Zlən ataa həji ta zlən aagi 16
16
Dzəv tiw Pul abə Timuti
1Azha, peteŋ Pul a hayak ma dzamadzam Derbe, zhana, peteŋ a hayak ma dzamadzam Listira, a tsutsa, magəla minja aka, zləm tə Timuti, mbə ataa wala ndə Yahuda minja, ma bəw tə a wala ma ji ma Kərist. Ama, cin tə ndə Gərek. 2Həji Kərist ma ndza a hayak ma dzamadzam Listira abə ma ndza a hayak ma dzamadzam Ikuniya aagi kazlap ata təwah Timuti. 3Pul a mayɓa a ji aara, leŋ a ji azha, zla a zlanə mazhemter bəza dawna Yahuda ma ndza a tsutsa aagi. Aa kasən tiwtiw ya, cin a ɗa ndə hayak Gərek. 4A ŋge a hayak ma dzamadzam ndə tiw Pul abə Silas aa kapew aagi, aa kaghalatana ma ndə həji ta zlən Yesu aagi abə həji ma shif shif aagi, aa gar ka a Wərusalima, azha dəba aagi azlapatana a ɗal andza ma garaya watsa. 5Həji Kərist aagi talima ŋgalaŋ bəza a ɗal awa, azha, kala pish, həji Kərist aagi kafəl.
Ya Pul a Makeduniya
6Tiw Pul abə Silas aa kadzəsl hayak Firigiya abə hayak Galatiya, ara ndə a ɗa, Miɗ ma ghwaɗeɗe a takata ka a ghal ma Bizlaf a hayak Asiya. 7Ndə aa ɗa huk a hayak Misiya, aa gas a nda a hayak Bitiniya, ama Miɗ ataa Yesu tatakata ka zhana. 8Mbara pew aa pew hayak Misiya bəza, azha, taduk aa tadukha a hayak ma dzamadzam Turuwas. 9Zaɗə minja aka, Pul a gəra ala ndə hayak Makeduniya minja a shiŋshiŋ, a kagar, a katar Pul, iŋgaya: «Ndaha a hayak Makeduniya azha, hwa ndaha a lamzani!» iy. 10A diwzha shiŋshiŋ ataa Pul watsa, ni tsa kanda cini kahkah a hayak Makeduniya, ara ndə a ɗa, ni kasən katkadək, Bizlaf a kayani a tsutsa a ghal Ma wiyə ma təwah.
Mbaɗ landza Lidiya a Filip
11Ni ji gəlmbə a hayak ma dzamadzam Turuwas, azha ni nda dəlili a ma bay yəm Samutaras, azha, a kwaf tə, ni tsa kanda a hayak ma dzamadzam Neyapulis. 12Azha, a tsutsa, ni nda a hayak Filip, hayak ma dzamadzam ma ŋtan ataa hayak Makeduniya, azha, a ɗa hayak ma dzamadzam ataa Ruma. Ni tandza kajik a tsutsa. 13Ma vah ta nəp, ni tsa kandaa cini a bəza a hayak ma dzamadzam aska ni nda mber a ma zlazlər. Ni deŋ ka: «A tsutsa ya, kwa avaŋgəy la tarha ataa Yahuda aagi aka parpar,» niy. Dəba ni andza cini ka, ni kazlap abə wali ma dzam ta ka a tsutsa aagi. 14Wala minja ŋtaguleŋ a taba ta, zləm tə Lidiya, maber rəkuts ma viri ma təwah, a ndza a hayak ma dzamadzam Tiyatira, a ɗa wala ma kahəmən Bizlaf tiw ana aŋtə. Wala watsa dəba a ateh zlap cini, azha Bay Madagal tadəɗanə ꞌunəf tə aska a teh zlap ataa Pul abə ŋkwaɓ. 15Ndə a lima batem bəza ya, ha tə abə jak tə, azha dəba a ayaani, iŋgaya: «Andza huni kadeŋ ka, ŋter, sa taɗal awa aska ma ataa Bay Madagal, huni ndaha a ndza a wata naka!» iy. Zhana a katakani a lamzə ma watsə abə ɓərɓər tə.
Mbəla Pul a jak yaka abə pəla tə a hayak Filipi
16Vah minja aka, ni kanda ata la tarha, həladəma ma ɗal zlən minja taa tə ara ni, a həla watsa ya, miɗ ma gamak a kaghalanə səkən ma kaapew atama aagi. Abə təf watsə ikwa abə madagal tə aagi aa kalima dala dagala. 17Dəba a asəbarani, ni abə tiw Pul, a kadza wəla, iŋgaya: «Həji watsə aagi, aa ɗa ŋter həji ma kaɗalanə zlən a Bizlaf ma ndza a wəzəm aagi, a kaghalahuni təf aska a reh,» iy. 18Həladəma ma ɗal zlən watsa, wan aka dagala a kaɗalə. Kwakuɗaŋ tə, Pul tikush a ghuɗek tə, azha, zlaz a zlazha ma, zlap a zlapanə a miɗ watsa, iŋgaya: «Ata zləm ataa Yesu Kərist, ji ŋgas kwa a bəza ana həla watsə,» iy. Azha, a tsutsa a tsutsa, miɗ watsa tsaw a ndaa tə a bəza a həla watsa. 19Həji madagal tə aagi aa gəra ya, aa kazhin a lima dala abə həla watsa akas. Azha, kaw aa mbəla tiw Pul bəza abə Silas, aa tsa kanjiwata ata hayak a jiɓata atama mazla guma aagi. 20Dəba aagi adaatana a həji ma zla guma ma ndza a hayak Ruma aagi, iŋgaya: «Həji watsə aagi, aa kahəɗəw həji aagi a hayak takwa, aa ɗa Yahuda aagi, 21aa kazhin a sərəkatana wiyə kwakus maparam a həji aagi. Ama, ni həji hayak Ruma aagi, ni abə təf ta lamzata, abə a səbarata akas.» 22Ŋgaɓa həji aagi, aa taghuɗek ta ata tiw Pul abə Silas. Həji ma zla guma ataa hayak Ruma aagi, dəba aagi azlap aska a səɗatana rəkuts a bəza ata zlikusəm, pa aa vəlatana təf ta rəgaɗata abə lakwatəy. 23Azha ndə, həji rəgaɗata bəza mgbəŋ andza ndə ꞌunəf a kamayə ya, kwiy aa kwiyata ka a jak yaka, zlap aa zlapatana ka ana həji ma həbar majak aagi, aska a njinata katkadək. 24Ndə ala ma həbar jak yaka a zlima zlap watsə ya, jaɓ a jaɓata ka a ŋge a kwakuɗaŋ jak yaka azha, ŋgap a dzawatana ŋgas aagi aka abə mpi. 25A ɗal bəza slaɓ abə taba zaɗə, tiw Pul abə Silas, aa katarha, aa kaya dərəf ta həmən Bizlaf, azha həji ma ndza a jak yaka ndiɓi aagi, aa teh ma ta. 26A tsutsa a tsutsa, hayak a kanaana, ŋcah jak aagi aa kakusah. Mpaŋ majak ataa jak yaka watsa aagi tiwtiw aa dəɗ ta, azha sheshili ma ata həji ma ndza a jak yaka aagi tiwtiw aa zla ta. 27Fəɗah a fəɗah tə ana ala ma həbar jak yaka watsa, a gəra ya, majak ataa jak yaka watsa aagi tiwtiw aa tadəɗ ta, a deŋ ka ya, həji ma ndza a jak yaka aagi tashi ta, leŋ a ji gulaŋ tə, a may a dza ha tə ka. 28Ama, Pul dəba a adzakənə wəla, iŋgaya: «Hwa ɗiw a ɗalɓa səkən ma gamak ata ha kwa səku, ni a ɗi tiwtiw!» iy. 29Ala ma həbar ɗiw a ɗiwzə kwahu a taŋ la, tsa kanda a jak yaka a ŋge a jak ma ndza a mən aagi, a kanaana ara ŋzliŋ azha, fak a fakakənə ha atama Pul abə Silas. 30A diwzha, kwar a kwarata bəza aha bəza, azha ɗiw a ɗiwzata, iŋgaya: «Madagal naka aagi, səkən ndə sa kaɗalə abə sa ɗa reh veme?» iy. 31Zhin aa zhinanə, aagi iŋgaya: «Ɗal awa aska ma ataa Bay Madagal Yesu, azha hwa aɗa reh, hwa, abə jak kwa,» aagiy. 32Dəba aagi aghalatana ma ataa Bay Madagal a sha abə həji ma ndza a gi tə aagi tiwtiw. 33Ata ler watsa, a bay zaɗə, ala ma həbar jak yaka watsa, leŋ a daata a yaɓatana mbəlah ta bəza. A tsutsa a tsutsa, ban aa ban batem bəza, sha abə ha tə abə həji ma ndza a gi tə aagi tiwtiw. 34Jaɓ a jaɓ tiw Pul abə Silas a wata tə, pa a vəlatana səkən zəm. Ala watsa abə həji ma ndza a gi tə aagi tiwtiw, aa mkpef abə ɓas ara ndə aa ɗalanə awa a Bizlaf.
35Ndə la a kwaf tə, həji ma zla guma ma ndza a hayak Ruma aagi zlən aa zlənha suji ma həbar jak watsa aagi aska a zlapanə ana ala ma həbar jak yaka watsa, aagi a pəlha həji watsa aagi ka. 36Ala ma həbar jak yaka watsa, ghal a ghalanə ma watsa a Pul, iŋgaya: «Həji ma zla guma aagi, aa ma zlapaka, aska a sa a pəlahuni ka, huni kula a ndaa kuni, azha huni nda abə təwah!» iy. 37Ama, Pul iŋgaya: «Aa tarəgaɗani ata nja manahayak tiwtiw, kwa aa taghemani akas! Avəli, ni ɗa həji ma ndza a hayak Ruma aagi, a diwzha, kwiy aa kwiyani ka a jak yaka azha, anawatsə, aa ɗiw a kwiyani bəza aha bəza abə ŋhil azha vəw? Ama, aŋghə. Aa mandaha abə ha ta a pəlani!» iy. 38Suji aagi, aa tsaa kanda a ghalatana ma watsə tiwtiw a həji ma zla guma ma ndza a hayak Ruma aagi. Ŋzliŋ a kadzata ndə aa zlima ya, tiw Pul abə Silas aa ɗa həji ma ndza a hayak Ruma aagi. 39Dəba aagi andaha a dzatana ra, azha kwar aa kwarata a bəza a jak yaka, azha zlap aa zlapatana aska aagi a nda ta a bəza a hayak ma dzamadzam. 40Ndə aa ndaa ta a bəza ana tiw Pul abə Silas a jak yaka ya, aa tsa kanda ta a wata Lidiya, aa gəra həji Kərist ndiɓi aagi, dəba aagi avəlatana ŋgalaŋ, azha aa tsaa kanda ta.
Iliyochaguliwa sasa
Zlən ataa həji ta zlən aagi 16: GOU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
