Piiluu 16
16
A Isemɛɛl Dɔgebo Yɛlɛ
1A Aboram pɔge Saarae da ba dɔge bie ko o. A Saarae da taa la Igyipiti gbaŋgba-pɔgesaraa kaŋ yuori naŋ di Heega. 2#Piil 30:3, 9; 1 Kor 7:2 A Saarae da yeli ko la a Aboram, “Fo nyɛɛ la ka a DAANA ba e ka N dɔge biiri, azuiŋ, N sɔrɔ fo la, kpɛ te laŋ ne a n gbaŋgba-pɔgesaraa sɛŋ poɔ, kaapɔge o na dɔge la biiri ko ma.” A Aboram da sage la a lɛ a Saarae naŋ da yeli. 3A Aboram naŋ da wa kpɛ a Keeina teŋɛ poɔ yuomo pie puoriŋ, a o pɔge Saarae da de la a o gbaŋgba-pɔgesaraa Heega ko a o serɛ Aboram ka o e o pɔge. 4A Aboram da baŋ la a Heega sɛŋ poɔ, ka o da taa poɔ. A Heega naŋ da wa nyɛ ka o taa la poɔ, o da maŋ erɛ la a o yidampɔge Saarae nimikpɛ yɛlɛ. 5Lɛ la ka a Saarae da yeli ko Aboram, “Ka a nimikpɛ yɛlɛ ŋa a gbaŋgba-pɔgesaraa naŋ e ma do fo! Maa la e ka fo de fo gbɛre dɔgle a n gbaŋgba-pɔgesaraa zu, kyɛ o naŋ wa baŋ ka o taa la poɔ, o erɛ ma la nimikpɛ yɛlɛ. A DAANA la na wuli soba na deme naŋ ba kyebe!” 6A Aboram da yeli ko la a Saarae, “Fõõ la so a fo gbaŋgba-pɔgesaraa faŋ; e o lɛ zaa fo naŋ boɔrɔ.” A Saarae da e o la nimikuo-yɛlɛ ka o da zo yi o zie.
7A DAANA maleke da nyɛ la a Heega kɔmbuli kaŋ zie naŋ be a Sɔɔl soriŋ, a wɛgyɛŋ poɔ. 8A maleke da soore o la, “Heega, Saarae gbaŋgba-pɔgesaraa, yeŋ ka fo yi waana, a wa gɛrɛ yeŋ?” Ka o da yeli, “N zoro yire la n yidampɔge Saarae zie.” 9A DAANA maleke da yeli ko o la, “Leɛ gaa a fo yidampɔge zie, a te sigri fo meŋɛ ko o.” 10#Piil 17:20 A DAANA maleke da la yeli ko o la, “N na e la ka fo boorɔ yɛle yaga zaa, a ba taa sɔroo.” 11A DAANA maleke da yeli ko o la:
“Pampana, fo taa la poɔ a na dɔge bidɔɔ;
fo na pore la o yuori ka Isemɛɛl,
bonso, a DAANA woŋ la a fo woore kpɛlle.
12 #
Piil 25:18
O na weɛŋ la aŋa Boŋ-weɛmɛ,
O na zɔɔrɔ ne la neɛzaa,
ka neɛzaa meŋ zɔɔrɔ ne o.
O ne o yideme zaa koŋ nyɛrɛ taa niŋe.”
13Lɛ la ka o da boɔle a DAANA naŋ da yeli a yɛlɛ ko o yuori, “Fõõ la Naaŋmen naŋ nyɛrɛ yelzaa”; bonso, o da yelee la, “N sereŋ nyɛ la a Naaŋmen kyɛ naŋ kyɛnɛ voorɔ be?” 14#Piil 24:62; 25:11 A lɛ zuiŋ ba da boɔlɔ la a bulee ka Bɛɛ-laha-royi.#16:14 Bɛɛ-laha-royi: A Bɛɛ-laha-royi tɛgɛ la: A Neɛ Naŋ Voorɔ kyɛ nyɛrɛ ma Bulee A bulee da be la a Kadɛs ane Bɛrɛd kpakyagaŋ.
15A Heega da dɔge la bidɔɔ ko a Aboram. A Aboram da pore la a o bidɔɔ a Heega naŋ dɔge yuori ka Isemɛɛl. 16A Aboram da e la yuomo lezaanaare ane ayoɔbo a saŋ a Heega naŋ da dɔge a Isemɛɛl ko o.
Iliyochaguliwa sasa
Piiluu 16: DGA
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
Dagaare First Bible © The Bible Society of Ghana, 2025.