Mateo 27
27
Jesu unopilwa kunaPilato
(Mako 15:1; Luka 23:1,2; Joni 18:28-32)
1Palyakeja, bose batebuji bakulwana nabatungamili babanhu, bakagala igota lyokulebeleka nezwokubulaya Jesu, 2pabakati bonsunga, bakenda naye kuna Pilato waluba untongi wedunhu.
Kuzwisungilila KwaJudasi
(Mishingo 1:18,19)
3Judasi uncheti uwe, paakabona kuti Jesu watongelwa lufu, wakazwifija, akabwiliza imali yesiliva makumi matatu kubatebuji bakulwana nabatungamili babanhu, 4akati, “Ndachinya nokupila unhu usina luchinyo.”
Koga ibo bakati, “Tineni nazwo isu? Zwibonele iwi woga.”
5Wakaposela imali yesiliva mutempeli, akabhuda akenda kunozwisungilila.
6Batebuji bakulwana bakanunga imali yesiliva bakati, “Azwimo mumulawo kuti ilondotwe muchikwama chemali yetempeli, nokuti imali yelopa.” 7Bakagowana bakanotenga unda wombumbi wehali, kuti bube bugalo bwokujikila banhu basinozibikana. 8Unda yoyo nanasi unowhi, “Unda weLopa.”
9Yezwi zwakava zwazhajikija yezwiya zwakalebwa noMpolofeti Jelemiya, eti, “Bakatola makumi matatu emali yesiliva, yaluba indipilo yiye yakatalwa nabamwe banhu baIzilayeli, 10bakabapa kuti ibe indipilo yominda wombumbi wehali, sokulayijwa kwangu naTezi.”
Kutongwa kwaJesu naPilato.
(Mako 15:2-5; Luka 23:3-5; Joni 18:33-38)
11Jesu wakama mbeli kontongi wedunhu, akabhuzwa nontongi wedunhu kuti, “Iwi ndiwi She wabaJuda na”
Jesu wakashandula eti, “Seni ndiwi waleba.” 12Batebuji bakulwana nabatungamili babanhu pabakompomela ndandu, apana chaakashandula.
13Pilato wakati kwaali, “Auzwiwhile na kuti zwingana zwinhu zwibi zwibakumusumukija pezhulu papo”
14Koga aajakashandula, kana undandu umwempela wakapomelwa zwakachenamisa kasa untongi wedunhu.
Jesu Unotongelwa Kufa
(Mako 15:6-15; Luka 23:13-25; Joni 18:39—19:16)
15Ngweno nemiliya yePasika, untongi wedunhu walugala esungunula unsungwa umwempela waludiwa nabanhu. 16Akale kwaluba nonsungwa waluzibikana kasa nezwito zwibi, waluwhi Jesu Bhalabhasi. 17Pabakabungana Pilato wakati kwabali, “Ndiupi wamunoda kuti ndimusungunulile? Jesu Bhalabhasi kana Jesu unowhi Kristo?” 18Nokuti waluziba kuti bakompila kwaali noluchibo.
19Pilato wakati echigele pechigalo chobutongi, unkaji uwe wakontumila unhu eti, “Usibe neni noyu unhu wakalulama, nokuti ndanyajikana kasa naye mumaloto angu nasi.”
20Feno batebuji bakulwana nabatungamili babanhu bakakutaija ibunga lyabanhu kuti likumbile Bhalabhasi, asi Jesu ebulayiwe. 21Untongi wedunhu wakababhuza akati, “Ngoupi wababili yaba wamunoda kuti ndimusungunulile?”
Bakashandula beti, “Bhalabhasi.”
22Pilato wakababhuza eti, “Nditeni naJesu unowhi Kristo?”
Bakati ibo bose, “Ngekahamilwe panchinjikwa!”
23Iye wakati, “Nokuda kweni, ndichipi chibi chaata?”
Koga ibo bakanyanya kushomeja beti, “Ngekahamilwe panchinjikwa.”
24Pilato paakabona kuti azwichinobhancha, asi kwaba nezhoba, wakatola ivula akashamba maboko awe mbeli kwebunga lyabanhu, eti, “Imi andinani nelopa lyoyu unhu, zwiboneleni imwi.”
25Ibunga lyabanhu bose lyakashandula liti, “Ilopa lilye ngalibe pezhulu pedu nopezhulu pabana bedu!”
26Nokudalo wakabasungunulila Bhalabhasi, koga paakapeja kukwabhula Jesu, wakompila kuna ibo kuti ekahamilwe panchinjikwa.
Balwi beHondo BanoHeula Jesu
(Mako 15:16-20; Joni 19:2,3)
27Balwi behondo bontongi wedunhu bakontola Jesu, bakongwinisa muchilola chontongi wedunhu, bakabunganisa ibunga lyabalwi behondo bose mbeli kukwe. 28Bakombula chimbalo, bakombajika ishashiko inshaba. 29Bakaluka chilemba chemhiwa, bakombajika munsholo uwe, bakombhatisa lushanga muluboko lulwe lwokululyi, bakafhugama mbeli kukwe boheula beti, “Ndauwe, she wabaJuda!” 30Bakomfhila mate, bakatola lushanga bakobondoba nalwo munsholo. 31Pabakapeja kuheula, bakombhisa ishashiko inshaba, bakombajika zwimbalo zwizwe, bakonsenga kuti benonkahamila panchinjikwa.
Jesu Unokahamilwa paNchinjikwa
(Mako 15:21-32; Luka 23:26-43; Joni 19:17-27)
32Pabakati babhuda pazhe, bakashangana nonhulume unezina linowhi Simoni wokuSayilini, bakomanikija kuti enyamule unchinjikwa. 33Pabakaswika kubugalo bunowhi Gologota, izina lileba kuti, “bugalo bwebhepe lyonsholo,” 34bakompa iwaini liloshanganiswa nendulwe kuti enwe, koga wakati alabila, wakalamba kuinwa.
35Bakonkahamila, kova bekobana zwimbalo zwizwe, bakata ifumbefumbe. 36Yopa bakagala pasi bakondinda. 37Bakabiga pezhulu ponsholo uwe lukwalo lwondandu uwe lwokuti, “Yoyu ndiJesu, She wabaJuda.” 38Kwakakahamilwa bapambi babili, umwe kululyi umwe kuchesho.
39Bose bakabepinda pelyo bakontuka bejunguja misholo yabo, 40beti, “Iwi unopalaja itempeli kova ulibaka mumazhuba matatu, zwichije! Kana uli Mwananhulumyana waMwali, ibhuluka panchinjikwa.”
41Batebuji bakulwana, balayiji bomulawo nabatungamili babanhu bakoheula naibo beti, 42“Wakachija bamwe, asi aatotubula kuzwichija nokukwe. NdiShe wokwaIzilayeli, ngeebhuluke ngweno panchinjikwa kuti tidimbwe mwaali. 43Unobimba naMwali, ngomunule ngweno kana ounda, nokuti iye wakabeti, ‘ndiMwananhulumyana waMwali.’ ”
44Nabapambi yabaya baakakahamilwa pamwempela nabo, bakontuka bo munzila imwempela.
Kufa kwaJesu
(Mako 15:33-41; Luka 23:44-49; Joni 19:28-30)
45Ngweno kwakaba nenhilima pasi pose kuvila masikati makulwana kunoswikila iawa lyatatu madeko. 46Nonshaji ungaba iawa lyatatu madeko, Jesu wakashomeja newhi igulwana eti, “Eli, Eli, lamasabakitani?” Ndiko kuti “Mwali wangu, Mwali wangu mwandisiyilani na?”
47Bamwe baabo bakabelimile pelyo pabakawha yezwi, bakati, “Yoyu unhu ukumushoba Elija.” 48Umwe wabo wakalabuka akanotola inganganga, akalimyuja muwaini linopanyuka, kova ebhayilila palushanga, ompa kuti enwe.
49Asi bamwe bakati, “Undekejeni tibone kuti Elija unozha konchija.”
50Jesu wakashomeja akale newhi igulwana, kova efa.
51Uncheka womuTempeli, wakajeluka ukaba zwibabi zwibili kuva pezhulu kunoswika pasi. Inyika yose ikateketa namabwe akakwamuka, 52makumbu akazhulika, nemitumbu minji yabachena bakafa ikamuswa, 53bakabhuda mumakumbu abo mushule mokumuka kukwe bakangwina muguta ijena, bakabonwa nabanhu banji.
54Feno untungamili balwi behondo nabaya baakabakalinda nabo, Jesu, pabakabona kuteketa kwenyika nezwimwe zwakatikana, bakava moyo kasa bakati, “Chokomende yoyu wabeli Mwananhulumyana waMwali!”
55Kwakabeli nabanhukaji banji bakabekalinga beli kule, ibo bakontobela Jesu kuva kuGalili, beumbhancha nokunshingila. 56Pakati pabo pakabeli naMariya unova kuguta lyeMagadala, naMariya amai baJemusi naJosefa, naamai babana banhulumyana baZebhedi.
Kujikwa kwaJesu
(Mako 15:42-47; Luka 23:50-56; Joni 19:38-42)
57Pakwakaba madeko, kwakezha unhulume umfumi wokuAlimatiya, waluwhi Josefa eli undayijwa waJesu. 58Wakenda kunaPilato kunokumbila kuti epiwe untumbu waJesu. Pilato wakalayila kuti epiwe. 59Josefa wakatola untumbu, akomputilija noncheka welineni wakashambijika. 60Wakanoumbiga mugumbu lilye lyebhako ibhya, lyaakaba azwilonganyila iye emene pebwe, akakungulija ihando yebwe pankoba wegumbu, kova enda. 61Mariya wokuMagadala nomwe Mariya, bakabelipo beligele bekalingisana negumbu.
Balindi peGumbu
62Feno nezhuba linotobela, lyesabata, batebuji bakulwana nabaFalisi bakenda kunaPilato, 63bakati kwaali, “Tezi tayeya kuti unchengeji yondiya paakaba eli umpenyu wakati, ‘Mushule mwamazhuba matatu ndinoomuka.’ 64Nokudalo ilayilani kuti igumbu lilye lilindwe kuswikila izhuba lyatatu, pamwe balayijwa babe bangezha koonkwiba beti kubanhu, ‘Wamuka mubafi,’ nezwo kuchengeja kwokupejisila kunova kwanyanya kupinda kwokutanga.”
65Pilato wakati kwabali, “Munabalindi behondo, indani munolinda sokubona kwenu.”
66Nokudalo bakenda bakamatila ibwe bebiga imhande, nokusiya balindi babo.
Iliyochaguliwa sasa
Mateo 27: LTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The word for The World International
