Piiluu 17
17
A Nɔ-eŋnaa Yelwulaa
1 #
Piil 35:11; Yiib 6:3; Piil 48:15 A Aboram naŋ da wa nyɛ yuomo lezaanaare ne pie ane awae, a DAANA da wa la o zie, a wa yeli ko o, “Maa la a Kpeɛ̃õ Zaa DAANA Naaŋmen; kyɛnɛ N niŋesogɔ, a ta taa saanaa zaa. 2N na eŋ la N noɔre, maa ne fo zie, a e ka fo boorɔ yɛle yaga zaa.” 3Lɛ la ka a Aboram da le vɔgle muro, ka Naaŋmen da yeli ko o: 4“Maa eŋ zie, a noɔre N naŋ eŋ ne fo la ŋa: Fo na e la nemboor-yaga sããkoma. 5#Rom 4:11, 17 Ba daŋ koŋ la boɔle fo yuori ka Aboram, kyɛ fo yuori na di la Aboraham, bonso, N eɛɛ la ka fo waa nemboor-yaga sããkoma. 6N na e la ka fo boorɔ e yaga, ka ba leɛ nemboor-yaga, ka namine yi ba poɔ. 7N na biŋ la a N nɔ-eŋnaa, Maa ne fo zie ane a fo boorɔ a fo kũũ puoriŋ. O na waa la nɔ-eŋnaa naŋ ba taa baaraa, ka N waa fõõ ane a fo boorɔ Naaŋmen. 8#Piil 23:4; 35:27; Hib 11:9-16 N na ko la fõõ ane a fo boorɔ naŋ na tu fo puori wa, a teŋɛ na yɛ naŋ waa nɔɔre o poɔ pampana, a Keeina teŋɛ zaa, ka o waa yɛ soobo tegitegilɛ; kyɛ ka N waa ba Naaŋmen.”
9Naaŋmen da yeli ko la a Aboraham, “Fõõ ane a fo boorɔ dɔge-tu-taa naŋ na tu fo puori na tuuro la a N nɔ-eŋnaa. 10#Bag 12:3; Tom 7:8 A N nɔ-eŋnaa N naŋ biŋ ko maa ne fo ane a fo boorɔ naŋ na tu fo puori, ka a seŋ ka yɛ tuuro la ŋa: A dɔbɔ zaa naŋ be yɛ poɔ seŋ ka ba iri ba dɛgre. 11Yɛ na maŋ iri la a dɔbɔ dɛgre ka a e yelwulaa kyaare ne a nɔ-eŋnaa naŋ be a maa ne yɛ sogɔŋ. 12A yi ŋaa gɛrɛ, ba na maŋ iri la yɛ bidɔɔlee zaa ba naŋ dɔge dɛgre a o dɔgebo beri anii daare, a de ne gbaŋgbaare ba naŋ dɔge yɛ yiri poɔ ane gbaŋgbaare yɛ naŋ da ne yɛ libie yi ten-yuo neɛ naŋ ba e yɛ boorɔ neɛ zie. 13A gbaŋgbaa ba naŋ dɔge fo yiri poɔ ane a gbaŋgbaa fo naŋ da ne fo libie, a ferɛɛ la ka ba iri ba zaa dɛgre. Lɛ la ka a N nɔ-eŋnaa na be a yɛ eŋgane eŋɛ tegitegilɛ. 14Dɔɔ zaa ba naŋ ba iri o dɛgre, ba na wɛle o la bare o noba poɔ, o naŋ sãã a N noɔre zuiŋ.”
15Naaŋmen da yeli ko la a Aboraham, “A fo pɔge Saarae eŋ, ta la boɔle o Saarae, kyɛ o yuori na la Saara. 16N na maale o la, a maaleŋ gaŋ a zaa, N na e la ka o dɔge bidɔɔ ko fo. N na maale o la, ka o e boorɔ yaga ma; ka namine yaga yi a o boorɔ poɔ.” 17#Piil 18:12; 21:6; Luk 1:18 A Aboraham da le vɔgle la teŋɛ kyɛ la, a yeli o poɔŋ, “Dɔɔ naŋ nyɛ yuomo kɔɔ na toɔ̃ dɔge la bie? Saara naŋ nyɛ yuomo lezaanaare ne pie na toɔ̃ dɔge la bie?” 18A Aboraham da yeli ko la Naaŋmen, “N da na nɔnɔ la ka a Isemɛɛl da nyɛ a maaloo na fo naŋ teɛrɛ kyaare ne ma!” 19#Piil 26:3 Naaŋmen da yelee la, “Ai, a fo pɔge Saara na dɔge la bidɔɔ ko fo, ka fo pore o yuori Aizik. N na biŋ la a N nɔ-eŋnaa ne o, ka o e nɔ-eŋnaa naŋ na bebe tegitegilɛ ko a o biiri naŋ na tu o puori. 20#Piil 16:10; 21:13, 18; 25:16 A Isemɛɛl eŋ, N woŋ la lɛ fo naŋ yeli; N na maale o la, a e ka o dɔge biiri yaga. O na e la nabiiri pie ne bayi saa, kyɛ e ka o e paaloŋ kpoŋ. 21Kyɛ a Aizik la ka N na biŋ a N nɔ-eŋnaa tere. Ona la ka Saara na dɔge ko fo, a ŋaa saŋ, a yuoni naŋ waana poɔ.” 22#Piil 35:13 Naaŋmen naŋ da wa yeli a yɛlɛ ko a Aboraham baare, O da bare o la kyɛ do.
23A Aboraham pãã da de la a o bidɔɔ Isemɛɛl ane a o gbaŋgbaare zaa ba naŋ dɔge o yiri poɔ ane gbaŋgbaare banaŋ o naŋ da ne o libie, ane a o yiri poɔ dɔbɔ zaa, a iri ba dɛgre a lɛ daare zaa, a seŋ lɛ a Naaŋmen naŋ da yeli ko o. 24A Aboraham da nyɛ la yuomo lezaanaare ne pie ane awae, a saŋ ba naŋ da iri a o dɛgre. 25A o bidɔɔ Isemɛɛl da nyɛ la yuomo pie ne ata a saŋ ba naŋ da iri o dɛgre. 26A bebiri na ne o zu daare, ba da iri la a Aboraham ane a o bidɔɔ dɛgre; 27ane a o yiri dɔbɔ zaa, gbaŋgbaare ba naŋ dɔge a yiri poɔ, ane banaŋ o naŋ da ne libie a yi ten-yuo neɛ zie.
Iliyochaguliwa sasa
Piiluu 17: DGA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Dagaare First Bible © The Bible Society of Ghana, 2025.