MATIE 12
12
Yesu ko sabata
(Hokea koko Mal 2, 23-28; Luk 6, 1-5)
1Ta ehole ena, Yesu anɔɔ ta gue dja ndongo busa ba sabata. Batingami ba nde baoka ndja; babanga obuka ndongo ko odjiya. 2Ehole ɛenɛ Bafalusai bea, babala na Yesu boo: «Hokea, batingami ba wɛ bakɔkɔ modjɔ imasiama okɔɔmɔ ta iswi la sabata!» 3Yesu abasɔmbɛdja boo: «Opakitalangani oko midjɔ imakɔɔ Davidi ehole ɛdaka yo na ndja engbanga na bato ibadalaka na nde? 4Moda imaingɛa yo ta ndako ɛ Ndjambe ko yo engbanga na bato ibadalaka na nde baya mapa imabudjeama; ena bea ɛdae yo kaoko bato ba nde pɛpɛ ɔboanaka omaya dongedja oko Banganga ba Ndjambe. 5Kaoko opakitalangani ta Mobeko boo ta iswi la sabata, Banganga ba Ndjambe ibakasale ta tepelo baisuma mobeko ma sabata, endolo baikwa ta ibunga ta tina ena? 6Bea, mbai nabalaka na nu boo, edii haa na moto omɔti oonɔi tepelo na onɛnɛ! 7Nga okɔki no sipoa tingo ɛ ebaeli hee: “Nakasepe na molema ma ndjokwa onɔ mbeka”, okɔkitini dumba bato bii na ikambo tina ɛ boo bakoiti obe. 8Tina ɛ boo Mwana ɔ moto adii Kumu ɔ sabata.»
Yesu aheledjai moto ɔgwa ebɔ
(Hokea koko Mal 3, 1-6; Luk 6, 6-11)
9Ɔdonga Yesu ena, akɛɛ ta ndako ɛ miɔngɔɔnɔ ɛ Bayuda. 10Moto omɔti ɔgwa ebɔ adaka oho. Bafalisai bapalaka bapunde Yesu, ta tina ena bamohɔdja boo: «Mobeko ma booso mapa ndjia ɛ ɔheledja bato ta iswi la sabata?» 11Yesu abasɔmbɛdja boo: «Nga omɔti ta ndanda ɛ boono akadaa oko na bhata omɔti ko bhata ona akwii ta mombɔndɔ ma mbɛngɛ ta iswi la sabata, atamodubodja? 12Moto adii na motwuia monɛnɛ onɔ bhata! Bea, Mobeko ma booso mapaka enɔli ɛ okɔɔ opele ta iswi la sabata.» 13Bea Yesu abala na moto ona boo: «Ninodja ebɔ ɛ wɛ.» Moto ona aninodja ebɔ ɛ nde ko ebɔ ena ɛhela elengɛɛ ena ekina. 14Bafalusai baimana ko basabolea tina ɛ ohomba ndjia ɛ oowa Yesu.
Yesu mosali ɔhɔɔ Ndjambe
15Ehole ɛdjeba Yesu boo bahombaka bamoowoe, adonga ena ko emumu ɛ bato ɛmokimana. Aheledja bato ba bipeko basusu, 16endolo abasia na ngulu boo batabala tina ɛ nde. 17Akɔɔ bea bɛngɛ boo ebaeli ɛ motɛli Isaya ɛkokedjame:
18«Hokea mosali ɔ mbai ɔhɔɔ mbai,
ona okapale mbai ko ona okasepedjaeni.
Naisaalea Mwembo ma mbai diko la nde
ko alehalea osooti ta bikomi ba bakɛndɛli.
19Asoetebi ko agametebi,
baoketebi moholi ma nde ta ndjia.
20Abuketebi mososongo imaimbama
ko adimeetebi moinda imapalaka madimee.
Akɔbi bea mbunoko odjoo balonge;
21ko bikomi bisusu ba bakɛndɛli balɛndɛbi ta kombe ɛ nde.»
Yesu abengani miembo mibe
(Hokea koko Mal 3, 22-30; Luk 11, 14-23)
22Balwɛɛ Yesu moto omɔti ɔ miso mago ko emimi ona ɔdaka nase dja okumu ba miembo mibe. Yesu aheledja moto ona, aimea obala ko oenɛ. 23Bato basusu bakamoa ko babala boo: «Moto hoo aditi mwana ɔ Davidi?» 24Ehole eoka Bafalusai midjɔ mia, babala boo: «Moto hoo abenganaka miembo mibe oko na kpati ɛ Belezebulu, kumu ɔ miembo mibe!» 25Ɔdjeba Yesu malɛi ma bobo, abala na bu boo: Okumu bosusu ibobɔtɔi ta tei ɛ bu botanɛngɛdja. Ibonga kaoko ibota ilibɔtɔi ta tei ɛ lu itanɛngɛdja. 26Nga Satana akabengana Satana, asaonedjaka yo mɛɛnɛ. Bea moda ndani okumu ba nde bonɛngɛdjalea? 27Ko nga mbai nakabengana miembo mibe na kpati ɛ Belezebulu, batingami ba boono bakamibengane na kpati ɛ nda? Ta tina ena, batingami ba boono badalea ibo mɛɛnɛ badjudji ba boono! 28Nga nabengana miembo mibe na kpati ɛ Mwembo ma Ndjambe, einedjaka boo Okumu ba busa bodoi mbunoko odii no.
29«Moda ndani moto ahɔni oingea ta ndako ɛ moto ɔ ngulu, ko atombi leka la nde, pɛpɛ opeta monanga mbɔti? Edii ta ehole ena apundjalea ndako ɛ nde. 30Moto odii pɛpɛ odaa engbanga na mbai adii moloni ɔ mbai; ko moto odii pɛpɛ okɔmedjani na oputoanedja akananganedjae. 31Na bea, nabali nanu sooti boo: masumu masusu ko matsio masusu mayɛɛmebi odii bato; endolo itsio isusu la Mwembo iyɛɛmetebi. 32Moto mosusu obalabi obe tina ɛ Mwana ɔ moto ayɛɛmɛbi; endolo moto mosusu obalabi obe na Mwembo Mosɛnɔke ayɛɛmetebi ɛdae ta mohelo ma nde ma ehole hee kaoko ma ehole eduake.»
Mole na mbuma dja mu
(Hokea koko Luk 6, 43-45)
33«Mole mopele mokabote oko mbuma djipele, mole mobe, mokabote oko mbuma djibe. Tina ɛ boo mole mokadjebame oko na mbuma dja mu. 34Ibota la mabate! Moda ndani ohɔnini obala midjɔ mipele, ena bea odiini bato babe? Tina ɛ boo midjɔ imaimanaka ta monɔkɔ mikadonge ta molema. 35Moto mopele akabale midjɔ mipele imikadonge ta molema ma nde; moto mobe akabale midjɔ mibe imikadonge ta molema ma nde. 36Nabalaka na nu boo: ta iswi la esambi, bato basambabi tina ɛ bibaeli ba bobo ba pɛpɛ tina ibaimanedjaka bo. 37Tina ɛ boo edii na ndjia ɛ ebaeli ɛ wɛ mɛɛnɛ oboani olonga kaoko okwa.»
Embete ɛ Yona
(Hokea koko Mal 8, 11-12; Luk 11, 29-32)
38Bea ekenge ɛ bato ba edjebeli ɛ mibeko ko Bafalusai babala na Yesu boo: «Molehi, lapalaka oloinedjae embete emɔti ɛ midjɔ ma okamoa.» 39Yesu abasɔmbedja boo: «Bato ba yangola hee, badii bato babe ko bataki isuma ta miso ma Ndjambe, endolo bahɔdjaka embete ɛ midjɔ ma okamoa, endolo pɛpɛ embete emɔti epamalea na bu dongedja oko embete ɛ motɛli Yona. 40Tina ɛ boo, moda madaka Yona ta sɔpɔ dja moswi monɛnɛ maswi masato ko bulu isato, moda momɔti Mwana ɔ moto akɔbi maswi masato ko bulu isato ta nase dja kpɔtɔ. 41Ta iswi la esambi, bato ba Niniwe baemabi ko baleneabi bato ba yangola hee etumbu, tina ɛ boo bato ba Niniwe basɔmbɔtɔnɔ milema ma bobo ehole ɛoka bo Yona aleha. Ko moto onɔi Yona adii haa! 42Ta iswi la esambi, kumu mwali ɔ Sudi aemabi engbanga na bato ba yangola hee ko abaleneabi etumbu, tina ɛ boo adonga ta suka ɛ ngondo adoa tina ɛoka bibaeli ba owɛi ba Sɔlɔmɔ. Ko moto onɔi Sɔlɔmɔ adii haa!»
Osɔmbɔ ba mwembo mobe
(Hokea koko Luk 11, 24-26)
43«Ehole eimani mwembo mobe odii moto, mokakɛɛ alebalebe ta bisobe ahomba esika ɛ ohema. Endolo momitidiha esika ena, 44bea mosabalealea boo: “Enɔi na opele osɔmbɔ ta ndako ena ɛkina mbai.” Mokasɔmbɔ motanei ndako ena bwase, eombɔmɔke ko ebɔngedjamake. 45Mokɛlea koko atomba miembo mikina sambo imimonɔi na obila; basɔmbi engbanga adaa ta ndako. Bea, mohelo ma moto ona moimeabi mobe onɔɔ moda imadaka mo boso. Edabi oko bea tina ɛ bato babe ba yangola hee.»
Nɛngɛ ɛ Yesu na bana ba nango
(Hokea koko Mal 3, 31-35; Luk 8, 19-21)
46Ena ɔdaka Yesu abala na bato, nango na bana ba nango baami badaka baemi osokolu. Ko bahombaka basoole na nde. 47Bea moto omɔti atɔndɔɔ Yesu boo: «Ngwao na bana ba ngwao baami baemi osokolu ko bahombaka basoole na wɛ.» 48Yesu amosɔmbɛdja boo: «Odii inga nda? Badii bana ba inga ba nda?» 49Bea Yesu ainedja ebɔ ɛ nde ngise ɛdaka batingami ba nde ko abala boo: «Hokea: Inga na bana ba inga ibibi. 50Tina ɛ boo moto okakɔe opala ba Tata ona odii ta busa adii mwanainga, ngɛnɛ kaoko inga.»
Iliyochaguliwa sasa
MATIE 12: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
