Mateo 28
28
Kumuka kwaJesu
(Mako 16:1-10; Luka 24:1-12; Joni 20:1-10)
1Mushule mweSabata, kumijelo nezhuba lyokutanga lyeviki, Mariya wokuMagadala noumwe Mariya bakenda kunobona igumbu. 2Bonani, kwakaba nokuteketa kwenyika kukulugulu, nokuti ingilozi yaTezi yaluba yabheluka iva kudenga, ikakungulija ihando yebwe yelyo pankoba, ikagala pakale. 3Yakaboneka solupalanganda, chimbalo chayo chili chichena twaa 4Balindi bakateketa betya iye, bakaba sabalofa.
5Koga ingilozi yakati kubanhukaji, “Musitye, nokuti ndinoziba mukumupyanga Jesu wakaba akakaamilwa. 6Aachipo yopano, nokuti wamuka mubafi, sokuleba kukwe. Izhani mubone pabugalo paakabakalajikwa. 7Nokudalo, indani nokukambija munobuja balayijwa babe kuti wamuka mubafi, akale unomutangila kunda kuGalili, yoko kwamuchanoombona. Whililani, ndamubuja.”
8Bakabhuda kugumbu nokukambija beli nolutyo akale nokushanta kukulwana, bakalabuka kunobuja balayijwa babe.
9Bonani, Jesu wakabashangana nabo akati, “Mwamuka.” Nokudalo bakaswika bakafhugama, bakombhata kumakumbo bakonamata. 10Jesu wakati kwabali, “Musitye, indani munobuja banakwaina bangu kuti bende kuGalili, yoko ndikwo kwabachanondibona.”
Chiwijo chabalindi
11Bakati bechinokwenda, bamwe babalindi bakenda kuguta kunobuja batebuji bakulwana, pezhulu pezwose zwakatikana. 12Pabakabungana batebuji bakulwana nabatungamili babanhu, bakagowana bakapa imali inji kubalwi, 13beti kwabali, “Bujani banhu kuti, ‘balayijwa babe ndibo bakezha busiku bakounkwiba isu tililele.’ 14Kana yezwi zwikazibwa nontongi wedunhu igulwana, ndisu tichonguncha, kuti imwi musipiwe undandu.”
15Bakatola imali bakata sokulayilwa kwabo, lungano yolu lwakwenda pakati pabaJuda kuswika nasi.
Jesu Unobonekwa nabaLayijwa babe
(Mako 16:14-18; Luka 24:36-49; Joni 20:19-23; Mishingo 1:6-8)
16Ngweno balayijwa babe bali gumi nomwempela bakenda kuGalili, kudunhu libakabalayilwa naJesu. 17Bakati bombona bakonamata, asi bamwe bakahajika. 18Jesu wakenda kwabali akati, “Masimba ose okudenga nopenyika akapiwa imi. 19Nokudalo indani mute kuti inyika yose ibe nabalayijwa bangu, mubabhabhatize muzina lyaTate nelyoMwananhulumyana nelyoMpepo uNchena. 20Mubalayije kuti belondote zwose zwindakamulayila, akale ndinoba ndili namwi unshaji uli wose kuswikila kupela kwonshaji.”
Iliyochaguliwa sasa
Mateo 28: LTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The word for The World International
