Matyáasa 10
10
Vihoóhóná vyábɔ́t na vívé vyá Yésusu
(Már 3:16-19; Rúk 6:14-16)
1Yésusu a ma bérááná vihoóhóná vyá, kó a wó hwámó ŋguru anáá vá guné vambé vá vireréŋgi vá rɔndɔ kána ra manɔ́ iŋgimé na kána ra moyéme mwimé. 2Vibérana vyá enásá ra Yésusu yábɔ́t na eba kíiví. Wa makésyé, Símono ójó ebérááná anáá Pyéere na navéne waá ójó Anderéya, Yáka na navéne ójó Yohánese bimé vává vaná vá Sebedé, 3Híripi na Barateremíya, Tómasa na Matyáasa ójó asérá tása, Yáka ombwene rá Aráfe na Tadéyá, 4Símono ójó a ma ré kamana na edɔŋgɔ na Yúdasa Isikariyóto ójó a ma sérá Yésusu.
Yésusu a tómámó vihoóhó vyáa vyábɔ́t na vívé
(Már 6:7-11; Rúk 9:2-5; 10:3-12)
5Yésusu a ma tómá vihoóhóná vyáa imívi na tévéré anáá: Vinó ká enda na ava vá ta ámó va Yúdene, ka iŋgáana na oŋgórá omó ójó na Samaríya. 6Ndáno bɛ́ŋ na vato ává na Ísayéere no enda sɔsɔ vaná va vitómbá íví ví ma dáŋgáná. 7Na pé, vinó o té ojana vato anáá Tamba éjé na máná yo okéra berebe nawó. 8Rɔndɔ́no vinɔ́, no honona vigwé, no ondóna vambaambáá, no gúné vambé vá vireréŋgi. Vá ma nó hwá na sásáá vinó hónó eréénáno na sásáá. 9Vinó ka wɔ́rɔ́ mwení, tɔɔ rá góoro, tɔɔ rá itwíŋí, ítɔɔ kána ra vikpama vyá mwení víndyé ováá naáté yá mucáka mwá vinó, 10tɔɔ icáka na wusó wá oŋgendɔ, tɔɔ cunú ibé, tɔɔ ŋgoo, tɔɔ itímbó, esene éyé anáá moto uŋgimé ójó a nɔnɔwɔmó a geremenamó na ipéyé. 11Ará nó né iŋgáanámó naáté yá oŋgórá omó tɔɔ na edɔŋgɔ emó vinó osɔsɔ moto ójó a hítyámó watɔ́wɔ́ anáá no rií na yanje yáá. Vinó orií ɔ́wɔ́ hwɔs isí éyé no etámó. 12Ará no iŋgáanámó naáté yá yanje mwané járáno anáá: Dɔ́ŋgɔrɔ́ɔ́ŋ a rií na vinó. 13Ŋgé vato ává na yanje mwané vá nó wɔ́rɔ́ wusi, dɔ́ŋgɔrɔ́ɔ́ŋ mwané orií nawó, ŋgé vá rií ka nó wɔ́rɔ́ wusi dɔ́ŋgɔrɔ́ŋɔ wa vinó o nó wúndana. 14Ŋgé vá rií ka nó aká ítɔɔ o nó ová na yanje emó tɔɔ hónó na oŋgórá omó gitáno mpumí éjé na oŋgóro ra vinó no enda. 15Na vatɔ́ɔ́tɔ́ ŋgo no ojánámó anáá isí yá jósi vato ává na Sodomo na Gɔmɔ́rɔ, pwénísi rawó e mó riyámó dekétií otómbá ra vato ává na oŋgóra mwané.
Itúúríyé éyé yó urámó
(Már 13:9-13; Rúk 12:11-12; 21:12-19)
16«Kóowó, ŋgo nó tómámó amó vaná vá vitómbá na raáté wa mumgbémé, vinó okwekwena sɔ́ amó nɔɔ́. Ríyáno cók ka yoórana amó yeba. 17Vinó okéryé na vato, esene éyé vá nó endamó o nó sɔ́mɔ́nɔ na byanje vyá jósi, Kó vá né nó gítamó na ikume naáté yá byanje vyáwó vyá mbásóóríyé. 18Na wusó wa amé kówo vá ne endámó o nó sɔ́mɔ́nɔ na ŋgɔ́mɔnɔ kó na mahumu, ɔ́wɔ́ no né riyámó va tiseenye vámé na aŋgísó ráwó kó na aŋgísó rá vato ává vá ta ámó va Yuúdene. 19Ará vá ne endámó na vinó na jósi vinó ka yérána anáá: To né járámó twii? Até éyé to né ojámó? Esené até éyé nó ne geremenámó ojárá é né no uránámó na itíndíkáná mwané. 20Ɔ́wɔ́ até vinó káva no né járámó, wó ámó Ireréŋgi yá tyó wa vinó kéye é né járámó na uŋgúté ra vinó. 21Navene moto a né kávámó navene anáá vá me oná. Isyé mwaná wéŋga sɛ́ɛm wa wandá na mwaná, vaná vá né pékáanámó na vabonda kó vá né eŋgámó anáá vá wó sómbéna ntóró ra nugwé. 22Moto uŋgimé a no ne benámó na wusó wamé. Wó je rií aná ojo a né ménévámó ondo humé na mamana, Irɔŋgɔ a né me sótyámó. 23Ará vá no ne tuúriyámó na oŋgórá omó, bɔnɔ́nó na oŋgórá undyé, wó ámó vatɔ́ɔ́tɔ́ ŋgo no ojánámó no te ne mana o ndenda ówó na eŋgórá ra Isayére eŋgimé hɔrɔ́, Mwaná moto a ra rií ka nde jiné. 24Ehoóhóná é ta tómbá va oyéére waá, kó hónó yeŋga manɔnɔwɔ é ta tómbá mása waá. 25Wó géremenámó na wusó wá ehoóhóná anáá é rií sɛ́ɛm ámó oyéére váá, yeŋga manɔnɔwɔ hónó sɛ́ɛm ámó mása wáá. Esené ŋgé vá bérááná moto wa naŋgá anáá saátana ójó ebérááná anáá Beresebúre, ndúmukana noyómó na vato náá nimé! Vá né owó séyámó sɛ́ɛm!»
Vinó ka tíné wandá
(Már 8:38; Rúk 9:26; 12:2-9)
26«Ne teŋge no wó tíné sɔ́! Wandá Womó wó ta ámó ebendééná ówó wó ta né enéyá, wimé ówó na asɔɔ́ wó né enéyámó. 27Ówó ŋgo ne ojánámó na mbinó, járánó na wusi, ówó no ovámó na púpuni járáno mií na máná na vato. 28Vinó ká tíné vato ává vá onámó notó kó vá ta hítí woná Ireréŋgi, vinó o tíné ojo a hítyámó woná Ireréŋgi orɔŋgɔ na nótó ká o wó tómá naáté yá ihyáné iji ita hindiyé. 29Ye vá ta kusááná na muríiríndi móvá na ekpama yá mwení émwéesií? Wó je rií anáá omwesií ójó na vá mwané a ta hítí woba na cí ŋgé Tyó wa vinó a ríi ka atɔ́wɔ́. 30Kó vinó, jembánó anáá kító rá vinó iŋgímé í ámó banérí. 31Vinó ka tíné sɔ́ esene éyé no ámó na mpí otómbá moríiríndi mwimé. 32Ojo a me járámó na aŋgísó ra vato bimé anáá a ámó íwaame, noó hónó ŋgo mó járámó na aŋgísó rá Tetáŋgá ójó na máná anáá eeŋ moto omójo a ámó iwaame. 33Wó je rií anáá ojo a mó járámó anáá a ta ŋgíjímé na aŋgísó rá vato, noó hónó ŋgo mó járámó anáá ta me ijímé na aŋgísó ra Tetáŋgá ójó na máná.»
Dɔ́ŋgɔ́ɔ́ŋ a ta ámó ɔ́wɔ́
(Rúk 12:51-53)
34«Vinó ka buŋgana anáá ŋgo ma uré anáá cí e rií na dɔ́ŋgɔrɔ́ɔ́ŋ, ŋgo ma uré ondo vaá induutana. 35Ŋgo ma uré ondo sa mwaná na isyé, ŋgwande na nétí, eéné mwaná na ninó. 36Ó ámó vato ává na noyómó ná vinó maté káva vá mó ríyámó vambéenbéná vá vinó.»
Weréena ówó Yésusu esɔ́tɔ́ yá visó
(Már 8:34-35; Rúk 14:26-27; 9:23-24)
37«Ójó a diŋgámó isyé itɔɔ nétí otómbá noó a ta geréméná anáá a rií waame. Ojo a diŋgámó ombwéne ráa ítɔɔ ŋgwande ráá otómbá noó a ta geréméná anáá a rií waame. 38Ojo a ta byaá koroso raá anáá a mbyɔɔnɔ a ta geréméná anáá a rií waame. 39Kaá ojo a mó díŋgámó anáá a beerye esɔ́tɔ́ yáá a né déŋgyámó esɔ́tɔ́ mwané, wó je rií anáá ojo a né déŋgyámó esɔ́tɔ́ yáá na wusó wamé a mó sɔ́tɔ́mó.»
Ipéyé yá moto ójó a ŋgakámó
(Már 9:37-41; Rúk 9:48; 10:16; Yoh 13:20)
40«Ojo a nó akámó a mó ŋgáka noó mate, kó ojo a mo ŋgáka a mó aka moto ójó a ma tómá. 41Ojo a akámó ahúmíye maró wa Irɔŋgɔ esene éyé a ámó ahúmíye maró, a mó tímbámó ipéyé yá ahúmíye maró, ojo a akamó moto ójó ndíŋgirííŋ esené éyé a ámó ndíŋgirííŋ a mó tímbámó ipéyé yá moto ójó ndíŋgirííŋ. 42Ŋgo nó ojánámó na vatɔ́ɔ́tɔ́ anáá ójó a né eréenámó ehoóhoná yámé tɔɔ bɛ́ŋ irá rá matiyá éséné éyé anáá a ámó ehoóhoná yámé, tɔɔ é ámó ehoóhóná éyé é cákámó orií dekétií, moto mwané a ta mó búkyé otimbe ówó ipéyé yáa.»
Iliyochaguliwa sasa
Matyáasa 10: tii
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2024, CABTAL
