MATIE 13

Indjɛ la mooneli

(Hokea koko Mal 4, 1-9; Luk 8, 4-8)

1Oko ta iswi dia, Yesu aimana ta ndako ko akɛɛ adaa ta ekulu ɛ ibeke inɛnɛ tina ɛ oleha. 2Emumu ɛ bato bamohika, Yesu atitea ta bwato ko adaa otei ba bu. Bato basusu badika ena baemi ta ekulu. 3Abala na bu midjɔ mike na ndjia ɛ mandjɛ ko abala na bu boo: «Iswi imɔti, mooneli omɔti akɛɛ aona ta gue ɛ nde. 4Ena ɔdaka yo aona, kona ikina djakwa mbuti na ndjia: mbulu badjiyaka. 5Ikina djakwa ta esika ɛ ndeke ena kpɔtɔ djaidaka inɛnɛ. Kona djatɔɔ pɛpɛlɛ tina ɛ boo kpɔtɔ djaidaka na mbɛngɛ. 6Ehole ɛimana moi, matumba kona: tina ɛ boo djaidaka na nginga. 7Ikina kona djakwa ta mele ma ndjubɛ. Ndjubɛ djakandoa ko djadjikamamedja. 8Endolo ikina djakwa ta mokpɔtɔ mopele ko djabota mbuma: ikina kona djabota mbuma mokama momɔti, ikina tuku isamano ko ikina tuku isato.» 9Ko Yesu abakea boo: «Moto odii na matoi ma ooka, aoke!»

Tina ekabale Yesu na mandjɛ

(Hokea koko Mal 4, 10-12; Luk 8, 9-10)

10Batingami babatama na Yesu ko bamohɔdja boo: «Tina ndani ɔbalaka na bu na mandjɛ?» 11Yesu abasɔmbɛdja boo: «Ndjambe aopini, ino, edjebeli ɛ midjɔ ma mbombi ma Okumu ba busa endolo ɛipama na moto mosusu. 12Tina ɛ boo moto odii na eka bamopalea koko bɛngɛ aimee na lu luke; endolo moto odii pɛpɛ odaa na eka bamokatoalea noko okɛkɛ bopeli yo. 13Hokeani tina ɛbalaka mbai na bu na mandjɛ: tina ɛ boo badii na miso ko tebaenɛ, bakaoke ko tebasipoe. 14Ebaeli ɛ motɛli Isaya ta tina ɛ bobo ekokedjami:

“Ookabini opele, osipoetebini;

ohokeabini opele, oenɛtebini.

15Tina ɛ boo milema ma bato bii maapinga;

baditea matoi ma bobo,

badipa miiso,

bɛngɛ boo bataɛnɛ,

badipa matoi ma bobo,

bɛngɛ basaka sipoa ta milema ma bobo,

badae pɛpɛ osɔmbɔtɔnɔ milema

ko nabaheledjae.”»

16«Endolo ino, daani bato ba sepi: tina ɛ boo miiso ma boono maenɛkɛ ko matoi ma boono maokaka! 17Nabalaka na nu, sooti boo: batɛli bike ko bato bike ba milema mipele badaka na posa oenɛ midjɔ mii imaenɛkɛ no, endolo baimienɛ, ko baoke midjɔ imaokakano, endolo baimioka.»

Yesu atingodjai indjɛ la mooneli

(Hokea koko Mal 4, 13-20; Luk 8, 11-15)

18«Okani tingo ɛ indjɛ la mooneli. 19Nga moto akaoka ebaeli ɛ Okumu ko ayesipoiti, Satana akadoe adongedja midjɔ imaonama ta molema ma moto ona: Ena edii tingo ɛ kona idjakwa ta mokpɛngɔ ma ndjia. 20Mbuma idjakwa ta mokpɔtɔ ma ndeke edii moto ooki ebaeli ko ayeɔsi na sepi. 21Endolo aditi na nginga dja edhimeli, anɛngɛdjalea oko maa ehole mokɛkɛ. Bea, ehole ɛ monɔngɔ kaoko ɛ omekama ekaimea ta tina ɛ ebaeli ɛ Ndjambe, asundolalea edhimeli ambuku. 22Mbuma idjakwa ta mele ma ndjubɛ: edii moto ooki ebaeli, endolo posa ɛ ngondo na posa ɛ odiheli ikamamedjai ebaeli ta tei ɛ nde, bea atabota mbuma. 23Mbuma idjakwa ta mokpɔtɔ mopele: edii moto ooki ebaeli ko ayesipoi opele; bea abotalea mbuma, mokama momɔti, dɔngɔ ikina tuku isamano ko dɔngɔ ikina koko tuku isato.»

Indjɛ la mondjani mobe

24Yesu abala na bu indjɛ ikina boo: «Okumu ba busa bokoani na moto ooni kona djipele ta gue ɛ nde. 25Endolo, ehole ɛhwɛɛ bato basusu, moloni ɔ nde adoa ko aona ndjani djibe ta gue ɛ nde ɛ ndongo ko akɛɛ. 26Ehole ɛbanga ndongo otɔɔ ko oimanedja mingbɔndu, ndjani djibe djakandoa koko. 27Basali ba moswa gue badua ko babala na nde boo: “Kumu, wɛ ɔiona kona ipele ta gue ɛ wɛ: bea odongi ndjani dji ibe hɔɔ?” 28Moswa gue abasɔmbɛdja boo: “Edii moloni moto okɔi bea.” Bea basali bamohɔdja boo: “ɔpalaka lakɛɛ abikoa ndjani djia ibe?” 29Moswa gue abasɔmbɛdja, pɛpɛ, tina ɛ boo okadongedjani ndjani ibe ohɔnini koko obikoa ndongo engbanga na dju. 30Kinani djakandoe isusu engbanga mbunoko ehole ɛ obuka mbuma, ta ehole ena, nabalalea na bato ibabukaka mbuma boo: Dongedjani boso ndjani ibe, djinangani bibolo ko djitumbani, endolo bukani ndongo ko djiboleani ta ebombelo ɛ mbai.»

Indjɛ la mbuma ɛ sinapi

(Hokea koko Mal 4, 30-32; Luk 13, 18-19)

31Yesu abala na bu indjɛ ikina boo: «Okumu ba busa bokoani na kona ɛ sinapi ɛtomba moto omɔti ko ayeona ta gue ɛ nde. 32Kona ena enɔi kona isusu na okɛkɛ; endolo ehole ekandoa yo, ɛnɔɔ ndjua susu dja gue na oyai ko na onɛnɛ: ɛimea mole ma bitape binɛnɛ ibikadoe mbulu ayoa meepu ma bobo.»

Indjɛ la nɛngɛɛ mapa

(Hokea koko Luk 13, 20-21)

33Yesu abala indjɛ ikina boo: «Okumu ba busa bokoani na nɛngɛ mapa ɛtomba mwali ko aputoanedja na biidjɛli bisato ba falini mbunoko pɔtɔpɔtɔ ɛhuula.»

Eleho na ndjia ɛ mandjɛ

(Hokea koko Mal 4, 33-34)

34Yesu alehaka na mandjɛ tina ɛ obala midjɔ mia misusu odii bato; ko ehole esusu abalaka na bu oko mandjɛ. 35Abalaka bea bɛngɛ boo bibaeli ba motɛli bakokedjame:

«Nadipoabi monɔkɔ tina ɛ obala na mandjɛ,

Natɛlɛbi midjɔ ma mbombi donga ibange la ngondo.»

Yesu atingodjai indjɛ la mondjani mobe

36Bea Yesu akina emumu ɛ bato ko aingea ta ndako. Batingami ba nde badua odii yo ko bamohodja boo: «Lotingodja indjɛ la mondjani mobe ta gue.» 37Yesu abasɔmbɛdja boo: «Mooneli ɔ kona epele, edii Mwana ɔ moto; 38gue, edii ngondo; kona ipele edii bana ba Okumu ba busa; ndjani ibe edii bana ba Satana; 39moloni ona ɔonaka ndjani ibe, edii Satana; ehole ɛ obuka mbuma, edii suka ɛ ngondo; ko bato ibabukaka mbuma, edii babwɛndi. 40Moda mokabikoe bo ndjani ibe ko mokadjitumbe bo ta mosa, edii oko moda mua imodabi ta suka ɛ ngondo: 41Mwana ɔ moto alomabi babwɛndi ba nde, badongedjabi ta Okumu ba nde leka losusu lokalome bato bakɔe masumu na bato ibakakɔe obe, 42babadumbabi ta ipombe la mosa esika edabi bo bayea ko bakpɛkɛnɛ miino. 43Bea bato ba odjoo bangɛngɛbi elɛngɛ diiso la busa ta Okumu ba Sangwabu. Yɛɛ boo moto odii na matoi ma ooka, aoke!»

Indjɛ la odiheli iba mbombi

44Okumu ba busa bokoani na odiheli ibabomba bo ta gue. Moto omɔti aboeni ko abobombi koko. Na sepi ena boo akɛlea atɛkɛ leka la nde losusu bɛngɛ asombe gue ena.

45«Okumu ba busa bokoani koko na motɛki ɔ leka ona ohombaka mayaka mapele. 46Akaenɛ mayaka ma motwuia monɛnɛ, akɛlea atɛkɛ leka la nde losusu bɛngɛ amasombe.»

Indjɛ la ehea

47«Okumu ba busa bokoani koko na ehea ena ekadumbe bo ta ibeke inɛnɛ ko etɛdjai swi ba mindumba na mindumba. 48Ekaluma, baowoli ba swi bayedubodjai o ngondo, badalea ko baisalea swi bapele ta ngombe ko badumbalea ibabe. 49Edabi oko moda mua ta suka ɛ ngondo: babwɛndi badoabi akaana bato babe ta ndanda ɛ bato ba odjoo 50bea badumbabi bato babe ta ipombe la mosa mopipo oho bayeabi ko bakpɛkɛnɛbi miino.»

Odiheli ba yanie ko boyou

51Yesu ahɔdja batingami ba nde boo: «Osipoini midjɔ mii misusu?» Bamosɔmbɛdja boo, «Edii bea». 52Bea abala na bu boo: «Moto mosusu ɔ edjebeli ɛ mibeko ona oimea motingami ɔ midjɔ ma Okumu ba busa akoani na moswa ndako ona oimanedja ta ebombelo ɛ nde odiheli ba yanie na iboyou.»

Bato ba Nasaleta baloni odhima Yesu

(Hokea koko Mal 6, 1-6; Luk 4, 16-30)

53Ngɔngɔ dja Yesu obala mandjɛ mia, adonga ta esika ena 54ko asɔmbɔ ta ibonga ilakandoa yo. Aimea oleha ta ndako ɛ miongɔɔnɔ ɛ Bayuda ko bato basusu bakamoa. Babala boo: «Ohulaka owɛi buu ba nde hɔɔ? Moda ndani akɔkɔ midjɔ ma okamoa? 55Hoo titi mwana ɔ mosali ɔ mabaya? Malia titi nango? Djake, Yosepu, Simo nɔbɔ Yuda titi bana ba nango baami? 56Ko bangɛnɛ basusu baditi nasu haa engbanga? Odihi yo kpati hee esusu hɔɔ?» 57Bea adaka ibaku tina ɛ odhima ba bobo. Yesu abala na bu boo: «Motɛli akatiolame oko ta ngando ɛ nde ko ta ibota la nde.» 58Yesu akɔɔ midjɔ ma okamoa mikɛkɛ ena tina ɛ boo baidaka na odhima.

Iliyochaguliwa sasa

MATIE 13: ngc

Kuonyesha

Shirikisha

Nakili