MATIE 2
2
Bato ba owɛi badoi aindja Yesu
1Yesu abotama ta Bɛtɛlɛmɛ ɛ Yuda, ta ehole ɛdaka Elode kumu. Ngɔngɔ dja obotama ba nde, bato ba owɛi, badonga ta dɔɔngɔ ikaimane diso la busa. Baimea ta Yelusalɛmɛ 2ko bahɔdja boo: «Odii Kumu ɔ Bayuda hoo ɔhulake abotama hɔɔ? Loeni mondjɔtɔ ɔ nde dɔngɔ ikaimane diso la busa ko lodoi akwa magunda boso ba nde.» 3Ehole ɛoka kumu Elode gala ena, atungeama obuke, engbanga na bato basusu ba Yelusalɛmɛ. 4Abolea bakumu ba banganga ba Ndjambe na bato ba edjebeli ɛ Mobeko, ko abahɔdja esika eboani Masia obotama. 5Bamosɔmbɛdja boo: «Ta Bɛtɛlɛmɛ, ɛ Yuda. Tina ɛkomama na motɛli boo:
6“Bea wɛ, Bɛtɛlɛmɛ, ta ekomi ɛ Yuda,
oditi mokɛkɛ ta mabonga ma Yuda,
tina ɛ boo kumu aimanabi odii wɛ
ona odabi mobanyei ɔ bato ba mbai, Isalɛlɛ.”»
7Bea, Elode abea na mbombi bato ba owɛi bɛngɛ adjebe ehole ɛimana mondjɔtɔ. 8Bea, abaloma ta Bɛtɛlɛmɛ ko abala na bu boo: «Kɛɛ ahombeni mwana ona, ko okamodihani, djebedjanini bɛngɛ boo mbai koko nakɛɛ akwa magunda boso ba nde.»
9Ngɔngɔ dja ooka bibaeli ba kumu, bakɛɛ. Baenɛ koko mondjɔtɔ ona oɛnɛ bo dɔngɔ ikaimane diso la busa. Mondjɔtɔ ona adalaka boso ba bobo mbunoko ehole ɛema yo diko la esika ɛdaka mwana. 10Ehole ɛenɛ bo koko mondjɔtɔ ona, baluma na sepi enɛnɛ. 11Baimea ta ndako ena, baenɛ mwana na nango, Malia. Bakwa magunda tina eokumedja mwana; ngɔngɔ djia badipoa bhodjo dja bobo, bamopa bipeeli bii: ɔɔlɔ, malasi ma otumba, na miile. 12Ngɔngɔ djia, Ndjambe abakebedja ta tei ɛ ndjɔti boo badae koko pɛpɛ osɔmbɔ odii Elode, batomba ndjia ekina bɛngɛ bayane ta ngando ɛ bobo.
Otili ta Edjipito
13Ngɔngɔ dja iyane la bato ba owɛi, Obwɛndi ɔ Ndjambe aenɛmɛ na Yosepu ta ndjɔti ko abala na nde boo: «Ema, tomba mwana na nango, tiani ta Edjipito ko nɛngedjani oho mbunoko ehole eodjebedjalea mbai koko boo osɔmbɛ. Tina ɛ boo, Elode ahombalea mwana bɛngɛ amoowoe.» 14Yosepu aema, atomba mwana na nango, oko na bulu bua, batia ta Edjipito. 15Adikama oho mbunoko ogwa ba Elode. Ekɔɔmɔ bea bɛngɛ boo modjɔ imabala Kumu na ndjia ɛ motɛli makokedjame: «Nabea mwana ɔ mbai aimane ta Edjipito.»
Oowama ba bana
16Ehole ɛsipoa Elode boo bato ba owɛi bamokosea, aoka kɛlɛ enɛnɛ. Apa enɔli baowoe bana baami bakɛkɛkɛ basusu donga mbua babae mbunoko otita ta Bɛtɛlɛmɛ na ta ngando dja mbuti-mbuti, okimana na ehole ɛenɛ bato ba owɛi mondjɔtɔ. 17Na bea, ebaeli ɛ motɛli Yelemia ɛkokedjama:
18«Mongoli mookami ta Lama,
Bie na miyeano minɛnɛ miokami:
Edii Laele moto ɔyeaka bana ba nde,
Ko aloni opingedjama, tina e boo bagwa.»
Ihule ta Edjipito
19Ngɔngɔ dja ogwa ba Elode, Obwɛndi ɔ Kumu aenɛmɛ na ndjɔti odii Yosepu ta Edjipito. 20Abala na nde boo: «Emaa, tomba mwana nɔbɔ nango ko sɔmbɔ ta ekomi ɛ Isalɛlɛ, tina ɛ boo, bato ibapalaka baowoe mwana bagwa.» 21Yosepu aemaa, atomba Mwana nɔbɔ nango ko bayana ta ekomi ɛ Isalɛlɛ. 22Endolo ehole ɛoka yo boo Alikelausi asulungana ta egboto ɛ sango Elode elɛngɛɛ kumu ɔ Yuda, abanga osɔmbɔ oho. Ndjambe amokebedja ta tei ɛ ndjɔti ko Yosepu akɛɛ ta ekenge ɛ mokpɔtɔ ma Galilai. 23Akɛɛ adikama ta ibonga ilabeaka bo Nasalɛta. Bɛngɛ ebaeli ɛ batɛli ekokedjame: «Bamobealea moto ɔ Nasalɛta.»
Iliyochaguliwa sasa
MATIE 2: ngc
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©2025 Communauté des Eglises Travaillistes (CET)
