Piiluu 27
27
A Aizik Naŋ Maale Gyekɔb
1A Aizik naŋ da wa kore, ka o nimie da ba la te nyɛrɛ velaa, o da boɔle la o bidɔɔ-kpoŋ Esɔ a yeli ko o, “N bidɔɔ”; ka o sɔge, “Maa la ŋa.” 2Ka o da yeli ko o, “Nyɛ, N korɛɛ la; N ba baŋ N kũũ daare. 3De a fo naŋkpãã-boma, a fo logi ane a fo tammo, a yi kpɛ moɔ a te bɔ mɔnɛne wa ko ma. 4#Hib 11:20 Wa maale bondi-noɔ, aŋa lɛ N naŋ nɔŋ, a taa wa ko ma ka N di, kyɛ pãã maale fo sɛre kyɛ kpi.”
5A Rebɛka da sɔgle kyɛlle la a yɛlɛ a Aizik naŋ da yele korɔ a o bidɔɔ Esɔ. A Esɔ naŋ da wa yi kpɛ a moɔ ka o te bɔ a mɔnɛne wa ne, 6a Rebɛka da yeli ko la a o bidɔɔ Gyekɔb, “N woŋee la ka fo saa yeli ko fo yɔɔ Esɔ: 7‘Te bɔ mɔnɛne wa maale ne bondi-noɔ ko ma ka N di kyɛ ko fo a DAANA maaloo sɛre kyɛ kpi.’ 8A lɛ zuiŋ, n bidɔɔ, sage tu a lɛ N naŋ na yeli ko fo. 9Gaa a donne poɔ, a te kaa nyɔge bobilii ayi naŋ soma wa ne, ka N maale ne bondi-noɔ aŋa lɛ a fo saa naŋ maŋ boɔrɔ a ko o. 10Fo na de a la te ko a fo saa ka o di kyɛ pãã maale fo sɛre kyɛ kpi.” 11#Piil 25:25 A Gyekɔb da yeli ko la a o ma Rebɛka, “Nyɛ, a n yɔɔ Esɔ eŋɛ taa la kɔɔloŋ kyɛ ka n eŋɛ ba taa kɔɔloŋ. 12Kaapɔge, ka a n saa wa bɔgle a n eŋɛ kaa, a baŋ ka maa la kyɛ bɛllɛ o, o koŋ maale ma, kyɛ o na kaa-eŋ ma la.” 13A o ma da leɛ yeli ko o la, “N bidɔɔ, vɛŋ ka a kaa-emmo do ma. Fõõ eŋ deɛ tu a lɛ N naŋ yeli kyɛ gaa te taa a bobilii wa ko ma.” 14A Gyekɔb pãã da gaa te taa la a bobilii wa ko a o ma, ka o da maale ne bondi-noɔ ko a o saa aŋa lɛ o naŋ maŋ boɔrɔ. 15A Rebɛka pãã da de la a o bidɔɔ-kpoŋ Esɔ kpar-velaa naŋ da be o zie a yiri poɔ su a o bidɔɔ-bile Gyekɔb. 16O da de la bobilii kɔɔloŋ page ne a Gyekɔb nuuri ane o nyuu zie naŋ da ba taa kɔɔloŋ. 17O pãã da de la a bondi-noɔ ane a boroboro o naŋ maale ko a o bidɔɔ Gyekɔb.
18Lɛ ka a Gyekɔb pãã da gaa a o saa zie a te boɔle o, “N saa”; ka o sɔge, “Maa la ŋa; n bidɔɔ buo soba la?” 19A Gyekɔb da yelsɔge la a o saa, “Maa, a fo bidɔɔ-kpoŋ Esɔ la. N e la a lɛ fo naŋ da yeli ko ma. Pãã iri zeŋ ɔɔ a mɔnɛne kyɛ maale ma.” 20A Aizik da leɛ soore la a o bidɔɔ, “Wola la ka fo e nyɛ a mɔnɛne wieũ lɛ, n bidɔɔ?” Ka o yelsɔge, “A DAANA fo Naaŋmen la ko ma a zunoɔ.” 21Lɛ la ka a Aizik da yeli ko a Gyekɔb, “Tage peɛle ma, n bidɔɔ, ka n faare fo nyɛ, ka a n bidɔɔ Esɔ sereŋ la bee ka ona naane.” 22A Gyekɔb da tage ta la o saa Aizik, ka o da bɔgle o kaa kyɛ yeli, “A kɔkɔre e la Gyekɔb kɔkɔre kyɛ ka a nuuri waa Esɔ nuuri.” 23O da ba toɔ̃ baŋ ka a Gyekɔb la, bonso, o nuuri da taa la kɔɔloŋ aŋa a o yɔɔ Esɔ nuuri; lɛnso o da maale o la. 24O da soore o la, “A n bidɔɔ Esɔ sereŋ la fo be?” Ka o yelsɔge, “Maa la.” 25Lɛ la ka o da yeli, “N bidɔɔ, taa a mɔnɛne wa ne ka N ɔɔ kyɛ maale fo.” O da taa wa ko o la ka o da di. O da ko o la dãã meŋ ka o nyu. 26A o saa Aizik pãã da yeli ko o la, “N bidɔɔ, tage peɛle, a kori ma.” 27O da tage peɛle o la, a moore o. A Aizik da woŋ la a o bidɔɔ kparoo nyuu kyɛ da maale o, a yele:
“Nyɛ, a n bidɔɔ nyuuro la
aŋa weɛ a DAANA naŋ maale nyuu.
28Ka Naaŋmen e ka O sazu meɛloŋ le eŋ fo,
a e ka fo weɛ kpɛ,
ne bombie ane dãã.
29 #
Piil 25:23; 12:3 Ka nemboorɔ zaa tonɔ korɔ fo,
kyɛ ka tatenne noba vɔgle muro fo niŋesogɔ.
Di kponnuŋ fo yɔɔmine zu,
kyɛ ka fo ma bidɔbɔ vɔgle muro fo niŋesogɔ.
Neɛzaa naŋ kaa-eŋ fo, a kaa-emmo na leɛ do o la,
ka neɛzaa naŋ maale fo, nyɛ maaloo!”
A Esɔ Maaloo Naŋ Bɔre
30A Aizik naŋ da wa maale a Gyekɔb baare, kyɛ ka o deɛ yi a o saa Aizik niŋesogɔ belãã la ka a o yɔɔ Esɔ la lɛ a leɛ yi a o moɔ yoɔbo wa. 31O meŋ da wa maale la bondi-noɔ, a taa wa ko a o saa. O da yeli ko la a o saa, “N saa, iri zeŋ ɔɔ a fo bidɔɔ mɔnɛne kyɛ pãã maale ma.” 32A o saa Aizik da soore o la, “Nembuo la fo?” Ka o da yelsɔge, “Maa, a fo bidɔɔ-kpoŋ Esɔ la.” 33Lɛ la ka a Aizik eŋɛ da mii yaga zaa kyɛ ka o da soore, “Ka nembuo la da yɔ moɔ a te taa a mɔnɛne wa ne ka N ɔɔ a zaa kyɛ maale o sɛre kyɛ ka fo wa? N maale o la ka o sereŋ na nyɛ a maaloo meŋ!” 34#Hib 12:17 A Esɔ naŋ da wa woŋ a o saa yelbie, o da ŋmɛ la kpɛlle ne posaanaa, kyɛ sɔre a o saa a yele, “Maale n meŋ, n saa, maale ma!” 35Ka a Aizik da leɛ yeli, “A fo yɔɔ wa bɛlle ma la a de a fo maaloo.” 36#Piil 25:26, 33 Ka a Esɔ da leɛ yeli, “A o yuori Gyekɔb#27:36 Gyekɔb: A Gyekɔb tɛgɛ la Neɛ Naŋ Neɛrɛ Noba yɛlɛ naane sereŋ tuuro o be? Bonso, a boyi soba la a ŋaa o naŋ finni ma. O da de la n kponnuŋ; kyɛ pampana, o de la n maaloo meŋ.” O pãã da la sɔre la a o saa, “Maaloo zaa ba la kyebe ka fo na ko ma be?” 37A Aizik da yelsɔge la a Esɔ, “N eɛɛ la ka o di kponnuŋ fo zu baare, kyɛ ka a o yɔɔmine zaa na waa o tontombiiri. N ko o la bombie ane dãã yaga. N bidɔɔ, boŋ pãã ka N na la toɔ̃ e ko fo?” 38#Hib 12:17 A Esɔ da soore la o saa, “Maaloo boŋyeni yoŋ la ka fo taa be? Maale n meŋ, n saa, maale ma!” A Esɔ da ŋmɛ la kpɛlle a kono.
39Lɛ la ka a o saa Aizik da yelsɔge:
“Nyɛ, fo kpeɛbozie na e la tɔɔre ne a zikoɔraa naŋ kpɛ,
a waa tɔɔre ne a sazu meɛloŋ naŋ lere.
40 #
2 Nam 8:20
A fo zɔɔzɔɔ-soɔ la ka fo na guoli ne fo meŋɛ,
a na tonɔ korɔ a fo yɔɔ;
kyɛ ka fõõ wa faa fo meŋɛ,
fo na faa la fo meŋɛ ka o koŋ la di kpeɛ̃õ fo zu.”
A Esɔ Suuri Naŋ Da Iri Ka a Gyekɔb Zo
41A Esɔ da kyiiri la a Gyekɔb, a o saa naŋ da maale o zuiŋ. A Esɔ da teɛre la o poɔŋ, “A n saa kũũ bebie peɛlɛɛ la. Ka tenee wa koŋ o baare N na ko la a n yɔɔ Gyekɔb.” 42Ba naŋ da wa yeli ko a Rebɛka lɛ a o bidɔɔ-kpoŋ Esɔ naŋ teɛrɛ, o da eɛɛ la ka ba boɔle a o bidɔɔ-bile Gyekɔb ka o yeli ko o, “A fo yɔɔkpoŋ Esɔ boɔrɔ la ka o ko fo yaa sane. 43#Piil 24:10 A lɛ zuiŋ, n bidɔɔ, kyɛlle woŋ a tu a n noɔre; iri zo gaa n yɔɔdɔɔ Lɛban zie a Haran teŋɛ poɔ a daadaalɛ. 44Te be a o zie belãã a te ta lɛ saŋ a fo yɔɔ suuri naŋ wa maa, 45ka a fo yɔɔ suuri naŋ iri ne fo wa maa, ka o inni a lɛ fo naŋ da e o, N pãã na e la ka fo leɛ yi a be wa. Bonso ka N na kɔŋ yɛ zaa bayi bebi-yenaa?”
46 #
Piil 26:34-35
Lɛ la ka a Rebɛka da yeli ko a Aizik, “N balɛɛ la ne a Hita deme pɔgeyaare yɛlɛ. Ka a Gyekɔb wa de a Hita deme pɔgeyaare bama kaŋ ka o e o pɔge, boŋ tɔnɔ ka a n nyɔvore na taa ko ma?”
Iliyochaguliwa sasa
Piiluu 27: DGA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Dagaare First Bible © The Bible Society of Ghana, 2025.