi, aru tumi keneka suraksha rakhi bole monn ase eneka rakhibi.” 66Tetiya tarkhan jaise aru kobor mukh laga pathor upor te mohor lagai dise aru sentry kori kene sepahi rakhi dise.
Iliyochaguliwa sasa
MATTHEW 27: NagaMe
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2014, The Bible Society of India
All rights reserved.
