Matyáasa 11
11
1Ará Yésusu a ma maná weréena vihoóhóná vyáa vyábɔ́t na vívé ndébɔ́, kó a urikyámó hɔ́rɔ́ wenda anáá a té yeére vato a wunde woja Usi wa cómó naáté yá eŋgórá rawó.
Cúcáná ra Yohánese
(Rúk 7:18-35)
2Yohánese adwe vató a ma óvá nkímíti ra Etómá yá Irɔŋgɔ a rií na mboo, kó a ma tómá vihoóhóná vyáa anáá vá endá me súsé anáá: 3«Ye o ámó ojo Irɔŋgɔ a ma geréméná otómá kee to geremenámó ogíré moto undyé?» 4Yésusu a ma járá nawó anáá: «Ndáno ojana Yohánese até éyé nó enámó na até éyé no ovámó: 5Byewu vyó té ená, vato vá moyémé vá etá ndeda wusi, vambaambáá vá etá pómónérí, ndɔ́kɔ́ yo etá ová, vigwé ví wundámó osɔ́tɔ́ kó Usi wa cómó a ojavenámó na vaworá. 6Vitaka na ojo a ta né céŋgítye ŋgɔ́tééná raá na noó!»
7Ará vihoóhóná vyá Yohánese ví ma báréyá, Yésusu a ma késyé ojárá maró wa Yohánese na vato ává vá ma ríi ɔ́wɔ́ aye nawó anáá: «Até eye no má endá ená na ekwété yá edɔŋgɔ? Ye aŋgoó ájá mpuŋgi e katé niŋge? 8Até sɔ́ kéye no má endá ená? Moto ójó a byámó vesi vá cunú? Wó je rií anáá ava vá byámó vesi va cunú vá ámó na byanje vyá mahumu. 9Kaá até sɔ́ kéye no má endá ená? Ahúmíye maró? Eeŋ ŋgo nó ojánámó anáá a tómbámó hónó ahúmíye maró. 10Yohánese a ámó moto ójó Irɔŋgɔ a ma járá na va mwáŋ mwáŋ vá aŋgóŋgí anáá: Kóowó tómámó yojá cómó yámé índi é jówa ondo heénhenda pé na wusó wɔɔ́.» 11Kó Yésusu a ma uswíyé ayáá: «Ŋgo nó ojánámó na vatɔ́ɔ́tɔ́ anáá, na vato bimé ává na cí, omwesií ójó ɔ́wɔ́ a ta geré na Yohánese adwe vato, wó je rií anáá mwaná wa maŋgájó ójó na Edɔŋgɔ éyé na máná a ámó ogónó o me tómbá. 12Okésyé ówó na itíndíkáná rá Yohánese adwe vato ohúmé hwɔs tetee ójó, wiŋgáana ówo na Edɔŋgɔ éyé na máná wó susámó ŋguru kó vato vá ŋguru kává vá iŋgáanámó. 13Va humiye maro va Irɔŋgɔ bimé na va kárate vá mbéndɔ́ ra Mósese vá ma ojá até éyé é ma geréméná weŋgavena hwɔs na itíndíkáná rá Yohánese. 14Na vatɔ́ɔ́tɔ́, Yohánese a ámó Eriyása ójó a ma géréméná owunde. 15Ojo a timbámó etú, ómwané wová! 16Ndo ámó oheyána vato ává wusi owó na áté? Vá ámó amó vaájó ává vá ámó vindindíi na naŋgáté emó kó vá béráanámó vasɔ́ɔ́ váye nawó anáá:
17To mó nó tɔ́ŋgéna iŋgómbí, vinó ka bíné!
Visó o nó vaánena osawo rá nugwe, vinó ka vaŋga!
18Esené Yohánese a ma uré ka nyá ka vényú, váye anáá a timbámó ombe vá Ireréŋgi, 19Mwaná moto wuré a nyá a vényú, váye anáá a ámó na orɔtɔ, arií enyá mɔwɔ́, a wunde orií mbérá wa vasérá tása na vato vá ombé wa esɔ́tɔ́! Wó je rií anáá ará vá enámó peyɔ ra Irɔŋgɔ, vá enámó anáá peyɔ ra Irɔŋgɔ e ámó ndíŋgirííŋ na vesi vá mamba váa.»
Eŋgórá éjé e váráŋgámó watɔ́wɔ́
(Mat 10:15; Rúk 10:12-15)
20Yésusu a ma késyé sɔ́ oriŋgaana eŋgórá éjé a ma caká weŋga mesimbá ɔ́wɔ́, esene éyé vato ává na eŋgórá mwané vá ta ma céndyé visɔ́tɔ́ wyáwó. 21Aye nawó anáá: «Numerí nɔɔ mámó ójó oŋgórá ra Korasíni! Numerí nɔɔ mámó ojó oŋgórá rá Becayída! Esené wá ríi mesimbá ámá má ma eŋgávéná na vinó má ma eŋgávéná na eŋgórá ra Tíiri na Sidóŋo ŋgé vato ává ɔ́wɔ́ vá ma byá cunú rá nugwé kɔ́ɔ́m, owunde océndyé ombé wa esɔ́tɔ́ wawó. 22Eeŋ ŋgo nó ojánámó anáá isí yá jósi vato ává na eŋgórá ra Tíiri na Sídono, pwénísi rawó e mó riyámó dekétií otómbá ra vinó.
23Kó mámó, oŋgórá rá Kaperenahumu,
ye Irɔŋgɔ a mó wo neétyámó hwɔs na máná?
Mbéndɔ́ o mó sísámó hwɔs na edɔŋgɔ yá vigwé!
Esené wá ríi mesimbá ámá má ma eŋgávéná na mámó má ma eŋgávéná na oŋgórá rá Sɔ́dɔmɔ, ŋgé a ré rií hée ɔ́wɔ́ wusí owó. 24Eeŋ ŋgo nó ojánámó anáá isí yá jósi vato ává na oŋgórá ra Sɔ́dɔmɔ, pwénísi rawó e mó riyámó dekétií otómbá ra vato ává na Kaperenawúmu.»
Isyé na Mwaná
(Rúk 10:21-22)
25Na itíndíkáná mwané, Yésusu a ma wɔ́rɔ́ enjárá a ye anáá: «Ŋgo wo gúmíyámó Tataá, Okí ójó na máná na cí, esene éyé o mó búne aŋgísó rá vaná vá viwúrú viwúrú vá vato anáá vá ená mamba mwané, obweená rá vajembe kárate na vapeyɔpéyɔ́. 26Ɛɛŋ tataá, náná kówo o ma atɔ́wɔ́ anáá mamba má tékávena na ndiŋgéná rɔɔ.» 27Tatá a ma pwá wandá wimé, kó moto a ta jembe, áné kójo Mwaná, ŋgé wá ríi ka rií Isyé, ka je jembe Isyé ŋgé wá ríi ka rií Mwaná na ava Mwaná a atɔ́wɔmó anáá vá me jembe.
Yésusu kójo a eréenámó ihuwe
28«Vino bime ává no omó vineŋgéná na vikáné vyá vibya, úráno na noó índi ŋgo nó hwá ihuwe. 29Vino wɔ́rɔ́no ebya yamé, esene éyé émwané é ta nywá índi no rií vihoóhóná vyamé, esene éyé anáá noó ta yóóráná kó ŋgo vásísyamó nótó, kó no né timbamó ihuwe na noó. 30Eeŋ ebya éyé ŋgo nó hwámó anáá no bya é ta yákána, kó é hésémamó.»
Iliyochaguliwa sasa
Matyáasa 11: tii
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
© 2024, CABTAL
