MATIE 1
1
Bakɔkɔ ba Yesu
(Hokea koko Luk 3, 23-38)
1Hee edii kombe dja bakɔkɔ ba Yesu Klisto, motitani ɔ Davidi, ko David motitani ɔ Abalayama.
2Abalayama abota Isaka, Isaka abota Yakobo, Yakobo abota Yuda na bana ba nango; 3Yuda abota Pelesi nɔbɔ Djela ngwabu adaka Tamala, Pelesi abota Esɔlɔme, Esɔlɔme abota Alame; 4Alame abota Aminadaba, Aminadaba abota Nasɔni, Nasɔni abota Salamane; 5Salamane nɔbɔ Laba babota Boadja, Boadja nɔbɔ Luta babota Obede, Obede abota Yese, 6ko Yese abota kumu Davidi.
Davidi nɔbɔ mwali ɔ Uli babota Sɔlɔmɔ, 7Sɔlɔmɔ abota Loboama, Loboama abota Abia, Abia abota Asafa; 8Asafa abota Yoyafata, Yoyafata abota Yolama, Yolama abota Odjiasi; 9Odjiasi abota Yotama, Yotama abota Akadja, Akadja abota Edjekiasi; 10Edjekiasi abota Manase, Manase abota Amoni, Amoni abota Yodjiasi; 11Yodjiasi abota Yekonia na bana ba nango, ta ehole ɛtombama bana ba Isalɛlɛ ta Babilone.
12Ngɔngɔ dja otombama ba Isalɛlɛ ta Babilone, Yekonia abota Salatiele, Salatiele abota Yolobabɛlɛ; 13Yolobabɛlɛ abota Abiudi, Abiudi abota Eliakimi, Eliakimi abota Adjolo; 14Adjolo abota Sadoki, Sadoki abota Akimi, Akimi abota Eliudi; 15Eliudi abota Eleadjala, Eleadjala abota Matani, Matani abota Yakobo; 16Yakobo abota Yosepu, moomi ɔ Malia nɛngɛ ɛ Yesu, okabee bo Klisto.
17Bea, donga Abalayama mbunoko Davidi, yangola djadaka doomi na inei, ko doomi na inei donga Davidi mbunoko ehole ɛtombama bana ba Isalɛlɛ ta Babilone, ko ikina doomi na inei donga ehole ena mbunoko obotama ba Klisto.
Obotama ba Yesu Klisto
(Hokea koko Luk 2, 1-7)
18Hokea moda mabotama Yesu Klisto. Malia, nango, apandamaka na Yosepu boo amoosɛ; endolo boso baodjebana mwali na moomi, Malia alwa deemi na ndjia ɛ Mwembo Mosɛnɔke. 19Yosepu, moomi ɔ nde, adaka moto ɔ odjoo ko aipala omosambodja ta miso ma bato, aenɛ opele boo babɔtɔe na mbombi. 20Oko ta ehole ɛdaka yo alɛdja modjɔ mua, obwɛndi ɔ Kumu aenɛmɛ na nde ta ndjɔti ko abala na nde boo: «Yosepu, motitani ɔ Davidi, pɛpɛ oda na bɔɔ ba osɔɔ Malia mwali ɔ wɛ, tina ɛ boo deemi ilidii na nde idongi odii Mwembo Mosɛnɔke. 21Abotalea mwana moomi ko omobakealea kombe ɛ Yesu, tina ɛ boo edii yo moto oheledjalea bato ba nde ta masumu ma bobo.»
22Midjɔ mia misusu makɔɔmɔ tina ɛ okokedja ebaeli ɛbala Kumu na ndjia ɛ motɛli:
23«Moseka mwali ɔ pɛpɛ odjeba baami alwalea deemi ko abotalea mwana moomi,
bamobealea Emanuɛlɛ.»
Kombe ena etingodjai boo: «Ndjambe engbanga na su».
24Ehole ɛongɔɔ Yosepu ta hiɔ, akɔɔ midjɔ misusu oko moda imabala obwɛndi ɔ Kumu na nde. Atomba mwali ɔ nde Malia ta ndako ɛ nde. 25Endolo aiputoana na nde mbunoko ehole ɛbota Malia mwana moomi, Yosepu amobakea kombe ɛ Yesu.
Iliyochaguliwa sasa
MATIE 1: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
