Luka 9
9
Jesu unotuma balayijwa babe gumi namabili
(Mateo 10:5-15; Mako 6:7-13)
1Wakashoba pamwempela balayijwa igumi nababili, akabapa isimba nobukulwana bwokubhisa wose madimoni nokulapa malwaji, 2akale wakabatuma kunobhaunula bushe bwaMwali nokulapa banolwala. 3Wakati kwabali, “Musinyamule kana chinhu mulwendo lwenu, kana kadozo, kana chikwama, kana chokulya, kana imali; musinde nezwimbalo zwibili. 4Ingumba ipi zwayo yamunongwina, galani mwakale kuswikila mujine mukwende. 5Kuna yabo basinomutambula, kuhumulani ihuluba kumakumbo pakubhuda kwenu munsha yoyo, bube busumikiji kwabali.”
6Bakanyamuka, bakakwendela mizi minji bebhaunula iNdebo iMbuya, belapa kumapazu ose.
Bukukutu bwaHelodi
(Mateo 14:1-12; Mako 6:14-29)
7Helodi untongi wakawha zwose yezwi zwakabetikana, akakankabala nokuti bamwe bakaba beti ndiJoni wamuka mubafi, 8bamwe bo beti ndiElija waboneka akale bamwe beti umwe wabalebambeli baMwali wantolo wamuka akale. 9Helodi wakati, “Joni ndakondubula unchibha, ani biya ndiyani yoyo undimuwha eta zwakadai?” Wakashaka kuti ombone.
Jesu unopa kulya zwiulu zwishanu
(Mateo 14:13-21; Mako 6:30-44; Joni 6:1-14)
10Bapositoli bakabuya bakombuja zwose zwibakaba bata. Wakabatola akenda nabo beliboga kuguta linowhi Bhetisaida. 11Ibunga lyabanhu palyakazwiwha yezwi, lyakontobela, wakabatambula akababuja nezwobushe bwaMwali, akalapa yabo bakaba beshaka kuchijwa.
12Kwakati kwaba madekwana, balayijwa babe igumi nababili bakezha kwaali bakati, “Lekeja banhu bende kumizi nokumisha ipo pelyo kuti bewane kulya nokuti yokuno timo mubugalo musina banhu.”
13Koga iye wakati kwabali, “Imwi bapeni zwokulya.” Ibo bakati, “Tina zwinkwa zwishanu nehobe imbili chete. Kuzhe kwokuti tinobatengela kulya banhu bose yaba.” 14Banhulume bakabeswika zwiulu zwishanu.
Wakati kubalayijwa babe, “Babujeni begale pasi muzwikapo zwabanhu makumi mashanu.”
15Bakata alo bakagajika banhu bose pasi. 16Wakatola zwinkwa zwishanu nehobe imbili, akalinga kudenga, akaboka Mwali, akamedula, akapa balayijwa babe kuti bekobele banhu. 17Bakalya bakaguta bose. Bakakolela zwipemu zwakasala zwakazhaja zwitundu igumi lina zwibili.
Pita Unolebeleka Kudimbwa kukwe kunaJesu
(Mateo 16:13-19; Mako 8:27-29)
18Zwakatikana kuti elimukunamata eli ega kumbali, eli nabalayijwa babe, wakababhuza eti, “Banhu banoti ndimi aani?”
19Bakashandula beti, “Banoti ndiwi Joni umbhabhatizi, koga bamwe banoti ndiwi Elija nabamwe bo banoti ndimi umwe wabalebambeli baMwali bantolo wamuka.”
20Wakati kwabali, “Ani imwi munoti ndimi aani?” Pita wakashandula eti, “Ndiwi Kristo waMwali.”
Jesu unolebeleka nezwolufu lulwe
(Mateo 16:20-28; Mako 8:30—9:1)
21Wakabalaya kuti besibuje umwe nezwi, 22eti, “Mwananhulumyana woNhu ulokwelela kuyabula muna zwinji, akale elambwe nabakulugulu nabatebuji bakulwana nabakwali, unoobulayiwa, nezhuba lyatatu unoomuswa .”
23Wakati kwabali bose, “Kana unhu eda kunditobela, ngezwilambe, etole unchinjikwa uwe mazhuba ose, enditobele. 24Nokuti wose unoda kuchija bupenyu bubwe unobulashikilwa, asi yoyo unolashikilwa nobupenyu bubwe pezhulu pangu unoochijwa. 25Zwinobhanchani kuti unhu ewane inyika yose, iye nokukwe ezwipalaja? 26Nokuti aani naani uneshoni nami namawhi angu, Mwananhulumyana woNhu unoontila ishoni, paachoozha mulukujo lulwe, nomulukujo lwaTate nenhumwa jaMwali inchena. 27Ndinolebesa kwamuli, baipo bamwe benu pakale yopano bachabona bushe bwaMwali besanhu bafa.”
Kushanduka kwaJesu
(Mateo 17:1-8; Mako 9:2-8)
28Kwapinda mazhuba mashanu ana matatu zwalebwa yezwi, wakatola Pita, naJoni naJemusi akenda nabo kudunhu kunonamata. 29Wakati elimukunamata, chiso chiche chakashanduka nezwimbalo zwizwe zwakangaima nobuchena. 30Pakalepo kwakaboneka banhulume babili, Mozesi naElija belebeleka naye, 31bakaboneka belimukungaima, belebeleka nezwokukwenda kukwe kuti kwakabeli pelyo kuti kunozhajikija muJelusalema. 32Pita nabaluba naye bakaba bhatwa nehope, asi pabakati babhwazula, bakabona kungaima kukwe nabanhulume babili bakaba belimile naye. 33Yaba banhulume pabakabonsiya, Pita wakati kuna Jesu, “Tezi, zwibuya kuti tipo yopano, ngatibakeni zwitumba zwitatu, chicho, chaMozesi nechaElija.” Aajakabeziba zwaakabelebeleka.
34Echinoleba alo kwakezha igole, likaba fukatila bakangwina mugole, balayijwa bakaba nolutyo. 35Iwhi lyakawhika liva mugole liti, “Yoyu ndiye Mwananhulumyana wangu wandakashala, unwhilileni!”
36Palyakama kuwhika iwhi, Jesu wakaboneka aba ega. Balayijwa bakawhilijila, apana ubakabuja mumazhuba yayo nezwo zwibakabona.
Jesu unochija umbisana unampepo umbi
(Mateo 17:14-18; Mako 9:14-27)
37Muchimuka pabakabhuluka idunhu, ibunga lyabanhu lyakezha konshangamija. 38Umwe unhulume waluba mugapo wakashomeja eti, “Ndayiji, ndimukumbila kuti muwhile ishe mwananhulumyana wangu, nokuti ndiye mwanangu ega, 39umpepo umbi ungombhata, pakalepo unotanga kukwiila kova ezhazhama pakalepo unobhuda ifulu mundomo autonsiya. 40Ndakakumbila balayijwa babo kuti bombhise asi bakakonwa.”
41Jesu wakashandula eti, “Aa! Chizekululu chisina kudimbwa, mane kunonoba lini ndili namwi, ndimuwhila ishe? Umbuze yokuno mwananhulumyana uwo.”
42Paakabezha umbisana, idimoni lyakongwigila pasi akatanga kuzhazhama. Asi Jesu wakakalalila umpepo weshambwa, akachija umbisana, kova ompa kuna tate babe. 43Bose bakachenamiswa nesimba lyaMwali.
Jesu unolebeleka pezhulu polufu lulwe akale
(Mateo 17:22,23; Mako 9:30-32)
Asi bechakachenama nezwose zwaakata, wakati kubalayijwa babe, 44“Iwhisisani mawhi yaya, nokuti Mwananhulumyana woNhu unoochetwa kova epilwa mumaboko abanhu.” 45Koga abajakawhisisa mawhi yaya, zwakabakasisika kwabali, kuti besiwhisise, akale bakatya kuti bombhuze nezwaakaleba.
Unkulwana ndiyani?
(Mateo 18:1-5; Mako 9:33-37)
46Bakatanga kukakabajana pakati pabo beti unkulwana pakati pabo ndiyani. 47Jesu mukuziba kuti zwakabeli mundangalilo jabo ini, wakatola mwana akomisa pelyo naye, 48akati kwabali, “Aani naani unotambula mwana yoyu muzina lyangu unobanditambula namibo, wose unotambula imi, unotambula iye wakandituma, nokuti yoyo untukutuku pakati penu mwose, ndiye unkulwana.”
Wose usinonyenyejana nami ngowenu
(Mako 9:38-40)
49Joni wakashandula eti, “Tezi, tabona unhulume ebhisa madimoni muzina lyenu, asi tondambija kuta alo nokuti atoba umwe wedu.”
50Koga Jesu wakati kwaali, “Musunjibise, nokuti aani naani usinonyenyejana namwi unowhanana namwi.”
Unzi wokuSamariya unolamba kutambula Jesu
51Paakati abapelyo mazhuba awe okuti etambulwe kudenga, wakatola inzila inonda kuJelusalema. 52Wakatuma batumwa babe mbeli kukwe, bakanongwina munzi wokuSamariya betila kuumbambila, 53koga banhu abajakontambula, nokuti zwakabeli pachena kuti ulonanga kunda kuJelusalema. 54Pabakati balayijwa babe Jemusi naJoni babona yezwi, bakati, “Tezi munoda kuti tishobe moto ubheluke uva kudenga kuti ubapalaje na?”
55Asi wakachingunuka, akabakalalila. 56Bakenda kunomwe unzi.
Bachooba batobeli baJesu
(Mateo 8:19-22)
57Beli mulwendo lwabo, umwe unhulume wakati kunaiye, “Ndokutobela kwose kwaunonda.”
58Jesu wakati kwaali, “Ihaba jina makwizhana, nenyuni jomuzhezhulu jina zwizhumbo, koga Mwananhulumyana woNhu aana paanolajika unsholo uwe.”
59Wakati kunomwe, “Nditobele.” Asi iye wakashandula, eti, “Tezi ndisiyeni ndinolajika tate bangu tangwa.”
60Koga wakati kwaali, “Leka bakafa belajike bakafa babo, iwi inda, unopupula bushe bwaMwali.”
61Umwe wakati, “Ndomutobela Tezi, asi lekani tangwa ndinokoneka bopasha pangu.” 62Jesu wakati kwaali, “Apana unoti abiga luboko lulwe pechikekelo, unotanga kuchebuka mushule, yoyo aatokwelela kuba mubushe bwaMwali.”
Iliyochaguliwa sasa
Luka 9: LTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The word for The World International
