Luka 8
8
Mamai okuGalili anotobela Jesu
1Eva yopo wakangwina mumakuta nomumizi ebhaunula akale esuma iNdebo iMbuya yobushe bwaMwali. Balayijwa babe bali igumi nababili baluba naye, 2akale waluba nabamwe bechinhukaji bakaba babhiswa mipepo mibi namalwaji; naMariya walushobwa ewhi Magadalena, wakaba abhiswa mipepo mibi mishanu inamibili. 3NaJohana unkaji waKuza, umbhati wengumba yaHelodi, naSusana nabamwe banji bakaba bobhancha eli nabalayijwa munazwose zwabakabeshayiwa.
Unkwejaniso wombyali
(Mateo 13:1-9; Mako 4:1-9)
4Banhu banji pabakezha bakabungana kwaali, beva mumakuta alosiyanasiyana, wakalebeleka nonkwejaniso akati,
5“Undimi wakenda kunobyala imbeyu yiye, paakamezha, imwe yakambwelela kumbali kwenzila ikatobwa, ikalyiwa nenyuni jedenga. 6Imwe yakambwelela pamwala, yakamela, ikahwima nokushayiwa mwando. 7Imwe yakambwelela panamiwha, ikakubuka pamwe nemiwha, ikamanikijwa. 8Imwe yakambwelela muvu ibuyanana, yakakubuka, ikazwala izana lyonchelo .” Paakapeja kuleba yezwi wakashomeja akati, “Unenzebe ngewhe.” Zwinangwa zwemikwejaniso.
Chinangwa cheMikwejaniso
(Mateo 13:10-17; Mako 4:10-12)
9Balayijwa babe pabakombhuza kuti unkwejaniso yoyu unolebani, 10wakashandula eti, “Imwi mulopiwa kuziba isiswa lyobushe bwaMwali, koga bamwe banotilwa mikwejaniso chete kutila kuti bebone asi besibonesese, bewhe asi besiwhisise.”
Jesu unopandulula ukwejaniso wombyali.
(Mateo 13:18-23; Mako 4:13-20)
11“Yezwi ndizwo zwinolebwa nonkwejaniso: Imbeyu ndilyo iwhi lyaMwali. 12Imbeyu yokumbali kwenzila banhu banoliwha, kova Satani eswika elibhisa iwhi mumyoyo yabo, kutila kuti besilidimbwe, nokuti banosokochijwa. 13Imbeyu yopamwala, banhu banoti bangoliwha iwhi, banolitambula nolushanto, koga abana miji, banodimbwa kwonshaji umfupi, asi bangokwejwa banomuka nokulilamba. 14Imbeyu yakambwelela pamiwha ndibo yabaya bakaliwha, asi mubupenyu banokonejwa nokunakilijwa, ifuma nezwinonakilija penyika, ndizwo besinozwala michelo isinokubuka. 15Imbeyu yakambwelela muvu ibuyanana ndibo banhu yabaya bana myoyo mibuya inobimbika, banoti bangoliwha iwhi, banolibhata bolilondota besima nalyo kova bezwala michelo.”
Unkwejaniso weChimuniko
(Mako 4:21-25)
16“Unhu aangatutumise chimuniko kova echitibhikila nendyilo kana kuchibiga pasi pombheda, asi unochibiga palonabuka kutila kuti banhu bemunikilwe kana bengwina mungumba.
17“Zwose zwilosisika zwinoobhudila pachena, zwose zwilofumikwa zwinoofumulwa.
18“Chenjelani kuti mowhilila chini, nokuti yoyo unanazwo unoopamhijilwa, asi yoyo usina, unootolelwa nezwo zwishoma zwanoyeyesela kuti unanazwo .”
Amai baJesu nabanuna babe.
(Mateo 12:46-50; Mako 3:31-35)
19Amai babe nabanuna babe bakezha bompota, bakakonwa kumbona nokuti pezhulu pebunga lyabanhu. 20Wakabujwa kuti, “Amai babo nabanuna babo bamile pazhe bakumuda kukubona.”
21Koga wakati kwabali, “Amai bangu nabanakwaina bangu, ndiyabo banowha iwhi lyaMwali, kova beta zwalinoleba.”
Jesu unonyalaja ibhepo muGungwa
(Mateo 8:23-27; Mako 4:35-41)
22Limwe izhuba wakatanha mubwato nabalayijwa babe, akati kwabali, “Ngativubukeni tinde museli mwegandwegulu.” Bakangwina bakatanga lwendo, 23bakati bechinotanga lwendo lwabo, iye wakabhatwa nehope akalala. Kwakaswika ibhepo igulwana linegampo, ivula ikatanga kungwina mubwato, bose bakaba mugubaji. 24Bakenda kwaali bakomusa beti, “Tezi, Tezi, tabolopalala!”
Iye wakamuka, akakalalila ibhepo nevula yakabeli nobukali, zwose zwikava zwama kukaba nokunyalala. 25Wakati kwabali, “Kuponi kudimbwa kwenu biya?”
Asi ibo bakakankabala bakatya, bakabhuzana beti, “Angaba ani yoyu unolaya ibhepo linabukali nevula, hezwo zwinonwhilila?”
Jesu unolapa unhu unamadimoni
(Mateo 8:28-34; Mako 5:1-20)
26Bakaswika kunyika yeGenesaleti ilolingana neGalili 27Paakati atoba pasi, wakachingamijwa nonhulume waluba namadimoni eva muguta, wakabesinombala akale esinogala pengumba, asi egala kumakumbu. 28Wakati abona Jesu, wakakwiila kova embwela mbeli kukwe, akashomeja eti, “Unani nami na Jesu Mwananhulumyana waMwali wopeZhuluzhulu? Ndakombelela usindijiije.” 29Wakaleba yezwi nokuti Jesu wakaba abuja umpepo umbi kuti ubhude munoyo unhulume. (Wakabegala ekabhatwa nedimoni, kojoba maboko namakumbo awe akabegala ekasungwa neketani koga wakabedubula iketani idimoni liunsenga mugwegulu).
30Jesu wakombhuza eti, “Unowhi ani izina lilyo?”
Iye wakati, “Ndinowhi Ligiyoni,” nokuti wakabangwinwa namadimoni manji. 31Iwo akombweta kuti esiwatatile kubugalo bunomila kusinojiba.
32Kwaluba nedanga igulwana lyengulube jakaba jichela mumbali mwedunhu, iwo akombweta kuti ewavumije engwine munaijo. Wakaavumija. 33Madimoni akabhuda munoyo unhulume, akangwina mungulube, jakalabukila kubhilipili, jikanombwelela mugungwa, jikanonwila undondwe jikafa.
34Balyisi bengulube pabakabona yezwi zwitika, bakatizha bakanobuja bokuguta nabanhu bomumizi. 35Banhu bakenda kunobona yezwo zwakabatikana, pabakaswika kunaJesu, bakawana unhu wakasiyiwa nemipepo yamadimoni eligele pelyo naJesu ekambala akale imhengo japela, yezwi zwakabatyisa. 36Yabo bakazwibona bakalungululila banhu kuti yoyu unhu wakachijwa chini. 37Bose banhu bomubugalo bweGenesaleti yobo bakonkumbila kuti ebhude ende nokuti bakaba nolutyo, iye wakangwina mubwato akabwilila. 38Unhulume wakabhiswa madimoni wakakumbila kuti bende bose,
Asi iye wakombwiliza ontuma, eti, 39“Bwilila kusha kuko, unobabuja zwiwatilwa naMwali.”
Iye wakenda muguta epupula zwose zwaakatilwa naJesu.
Kumuswa kwomwananhukajana waJailos nokulapwa kwonhukaji wakabekunga ilopa
(Mateo 9:18-26; Mako 5:21-43)
40Jesu paakabwilila museli mwegungwa, banhu bakontambula nolushanto nokuti bose bakabakomilila. 41Kwakaswika unhulume waluwhi Jayilosi, eli untungamili weSinagogi, wakazwiwigila pamakumbo aJesu, akombweta kuti ende kungumba yiye, 42nokuti mwananhukajana uwe umwempela chete, wakabeli namakole igumi linamabili okuzwalwa, wakaba alobofa.
Paakabekwenda, banhu bakabomanikija. 43Unhukaji wakabekunga ilopa elwala kwamakole igumi lina mabili, wakabakona kubalapi, 44wakezha nokushule kukwe, akaguma lupetelo lwechimbalo chiche, pakalepo ilopa lyakava lyama kukunga. 45Jesu wakati, “Ndiyani wandiguma?”
Pabakalamba bose, Pita wakati, “Tezi, seni banhu bamususumana, ndibo bamumumanikija.”
46Koga Jesu wakati, “Kuna unhu wandiguma, nokuti ndaliwha isimba libhuda mwandili.” 47Paakabona kuti wazibikana, unhukaji yoyu wakenda kunaiye eteketa akazwiwigila pamakumbo aJesu, elungulula pakati pabanhu bose kuti wakongumilani akale nokuchila kukwe pakalepo. 48Wakati kwaali, “Mwananhukajana kudimbwa kukwo kwakuchilisa, inda nolunyalalo.”
49Echinolebeleka alo, kwakaswika untumwa eva kungumba yombhati wemishingo musinagogi eti, “Mwananhukajana wapalala, musinyaje.”
50Koga Jesu pakazwiwha yezwi wakonshandula eti, “Usitye, iba nokudimbwa chete unochila.”
51Paakaswika pengumba yeyo, aajakavumija banhu banji kuti bengwine naye kuzhe kwaPita, naJoni, naJemusi, natate namai bomwananhukajana. 52Bose baluba belila, lilidilwe, asi iye wakati, “Musilile aajafa ulele.”
53Bose bakonseka, nokuti bakabeziba kuti wafa. 54Wakombhata luboko unsichana, akoonshoba eti, “Awe mwana, imuka!” 55Umpepo uwe wakabwilila mwaali, akamuka, akamilika pakalepo. Wakabuja banhu kuti bompe kulya. 56Zwakabachenamisa bazwali babe, asi iye wakababuja kuti besibuje kana aani nezwakabatikana.
Iliyochaguliwa sasa
Luka 8: LTP
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
The word for The World International
