Zlən ataa həji ta zlən aagi 15
15
Həɗəw ha a Aŋtakiya ata zla mazhemter
1Həji ndiɓi aagi tadukha azha, a hayak Yahudiya a ndaha a Aŋtakiya. Tsakwa ana ma ndə aa kasərəkatana a zlina mama aagi: «Andza huni tazla mazhemter andza ndə a ghalə, ana ma ma garagar ataa Musa aka səku, huni kaareh səku,» aagiy. 2Ha tahəɗəw tə, səbakw ma dagal a kadza a taba tiw Pul, Barnabas abə həji watsa aagi. Dəba aagi azlap aska tiw Pul, abə Barnabas abə həji ndiɓi aagi a taba dzam həji Kərist aagi, aa taf a Wərusalima, aa nda gəra həji ta zlən Yesu aagi abə həji ma shif shif aagi, ata ma watsa. 3Ladzam həji Kərist ma ndza a hayak Aŋtakiya aagi kavəlatana səkən ndə aa kamayə a ciwir ta. Ndə aa pewha gwara a hayak Finikiya abə hayak Samariya, aa kaghalatana a həji aagi a tsutsa avaŋgəy abə həji ma ŋkula ɗa Yahuda aagi, aa bəw ta a həji Kərist aagi. Tavəlatana ɓas ma dagal a həji ma ji Kərist aagi tiwtiw. 4Ndə həji watsa aagi ɗa gwar a Wərusalima ya, ladzam həji Kərist, həji ta zlən Yesu aagi abə həji ma shif shif ma ndza a hayak aagi talamzata abə ra gbak gbak, azha, dəba aagi aghalatana səkən ndə Bizlaf a ɗalə abə təmta aagi tiwtiw.
Zlap ma ndza ata dza kusəm ma dza a Wərusalima
5Ama Farisa ndiɓi, ma bəw ta a həji ma ji ma Yesu aagi, dəba aagi azlap: «A kaɗiw ya, həji Kərist, ma ŋkula ɗa Yahuda aagi, aa mazla mazhemter, zhana aa manjin ma ma garagar ataa Musa,» aagiy. 6Həji ta zlən Yesu aagi abə həji ma shif shif aagi, dəba aagi adzamha ka aska zlima ma watsa.
7Aa kadza səbakw a guɗaŋ, azha, leŋ Piyer a ji zlap, iŋgaya: «Huni kasənə, zlina aagi, wan aka, Bizlaf ma mayaka a taba kuni, aska sa aghal Ma wiyə ma təwah a həji ma ŋkula ɗa Yahuda aagi, azha aa tazlima ata madedizh ma naka, aa tabəw ta a həji Kərist aagi. 8Bizlaf a kasən ꞌunəf həji aagi, ndə a gəra zlən ta aagi, ama tavəlatana Miɗ ma ghwaɗeɗe andza ndə a vəlahəji. 9Kwa səkən ma ɓizhata abə ŋkwa kwa kajik akas, abə ɗal awa abə ghwaɗeɗe ꞌunəf ta bəza. 10Mbara anawatsə azha, huni gas ma aska Bizlaf ava? Huni ɗiw a tsatana səkən ma ndəlndəl aka ata wəla a magəli ataa Yesu aagi, səkən ndə jiji takwa aagi abə ŋkwa tə, həji kula tiw səku, ara veme? 11Aɓa azha ci, abə təwah ataa Bay Madagal Yesu, abə ɗal awa takwa a rehahəji bəza andza təmta.»
12Azha, həji ma dzam ta ka nana aagi tiwtiw ɗekɗek aa ndza ta ka. Dəba aagi ateh zlap tiw Barnabas abə Pul, aa kaghal mbaɗ aagi abə tsaɓan ndə Bizlaf a ɗal gwar ara təmta ata nja həji ma ŋkula ɗa Yahuda aagi.
13Ndə aa kəɗaŋ zlap ta bəza, leŋ Yakuba a ji zlap yəm, iŋgaya: «Zlina aagi, huni tehzaka. 14Simun a ꞌwal a ghalahəji anawatsə avaŋgəy abə Bizlaf a deŋɓa ata diw tə, a ji a taba həji ma ŋkula ɗa Yahuda aagi, aska a ɗa həji tə aagi. 15Zlec abə zlap ataa həji ma ɗaf ma ndə aa zlimazə ara Bizlaf aagi ana ma watsə, ara ndə a ɗa, taŋtiraya:
16 A diwzha ma watsə, sa azhinha
a ꞌun jak ataa Dawda ma ghurəm tə ka.
Sa aꞌunə jak tə ma ghurəm tə ka azha,
sa agar jak watsa aagi ka a wəzlaf.
17 ꞌWa aka a tsutsa, baraf həji ma finha aagi agas Bay Madagal,
abə həji ndə sa yata a ɗa həji naka aagi tiwtiw.
Tsakwa ana ma ndə a zlap ana Bay Madagal
azha, taɗal səkən ndə a garata ka a ɗal andza sha aagi.
18 Səkən watsa aagi tasənaya ambəɗa tə.»
19Yakuba zhana, iŋgaya: «Tsakwa azha ana səkən ndə sa kadeŋi: tazhiva a ɗalatana səkən ma gamak a həji ma ŋkula ɗa Yahuda ma kazhina ta ara Bizlaf aagi səku. 20Ama həji ŋtiratana ma watsə: “Huni ɗiw a zəm wəda takun səku, ara ndə a ɗa dadawər dəy a mən. Huni ɗiw a ɗal mazheref səku. Huni ɗiw a ji a zəm zli ndə ampəs ndza tə a mən səku.” 21Ara ndə a ɗa, wan aka dagala, həji aagi kaghal ma ma garagar ataa Musa a hayak ma dzamadzam kwa vatəy azha, kala vah ta nəp tiwtiw, həji kayə a jak ta tarha Yahuda aagi.»
Ɗerewal ma zlənha a həji Kərist ma ndza a hayak Aŋtakiya aagi
22Mbara azha, həji ta zlən Yesu aagi abə həji ma shif shif aagi, abə həji Kərist aagi tiwtiw, azha dəba aagi aji deŋ ŋkwaɓ ta dəm həji ndiɓi aagi a taba ta, azha aa tazlənata tsalah a hayak Aŋtakiya, abə tiw Barnabas abə Sul. Dəba aagi amayɓa tiw Yahuda ndə aa kayə Barsabas abə Silas, həji ma ndza abə ŋgalaŋ aagi a taba həji Kərist Yesu aagi. 23Pa aa vəlatana ɗerewal ma zlənha watsa ka: «Dəba həji ta zlən Yesu aagi abə həji ma shif shif aagi azlapzatana a həji ma ji Kərist ma ŋkula ɗa Yahuda aagi, ma ndza a hayak ma dzamadzam Aŋtakiya, hayak ma dagal Siriya abə hayak ma dagal Silikiya aagi. 24Ni tazlima a taba cini, həji ndiɓi aagi taha a gəy ŋkwaɓ kuni, aska ŋzliŋ a dzahuni ara madedizh ma ta, ama ni tazlənata a ɗalə ikwa akas. 25Sha ana ndə, ni tiwtiw ata la ma ŋtaguleŋ, ni tadəm həji aagi azha, ni tazlənahuni təmta. Aagi lah həji cini ma ɗa tiw Barnabas abə Pul, 26həji ma ji a ber ha ta aagi bəza aska zlən Bay Madagal takwa Yesu Kərist. 27Azha, ni kazlənahuni tiw Yahuda abə Silas, aa kaaghalahuni zlap ndə ni ŋtiri a ma watsə. 28Ara ndə, Miɗ ma ghwaɗeɗe, ha cini, ni tagar bəza. Aha dəɓa ma ma dzawaka watsə, ara həji aagi mbakahuni səkən ka aha: 29Huni ɗiw a zəm zli takun səku ara ndə a ɗa, dadawər dəy a mən, abə zli ndə ampəs ndza tə a mən, huni aɗal mazheref səku. Andza huni tanjin səkən watsə aagi bəza a heɗe a heɗe, zlən kuni təwah. Ni kazlapzahuni, huni ndza kadək.»
30Ndə aa mbasl tiw Pul, Barnabas, Yahuda abə Silas aka, aska aagi nda a hayak ma dzamadzam Aŋtakiya ya, a tsutsa dzam aa dzam həji Kərist aagi, azha pa aa vəlatana ɗerewal ma zlənha ata təmta watsa. 31Dəba aagi aya zlap ma ndza a ma watsa, həji aagi mkpef abə ɓas mavəy sakw ꞌunəf ta. 32Yahuda abə Silas, ma ɗa həji ma ɗaf ma ndə aa zlimazə ara Bizlaf aagi, aa kazlapatana dagala a həji Kərist aagi, azha aa kalamzata a vəlatana ŋgalaŋ. 33Ka aa ndzazə kusəm kajik a hayak ma dzamadzam Aŋtakiya. Azha, həji Kərist aagi, mbasl aa mbaslata ka, dəba aagi azhina ta abə təwah ara həji ma zlənata aagi.[ 34Ama Silas a kamay a nda a bəza a tsutsa səku, ataa Yahuda tsaa zhina tə a Wərusalima.] 35Ataa tiw Barnabas abə Pul, ka aa ndza ta ka a hayak ma dzamadzam Aŋtakiya. Aagi abə həji ndiɓi aagi vərəm zhana, aa kasərəkatana səkən aagi azha, aa kaghal zlap ataa Bay Madagal.
Ɓizh tiw Pul abə Barnabas
36Wan kajik a diwzha tə, Pul zlap a zlapanə a Barnabas, iŋgaya: «Kiyzamə a zhinzə kusəm a taŋazə həji Kərist aagi ma ndza a hayak ma dzamadzam, ata la ndə mə ghalha zlap Bay Madagal tiwtiw azha, mə taŋazə, landza ta, kata a ndza avaŋgəy?» iy. 37Barnabas a may a yaha Yahwana ndə həji kayə Markus aara abəra təmta. 38Ama Pul taji ma watsa səku. Ara ndə a ɗa, Yahwana ma ɗa Markus tambaslata ka a hayak Pamfiliya, taji a zhin a səbarata a zlən ta ka zhana səku. 39Ama ma ataa tiw Barnabas abə Pul tazhin a dzəv səku aa taɓizh ta. Daŋ Barnabas a yaha Markus ma ɗa Yahwana aara, takaf aa taf ta ata gəlmbə, aa tsaa kanda ta a hayak Kipərus. 40Ataa Pul ya, aa tsaa kanda ta abə Silas. Pa həji Kərist aagi, aa tsa Pul aka a zəghay Bay Madagal, azha tsaa kanda tə. 41Dzəsl a dzəsl hayak Siriya abə Silikiya bəza, Pul a kaləm a vəlatana ŋgalaŋ a ɗal awa ataa ladzam həji Kərist aagi.
Iliyochaguliwa sasa
Zlən ataa həji ta zlən aagi 15: GOU
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
