Ichedendik 34
34
Daina ọttạra anạng p'Shẹkẹm
1Wa k'okpe gwạnọ, Daina kw'ode ọkwanạng-nwa kw'Lea ọmaanẹ ọnạng Jekọb, uyini k'iyaan ọta udibh ipanạng bạnọ p'ofhon ngwọ. 2Masẹ Shẹkẹm kw'ode nnwa kw'Hamọr, kw'ode ọvaarnạng kw'anạng p'Hiv ose Daina, ọvạkh-ẹ k'ẹfa uyima abẹ. 3Wa Shẹkẹm ọtak ettem chẹ phyibh ọkpạna k'Daina kw'ode uminanwa kw'Jekọb. Wa Daina ọdaakh-ẹ oseng eden, n'okhonga bẹ́, usi-ẹ ocher-ẹ eyok. 4Ma wọ, Shẹkẹm obeni otte kwẹ Hamọr bẹ́, “Aro, ọma tạkha uminanwa nwọ nạng-m amba ayok kadẹ o.”
5Wa ajunungva p'Jekọb atim aning k'owonu, sabẹ ata anạng itirakpo pyẹ uchiattọhk k'okpe kw'Jekọb ọbhaang bẹ́, abẹ kk'nnwa kwẹ Daina ọkpạrsiadik asia. Umyi udik ngwọ tạrr iva mbọ akwuna.
6Wa Hamọr kw'ode otte kw'Shẹkẹm, ubin ofona bẹ́ ẹma ọttạra Jekọb attọhnọ udik ngwọ. 7Masẹ iva p'Jekọb abin kha sabẹ n'akkeri itirakpo akwuna, abẹ abhaanga udik kw'otto sabẹ nạnáde, ifor ipe bẹ, nttem ibạra ipyibh bẹ ukwuru ọkpạrsiadik kw'Shẹkẹm kk'usia k'Israẹl bẹ́, ọvạk uminanwa kw'Jekọb uyima abẹ k'ẹfa, kw'nạnọ́baana mesese.
8Okhenka, Hamọr oben bẹ bẹ́, “Totokhạn, abạnga atte nnwa kwaam Shẹkẹm ọbọhk ọtạkha uminanwa kwabạnga, khiri ettem chẹ phyibh n'ẹkpạn k'akhẹ e. 9Tte amạna ammạkhẹ antạkha ayok k'ọbada, tte ajunung p'amạna atạkha aminava p'abạnga, ọfha abạngama abạra atạkha aminava pamạna. 10Abạnga akkokke aruk mạna abẹ, isisek iyim kha bẹ́ tẹẹrr, ifona, abạnga aruk, abạra asenga mphya s'idaakhẹ bạnga, ọttạra bẹ́, abạnga agba akhaama asisek pabạnga oyeni.”
11Ma wọ, Shẹkẹm obeni otte ọttạra ivotte p'Daina bẹ́, “Atotokhạn e, tte ntạkha ọphyaam k'abạnga k'ititikha, amma kk'ifor ndia bẹ́, nnạng bạnga ọttọhk fidede f'abạnga abeni bẹ́, nnạng k'echo ch'uminanwa kwabạnga. 12Abạnga atekh-m acho-kpokha ọttạra ekpo pyidede py'ẹbaan bẹ́ ntima nkwu, k'oche kw'ọdaakhẹ bạnga. Amma m'nnạng bạnga ọnạng. Abạnga akhenka anạng-m uminanwa nwọ ntạkh-ẹ k'ọbada.”
13Wa iva p'Jekọb aseng ọkpạrsiadik kw'kk'uttia okhebha nnwotte kwabẹ Daina, abọhra Shẹkẹm ọttạra otte kwẹ Hamọr. 14Abẹ aben bẹ́, “Udik demakwẹ ngwọ mánsi. Ode ọkpạrsiadik ọnạng mạna bẹ́, antạkha nwotte kwamạna annạng ọkpatwạr-nạng bẹ́, ọtakh-ẹ k'ọbada. 15Bạrasẹ anchera udik kw'abạnga aphyemi mạna maa, ode bẹ́, abạnga m'achera bẹ́, abạnga ade masẹ amạna. Oyonga ujunung kwidede k'ikhaana sabạnga m'usi ọkpọkkrọkkọ. 16Ma wọ m'antima anchera bẹ́ ajunung pabạnga atạkha ipanạng pamạna, amạna ambạra antạkha ipanạng pabạnga. Ma wọ m'anchera annuk bạnga abẹ, phyi-phyibh bạra ande wạnọ, k'oche kw'abạnga aphyemi. 17Okhenka, de abạnga nạ́náchera bẹ́ abạnga asi ọkpọkkrọkkọ, amạna mánchera bẹ́ abạnga atạkha uminanwa kwamạna k'ọbada, m'antima abẹ utima amfona e.”
18Wa Hamọr, ọttạra nnwa kwẹ Shẹkẹm ase bẹ́ ẹkka ch'iva p'Jekọb ijibh-ujibh. 19Wa Shẹkẹm ode ọnạng kw'efona chẹ phyibh n'ẹnạng ikpukpobha. Ukwuru s'uminanwa kw'Jekọb kk'ẹ ọdaakha kidaam-kidaam, okpe dạk núkhibha, ochera bẹ́ abẹ abẹ asi bẹ ọkpọkkrọkkọ, k'oche kw'iva p'Jekọb abeni. 20Ma wọ Hamọr ọttạra nnwa kwẹ Shẹkẹm abin afona k'ẹbhama ch'ofhon bẹ́ abẹ ata akpaak anạng pabẹ udik ngwọ. 21Abẹ akpaak ajunung p'ofhon ngwọ bẹ́, “Ajunung mbọ bạra ajibh akpen! Tte abẹ aruk maa isisek samạna, abẹ asenga mphya, ọgba isisek ibạrẹ kha ifona s'm'ibenga bẹ. M'ankk-okke antạkha aminava pabẹ, abẹ atạkha pamạna. 22Eden oyeni ch'udik ngwa m'osenga ọvạkha, ọfha abẹ achera anạng mạna ode bẹ́, ajunung pamạna phyibh m'achera bẹ́, abẹ asi ọkpọkkrọkkọ, oche kw'abẹma asi. 23De akker-okkeri, ẹkhaama chabẹ phyibh, ọttạra itirakpo pyabẹ phyibh ede pyamạna. Tte anchera annạng bẹ́, ansi oche ngwọ, ọfha abẹ aruk mạna abẹ.”
24Wa anạng mbọ phyibh p'aning ma ẹbhama acher anạng Hamọr ọttạra nnwa kwẹ Shẹkẹm. Osenga ma, ujunung kwidede kw'ofhon ngwọ oseng ofona k'ẹbhama ch'ofhon bẹ́ abẹ asi-ẹ ọkpọkkrọkkọ.
25Masẹ iwu ittaan kk'isenga sabẹ asi bẹ ọkkpọkkrọkọ s'utim ọkhọhn bẹ ọkhọhn, iva p'Jekọb afa p'ade Simeọn ọttạra Lẹvi, p'ade ivọkka p'Daina, adir akkangkkang-kkro pabẹ k'okpe kw'anạng nạn ichen náchokha, ata afhọ ajunung p'ofhon ngwọ phyibh. 26Abẹ atim akkangkkang-kkro pabẹ afhọ Hamọr ọttạra nnwa kwẹ Shẹkẹm, abẹ abạra anwa k'ọchọhm kw'Shẹkẹm, atạkha Daina atima afona. 27Masẹ iva mbọkha p'Jekọb ase bẹ́ ajunung p'ofhon phyibh n'ayim abubukhu, abẹ anwa k'ofhon ngwọ kw'abẹ ayim nnwotte kwabẹ abẹ k'ẹfa, acha ekpo pyabẹ. 28Abẹ atạkha itirakpo ọttạra mmaam, nnyạnyaang, ọttạra ekpo pyidede ma ofhon ngwọ, atima afona. 29Abẹ atạkha ọttọhk fidede f'abẹ ase ma ofhon ngwọ, tạma k'ẹkhaama chidede, ọttạra ipanạng phyibh, ọttạra iva pabẹ, atima afona.
30Ma o, masẹ Jekọb ukwu osonga udik ngwọ, n'obeni Simeọn ọttạra Lẹvi bẹ́, “Abạnga kk'aam agia k'ọmmaphyaangẹ, abạnga asi-m mbạkhọ aKenaan ọttạra aPẹriz p'arukhu maa isisek nna, idik. Abạnga kk'asia bẹ́, ubhik kwamạna nọ́saabha, ode anạng mba akpạr mbọhk bẹ́, arima abamẹ, abẹ m'adim-m ọttạra ẹchọhmfhạr chaam phyibh.”
31Okhenka, abẹ apọhn-ẹ bẹ́, “Shẹkẹm wọ wạra ọbaan bẹ́, ọtạkha nwotte kwamạna masẹ ọsasa-kwanạng o?”
Iliyochaguliwa sasa
Ichedendik 34: mfn-x-os
Kuonyesha
Shirikisha
Nakili
Je, ungependa vivutio vyako vihifadhiwe kwenye vifaa vyako vyote? Jisajili au ingia
©️2025 West Africa Christian Mission